الفصل209.......
الطفل الشيطان.....
---
الهدوء رجع.
بس المرة دي
كان بيشدّ أعصاب المكان واحدة واحدة.
انس ما قامش فورًا.
فضل قاعد على طرف السرير، ضهره محني شوية، عينه ثابتة على الولد.
— شُفت إيه؟
الولد رفع عينه بصعوبة.
كان واضح إنه بيختار كلماته…
مش علشان مش فاهم،
علشان فاهم زيادة.
— في القبو…
— تحت.
انس سكت.
— إنت نزلت لوحدك؟
الولد هز راسه: — آه.
— ليه؟!
الولد شدّ في طرف هدومه: — سمعت صوت.
الصوت د تحديدًا
خلّت انس يلف يبص ناحية مهند بخوف.
مهند كان نايم.
نفسه مش منتظم قوي،
بس موجود.
صدره بيطلع وينزل ببطء.
انس قرّب شوية، بص في وشّه.
اتطمن شويه…
أو حاول.
رجع للولد: — الصوت كان عامل إزاي؟
الولد بلع ريقه: — زي…
— حاجة وقعت.
— إزاي؟
— تقيلة.
انس حسّ بشيء شدّ معدته.
مش خوف مباشر…
إحساس أقدم من كده.
— وبعدين؟
الولد رفع عينه: — شُفت حد.
الجملة نزلت تقيلة.
تقيلة كفاية تخلي إنس ما يسألش فورًا.
— حد مين؟
— راجل.
انس تنفّس ببطء: — تعرفه؟
الولد هز راسه: — لا.
— كان بيعمل إيه؟
الولد سكت.
السكوت المرة دي ما كانش تردّد.
كان حساب.
— كان واقع.
انس حسّ إن الكلمة علّقت في ودنه.
— واقع إزاي؟
الولد بص في الفراغ: — على الأرض.
— بيتحرّك؟
— لا.
انس سكت.
وبص تاني لمهند.
مهند اتحرّك حركة بسيطة،
: — انس…
الصوت كان ضعيف.
بس كفاية.
انس قرب فورًا، حط إيده على كتفه: — أنا هنا.
مهند فتح عينه نص فتحة: — في إيه؟
انس بص للولد، وبعدين رجع لمهند: — مفيش…
— نام.
مهند حاول يقعد: — أنا سمعت…
انس ضغط بإيده: — مفيش حاجة.
الولد وقف مكانه.
ما اتحركش.
ما قربش.
مهند بص له: — في ايه؟
الولد رد قبل انس: — في حد في القبو.
مهند بص له ثانيتين،
وبعدين رجع عينه لأنس: — وإنت نازل؟!!
السؤال جه هادي…
بس سابق للحظة.
انس ما ردش فورًا.
بص للأرض،
وبعدين للباب.
— القبو فين؟
الولد لفّ، ومشي خطوتين: — من هنا.
انس قام على مهله.
ركبه رعشت شوية،
حاول يثبت نفسه.
لفّ على مهند: — خليك.
مهند مسك دراعه: — استنى.
انس بص له: — دقيقة وهرجع.
— خدني معاك.
انس قرب، صوته واطي: — لا.
— ليه؟
— عشان إنت تعبان.
الجملة خرجت من غير تفكير.
زي ما الولد قالها قبل كده.
مهند سكت.
ساب دراعه.
انس لفّ للولد: — وريني.
مشيو ببطء.
كل خطوة كانت محسوبة.
السلم كان ضيق.
الضلمة مش كاملة،
بس كفاية تخلي الحيطان تقرب.
الولد نزل الأول.
انس وراه.
— كنت نازل هنا لوحدك؟
الولد: — أيوه.
— مخفتش؟
— شوية.
وصلوا قدام الباب.
باب خشب تقيل،
عليه قفل قديم اوي.
الولد وقف.
مدّ إيده: — هنا.
انس قرّب،
حط إيده على الباب.
حسّ ببرود الخشب.
— إنت متأكد؟
الولد هز راسه: — شُفت بعيني.
انس قرب.
فتح الباب شوية.
ريحة المكان ضربته.
مش دم.
مش عفن.
ريحة قديمة…
مقفولة.
دخل خطوه.
الولد فضل واقف علي الباب.
انس لفّ يبص في المكان.
أدوات مرمية.
سلاسل مصدية.
بقع غامقة على الأرض.
— فين؟
الولد قرب الباب.
إيده مسكت في المقبض.
— خليك هنا.
انس لفّ بسرعة.
في اللحظة دي
الباب اتقفل.
مش خبطة.
قفلة هادية…
محسوبة.
انس اندفع، شدّ الباب: — افتح!
مافيش رد.
ضرب الباب: — افتح الباب!
من برّه،
كان في صمت.
انس فهم.
مش فجأة…
ببطء مؤلم.
— إنت عملت إيه؟!
مافيش صوت.
انس سند راسه على الباب.
نفسه اتقطع.
— مهند…
وفي فوق…
كان الهدوء
لسه
ما اتكسرش.
---