Part 6
======
#الاطلس "دمليج أسود"
بقلمي: زهراء السلامي 💛
لتنسون التصويت + التعليق بين الفقرات + متابعة لحسابي 🌼.
• ━━━━━━❪♣❫━━━━━━ •
-الاطلس: ممكن تنطينه مجال
بقيت صافنه مثل الهبلة ماعرفت شنو يقصد، زفر ومد ايده بجيب الجاكيت وطلع منهه شي مده ناحيتي وگال بهمس بدون لا احد يسمعه..
-الله ينطيچ، ورجاءً الشركة مكان عمل ماحب احد يطردج منا بطريقة مو حلوة
باوعت لأيده الي سادهه بطريقة محد يشوف الموجود بيهه غيري وفتحت عيوني وحلگي مدهوشة وماسمع غير الهمسات بدت تتعالى، گلبي صار ببطني والحماوة صعدت لراسي من شفتهن فلوس هذا عباله اني دا اگدي؟!!!
خزرته بقوة ودفعت ايده حيل فتح عيونه متفاجئ من حركتي، ابتعدت عنه وداخلي يغلي، تعداني بدون لا يحجي شي ويه جماعته وصعدو المصعد..
اللتفتت واذا اشوف الموجودين كلهه تباوعلي تخبلت عطت بواحد منهم..
-مريم: نعم؟؟؟ اكو شي؟؟؟!
-لا لا العفو
انهاريت تمنيت الكاع تنشگ وتبلعني شنو هالقهر ربييي شنو هالقهررر!!!
-انتِ زينة؟
وجهت نظراتي عليهه وعيوني مليانة دموع معاندة بكل شموخ متنزل، تقربت مني البنية وياهه صديقتهه وربتت على متني بهدوء، ماتحملت نزلت دموعي ووجهي ولع مرة ثانية..
-مريم: مابيه شي مابيه
-حبي ليش تبچين شنو گلچ الرئيس؟
رفعت عيوني عليهه نظراتهه مليانه تسائل وصديقتهه نفس الحالة..
-مريم: علساس ما سمعتو انتوو
-لا ماسمعنه شنو انطاج؟ وليش دفعتي ايده شصار
رد الدم لوجهي نوعاً ما من استوعبت الهمسات الي تعالت بسبب محادثته البسيطة ويايه وفضولهم على شنو انطاني مو لان شافوني مگدية..
-مريم: هاا.. ولشي ما صار
-واني عبالي صار شي لان شفتج دفعتي ايده.. هفف حرامات
-مريم: شنو قصدج
حچت صديقتهه وهي تضحك..
-رادت غيبة رادت نميمة تريد شي تسولف بي
-مريم: صدكوني مافيدكم اني
-مبين عليج فقيرة
-مريم: تره اني مو فقيييرة شبيكم انتو شبيكم!!!
-بيب ريلاكس شبيچ شگلت اني واذا چنتي فقيرة مو زين مو ملعبة
صفنت مستوعبة قصدهه شكد حسيت بالفشلة والخزي تمنيت روحي مطمورة بفراشي ولا جايه هنا ومنهانه هاي الاهانة من المحيط الاطلسي..
-لج تينا بده الدوام امشييي اليوم حمزاوي يشوي على اذاناتنه البصل
-تينا: اوووي فديت ربه خلي يشوي يمة اروحله فدوة
-تينا فضحيتنه شجاچ متكدرين تلزمين لسانچ
-مريم: وين اكدر احصل استاذ حمزة؟
-تينا: شتسوين بي لا بيب هذا الي محجوز ممنوع وحده تدناله
-تيناا شبيچ تخبلتي
ضحكت تينا واضح كل كلامهه بالشقه چان، اندارت عليه وكالت بغمزة لعوبة..
-تينا: حرامات هو مسلم
كملت صديقتهه وهي تباوعلي مبتسمة..
-اني ضحى وانتِ؟
-مريم: اسمي مريم
-ضحى: هلا بيج مريم، رايده مكتب استاذ حمزة مو؟
-مريم: اي ياريت تدلوني
-تينا: اخذج بعيوني مو بس ادليج نبضي
جرتني من ايدي حييل خلعتهه ومشتني وياهه، تناسيت الموقف المقرف الصار ويه طوطي قبل شويه ونويت اكمل على شنو اجيت وما اخرب خططي بسبب اطلس الغثيث..
صعدنه المصعد وانتبهت ضغطن على زر الطابق 14، اسمع لسوالفهن واشوف تينا وهي تعدل حمرتهه بمراية المصعد..
-تينا: ضحاوي عدلي شعري ولج ليشوفني حمزاوي مكفشة
-ضحى: حبي اثگلي عدنه خطار خرب روحج
-تينا: ههههه اتشاقه اوي شجاچ، مرايم تره نمزح احنه اصلاً حمزة متزوج وحده عگربة عابت چنهه الجدة صفية
-مريم: زوجته تشتغل هنا وياه؟
-ضحى: لا لا تصير بنت الرئيس الچبير
-مريم: اخت الاطلس؟
باوعن وحدة على الثاني وضحكن..
-تينا: واضح ماخذه ميانة من اولهه
-مريم: لا لا بس لان اسمه على اسم الشركة لهيج فوراً گلته بدون رسميات
انفتح المصعد وطلعنه نتمشى بالممر، كلشي رسمي بس فخم بنفس الوقت، بقن البنات يسولفن واجه دور ضحى تعدل ذيل حصان مالتهه وتينا تعيب عليهه..
