الفصل210......
الطفل الشيطان......
---
انس فضل يدور في المكان...
اي حاجه يقدر يفتح بيها الباب..
المكان كله ادوات غريبه...
مسك حديده لقاها علي الارض..
غرسها في جنب الباب...
وحاول يفتح بيها..
هياخد وقت...
بس مش مهم..
اهم حاجه يفتح الباب....
فوق…
البيت كان ساكت
سكات مش طبيعي.
مهند كان نايم على ضهره،
إيده مفروشة جمبه،
نفسه بيطلع وينزل
بس على مهل
كأنه خايف يزعج حاجة.
فتح عينه فجأة.
مش مفزوع.
ولا متلخبط.
حاسس.
قعد شوية يبص في السقف.
عدّ أنفاسه.
واحد…
اتنين…
— انس؟
قالها واطي.
صوته خرج مبحوح.
مافيش رد.
حاول يقعد.
جسمه ما أطاعوش من أول مرة.
سند بإيده على السرير
وقعد نص قعدة.
— انس؟
أعلى شوية.
الصوت الوحيد اللي رد
كان خبط خفيف
جاي من تحت.
مهند حاول يقف.
رجله خانته.
وقع علي ركبته..
حاول يقوم تاني..
جسمه كله بترعش..
مسك طرف السرير..
وقام تاني..
حرك رجله بصعوبه..
وقف عند باب الأوضة.
فتح.
البيت فاضي.
مش فاضي بمعنى مفيش حد.
فاضي بمعنى
إن في حاجة ناقصة.
مهند بلع ريقه.
بص ناحية السلم.
السلم بينزل لتحت..
ضلمه..
نزل خطوة.
وبعدين خطوة.
— انس؟
ولا رد.
وصل قدام باب القبو.
مقفول!.
طب ازاي؟!
اومال راحو فين؟!
قبل ما يكمل----
سمع صوت.
مش خبطات خفيفه.
حد جوا
بيحاول يفتح الباب.
قلبه وقع في رجله.
قرب خطوة: — انس؟
مهند مدّ إيده
ولمس القفل.
ـــ انس؟!
صوت انس طلع مكسور: — مهند…
— افتح الباب بسرعه.
مينفعش تكون لوحدك برا.
الجملة دخلت فيه
زي سكينة.
— انت جوا لوحدك؟!
— آه
— اومال الولد راح فين!؟... وليه اصلا الباب مقفول عليك؟
ثانية صمت.
— مهو قفل عليا....ومشي!
مهند حاول يفتح الباب: — الولد؟؟؟!
— ايوا....
الجملة نزلت تقيلة
بس ما كانتش مفاجأة.
مهند غمض عينه: — هو فين؟
— فوق.
— لوحده؟
— أيوه.
انس كمل بصوت واطي: — اسمعني…
— متقربش منه.
مهند فتح عينه.
نفسه بقى تقيل.
— إنت كويس؟
— مش مهم..ركز بس
لو معرفتش افتح الباب واجيلك
استخبي في اي مكان..
مهند بص حوالينه.
دور على حاجة
أي حاجة.
المفتاح مش موجود.
— استنى.
قالها وهو طالع للولد.
مش عارف هيعمل إيه
بس لازم يتحرك.
وهو بيطلع
سمع صوت خفيف.
مش حركة عشوائية.
خطوة.
لفّ.
الولد واقف في آخر الممر.
ضهره للحيطة.
إيده في جيبه.
واقف
زي اللي مستني حد.
مهند وقف مكانه.
مش خوف…
حذر.
— إنت عملت إيه؟
الولد ما ردش فورًا.
عينه مش في عين مهند.
في الأرض.
— قالي أعمل كده.
— مين؟
الولد رفع عينه أخيرًا: — هو.
الكلمة ما احتاجتش شرح.
مهند قرب خطوة: — هو فين؟
الولد بلع ريقه: — برا.
— هييجي؟
الولد هز راسه
هزّة صغيرة.
— إمتى؟
— دلوقتي.
مهند حسّ الدنيا بتميل تحت رجله..
— طب…
— ليه؟
الولد شدّ التيشيرت: — لازم اسمع كلامه.
الجملة بسيطة.
بس قاسية كفاية.
مهند سكت.
بص للولد طويل.
— إنت قافل عليه صح؟
الولد هز راسه تاني.
— يعني معاك المفتاح صح؟
— أيوه.
— طب افتح.
الولد ما اتحركش.
— مقدرش.
— ليه؟
— قاللي لأ.
مهند قرب أكتر.
صوته هادي: — وأنا بقولك افتح.
الولد بص له
نظرة فيها حاجة مكسورة.
— هو قال
إن ده اختبار.
مهند حسّ بقشعريرة.
— اختبار إيه؟
الولد همس: — ليك.
قبل ما مهند يرد
الباب الخارجي
اتفتح.
مش بعنف.
فتح هادي.
خطوة دخلت.
وبعدين خطوة.
الصوت اللي دخل مع الخطوات
كان تقيل
حتى وهو واطي.
— وحشتني يا مهند.
جسم مهند اتشدّ.
كأنه اتسمّر.
الصوت ما اتغيرش.
ولا نبرة
ولا طريقة.
الأب وقف في نص الصالة.
بص حواليه.
— بيت حلو.
— اختيار موفق.
مهند حاول يتكلم.
لسانه تقيل.
— إنت…
— إزاي عرفت؟
ضحكة خفيفة: — أنا بعرف دايمًا.
عينه وقعت على الولد.
مدّ إيده
وطبطب على راسه.
— شاطر.
الولد ما اتحركش.
الأب كمل مع الولد: — فين أنس؟
— زي ما قولتلي.
الولد رد عليه وهو نظره في الارض.
الأب ابتسم: — حلو.
مهند شدّ نفسه: — طلعه.
الأب وقف قدامه: — اطلعه؟!
— هو دخل لوحده.
— لأ.
وبص للولد بغضب....
ابتسامة الأب وسعت: — يبقى غلطته.
وكمل بضحك...
ـــ غلطته انه يسمع كلام طفل
مهند حاول يقف مستقيم.
وجسمه خانه.
وقع علي ركبته..
الأب بصله.
ضحك.
— لسه؟
— فاكر نفسك اتغيرت؟
مدّ إيده
ومسكه من لياقته.
— لما تكلم أبوك
تبقى واقف.
رفع صوته فجأة
والحركة جات أسرع من تفكير مهند.
جسمه اتشال
واترمى في الحيطة.
الصوت دوّى.
مهند وقع.
نفسه اتقطع.
تحت…
انس كان بيحاول يفتح الباب بالحديده اللي معاه
سمع الخبطة.
خبط بجنون: — مهند!
فوق…
الأب بص لتحت
كأنه سامع الصوت.
— سمعته؟
رجع بصره لمهند: — لسه بيجري وراك؟!
ــ غبي..
بسبب جريه وراك..
حياته هتبقي جحيم...
مهند حاول يقوم.
رجله ما شالتهوش.
الأب صفق ببطء: — إيوا كده…
— وريني.
---