Part 1
======
#الاطلس "دمليج أسود"
بقلمي: زهراء السلامي 💛
لتنسون التصويت + التعليق بين الفقرات + متابعة لحسابي 🌼.
• ━━━━━━❪♣❫━━━━━━ •
-ويااااي وياااي
-اييييييي
-يلة واحححد ثنييييين ثلااااااثة...
اييي ايييي ايييي اييييي حييييل يلله وياااااااااااي اريد اسمع صوتكممممممم
سهر، غناء، اصوات عالية، دي جي يثقب طبلة الاذن، اضوية البلورة الملونة المعلقة في السقف تنير بضوضاء وتزيد الاجواء اثارة.. اجساد تتمايل بـ مرونة، عيون تتفحص بـ لذة، فحيح انثى تهمس في اذنه باللهجة المغربية..
-لا باس عليك؟
قَلّب عيونه بغرور وضحك بصوت عالي مع شعلة السگارة التي في يمينه، سحب منها نفس وزفره بهدوء مع تركيز سمعه لأصوات الموسيقى الصاخبة..
رمقهه بنظرة مستفزة وتركهه واگفه تنتظر وتقدم بهدوء للبار وهو يضحك على لهفتهه كانت تلهث مثل الكلب بالضبط، استقر على كرسي عالي واشر للگرسون..
-cocktail
-alcohol sir?
-no..
شتت تركيزه بالكرسون هجمه مرتدة اجت على ظهره بقوة..
-اخيراً لگيتك وينك ولك عمر منتظرنه وحاجزلنه طاوله
اردف المتحدث المهاجم بفحيح رديء مصحوب بأبتسامة مشاكسة خبيثة..
-جايب وياه حلويات راح يعجبوك
رمش بعيونه وقهقه بصوت واضح وتمشو ويه بعض للطاولة المحجوزة بأسمهم "كالعادة" بدت السهرة وبده الهذيان والضحك والوناسة بنظرهم اكيد..
-شباب.. شباب!!
-عمر: ها شبيك ولك
-ابوي يتصل خرب عرضك عمر خرب شرفك خرب روحك انعل...
-عمر: بدال هاي اللغوة كوم بساع جاوبه بره لا يسمع صوت الدي جي
نهض من مكانه سريع يهرول بره حتى يلحگ على الاتصال لكن قاطع طريقه دخولهه لهذا المكان الوصخ..
-وينك!!
-شجابچ هنا
-ليش مترد على اتصالاتي اشتاقيتلك بزاف (هوايه)
-مو وكتهه ابوي يتصل
عبرهه مستعجل وجرت معصم ايده بقسوة، نظرلهه متفاجئ وبلحظة غضب گزت على اسنانهه وكالت..
-ليش تلعب بأعصابي!!!
ركز نظراته على عيونهه التجدح وتأملهم بهدوء، تنهدت بحزن وهمست..
-لا تسوي هيج بيه
-شسوي
-ليش تحب تعذبني
-اعذبچ؟
-انتَ تتهرب
ابتسم مداعب بدون لا ينطق فوراً لانت ملامحهه وگلبت عيونهه بمياعة وطلعت وياه بره، رجع اتصل على والده واستقبله بصياح فجر طبلة اذنه..
-انتَ وييييييييينكككك
-احم.. هنا يابه بالشسمه بالشغل
-يا شغل بالثنتين بالليل؟؟؟؟
-جاي يابه جاي
-تعال وحسابك بعدين
-اخذني الوكت ويه الشباب جاي نشتغل ما حسينه على ارواحنه
-ما حسيت على روحك مو؟؟ تعال تعال للبيت تعال يالدايح
طبگه بوجهه بدون لا يودعه، صار "الدايح" يبلع بريگه وجبينه يتعرق، تقدمت عليه وسألته بحيرة..
-شبيك شصاير؟
-اكيد احد موصل لأبوي حچي اني بالنادي
-بيب شبيك واذا چنت بالنايت كلاب شاب ومن حقك
-اكرمينه بسكوتچ رجاءً
تركهه وطفر بسيارته وداس بانزين شگد ميگدر حتى يوصل للوالد ويشوف شنو راح تكون عقوبته "هذي المرة"..
بعد نصف ساعة وصل ونزل يتعثر بخطواته الى ان دخل جوه وشاف امه ماكلتهه الحيرة والتوتر..