-تينا: بطلي حركة ذيل الهايشة بربج ضحى
-ضحى: وانتِ شغاثچ اوي
-تينا: غاثني لان راح اتزوج حمزاوي وانتِ تبقين عانس شلون تلگيلچ رجل بهذا الشعر الگامز
-ضحى: هه هه احلام العصر مسيحية تزوج مسلم
ضحكت تينا للمرة المية واضح هوايه تضحك ورجعت كالت كلمتهه..
-تينا: اتشاقة اوي بس مكرشة عليه يختي معذبني
-مريم: بس هو متزوج
-تينا: يعني شنو؟
-ضحى: يعني عيب نكرش على واحد متزوج تينااا
عوجت حلگهه وكملن طريقهن لمكتبهن لكن قبلهه ودعني ودلني على مكتب استاذ حمزة.. اخيراً وصلت للمكان المنشود باوعت على حفر اسمه على الباب وابتسمت بـ رضا، ردت افوت ووگفتني السكرتيرة تسأل المن رايده شرحتلهه الوضع هزت راسهه ودخلت عليه الغرفة شوية وكلتلي تفضلي..
طرقت الباب ودخلت على رجل وقور يطلع بعمر الاطلس او اكبر بكم سنة شكله مريح واستقبلني بأبتسامة لطيفة وبشوشة جداً..
-مريم: السلام عليكم
اتسعت ابتسامته اكثر وكال مرحب..
-وعليكم السلام تفضلي
-مريم: استاذ حمزة اني وصلوني الك وكالو حضرتك المسؤول
-حمزة: صحيح نعم، تفضلي؟
حطيت الملف على المكتب مالته وگلت وكلني فخر ورغبة وحماس وعارفه ومتأكدة هذا احسن قرار راح اتخذه بحياتي..
-مريم: اجيت اقدم على وظيفة هنا
هز راسه وابتسامته ما غابت، اخذ الملف من الميز وكال وهو يقلب بي..
-اليوم شنو سامعين
-مريم: عفواً؟
رفع راسه يباوعلي وكال بمرح..
-انتِ رابع وحدة تقدم على عمل هنا خلال هالنص ساعة
بهتت يائسة لا معناهه فرصة توظيفي راح تكون قليلة وزاد يأسي من گال وهو يميّل زاوية فمه..
-اممم دبلوم محاسبة.. مو خوش سالفة هاي
-مريم: ليش استاذ اني خريجة والله رحت للمعهد ودرست وحتى طلعت من الاوائل اني كلش شاطرة وبسرعة اتعلم شنو تكلولي اعرف اسوي وحتى لو ماعرفت اتعلم والله صدگني
يستمعلي ووجهه بشوش ماتغيرت ابتسامته، بقى يقره الملف مالتي گدامي شويه وگال تگدرين تتفضلين بره واحنه نتصل بيچ، متت قهر گوة سيطرت على نفسي حچيت مهضومة..
-مريم: يعني متوظفوني مو
-حمزة: اذا احتاجينه موظفين ان شاء الله نتصل بيج آنسة مريم
الحسرة صارت ببلعومي عزه راح ابچي هنا وافضح روحي، هزيت راسي وتشكرت منه واعتذر مني وشرحلي ان عدهم هوايه موظفين واغلبهم شهاداتهم لو ماجستير لو دكتوراه لو بكلوريوس ومن الاوائل..
-مريم: لهيج متحتاجون خريجين دبلوم
هز راسه بأسف وگال مشجعني..
-حمزة: روحي لشركة "شمسون" يمكن يحالفچ الحظ آنستي
-مريم: وين صايرة شمشون
قهقه بطريقة هادئة ومسح وجهه وراهه لحيته وكال بنبرة محترمة نفس قبل شوية..
-شمسون ماتبعد هواي عنه مجرد تعبرين الشارع و.....
قاطع كلامه صوت السكرتيرة وهي تدخل لغرفته سريع وتكول..
-موسيو محمد وصل
عكد حاجبه مستغرب وبسرعة سمحلهه تدخله، رجع على المكتب مالته ورتب بعض الملفات گدامه عبالك نسى وجودي ارتبك وهو يرتب الميز عدل كأن مستحي يجي ويشوف هوسة الاوراق والملفات..
-صباح الخير
اللتفتت عليه مجرد شفته ارتبكت، باوعلي هو وماحچى شي تقدم عليه استاذ حمزة وصافحه بقوة وكال بصيغة واضحة فرحته بشوفة محمد..
-حمزة: يا اهلاً وسهلاً بعمي نورتنه
-هلا بيك وليدي حمزة شلونك شلونهه غدير
-الحمد لله كلنه بخير ونعمة، تفضل عمي على كرسيي تفضل
-محمد: لا هنا اريح
كعد على الكرسي المواجه الطاولة وحط رجل على رجل، اخيراً اندار عليه وعكد حاجبه يمكن هسة ياله انتبهلي..
-حمزة: الآنسة موظفة جديدة تبحث عن عمل عمي
-محمد: اها
-حمزة: خلال هالساعة اجو اربعة
-محمد: قبلتهم رفضتهم؟
-حمزة: بعد انتَ اعرف بوضعنه
هز راسه محمد وطلب منه يشوف ملفات الموظفين الجدد، اشرلي حمزة بلطف حتى اطلع بره واعوفهم وحدهم وفعلاً سويتهه واني اجر ذيال خيبة الامل..
