هاي شلونكم اتمنى تدعمون القصه وتشوفونا حبكم الها القصه واقعيه 100%
مممكن تصويت قبل لااتابعو💖
تبدأ القصة في تاريخ23/4/2023..
ــــــــــــــــــــــــــــــــــــــــــــــــــــــــــــــــــــــــــــــــــ
خلوه بالسديه وجهاز تنفس حالتهه تعبانه لدرجه ماتكدر تحجي وياي نظراتهه الحنينه چنهه وطن تودعني بكل اريحيه تگلي وليدي اني مفارگه الحياه
مصطفى بجي. لخاطري ابقي مالي غيرج من عمري على عمرج ابقي وياي صبري راح ينقذوج
اخر حجي سمعته
-وليدي عيش حياتك لاتنتظرني راضيه عنك
بهل لحظه وكعت وضميت راسي حسيت بشعور من أفقد اعز ناس الي خسرت ضوة بالبيت شمعه البيت الضحكتها چنهه العافيه ابتسامتها تفرح الجاهل شلون راح اكدر شلون ماانتظرها شلون اكمل حياتي بدونها توقعت كلشي اخسر مايهمني بس جده جانت من اكبر خساراتي بقيت انتظره
ساعات اني انتظر الدكاتره يطلعون ويخلون الامل بينه يختفي يحطمون النفسيه ولايحسون بالناس الكبالهم محد يحبها بگدي والكل شهود عشت كل حياتي وياهم ضگت طعم المر ومر عليه
الي يكول الام مايجي غيرها ماكو شخص تكدر تحبه اكثر منهه اني بوجود جدتي نسيت الاهل هيا الربتني تعبت عليه ضحت بحياته لجلي هيا جانت فرحتي السبب الي يخليني ارد لبيتي مرتاح ولو الدنيا تعبتني ضاكت بيه
سعادتي راحت سبب الي يخليني اضحك للحياه فقدته احساسي يظل بمكانه راح افقدها بس جان الي امل
الماعنده سند اله وين يعيش
وين ينطي وجهته
المن يروح يشكيله همه
الماعنده شخص يوكف وياه
شلون يكدر يكمل حياته
المحتاج حنيه ام وسند اب شلون يعوضهم
اشوكت اتذكر ناس ماعدها اب ام اتذكر نفسي
بس حياتي مختلفه انه هم عندي اهل خلفوني وذبوني يم عمي اتربى عمري ماضگت حضن الام ردت احس يوم من اوگع واتأذى امي تجي تشبكني وتكلي جرح بسيط ويطيب ردت امي تجي تكلي شماكل اليوم شتغديت شلون جان يومك شوفني نتيجتك
كل سنه جنت اشد حيلي وادرس واتفوق اطلع من الاوائل عالمدرسه على مود انتظرهه جانت امنيتي تجي تشوف نتيجتي وتباركلي كل سنه اني منتظرها تفتخر بيه
امي؟ الي عمرها مااجت وياي للمدرسه من اول يوم الي
فد يوم جتي سألتني شنو حلمك؟ شنو تريد تصير
عمرهه مانصحتني هذا الشي غلط لو صح
خلفتني وذبتني وحدي
ابويه الي جان اسمه اب ماوكف وياي وگلي سوي هاي الشغله وهاي وهاي
مااجى سأل عليه بدراستي ولاشاف شنو مستواي
اول ابتدائي مثل الغريب ماشايف ناس ولامگابلهم بين يوم وليله عمي سجلني وصلوني للمدرسه ومن اول يوم كلي انت ترجع طفل عمره6سنوات واول مره جاي للمدرسه وين يعرف طريقه؟
ابويه جان كل يوم بالشغل كاضيها سفر ومايرد للبيت حتى من اشوفه حاله حال لبقيه
كلهم نفس الشي
اني الحفيد الجبير
من دخلت الابتدائية عمي صار يعلمني بالصناعه
كل يوم رايح وياه دراستي بليل اكضيها ادرس للامتحان