-وينك يَـ وليدي وين صرت
-يمة مو وكتهه ابوي ناويلي نية گشرة راح يشگ راسي نصين
-وانا ابقى اعلمك يالدايح
-يووم
-بَس عاد يلا بسرعة گبل لا ابوك يتضايگ اكثر وتصيرلنه مصيبة
-بروح امج لا تحجين خليجي روحي تروح واتأكد السالفة چايدة وابوي مفول عصبية
-يله ماحجي بس روحله لا يگلب البيت على روسنه
-ماشي
-وگف تعال اشوفك تعاال
سحبته من ياخته تشم بملابسه ووجهه وتكفخ خدوده وتعدل شعره المخربط..
-ما شارب والله
-شال الله عدوك، اسِكت لا تسويلنه سالفة اوف منك اوووف
-يعني گوة تسويني شارب
-امش امشش لا تزعل ابوك
-كاين شي جديد؟ (اكو شي جديد)
-تعدل لسانك لا تصير عقوبتك عقوبتين چم مرة ابوك گايلك تكلم عراقي
-انتِ هم احچي عراقي ولا تفحطينه
نافخت بوجهه وعدلتله هندامه، وكف بـ باب مكتب ابوه وطرقه بخفة وامه الحارس الشخصي الي يدافعله خلفه..
-ادخل..
فتح الباب بخفة ايده والايد الثانية على گلبه يدعي تعدي الليلة على خير وكلشي يكون تمام..
-السلام عليكم ورحمة الله وبركاته يابة
-هه.. عليكم السلام بوليدي الفحل
-بوية اني اسف لان تأخرت بس صدگني الشغل هلكني هلاك
-معذور وليدي معذور، تعال سولفلي شسويت هناك
-هاا..؟
-سولفلي شسويت شنو اشتغلت؟
-اءء.. چنت.. احم نسيت والله لان تعبان، عمر اكيد راح يوافيك بالاخبار
-چا عمر ابني واني مادري؟
-لا اكيد اني ابنك
-يله اطربنا شسويت؟
-اليوم.. اليوم بس رتبنه الملفات و..
-اممم لطيف، رتبتو الملفات بتسع ساعات عمل جداً ممتاز
-اي يابة لان صارت لخة علينه ومنار خربطت و..
-حضرت الاجتماع بخصوص المناقصة؟
بلع ريگ بدون جواب، اردف ابوه بصوت مستهزأ مستصغر الي امامه..
-طيب، والملفات الي رتبتهم بخصوص شنو.. شنو محتواهه؟
زادت دقات قلبه، تحسس معصم ايده النابض من التوتر جفل بمكانه وغمض عيونه مع زفرة خفيفة تؤكد قربت نهايته واليوم هو متعاقب مابيهه مجال، أمر الوالد بصوت قوي..
-تعال!
-يابة..
تنهد بصعوبة واندار على امه يطلب الاعانة افتهمت عليه "حصة" وتقدمت تكعد بصف الاب..
-محمد ابوس يدّك على كيفك ويه الصبي لا يوگف گلبه
نظرلهه بطرف عين وابتسامة معروفة مرسومة على ثغره، زوجته الخليجية متحچي بلهجتهه الا من تكون جَدية ومتوترة ولاحظ هالشي عليهه، هز براسه يطمئنهه وگال بهدوء..
-حصة لا تدخلين ماريد يلوحچ طشار
-محمد وش ناوي عليه؟؟
-حصة!!
-سَم؟
-طلعي بره حبيبتي
هزت راسهه يائسة وربتت على كتف ابنهه وطلعت بره، وبحركة سريعة نهض محمد من الكرسي وشمر بوجه ابنه اوراق سميكة طرف الورقة شخط خده، مسح على خده يتحسس المكان وتسائل بهدوء مؤدب..
-يابة هاي شنو
-شوف بعينك، شيلهم من الگاع وشوف محتواهم
حچاهه بقسوة مع ابتسامة خائبة مرسومة على ثغره، نزل يشيل الاوراق من الگاع وانتبه لكارثة هذي اوراق تخص العمل، قلب بيناتهم وعض على شفته السفلية بحسرة وهو يشوف خسارة فادحة بقيمة ملايين الدولارات واكيد الي سبب هالخسارة هو!