نزلت جوه للطابق الارضي ورحت اكعد على وحدة من القنفات الموجودة، گلبي مكسور ومقهورة كلش ماعرف بشنو احس بس رجعلي نفس احساس الكسرة مال يوم عرسي..
دورت عيوني بالمكان شكد فخم شكد مثالي شكد واسع وچبير بس اني مخنوگة الحسرة الي بصدري مدا تطلع دمرتني، طلعت موبايلي وحاولت اتصل بأبوية عسى ولعل قلبه لان عليه وفتح الحظر بس للاسف ما حن وفتح الحظر عني..
انتبهت لـ نانا متصلة عليه هوايه مارجعت اخابر خفت يبين الزعل بصوتي وانوب تتخبل من الخوف، رجعت موبايلي بالجنطة وببالي فكرة ارجع لمزرعتنه حتى لو اهلي شالو اكدر اسأل الاصحاب الجدد عن مكان اهلي عسى ولعل يعرفون..
گمت وقررت اسوي هالشي بس قبلهه ارجع للبيت اللملم كم شغلة واطلع متوجهه، اخذت تكسي ورجعت بسرعة وصلت الشركة متبعد هوايه عن البيت..
اول ما فتت شفت نانا كاعده وايدهه على خدهه بس شافتني طفرت عليه تعيط..
-انتِ وينننن رحتي وووويننن
-مريم: نانا شبيچ خرعتيني
-متت من الخوف عليج ولج اكو وحدة تسوي سوايتججج غير تحجين تكولين اني طالعة
-احتاجيت كم شغلة من بره وكلت اروح اشتريهن حتى كتبتلج رسالة
-خو اروح وياچ انتِ شمدليچ هنااا وليش من اتصل بيج ما تجاوبين يمة گلبي تعب
كعدت وحطت ايدهه على گلبهه گوة تجر النفس، رحت بسرعة اجيبلهه مي وركضت عليهه انطيتهه مي شربت ورجعت تتنفس بصعوبة..
-نانا والله اسفة ماعيدهه والله والله
-نانا: ولج يمة انتِ امانة
-ادري اسفة
هزت راسهه ولزمت ايدي بين ايدهه، ضحكت واني اباوع لحالهه شلون خايفة وترجف..
-مريم: هيج تخافين عليه ناناتي
-نانا: اووف منج ام لسان اوووف
-نونه شبيچ قابل زعطوطة اني
-اضرب من الزعطوطة ويه لسان وكفشة
-لا ماسمحلج كفشتي نصف جمالي نانا
-وجع امشي ولي عني مزاعلتج
-يله حبابه سامحيني
-امشي ولي هم الهه عين وتسولف
-والله اسولف واسولف كافي شكد تدللين عليه لو شفتيني مقهورة گلتي خليني اضوجهه بالزايد
-ومن اگلهه انتِ ام لسان تزعل
ضحكت وحضنت ايدهه، حطيت راسي على رجليهه وهي بدت تمسد على حجابي نانا بيهه ريحة ودفو امي كلما احط راسي بحضنهه اتذكر ماما وتخنگني العبرة..
-مشتاقة لماما نونه
-نانا: اني امج حبيبتي
-اريد اروحلهم للمزرعة عسى ولعل اعرف وين انتقلو
-شلون تعرفين؟
-يعني اسأل الساكنين بالمزرعة الجدد لو احد من الجيران
-محد ساكن بالمزرعة ابو الاطلس اشتره مزرعتكم والي بصفهه كلهن
كمت من حضنهه مصدومة..
-كلهن؟!!
-اي كلهن تقريباً فوك الميتين دونم اشتره كال هاي الكاع ارضهه حلوة وبباله مشروع
هزيت راسي بأسى معناهه مستحيل اكدر اوصل لأهلي اذا مشتري كل هالمساحة شلون راح اوصل للجيران بعد، رجعت راسي لحضنهه وهمست والعبرة كاتلتني..
-عود ليش محد يريد يسأل عني والله اني ما اذيت واحد منهم جنت اشتغل من حلگ ساكت ماتذكر بيوم حجيت لو تذمرت لو زعجت واحد بالعكس اخدمهم بعيوني واخاف على خواتي من الهوا الطاير
مسحت دمعتي وبلعت ريگي اختنكت..
-مريم: ماخلي وحدة منهن تحوش لو تنظف الزرع اخاف على ايديهن الترفة اخاف يتأذن لو تگرصهن حشرة.. حتى من اني مريضة اطلع اشتغل اخاف امي تسخر وحدة منهن بدالي
-سودة عليه
-نانا مشتاقتلهم كلش هوايه لو يرجعوني خدامة حتى اخدمهم هم راضيه
بديت بنوبة بكاء طويلة ونانا تصبر بيه وتسكتني، بعد اكثر من ساعة على البچي المتعب گمت من حضنهه وهي راحت تسويلي اكل..
بعدما اكلت كمت ابدل بغرفتي ونمت بالفراش، فكري كله ويه الشغل ليش مدا تضبط ويايه ليش كلشي يمشي اعوج!
استغفرت ربي وكمت توضيت ولزمت القران بقيت اقره هواي ارتاحيت شويه ونعست، جريت الغطا ونمت حسيت على رسالة وصلتني على موبايلي فزيت عليهه جريته وشفتهه رسالة مال خط الاشتراك..