انضرب انكتل من عمي ماعليهم
محد يوكف وياي غير السند(جدتي) جانت مصبرتني
كبرت اني ماعندي خصوصيا ماعندي غرفه ملابسي اخليهن بالجنطه انام بمكان جوه الدرج غرفه صغيره وظلمه كاضيها ادرس عالشمعه
-عمي شوكت تخلي ضوه للغرفه
انمار. من تكبر وتصير زلمه انته تخليها
هذا حالي بالصيف انصمط صمط بالحر بالكوه يلا مدبر بنكه طگه ونص تعطل خرابه كثرت انام بغرفه جدتي
عايش فقير بين اهل اغنياء
بحياتي ماشايف اب منطيني مصروف مدرسه
-مشكلتي مو مشكلته روح دبره لنفسك لتظل جاهل اكبر شويه وراك عائله
كبرت العائله والخلفه كثرت
ولد عمي كلهم عاشو الحياه الي تمنيتها بين اهلهم مصاريفهم عالاهل كله مدلليهم وافخم غرف عدهم
جانو يشوفون حالتي التعبانه يخافون شكلي وجهي التعبان ملابسي الارجع بيها من شغلي الوسخه حقهم يتنگسون
اني ماغار منهم بالعكس ذوله اخوتي الصغار ومو الصوج بأهلهم الصوج بأهلي بس هم ماحاقد عليهم وماخذ رضاتهم
مدرستي جانت خرابه عباره عن ولد فاسدين كلشي تشوف بيهم شعرفهم جنت جاهل يوميا انكتل من جماعه مراهقه لو اروح للمدرسه بقميص مزرف واسمع الحجي والتنمر اضحك مو مهتم لان حقهم عدهم اهل يربوهم
منو جان يتعب عليه غيرها منو الجانت تسويلي لگمه وتضمهه بين ماالكل ناسيني
جنت اخلص شغلي واجي لحضنها ابقى ليل كله يمها تلعب بشعري
تگلي اصبر ياوليدي راح تكبر وتصير رجال ويجي يوم تصير كلمتك تمشي بالبيت كله
طفولتي جانت دوام شغل بالصناعه وروح للمعرض مال عمي وارد لبيت كبل للمضيف اخدم بيه الى ان جدي توفى
كبرت
وهيج كدرت اجمع مصاريف البيت
بديت اكبر واتعلم واعتمد على نفسي وماخلي احد يجاوز عليه بفتره مراهقتي تعرفت على اثنين حسام وزيد هذوله صارو الايد اليمنه بالضبط مااطلع الا وياهم جنه نشتغل سوه لحد ماكبرنه وتكبر الهموم ويانه
ملابسي ضاكت علي بدت تطلعلي شوارب بسرعه صارن ثخينات عكس أصدقائي بلغت كبلهم اشكد سوو شغلات علمود يطلعلهم شارب ماكدروا
هاي الفتره صوت ماشوف اي احد اظل بره البيت اطلع ويا اصدقائي نروح للكورنيش نكعد بيه نذب لبگلبنه يصير الوكت متأخر نرجع
زيد. صفاء ماناوي تطلع من البيت
مصطفى. لاء البيت راح يتسجل بأسمي
حسام. هووب كافي ادخن صارن ثمانيه تريد تكتل نفسك
مصطفى بسخريه. لك بابا شبيك خايف على روحك انه الرح اموت لو انت ادخن؟
زيد. لا يمعودين كافي شبعنا تدخين
حسام. عمي حقك ادخن اذا انت حتى شوارب طالعتلك الكل يخاف منك الجلب يخاف يطب لشارعكم تطبكنه مرتين
مصطفى. هاي الضاغطتك شواربي؟
حسام. بااع وعلي مفتخر بيهن اكثر من خوتنه
زيد. غير انت بلا حظ
حسام. جا وانت شبيك؟
زيد. انه هم احسن منك شواربي خطت
مصطفى. بسكم هو مو كلمن تلبس شوارب صارو زلم
حسام. عفيه والله صح حتى لبنيه عدها شارب