-بابا اتمنى تسمحلي ابرر موقفي
-ما حاجة تعبنه وانتَ تبرر موقفك ودياحتك
سلمه ظرف اخر، لا كافي شنو بعد منتظره شنو هالمصايب الي نزلت على راسه اليوم.. فتح الظرف وانتبه هالمرة هذي مو اوراق هذي صور! تأملهم بصمت وبده وجهه يصفر ويخضر والعرق يتصبب من جبينه..
-يابه بشنو احلفلك اني مالي علاقة هذا...
-هذا عمررر اخذك مووو؟؟ لو علي؟؟ لو مسلم؟؟؟ لو حمزة؟؟؟ لو منووو هالمرة منوووو
-وحق هو علي ابن ابي طالب ما صار شي صدگني
-كاعد بالنوادي الليلية بحضن النسوووان وتكول ما صار شيييي ولك لشوكتتت تكبر انتَ لشووووكت
-بوية سامحني بس هالمرة بداعة امي و...
-برت منك امك وريحتني ولك خبلتني خبببببلتني العالمم اكلتتت وجهههي وهي تحجي وتكول ابنك بين النسوان والنسوان تسوگ عليه مثل المطي!!!
-لو بس تخليني ابرر الموضوع
-مطشر جيبه على بنات الليل ابننن الكلبببب هو صوچي اني ماعرفت اربيك زيين عود ردتك سندي وعكازتي من اكبر مو تسود وجهي يا طايح الحظظظ
نزل راسه متندم او يتظاهر الندم محد يعرف الحقيقة، محمد طفح كيله هالمرة ابنه سود وجهه كدام اعدائه وهمه لازمين عليه صورة مهينة وبنت دنيئة متقربة منه توشوش بأذنه والله اعلم شنو صار بعدهه..
-لو ما اكسسسسر خشمك العااالي ما يسموني محمد
-يابة والله ماسويت شي هاي الصورة اخذوهه الي متقصدين من جاي تهمس بأذني واني ما جاوبتهه
-تعبتني الى متى ابقى انتظرك تتغير وتعقل صار عمرررك 32 سنة كاااافي
-اكبر واتغير بس انطيني فرصة اخيرة
-باچر امك تروح تشوفلك مرة ونزوجك
-شنو
-گلت باااااااچر امك تروح تشوفلك مرة وبلا حچي زايد
-لا بوية ماهون عليك
-وداعة صحتي وعافيتي وتعبي وسنين رباتي الك ازوجك واكسر ظهرك والعباس ابو فااااضل وماحلف بي، اقشششعر من اجيب اسمه على لساني بس وحگ هو العباس ازوجك ازوجك ما يطلع اسمي محمد اذا ما سويتهه..
فز من مكانه ما مصدگ حلفان ابوه، فتح حلگه وعيونه ما مستوعب الكلام الي لقطته اذنه، ابوه تعود يهدده هالتهديد بس ولا مرة حلف هذا الحلفان وكان جَدي لهدرجة....
**
في بيت تملؤه الطمأنينة، الراحة المغلفة بالتعب، الابتسامة وارواح جميلة، ضحكات تجلجل في المكان.. في بيت مكون من اربعة بنات وام واب سعيدين جداً..
چانت اكو بنيه كلش حلوة تشبه الاميرات، واخلاقها تشبه الملكات وعقلها عقل سلطانات، هذي الاميرة الحلوة عايشة احلى حياة بالبادية، بيوم من الايام اجاهه عريس.. اي اي عريس وهذا العريس چان من المدينة حباب، مؤدب، خلوق، صايم مصلي وعايش ببيت كبير كلش محاوطي خدم من كل الجهات..
تقدم هذا الامير الشاب لخطبة البنت ومن اول نظرة وگع بغرامهه، اول مرة يشوفهه گال بلهفة وصوت عالي تسمعه الدنيا "هذي البنيه الاريدهه وماريد غيرهه"..
امه تعجبت زين هذا شلون اقتنع بيهه وهي عايشه بالبادية وهو عايش بالمدينة، قنعته امه يعرض عن قراره وگلتله البنيه متناسبك بس هو ماكو دگ رجل بالكاع گال الا اريدهه وماريد غيرهه..