تأفأفت متنرفزة وشفت الساعة صايرة صلاة المغرب كل هالفترة اني نايمة ومحاسه، كمت توضيت ووگفت اصلي دعيت من كل گلبي ربي يسهل اموري وييسرهه عليه وما احتاج احد ولا اكون عالة على احد..
نزلت ايديه مخلصة من الدعاء واني متيقنه ومتأكدة رب العالمين راح يستجيب، عندي ثقة بالله عجيبة واعرف كلشي يصير بحياتنه لسبب وكلشي بي صالح مهما كان..
لميت المصلاية وكمت اروح اساعد نانا بالعشى، سولفنه شوية بينما هي واگفة تقلي الكبة، سولفتلي على الاطلس صح انزعجت بس ماحبيت اطفي حماسهه وهي تسولف بي وحچت شلون ربته وكبرته..
-مريم: ليش مو خالة حصة ربته هي شنو چان دورهه؟
ضحكت نانا وگلبت الكبة على الوجه الثاني..
-يَـ بنتي ذولة ميربون ماعدهم هذا الشي يجيبون مربيات لاولادهم يهتمون بيهم يأكلوهم ويشربوهم ويكبروهم والهم الصافي
-وانتِ ربيتي الاطلس لو خواته هم؟
-اي ربيت غدير وسارة هم بس رقية اهتمت بيهه مربية ثانية لان حصة تكول اني كبرت ومابيه حيل بعد
-وانتِ حبيتي هذا الشي اقصد ربيتي اطفال مو جهالج وانتِ بقيتي بلا زواج ولا اطفال
سكتت مجاوبت وبقت عيونهه مركزة على الكبة، ضجت من نفسي واضح سؤالي زعلهه، ماردت اطوخ الموضوع وبسرعة غيرت السالفة..
-اي والاطلس بقى يحبج وماقبل تبتعدين عنه
رجعت على ابتسامتهه وكالت بحماس..
-اي صحيح اتذكر عمره 11 سنة واذا ارجع لمدينتي فترة اجازة يبچي ويقطع الاكل ويظل يصرخ لحدما بلاعيمه تطگ يصيح جيبولي نانا وجيبولي نانا هههه
-اووي وترجعين؟
-اي يرجعوني يكولون نانا لحكي هذا راح يموت وراج.. حبيب گلبي
-واضح تحبي هوايه
دمعت عيونهه وهزت راسهه شكد حلو عبالك ابنهه..
-مريم: وانتِ صارلج شهرين مزاعلته
-شمعرفج
-اممممم علينه يا نانااا
سكتت بدون لتجاوب اعرفهه من تزعل لو تنقهر متحجي تبقى ساكته وتعبر عن زعلهه بهدوئهه..
-هو ليش يصيحلج نانا
-بالمغرب يسمون الجدة لو المربية نانا
-ها اي صح
كملنه العشا وسوينه زلاطه وكلمن سوتلهه لفة واكلنه، راحت نانا لغرفتهه متعلمة تنام من وكت سدت الباب عليهه واني بقيت اگلب بالتلفزيون وحدي الى ان بديت انعس..
رجعت لغرفتي واخذت جهازي اگلب بي وانتبهت لرسالة واصلتني، فتحتهه وگلبي يدگ بقوة راح ينفجر بصدري..
شهگت بكل قوتي من شفتهه مو رسالة عادية هاي رسالة قبول توظيفي بشركة الاطلس!!!
-يااااااااااا الله كللللللووووووششششش كلللللللووووووش هلا هلا هلا هلا هلا ياااااااا الله ياااااااااااا الله تحقق العددددددددل الالهييييييييي ياااااااا الله
طفرت بمكاني وصرت اگمز على الچرباية اضحك وابچي بنفس الوقت ما مصدكة ما مصددددكة!!!
-الف الحمد لله الفففف الحمد لله والشكرررر كللللللوووووووششش هاي الراددهه وهاي التمناههه كلللللوووووووششششش
اطفر بمكاني ونافشة كفشتي واهوس لروحي، انفتحت باب غرفتي بقوة خلتني اوگف بمكاني واباوعلهه..
-ولج شبيييج شنو تسودنتييي شصايررر يمة ولج شصايررر احجي
-ولج ناااناية تعينتتتت ولج تعععينت طلع تعيينييي طلععععع
-ااه يا الله
-سمعينه هلهولة نونه سمعيننننه
-ماعرف ماعرف الف الف مبروك يَـ بنتي ياا الله الحمد لله صبرتي ونلتي حبيبتي
-هاي ثقتي بالله نانا اني اعرررف الله ميخيب ظني ولو بعد حين بس اعرف ربي ميعوفني اعررررفه فدوه لاسمه
-الحمد لله تعالي ابوسج تعاليي ولج ام كفشة
رحت ركض عليهه حضنتهه وبستهه من الفرحة شلتهه بمكانهه وهي تعيط وتصيح..
-ولج راح ينخسف ظهرج نزلينييي
-اي والله نانا شتاكلين شنو هالثگل شو مبينه رشيقة
ضحكت وضربتني على ظهري بالشقه، تذكرت مانزلت اسجد سجدة شكر فوراً حطيت راسي على الكاع وشكرت ربي من اعماق گلبي هاي البداية.. البداية بس يا مريم!!