زيد. هههههه خرب بعرضك
طبيت للبيت بال12
الجده: ولك وليدي ليش تسوي هيج بروحك ارجع للبيت ريح نفسك مو هلكت
اجيت بست راسها وحضنته
مصطفى. بيبي وداعتج صرت رجال مو جاهل تخافين عليه
ضربت جتفي بشقى
الجده. منو يخاف عليك غير انت الرجال المنطقه كلها تحمد بيك تكول حارس المنطقه من يوم جيته المنطقه آمان
مصطفى. منهو كلج هالحجي
الجده. هييه يوليدي شبسرعه كبرت جنت تفتر جوه رجليه تريد العب وياك شو هسا طولك مايفوت بيه الباب كبرت وليدي عيون البارده عليك
مصطفى. الله يحفظج الي بسببج انه وصلت لهنا
الجده. هذا صبرك ولدي تعال تعشى جنك مماكل شي اليوم
مصطفى. ماشتهي بيبي اريد انام
الجده. ولك شلون متاكل يلا تعال اكعد لاتخليني ازعل عليك مسىويتلك عشى
بست ايدها
مصطفى. كلشي ولازعلج عليه
كعدت هستوني داكل لخاطرها جتي مرت عمي
-لاعمه هاي مو مرجيه منج شلون تسوين هيج
الجده. شسويت بنتي احجي
-ترا دللتيه الولد هواي مملاحظه هيج هالشي وتحنا ولدنا شبيهم يحبوج ويركضون وراج
الجده. يايايمه شهل حجي احفادي كلهم احبكم
-لاعمه هذا متربي بالشوارع فسدتيه فوك ماهيج مدللته
دفرت الميز برجلي وكمت على حيلي متعصب صحت
مصطفى بعصبيه. كافي شهل تدخل اي صح اني متربي بالشوارع ليش شبيها الشوارع ماعجبتج علمتني هواي اشياء ولدج هم معتمدين على نفسهم مثلي يشتغلون من الصبح لليل الشيخ يضربهم؟ ليش علمود زقتبوت صارت اتفرق؟ وخري من البااب
الجده بقهر. ولك ابني تعال يبووو على كيفك لايرتفع السكري عندك سوده عليه امسحهه بوجهي
مصطفى بعصبيه. جده مابيه شي اريد ابقى وحدي هذا البيت التردين ابقى بيه مووو
احمد. صفاء شبيك مفاول
مصطفى بعصبيه. لحد يدخل بيه بعد
توضيت وصفكت باب الغرفه كعدت اصلي واندعي ربي يجازيني ويصبرني من اصلي احس بارتياح مو طبيعي تعلمت مابجي وماشكي حزني لحد اجيب السجاده واكعد اصلي للصبح الماعنده ام عنده الله يشكيله
خلصت شغلت قرآن بصوت مشاري غفيت شويه واندك الباب سمعت صوت طفل فتحته
-اني مريم
مصطفى. ياهلا بمريوم بعدج كاعده شلون جانت يومج؟
مريم بحزن. انت جنت تتعارك مو اهئ سمعت عمه جانت تتجاوز عليك انت زعلان
مصطفى بضحكه. تعالي يابعد اخوج منو كلج زعلان بالعكس فرحان بجيتج
مريم. ادري انت احسن اخ بالدنيا بس همه ليش مايحبوك
مصطفى. اخخ بويه مادامني احس اخ الكم ماريد الناس تحبني
مريم. لااني احبك
خليته بحضني شبكتني مريم صف ثاني ابتدائي تفتهم بس بعده صغيره وصار عندي اخ الشي الوحيد الي مفرحني بالدنيا اريده يصيرلي سند سميته عبد الرحمان
لان ماكو عبد يرحم بهل دنيا
دك الباب مره ثانيه
مصطفى. منهو
-اني احمد عادي ادخل
مصطفى بتفكير. ادخل
مريم اخذي لعابتج ورجعي الغرفتج شويه واجيج اقرالج قصه
مريم بفرحه. ياااي
طلعت وراها حجى احمد