تدخل الاب وتدخلو العمام وتدخلت الدنيا كلهه حتى يخلون الولد ينسى البنيه ومحد كدر، بعدين مشت الايام والولد ضاج من الوضع ويأس راح لامه بليلة ظلمة وگللهه يمة اني بعد ماريدهه زوجيني غيرهه..
-لاااا يمة خربتي القصة
-شسوي غير هذا الصار
-لا ماماتي حبابه لتحجين هيج ان شاء الله يتزوجون
-اي اي يمة حبابه خليهم يتزوجون
-يوم اذا ماتزوجو ماكووو احرگ البيت عليكممم
-الام: شبيچ بنتي هاي قصة اني سولفتهه من خيالي
-عليج الله خليهم يتزوجون حبابه
-الام: يلة يابة تزوجو
-لاااا مو هيج نريد تفاصيل وركزي على البالي بالچ
-الام: لا يا ملعونه خلي يسمعچن ابوچن يهدم البيت على روسنه
-ماما وارتاحت وياه الاميره؟
-اي ارتاحت وعرسهه چان اكبر عرس بالمدينة كل الناس يحچون بي لبست بدلة بيضة چبيرة وعريسهه جابلهه طقم اللماس يخطف الانفاس
-وحطت حنة مغربية على ايدهه يوم؟؟
-طبعاً طبعاً لعد شلون، الله يرزقكم يا بناتي هيچ عريس وترتاحون وتنسعدون وياه
-اميييييييين
ضحكنه كلنه واختي "بسملة" تنطط كل مكان تريد امي تعيد القصة الي سمعناهه الاف المرات كل ليلة قبل لا ننام، بس هالمرة غيرت امي النهاية ومحد عجبه الوضع..
طفيت الاضوية وعطت بخواتي حتى ينامون واني اروح اسقي الزرع، الوقت تأخر جهجرت الدنيا وامي تسولفلنه قصص منحس بالوقت..
بدلت ملابسي سريع وطلعت من الغرفة، لبست شال ولفيت دشداشتي مال الشغل على خصري، فور فتحي لباب البيت كفخ بوجهي نسيم بارد عليل يثلج القلب..
بيدي ضواية وتمشيت بين الزرع، ريحة اشجار الاركان تفوح بالمكان الريحة المفضلة عندي تنتعش روحي من اشمهه وتتغلغل الريحة بريتي..
فلتت دشداشتي ورجعت حزمتهه بشال اضافي حاطته على اكتافي، بديت شغلي المتعب اسقي وانظف بين الزرع وبين ما اني ابلل التربة خطف شي من ورايه.. شهكت واللتفتت بكل جسمي اشوف شنو..
ما لكيت شي بس اني متأكدة من الخيال، ذبيت نفس ومسحت وجهي من قطرات الندى التجمعت عليه ورجعت اسقي، بيدي مي وارش الزرع واغني بصوت ناصي خوفاً احد من اهلي يحس وتخرب نومته المريحة..
-يا ورد ويا ورد ميومة احلى ورد.. ويا ورد ويا ورد شحلاهه ميومه وشحلاهه المسعده وشحلاهه المرتبه وشحلاهه العنونه...
ضحكت واني استذكر الاغنيه بصوت امي وهي تلعب بشعري وتقراهه الي من جنت صغيرة.. رفعت راسي من رجع خطف وراية شي حطيت ايدي ع گلبي مهبوطة ونترت بهمسة..
-مزيونة موتيني خوف عبالي طنطل صخام!!
كعدت كبالي تمثل البراءة وعيونهه التضوي مثبتتهم عليه، ضحكت عليهه وفريت بيدي "مزيونة" بزونتي الحلوة بالحقيقة هي مو الي بس دائماً تجيني اوكلهه..
-هاا مزيونة اليوم جايبه وياچ خطار..
اجت بين ايديه اللعبهه وتدحرج على بطنهه تتنعوص، ضوجة وحابه احچي عن نفسي حابين نتعرف؟
حتى لو مو حابين تحملوني.. اني مريم أحمد، اعيش بهذا البستان او المزرعة شتسموهه سموهه، دمي عراقي اصيل لكن سكني بأحدى بوادي المغرب..
-آآيييي ولج شو تعضين صايره يا مهلسة ام كفشة هو صوچي اني المخبلة گاعده يمج
كمت اريد ارجع وصارت تمسح برجليه دفعتهه ورجعتلي، ابتسمت خجلانه من تصرفاتي اتدلل على بزونه؟ حقه ابويه من يكول عني مسودنه..