نمت هالليلة وكلني حماس وراحة، مي بارد وتسرسح على گلبي يارب تكمل ويايه واتوفق، كعدت الصبح ومارست روتيني الصباحي ولبست فستان محتشم اكيد وكلت اللبس كعب عالي ما اللبس عادةً لان طولي زين 158 بس عجبني اغير..
حطيته برجلي وشفته چبير عليه ماهتميت وبقيت لابسته ماعندي غيره يناسب فستاني آمله ميفشلني هناك وطلعت من البيت..
قررت ما اخذ تكسي الشركة قريبة من البيت، تمشيت وبين ما اني اتمشى تذكرت الرجال العراقي الي اللتقيت بي وچان شايل ملفات مال الشركة الظاهر چان ديرجع منهه..
بعد تقريباً 40 دقيقة وصلت لا الوضع يحتاج سيارة مو مال مشي تعبت، وگفني نفس الرجال البارحة وگتله همه طلبو مني اجي فتحلي الباب الصغيرة ودخلت مرفوعة راس وكلني حماس..
ماكدرت اخفي ابتسامتي حاولت اسيطر على ملامح وجهي وما ابين ما شايفة لو ما مصدكة بس ماكدرت اني فرحانة وكلش كلش فرحانة هم..
صعدت المصعد وهالمرة بخطوات واثقة دست على الطابق 14 واول ما وصلت صارو بوجهي تينا وضحى سلمو عليه بحرارة وكأن صارلنه عمر صديقات، سألوني عن سبب وجودي هنا وجاوبتهم بفرحة واضحة..
-مريم: قبلوني
-ضحى: واااو صدك والله؟ شكد حلو الف مبروك عمري
بقينه نسولف الى ان وصلت لمكتب استاذ حمزة خلتني السكرتيرة ادخل، طرقت الباب وتوقعت اللگاه وحده واگف بس المفاجأة چانت..
-مريم: احم.. السلام عليكم
-عليكم السلام
جاوبوني كل الواكفين، توقعت بس اني انقبلت لكن طلعت توقعاتي غلط هواية مقبولين يطلع عددهم 8 نفرات واني التاسعة..
-حمزة: نورتي آنسة مريم، ثواني ونبدي الاجتماع ننتظر حضور الرئيس
هزو روسهم واني وياهم على الواهس مادري شكو بس ميهمني المهم تعينت..
دقايق ورجعت السكرتيرة تكول وصلو، وگفنه على جهة من المكتب واستاذ حمزة واگف گدامنه متأنق ببدلة سوداء اللون انيقة بشكل ومناسبة جداً لطوله الفارع..
-حمزة: اهلاً وسهلاً نورتو
حچاهه بأبتسامة وهو يمد ايده يصافح عمو محمد والي وياه عرفته المساعد مالته لان شفته من رحت لبيتهم..
گعد محمد على الكرسي وهمس بأذن المساعد شي مبين مزعوج، شويه وانفتحت الباب كتمت انفاسي ويبست بمكاني ماكدرت اتحرك من شفته الاطلس يدخل علينه..
-الاطلس: اعتذر على التأخير، شلونك بوية
راح لعمو محمد وجر ايده باسهه ومحمد هز راسه يردله التحية، وگف بصف ابوه وعيونه شاخصة بالفضاء كدامه ما باوعلنه هالشي ريحني شوية..
-محمد: شلونكم ابنائي
جاوبوه بمختلف الاصوات الناعمة من الاناث والخشنة القوية من الرجال، بده محمد يحجي ويانه ويكول سبب قبولنه للشغل هو لان كلنه عراقيين وهو دائماً يمد العون للعراقيين هنا سواء بشركته او يأمنلهم مكان بغير شركات..
-محمد: كلكم شهادات ما شاء الله واريدكم تستغلون خبراتكم هنا اريد اشوف أيدي عاملة جادة...
بقى يحجي فترة ويطلب من عدنه الوفاء وبذل الجهد وكلما كان شغلنه ناجح راح نتكافأ عليه، اسلوبه بالكلام حلو ورزن بس يحمس الشخص ويخوفه بنفس الوقت نظراته جدية تتوزع علينه كلنه وكلما يوصل للرجال الي بجانبي ينتر بحچايته واضح ابد مو سهل..
كمل واستلمنه حمزة وهم خطب بينه واني واكفة اشيل رجل واحط رجل من التعب، عيني بقت على الاطلس الي واكف جماد ماتحرك ولا مال وعيونه تتابع للامام وملامحه باردة مابيهه تعابير..
-حمزة: مريم..
فزيت من كال اسمي صرت اتراعش باوعتله وهستوني دا اجاوبه وحچت وحدة بدالي..
-نعم
-حمزة: انتِ راح تكونين ويه تينا وضحى نحتاجج بقسم الادارة
-حاضر..
حچتهه وطلعت ذبيت نفس مرتاحة همزين اكو مريم بدالي هنا، رجعت عيوني على الاطلس لاحظته يباوع بأتجاهنه گلبي ادعبل بين رجليه عزه بعيني شبي هذا..
حاولت اشتت نظراتي وماحسسه بيه شي، كمل حمزة يعلم ويوجه باقي الموظفين واخيراً بقينه ثلاثة اني وبنية وولد..