احمد. مصطفى اني والله ادري مالي وجه والله كلش اسف عالسوته امي ادري تغار منك
مصطفى. مو مشكله انت ممجبور تعتذر وامك ماراح تخرب علاقتنا لتخاف
احمد. صفاء اني دائما واكف وياك لان تدري انت السند بالنسبه اليه ساعدتني بهواي شغلات اتمنى اردلك معروفك ولو بشي صغير
مصطفى. ماريد شي بهل دنيا الله موجود ولاتكول هذا الحجي انت خويه وبشنو تحتاج اوكف وياك
احمد. ههه اجاك ابو خزره
ليث بخزره. هاي شنو تحجون بدوني
مصطفى. لك تعال انت يوميا اذا ماتنكتل ماترجع ليث الصغير
ليث. لابروح اهلك خليني اني مفكر اعتزل عن البشريه
مصطفى. شبيهم البشر ولك اذا تعتزل وين تروح للحيوانات
احمد. هههههه وداعت حجيت وياه
ليث بخزره. تعلمني؟ المهم اريد اصير صفاء
مصطفى. شنو كلت
ليث. انت شنو تريد تصير اني راح اصير مثلك
مصطفى. ديلااا ولي معوزني مراهق بعدك هلكدك تكبر وتتندم
ليث. ولاالحسين اصير مثلك بس اكبر
مصطفى رفع حاجبه. تكدر تنام بلا فراش بالگاع ثلاث اشهر وتلبس ملابسك الوسخه نفسها بشغلك الثاني
ليث. لا
مصطفى. خايب دنجب وروح تغطى يلا اثنينكم طلعو اريد انام
تمددت بفراشي هستوني راح انام انفتح الباب
مريم. نسيتني كتلي راح تحجيلي قصه
مصطفى. نعل ابوج لابو القصه تعالي
جت تمددت يمي وحجيتله قصه جانت تحجيلي ياهه بيبي لحد مانامت وديته لغرفته ورجعت نمت
وهيج استمرت حياتي يوميا اتعارك بالشغل وياك عمي وارجع اتعارك ويا مرت عمي التدخل ومنهن عمتي الحيه الحجيها ادخله بطني سم يلا ترتاح وتدعي عليه وعايفه بناتها بلا تربيه
العائله بدت تكبر اكثر وياها تزيد المشاكل
جنت اشوف امي كل يوم بس ماعنده
مشاعر اليه اباوع عليها من بعيد ماعدها مشاعر ام لولدها هيج ربتني موجود مموجود بس هيا غشيمه ويا الكل وگاضيه عمرها بالشغل عكس نسوان عمي متصدرين وكاعدات محد يفاتحهم بالحجي وحتى اذا زلمتهن لزموهن وانكتلو ورجعو هيج ماعدهن عداوه ويا امي بس يحبون تخدمهم
بسببهن اكره اي مشكله تصير بالبيت
انمار بعصبيه. مصطفىىى تعالل
مصطفى. صار عمي
بثانيه ركع استكانه بوجهي
انمار بعصبيه. ولك جاهل انت؟ شعلمتك ليش تتجاوز متعارك وياهم بالشغللل
مصطفى. عمي اني اولا مو جاهل وتعاركت وياهن همه وصلوني هيج مرحله
انمار بعصبيه. لك انت عار عالكل تدري لو لاء كاتل ثلاث ولد وين اروح بيهم شوهتم واحد منهم رجله انكسرت شلون احلها تريد طلاباات
مصطفى بعصبيه. هينه عمي مقبوله منك كسرت رجله لان جنت احمي نفسي منه
انمار. انجب تحمي نفسك تكسره لرجاال والله لو ماعرف متجاوز جان خليتك تشتغل جوه رجولهم
صير زلمه سبع كلها تخاف منك مو تأذيهم فهمت
مصطفى. ان شاء الله
انمار. وهاي الشغله بطلتك منه لكيتلك غير مكان تتشغل بيه مو ترجع وياهم تتعارك بس كبلها انت وبقيه الولد واصدقائك ترحون لكربلاء تخدمون تطبخون انتو وتشتغلون ويا البقيه توزعون للناس