المهم وين وصلت، اي تذكرت اسمي مريم وعمري 24 سنة خريجة معهد محاسبة بيتنه مكون من اربع بنات وامي وابويه، عيشتنه بسيطة كلش مابيهه مميزات تذكر يعني شغل بشغل بين الزرع والمحاصيل والحلال..
اوقات افكر بكلام امي واتمنى اعيش بالمدينة بس ماما دائماً تكول المدينة حياتهم مختلفة ومنكدر نعيش وياهم منتحمل اطباعهم ولا همه يتحملون اطباعنه، بس ابقى اتمنى العيشة بيهه..
-مرررررييييييم
نزيت على صوت ابوية العالي وخبطت معدتي خوف من نبرته..
-نعم بااباا نعمم
-وينجججج
-اجيت.. اجيت
ذبيت كلشي من ايدي ونزلت دشداشتي المحزمة، ركضت مهرولة اشوف ابويه وامي فوگ راسه مبين عليه تعبان..
-مريم ماما بسرعة جيبي العلاج لأبوج ماعرفله اني
-هسة هسة يوم
بسرعة طلعت العلاج وانطيته بقى فترة متمدد وشبه غايب عن الوعي الى ان بده يصحصح شويه شويه بعد الحبايه..
-اخخ.. عاشت ايدج بنتي
-الف عافية بابا، ليش نسيت روحك لازم تاخذ الحبايه من العشا
هز راسه ساكت، كمت اخليهم يرتاحون ورحت للحمام اغسل ايدي بالصابون وافرك بيهن حيل، توجهت لغرفتنه واخذت مرطبي الخاص سعره يعادل مصروفي كامل بس ماهتم احب اعتني بيدي وماريدهه تتأثر بشغلي..
توجهت لغرفتنه حتى انام ميته تعب ونعس، اول ماخطيت خطوة سمعت بسملة ونور يسولفن بنومهن متت ضحك واني اسمع سوالفهن وحدة تسأل والثانيه تجاوب وثنينهن نايمات..
-مريم: بسملة بسملة
-بلسمة: امممممم
-مريم: انتِ ذاك اليوم كسرتي ماعون الفواكه مال الخطار
مجاوبت كررت عليهه السؤال كذا مرة وكالت وهي تمط بالحجي..
-بسملة: امممممم اييي
-مريم: يا چلبةة وذبيتي الصوچ بيه وحصلت عودة من ابويه امداااچ
گرصتهه وگمت انام بفراشي وافكر بماعون الخطار فد كتلة اكلتهه ما اتمناهه لعدوي، غمضت عيني وفزيت على صوت امي تكعدني..
باوعت حواليه وشفت الدنيا صبح سميت بأسم الله وكمت اكمل شغلي الروتيني وجسمي مرهق من التعب والكرف..
**
-تلگيله مرة فهمتي
-محمد وش تكول انت بسك عاد تراني تعبت
-محمد: واني تعبت من ابنج حصة!! ولد غير مسؤول تعبني واستنزف كل طاقتي
-حصة: والزواج بشو يفيده!
-ردينه
-واذا تزوج وحدة لعينة وعورت گلبه
-دوريله وحدة حوك وحدة تعرف تتصرف وتعرف تحجي واهم شي عقلهه چبير
زفرت بضجر وطلعت امي من مكتب ابويه واني صافنه عليهم، عجائب الدنيا سبعة، ثامنهه اخوية يتزوج!
طلعت وشفتهه تصعد لغرفته، ركضت وراهه اتسائل ماقبلت تحجي مبين الوضع منرفزهه بس متكدر تعاند ابويه..
-يمة غير تجاوبين
-رقية خليني افكر كيف افاتح اخوچ بالموضوع
-رقية: يمة مال يتزوج گطنه وطلعوهه من اذانكم
زفرت بدون متجاوبني وطرقت الباب عليه ما اجانه صوته، دخلت امي بسرعة تشوفه وين وحظ اخوية الفگر هستوه ديطلع من الحمام وبس منشفة على خصره، بس شفناه دگينه صدرنه ويه شهگة عالية..
