الفصل208.......
الطفل الشيطان....
---
.
البيت كان ساكت زيادة عن اللزوم.
مش سكون الليل… سكون ما بعده.
الولد صحي قبلهم.
مش لأن حد ناداه بصوت،
لكن لأن فيه إحساس شدّه من النوم، إحساس كان عارفه كويس.
وقف عند باب الأوضة، بص عليهم.
انس نايم على كتف مهند.
، ايده ماسكه ايد مهند بشده..
كإنه خايفه يختفي...
مهند على السرير، نفسُه تقيل، ووشّه باين عليه التعب حتى وهو نايم.
الولد فتح الباب بهدوء وطلع.
برّه، في الممر، كان مستني.
مش واقف في النور…
واقف في حتة نصها ضل.
الولد ما اتفاجئش.
ابتسم..
وقرب خطوتين، وقف، وقال بصوت واطي: — جيت.
الراجل نزل لمستواه، عينه في عين الولد: — كويس… شاطر.
مد إيده حطها على راسه، ضغط بسيط، مش حنية. — عملت اللي اتقال؟
الولد هز راسه: — لسه.
— بس هعمل.
سكت لحظة، وبعدين سأل: — هو هيحصله إيه؟
الراجل ابتسم ابتسامة مالهاش طعم...ورد عليه.
ـــــ ولا حاجة.
— بس لازم مهند يبقي لوحده شوية.
قرب أكتر، صوته بقى أهدى: — لما تصحيهم… هتقول إنك شوفت حاجة في القبو.
— حاجة تخوف.
— وهو… (وسكت لحظة) هو اللي هينزل.
الولد بلع ريقه: — والتاني؟
— التاني؟
الراجل عدّل وقفته: — سيبه ليا.
طلع موبايل من جيبه، ورّاه رسالة: — لو حصل حاجة غير كده…
— لو خفت…
— لو فكرت…
قفل الموبايل: — أنت فاهم.
الولد ما ردش.
بس هز راسه.
قبل ما يمشي، الراجل قال: — ولما الباب يتقفل…
— متبصّش وراك.
الولد لفّ ومشي.
رجع الأوضة، وقف نفس الوقفة، بص عليهم.
المرة دي، حس إن السكون تقيل.
قرب من انس، صوته طلع مهزوز بس محسوب: — انس…
— انس اصحى.
انس فتح عينه بنص وعي: — فيه إيه؟
الولد ابتلع خوفه: — أنا…
— شوفت حاجة في القبو.
الجملة نزلت في المكان غريبة.
مش قوية…
بس مقلقة.
مهند ما اتحركش.
لسه نايم.
انس قعد: — حاجة إيه؟
الولد بص للأرض: — حد…
— ميت.
وسكت.
الهدوء رجع.
بس المرة دي…
كان بيستعد ينكسر.
---