مصطفى. امرك اكو شي ثاني معلم
انمار. روح اريدك تصير زلمه خشن بعد
بلغت الولد وحضرت جنطتي ودعت جدتي واختي الصغيره وطلعنه لكربلاء وصلنه الفجر المرقد جان بي كم شخص مو هواي رحت توضيت وكمت صليت خلصت صلاتي صارت ازدحام جيت شفتهم نايمين تمددت غفيت ورى ساعتين وكعدنا طبخنا وجهزنا كلشي يوم كامل مرينه احنا واكفين بدون استراحه لحد الليل ناكل صار الوكت متاخر توضيت دخلت المكان جان بيه كم شخص كدرت اوصل لمرقد الامام الحسين (ع) وكفت يم الضريح حسيت روحي بالخشوع شي دخل بگلبي خلاني انعي واحجي والملم جروحي حسيت احد واكف وياي وجاي يواسيني وگته عرفت قيمتهم آل البيت من نذكرهم مو بس بالاسم ومكانهم الاعز ب گلوبنا زيارتهم ومكانهم الطاهر بالتقوى والايمان جبل وانزاح عن گلبي وعدت نفسي اتغير من هاليوم وعدت نفسي شوكت اتفرغ اجي ازور كل فتره
-مولاي جيتك بطلب لاتردني مولاي اني مكطوع من شجره واشتغل على كد حالي والحمدلله انه عندك مظلوم ابشرني بالخير لعل صبري بيه استفاده بلكت حياتي تتغير ويصيبني الخير
بقينه ثلاث ايام ورجعنه عمي لگالي شغل
اشهر تحملتهم جان شغلي زين والمدير كلش معتمد علي وعاجبه شغلي لحد ما واحد من العمال وياي
بدون سبب تجمعو عليه ولزم الحديده ضربها بظهري حسيت ظهري تشگگ بهل لحظه اني عفت كلشي تحملت حجيهم وتصرفهم همه منو جبناء مسحت عرگي تقدمت يمه ضربته جمه كسرت اسنانه الثاني راد يهجم لويت ايده ومطلته بالگاع تكسر الثالث خاف وانهزم بلغ المدير
صارت عرگه كلت هيا راح انطرد واعوف الشغل خل اكملها متحملهم هواي
لزمت ثلاثتهم كسرتهم تعاركت وياهم المدير ماكدرلي خابر عمي وصارت مشكله انحلت نقصهم من راتبهم واني طلعت من الشغله رحت للمستشفى سويت عمليه لظهري خياط وراها كمت اروح للمعرض بس وهواي ناس تعرفني اتجيبلي اغراضهم اصلحها مرات يوصوني جيرانه انقلهم قنينه الغاز علمود لايطلعن البنات سيطرت عالمنطقه ايد رجل متطلع ذوله كلهم عشيرتنا واهلنا
المشاكل بالبيت بدت تزيد لحد ماعمي اقترح عليهم يعزلهم بيوت وحدهم بصفنا حتى اهلي صارو بعاد بس اني اخترت جدتي اروح لبيت اهلي على مود اخوتي بس اشوفهم اعرف مستواهم ادرسهم
كبرت والهم كبر بيه بعد اكثر
جان يوم عادي يمر مثل كل يوم لحد ماتصير اول مره اهلي يريدون يحاجوني بموضوع
ابو مصطفى. تعال ابني ماشاء الله عليك كبران كبل كم يوم جنت بعدك جاهل
مصطفى. كبرنا يابه الوكت ديمر بس انت ماتحس بيه
ام مصطفى. ههههه المهم احنا ردنا نحاجيك بشغله
مصطفى. شنهي
ابو مصطفى. مثل متعرف امك مصلاويه ومن حقها الها سنين ماشايفه اهلها
وكفت على حيلي وحجيت
مصطفى. هسا حسيتو صدك هسا حسيتي عندج اهل انتي يمكن تلث مرات رايحه بس الهم