-يمممممااااا شلون تطبون عليه هييييج
-الام: ولككك داااك وشممم جديد على صدررررك
غطى صدره بسرعه وصار يتأفأف وهو ينشف شعره بجهة المنشفة الثانيه..
-يمة هاي هيج تروح مو عبالج
-رقية: شنو حنة هي وتروح!!
-انتِ لا تدخلين ولج هسة اجيچ اطيح...
-حصة: تتجاوز على اختك جدامي!
-ههه لا يوم شنو اتجاوز عليهه اموت عليهه هاي اختي الصرصور رقية..
جرني عليه حضني سفطني سفط عليه ووجهي دفنه بصدره لعبت نفسي وخدي يتلمس جلد صدره يمكن حتى حسيت بطعم ملوحه..
-ايعع وخر مالحححح
-تره هسة طلعت من الحمام هاي الملوحة من سبالاتچ
-رقية: دوخر لعبت نفسي راح اتقيأ
-يمة شفتيهه شلون تتجعمص
-حصة: شفيك انت؟!
-رقية: مامااا يكول عني جعمص
-حصة: عادي ما گال شَي
-رقية: تره معناهه فضلات الطليي!
-حصة: بسسسكم بَس تعبتوني
دفعني خلاني انرگع بباب الحمام انخسف ظهري باليدة يمة شكد نذل، هستوني دا اوكف عدل وماحسيت الا رجمة مرتدة اجت منه خله راسي ينركع بالباب متت قهر وعطت..
-رقية: يمممةةةة شوفييي
-رقية اختي السعلوة شبيچ ما تتحملين شقة
ردت اجاوبه وامي حطت ايدهه بوجهي معناهه اسكتي، طنكرت من راح لأمي يحضن بيهه ويبوسهه ويكول بدلال..
-شبيهه ام الجعموصة شبيهه
-حصة: تالي وياك
-فديتهه التحجي عراقي يمة اذا تحبيني احجي عراقي لتحولين على ذاك الصوب وعلي اخاف
-حصة: ماعرف
-شبيج صارلج سنين عايشة ويه ابوي وما تعلمتي
-حصة: لا تعلمت شلون لعد
-چا شلون تكولين ماعرف
-حصة: يوووه وخر عني شكد لزگة
-ياخي اني هاي الانسان احطهه بحلگي اللوچهه وانوب اتقيأهه
ضحكت امي بصوت عالي وانطته راشدي خفيف ودفعته عنهه..
-يماا شفيچ انتِ شفيييچ
-حصة: انطم لا تعيب
-شمالج يوم
-رقية: ماما شبيچ شلون متحملته وما طردتي لسه
-صرصور صاير يحجي روحي حفي شواربج احسن راح يغطن شفايفج
-يمممةةةة شوفييييي احجي ويااااه عنوان المغثة والوغف على الكلب انتَ
-حصة: بسكم كافي، تعال انت ابي اسولف معاك
-شفيچ يست الحبايب
-ابوك يبي يزوجِك
-هههه تشاقين
-حصة: والله العظيم شفيك ما اتغشمر
-يمة بطلي كلاواتج شكد صايره تچذبين
-حصة: انشب (انچب) كاعدة اسولف صج والله
-دروحي روحي هم الهه عين وتسولف وياي هاي فوگ چذبچ
انطته كفخة وعاطت..
-حصة: ابوك يبي يزوجِك صجج يالدااايح
-يمة انتِ كلتيهه اني دايح مال زواج؟
-هذا طلب ابوك
-ديلا ميخالف
-رقية: شو هذا مكيف
-لان ادري چذب وهاي سوالف ابوي بس حتى يخوفني
-الام: من صجه يتكلم يبي باچر نروح نخطبلك
-ومنو هاي؟ وين عايشين بالعصر الحجري واتزوج تقليدي؟
-مادري بعد بكيف ابوك
-هسة نازل احجي وياه
لبس شي على جسمه ونزل بسرعه واحنه وياه، اول ما دخلنه على ابويه لغرفة المكتب حچى..
-يابة موضوع زواجي صدك؟ يعني ما تشاقوني؟
-محمد: اخوك الصغير واشاقيك؟
-لا العفو محشوم بس..
-لا بس ولا حچي زايد، باچر امك واختك يرحون يخطبولك من البادية وشرط تكون عراقية
-نعم؟؟!!