-حمزة: جميلة ومريم انتو راح تكونون ويه مسلم بقسم الحسابات هو راح يفهمكم على العمل وعلى المطلوب وأي صعوبة تواجهونه تلتجأون للاطلس
هزينه روسنه بصمت بس شفت الاطلس ركز نظراته الي، حك مكان لحيته ونزل على ابوه يهمسله شي لو يطخوني اعيط من التوتر..
-محمد: وشنو المشكلة؟
-الاطلس: ماكو مشكلة بس انتَ تعرف قصدي
-محمد: ان شاء الله ما يصير شي
-حمزة: اكو مشكلة؟
-الاطلس: بعدين نسولف
-حمزة: طيب تفضلو على شغلكم بنات
حسيت بأيد تجرني چانت جميلة دتكولي حتى اطلع وياهه، بقيت امشي وراهه وهي تفوت من قسم وتطلع من قسم دخنه سوه..
-جميلة: اوف شنو هاي الشركة تدوخ تعبت
-مريم: وكعت رجليه يمعودة شجانه ما سألنه السكرتيرة عن المكان عاد هي تدلينه
-جميلة: اكلج هو كال قسم الحسابات باعي الخريطة المفروض قسم الحسابات بالطابق 44
-اي ورحنه بس ما لگينه شي
-جميلة: انوب همه يتيهونه شفتيهم شلون يذبونه على غير طوابق
-مريم: شفتهم شكد نحسين وغثة
-جميلة: هسة شلون شنسوي
-نروح نسأل سكرتيرة حمزة عسى تساعدنه
-لا اني ماريد تعبت واساساً راح يخلص الدوام
-ياااا ولج بعدهه بـ 10:30 وين خلص
-جميلة: تعبت خلينه نغلس اليوم ونرجع للبيت وباجر عود ندور
-لا اخاف نتعاقب امشي جميلة لتتعاجزين
-ماروح روحي وحدج اني اروح للكفتيريا جوه
-مريم: شنو هاي
-جميلة: هههههههه وين عايشة انتِ عزه
عافتني وصعدت المصعد ضجت من حچايتهه بس مابينت اني سامعة هاي الكلمة بس ماتذكر وين مدا يخطر ببالي..
بقيت وحدي بالطابق 41 اكش ذبان واتصفن افتر وادور واسأل ماعرف ليش حقراء هنا حتى من اسألهم يجاوبوني بأستهزاء واكو منهم حتى ميجاوبون كلش ضجت وأيست كلت ارجع لاستاذ حمزة على الاقل هو لطيف..
دست المصعد وبقيت انتظره باوعت للساعة صارت بـ 11:30 معقولة مشت ساعة بهالسرعة!!
صعدت المصعد چانت اكو مرة ابتسمت بوجهها وهي طنكرت بوجهي يبوو ذولة شبيهم شنو كاتله ابوهم.. لملمت الجاكيت على جسمي المصعد بارد نزلت المرة بقيت وحدي المصعد بطيء شلع گلبي.. وصلت للطابق 35 وانفتح، شهگت من المفاجأة وصرت اكح حيل وادك على صدري..
-اسم الله انتِ زينة؟ تحتاجين ماي؟
-يممةةة متتت يمةةة كح كح كح كح
ادك على صدري حيل والزلم انخبصو بيه وگفو المصعد وراد ينزل واحد منهم يجيبلي مي بس وكفت عن السعال، رجع صعد المصعد وكال..
-عندك العافية
-مريم: احم.. احم تسلم احم
بقيت احمحم والشخطة شكت بلعومي متت من الفشلة والرجال مبين لبناني من لهجته بقى يسألني اني زينة لو لا يمة لطش!!
فجأة توقف المصعد توادعو ونزل اللبناني بقيت ويه المصخم الي خله حالي يتخربط بقيت ويه الاطلس..
لزكت روحي بزاوية بعيدة عنه وهو ساكن وعيونه ليكدام، اشوف گفاه واكف مثل اللوح وجع لهلطول ما مصدك بروحه، بقيت اتأمله بحقد لو بيدي هسة اجيبه بعجل اخلي يگمز شكد اكرهك امداك..
اللتفت عليه نص اللتفاته خلتني فوراً احول عيوني على المراية الكدامي ولاحظت الطركاعة صورتي واضحة بيهه وچان يشووف نظراتي اله من المراية!!!
-حسب علمي ما كاتلچ احد
حچاهه بجمود ووجهه للامام، خرب شلون فشلة يا كاع انشگي وبلعيني واكليني ولوچيني وموتيني ودفنيني..
حك طرف حاجبه ونزع الكوت مالته حطه بين ايده عود عبالكم راح اكول عطره يموت ويخبل ويجنن ويسطر الراس ودوخني من اول ما فات للمصعد وگوة لزمت روحي ما اسأله على اسمه؟ لا والله ولا اكولهه للمعفن!
زفر هوا عالي وهو يدوس على ازرار المصعد ضايج، همس بلغة غريبة مو عربية توترت وصحت لا ارادي..
-مريم: راح يعصى بينه!!!
دار كل جسمه عليه متفاجأ من نبرة صوتي العالية، من خوفي هيج حچيت اخاف من المصعد وهذا الدايح لبكني تخيلت يعصى بينه واللزك وياه هنا لنهاية عمري..