ام مصطفى بدموع. مو بكيفي ابني ابوك جان مديون جنت صابره كل هالسنين الحمدلله لحد ماوفه ديونه شلون اروح بعدين كلي اذا انت جنت صغير منو يوديني
مصطفى. براحتج روحي بس شتردون مني بالضبط؟
ام مصطفى. تجي ويانه جدتك كتلت روحه تريد تشوفك
مصطفى. وصليله سلامي كليله عنده شغل
ام مصطفى. ولك ياشغل ليش مو عطله
مصطفى. ادري بس ماعوف شغلي
ام مصطفى. ليش انتي شتشتغل؟
مصطفى. ههههه على باب الله هسا تردين تعرفين؟ اذا جنتو تصيحوني على مود تقنعوني اجي وياكم
فا شيلو الفكره من راسكم
ام مصطفى بصدمه. شنووو
ايو مصطفى. اسمع ولك مو صاير رجاال براسي انت تصرف اني ابوك واني اتصرف
مصطفى. ابويه؟ انت ربيتني؟ بحياتي گتلك بابا عليش منو انتو
ام مصطفى بقهر. اني امك ليش تحجي هيج وياي طول عمري اخدمكم واخاف عليكم بس انت ردتك تصير رجال ماكدرت اشيلك لان جنت ملتهيه بالشغل
مصطفى. اعتقد نفس الشي كل الامهات وماختلف عن ولدج البقيه
ابو مصطفى بعصبيه. تروح يعني تروح وياها غصبن عنك وهسا احاجي عمك
الجده. وليدي ولكم عوفوه مافي عذبتوه للولد ليش هيج دبااعو للوجه فدوه الكلبك وليدي شيبت راسي من قهري عليك شوفو شلون تعبان
شبكته وبست راسه
مصطفى بابتسامه. شلونج جده انتي متجوزين من هذا الحجي
الجده. يوليدي تعاال تعال ادخل لغرفتي احجيلي شبيك
مصطفى بعصبيه. الاسمه امي جتني للمصلحه تكلي اروح وياعا للموصل
الجده. اشش اهدئ ولك روح جدتك ليش ماتعتبره شي حلو بحياتك تروح لمدينه جديده وتروح
مصطفى بعصبيه. مادري يمه مادري بس ماروح..
الجده. ليش ماتروح؟ منو يكول ماتشوف شي حلو بعينك
مصطفى بابتسامة. افهم قصدج بس اني مو من هالسوالف
الجده بضحكه. ولك اي يمه انت تكول هيج بس من تشوفها كبال عينك راح تتغير حياتك من تعشگ راح تضوك المراره كبل العنب
مصطفى عقد حاجبه. شقصدج يمه غير اني كل عالمراره العايشها بحياتي تردين ابتلي
الجده بضحكه. ولك لاء الحب غير راح تجربه بنفسك وهناك تروح بناتهن حلوات ويستحون ومثقفات اكثرهم روح وليدي اتعرف على اهلك ذوله ناسك هم
مصطفى. صح كلامج بس ماكدر اعوفج انتي مريضه منو يعتني بيج
الجده. ماراح اطولون شكم يوم لاتخاف عليه لخاطري روح
حضنته وفكرت
الجده. ها شكلت
مصطفى. لخاطرج راح اروح مو على مودهم
الجده. ميخالف حاول تسامحهم وتبقى وياهم هذوله همات اهلك والدنيا متسوى واهم شي رضاتهم
مصطفى بحسره. ان شاء الله
طلعت حجيت وياهم بكل برود راح اروح اخوتي الصغار فرحو من كتلهم صعدت لغرفتي طلعت كاسيتات قصائد حسينيه كمت اسمعهم واحد ورى الثاني مريت ساعات اسمعهم واصلح الاغراض العاطله.........
للحكايه بقايه💞......
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/417/احفاد-آل-حارث
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━