-انعم الله عليك
-بوية بادية شنو مستحححيل اتزوج منااااك
-ماشي حصة شوفيله من الريف
-تضحكون عليه انتووو!! انييييي الوريث الاووول والوحيددد لاكبر شركات المغرررب اتزوج وحدة من البادية؟؟؟
-محمد: نعم
-بوية هاي معيدية كلشي ما تعرف لا خلقة ولا اتكيت خوب روح اخطبلي صاحبي حمزة عاد هذا اعرفه
-رقية: حمزة متزوج تره
-ميهم شوفلي مسلم عزابي
-محمد: تستهزأ حضرتك
-لا حبيبي محشوم بس بنات البادية شنو انتَ تريد تورطني
-اريد اربيك
-ربيني من أي مكان اخطبلي بس هالمناطق ابتعد عنهن تره ذولة يجون ياخذون الاكو والماكو وتطلب الطلاق
-هذا الموجود سواء رضيت لو انرضيت
صك على سنونه بقوة وذب نفس قوي مبين گوة طايق بابا وبأي ثانية اخوية العزيز ينفجر، تقرب من ابوية وجر ايده باسهه ونظرله نظرة تبچي الجماد اول مرة نشوفه بهالحيرة..
-بابا اني ابنك الوحيد الي راح يرفع اسمك تالي تزوجني بنت بادية
-حصة: محمد احنه هوامــــير ناخذ بنت بادية؟ طيب ليش؟؟؟
-محمد: لا هواميررر ولا سلاطيييين الگلته يمشيييي عجبكم اهلاااً وسهلاً ماعجبكم لا اعرفكم ولا تعرفوووني مفهوووووم؟؟؟
طلع ابوي واحنه ماكلتنه الحيرة، دخلو بقية خواتي بعدما چانو يتسمعون من الباب وشافو وضع اخونه الصامد بهدوء لكن شرايين رگبته الناطه تشرح عصبيته، اجت اختي الچبيرة غدير تركض لزمت ايده وكالت بهدوء..
-اطلس..
مسحت على شعره وخدوده وهمست بصوت خافت متحدي..
-غدير: اخبلهه خلال شهر اخليهه تطلب الطلاق وداعتك
بلع ريگه ساكت وصار ياكل بشفته بعصبية مكتومة حرك رقبته يمين ويسار وصوته انفاسه علت، دفع ايدهه بـ روية واللتفت لباب المكتب راد يطلع وامي لزمته خايفه..
-اطلس وليدي شفيك يا روح امك ما تسوه اطلس هدي حالك
ما حچه شي وهالشي خوفنه اكثر، گلبي صار يدگ بهمجية لا لا لا الوضع ميطمن بخير ابد أطلس صاير كبريت وجهه اصطبغ وشراينه انتفخت من العصبية..
جرته سارة من قميصه بقوة وسفطته على الحايط حيل وبحركة سريعة دفعهه اطلس خلاهه توكع بالكاع وجر البردات وياهه شلعهم من الشباك شلع أدى الى تفلش جزء من الحايط وصار الي محد يتمنى يشوفه من الرهبة والرعب........
يتبع ♠️💸...
• ━━━━━━❪♣❫━━━━━━ •
عودة حميدة ان شاء الله شباباتي 😻
مشتاقتلكم كُلش كُلش هوايه شباب وشبابات 🙈😂
هسة بعدنه كُـلشي جديد بهالقصة ينرادلنه كم بارت ونتعود ونضرب ميانة عن نفسي متحمسة تظهر باقي الشخصيات والاحداث ونشوف الميانة والحماس على اصولهه 😆
التنزيل راح يكون حسب التفاعل ان شاء الله اذا حبيتوهه ثبتولنه حبكم بالتصويت والتعليقات الحلوه 💋
بالنسبة للي يسألون قصة الاطلس "دمليج أسود" هي نفسهه هوامير ونفسهه داماس لكن تغير اسمهه للمرة الثالثة شلون حظ عليهه 🥲 موضحة السالفة بقناة التلي للي يحب يعرف ♥️
أي سؤال، استفسار، فضول ناحية القصة تعالو لحسابي الانستا ودخلو برجلكم اليمين رجاءً 🌚❣️
ختاماً زهراء السلامي "زازا" تحبكم وااااايد وااااايد ومشتاقةةة 😻💋
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/540/الاطلس-دمليج-أسود-2
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━