-الاطلس: هسة لازم اراجع حساباتي يمكن فعلاً كاتلچ احد اني وناسي
-مريم: مو قصدي اعلي صوتي عليك استاذ بس خفت
رفع حاجبه وسوه حركة بوجهه مادري شلون افسرهه، بقى يباوعلي وهذا المصعد بنچر بينه غير نوصل شنو هالطوابق العالية الي صارلنه سنة ننزل..
انحرجت وتعصبت من نظراته ردت اعيط بي لوما انفتح المصعد اخيراً، نزلت بسرعة وهو نزل ورايه رحت اهرول لمكتب حمزة وهو هم وراية انداريت اباوع وبقى وراية هذا شنو ديلحگني؟؟
-الاطلس: مدام وين شايفچ اني؟
بسمرت بمكاني صار عندي هبوط فجأة ودوخة فجأتين راح تطلع روحي واموت يبووو عليج مريم يبووو من اول يوم كشفتي روحج يمصخمة..
تقدم بخطواته وصار كدامي ويراقب ملامحي تقرب اكثر عليه واني لو يذبحوني قطرة دم ميلكون بجسمي..
-انتِ.. انتِ الشفتج البارحة كدام المصعد مو؟
رفعت عيوني عليه خازرته من تذكرت الموقف البشع الي حطني بي، من شاف خزرتي ابتسم ومسح وجهه..
-oh shit
ويفشر الادبسز تمنيت اسمطه براشدي افر وجهه الازرك فر، وكف عدل وكال بصيغة محترمة..
-اني جداً اعتذر بس جنت مستعجل وواكفة بطريقي و...
-وعبالك اجيت اگدي منك!!
-مانتبهت ولا دققت بشكلچ جاي وياي وفد من فرنسا وانتِ صرتي بوجهي ساده عني المصعد ردت احل سالفتج بسرعة بدون لا اسوي ارباك و...
من ضوجتي عفته وكملت طريقي لمكتب استاذ حمزة ميهمني حتى لو انطرد مدا اكدر اطيق هالبني ادم، بقى يمشي وراية ويكول..
-حقج عليه مدام چان تصرف غير اخلاقي مني
-هه اي لان شفتني لابسة حجاب تستهزأ معاجبك
-مو هيج بس هنا..
بقيت احجي واني امشي سريع..
-هنا ميلبسن حجاب ادري وميهمني مستحيل اذب حجابي لو تموتوني ولو فعلاً اوصل احتاج اگدي بالشارع
-هو منو طلب منج تنزعي شو اوكفي
-استاذ رجاءً اني كلش مستعجـ.....
بعدني ممكملة الحچاية ومحمد يا علي تعثرت بحذائي وطفر من رجلي ردت اوگع على وجهي وبصعوبة سندت روحي وگعت على ركباتي شاطت روحي شوط من وجع ركبتي سمعتهه طگت..
-الاطلس: الله الله تأذيتي
-اااااااايييي يمةةة رجلي رجلي عزه بعيني اوووف يالغبرة يالثولة مريم انتِ غبررررة
-صوتچ يمعودة صوتچ فضحتينه
-اخخخ خرب روحي اخخخ الله ياخذك الله ياااخذكك
-اني شكو تدعين عليه شو اوكفي شبيچ تكمزين خزيتينه
تعدو موظفين يباوعون عليه ويضحكون سلمو على المهجوم مالتي وسألو اذا محتاج مساعدة لو لا..
-الاطلس: لا شكراً
-مريم: لغسل لهلخلق تره اني المتعورة مو هووو
-الاطلس: دخيلچ صوتج بابا عيب ما يصير هذا مكان محترم
-عزه راح اموت يمة ركباتي انكسررت روحي تفور اووفف الله ياخذ...
-بس اسكتي اسكتي هسة اساعدج
-اني مصخمة ادري بروحي
-تعالي استندي عليه شو
-لااااا بله!!!
-وجعه من الله شلون صوت فضحتينه يمصخمة!!
-تره اني محجبة لو عبالك حجابي كلاوااات
-مو كلاوات بابا بس هاي اسمهه حالات خاصة
-لا بابا لا متمشي عندي هيجي كلاوات صيحلي أي مهجومة تجي تساعدني
شد على سنونه حيل مفول عصبية شكله صار يخرع هذا شبي راح يتحول لو شسالفته..
گمت بصعوبة وعفته وصرت اطفر على رجلي اليمنى راح اموت من الوجع روحي تشوغ واستحي اصيح، بقيت مثل الكنغر ارتاحيت شفت ماكو احد بس الملطم وراية وطز بي..
-اوكفييي هسة اخابرلج وحدة تجي تساعدج
-مريم: صوتك عيب
-اي اوكفي خرب شلون يوم منحوس
وكفت سندت روحي على الحايط واتلوى من الالم يمكن ركبتي انكسرت صرت امرغ عليهه والوجع ينسور بگلبي واعض على السترة مالتي حتى ميطلع صوتي..
-الاطلس: الو حمزة كول للمهجومة مالتك تجينه...
اي اي اني يم المصعد
سد الاتصال واجه وكف بصفي يباوعلي وعاقچ وجهه عبالك متوجع ويايه، همس بصوت ناصي يواسيني..
-متوجعه
غرگت عيوني دمع واني اشوف ملامحه الصاكة الچلب هزيت راسي اي وهو هم هز راسه وكال..
-هسة تجي مهجمومة تساعدج
ماتحملت فطست ضحك كممت حلگي وصرت اضحك بالخنسة وابجي بنفس الوقت، فر بيده وكال..
-مسودنه هاي
اجت سكرتيرة حمزة تهرول مستعجلة من شافتني طنكرت بس بسرعة عدلت وجهها وهي تسلم على الاطلس وتكول بكل مياعة..
-أمر موسيو
-الاطلس: ممكن تساعدين البنية وتاخذيهه لمكتب حمزة
هزت راسهه واجت تساعدني، مشتني وياهه واني اعيط بالكتمة واطلس يمشي ويايه ويصبرني..
-ميخالف ميخالف وصلنه تحملي
وفعلاً وصلنه لمكتب حمزة من شاف حالتي فتح عيونه مستغرب، فوراً جرلي كرسي وگعدني والبنية عوجت حلگهه وهي تباوعلي عافتني وراحت هاي شبيهه شدعوه هالكد مغرورة..
رجعت للالم مالتي وبقيت الوب بمكاني اللزم رجلي وابچي صابونية ركبتي اتوقع انكسرت لو انطحنت الالم لا يطاق..
-الاطلس: حمزة اخيك جيبلنه ثلج
-حمزة: اي صار
طلع حمزة وبقيت وياه وحدنه، جرله كرسي قريب مني وكعد مقابيلي، مد ايده يريد يتلمس رجلي من فوك الفستان وتردد رفع عيونه يباوعلي وكال..
-بس اشوفهه خاف ورمت
اني هم خفت وقنعت روحي بگلبي عادي مو حرام اصلاً هو زوجي، هزيتله راسي ورفع فستاني على كيف وكل شويه يباوعلي يدرس ملامحي المتوجعة، طلع رجليه والخجل اخذني معت تمنيت روحي فعلاً مطمورة ومجايه هنا..
من شافني خجلانة غطى رجلي الباقية بالجاكيت مالته وطلع بس ركبتي شافهه وتلمسهه، كال..
-ماتوقع شي خطر ما ورمت
-مكسورة اكيد اني احس مكسورة
-لو مكسورة ما تكعدين هالكعدة
-لعد شسوي اكوم اركص!
زفر ضايج بدون ليجاوبني، فزيت من دخل حمزة وبسرعة نزلت فستاني وصحت..
-مريم: رجال اجه رجال
-الاطلس: واني شنو نعال!!
-حمزة: هاي شصاير
-الاطلس: ماكو شي ضلعي بس انطينه الثلج
-مريم: توجع كلش استاذ حمزة احس روحي راح تطلع
-حمزة: الله يساعدج شصار؟
سولفتله مختصر مفيد بدون ماحجي تفاصيل، ابتسم وكال..
-حمزة: واضح من اولهه لازم ننطيچ اجازة مرضية
-مريم: لا لا استاذ اني زينة ما احتاج هسة اكوم مثل الحصان كلشي مابيه
-حمزة: ان شاء الله
كام الاطلس وتوجه لحمزة حچو بالهمسات استحيت ابقى كاعدة، كمت اطلع شويه صرت احسن على الاقل اكدر اعرج عليهه..
-الاطلس: تحتاجين مساعدة؟
-لا تسلم
تمشيت على كيفي كلش سمعت طراطيش من همساتهم اطلس صوته خشن ينسمع نوعاً ما..
-الاطلس: ساوموا مسلم
صاح حمزة بصوت عالي..
-لا بشرررفك شلوون
سكته الاطلس ورجعو للهمسات، طلعت واول ماتعديت من السكرتيرة سمعتهه تدردم ويه احد على التلفون..
-السكرتيرة: طلعت اي سوالفهن شبعنه منهه عوع والله ميستحن
فرت من العصبية ردت ارجع اتعارك وياهه وارزلهه بس لزمت روحي گوة وكملت طريقي، تذكرت اني ما سألت عن مكان عملي غميت روحي شكد فاهية مريم!!
اخذت المصعد للطابق الارضي وكملت طريقي بره ارجع للبيت ماكدر ابقى بهاي رجلي التعرج..
تلگتني نانا من الباب تسائلت عن حالي وانخبصت خبص من سولفتلهه الصار، طبعاً هي متعرف اني توظفت بشركة الاطلس لهذا السبب ما شكت بشي..
-نانا: يعني المدير بنفسه ساعدج؟
-اي نانا المسؤول عن الشركة
-خوما ضايقچ مرايم زعجچ؟
-لا شحده خيولي هو بس ساعدني
-الحمد لله ربي سخرلج ابن حلال يساعدج
-اي
-شنو اسمه عرفتي اكيد الاطلس راح يعرفه
-هاا اءء مادري والله شسمه
-والشركة شنو اسمهه ما كلتيلي
-مادري مادري مانتبهت.. نانا اني كتلج الاطلس ميصير يعرف اني توظفت حبابه اخاف يبطلني
-لا مو شخصيته هاي بالعكس اصلاً هو كال خليهه تعيش حياتهه براحتهه
-حتى لو خلي الموضوع بيني وبينج فدوة
-تمام لا يظل ببالج
-نانا مو تضعفين وتسولفيله حبابه أمنتچ امانة
-لا خلص أمني
فرحت وكمت وياهه للغرفة اجت شافت ركبتي وكالت تاخذني للمستشفى ماقبلت، دهنتهه بفكس ولفتهه الي وگلتلي نامي ارتاحي..
طلعت واني هم كمت توضيت وصليت ولفيت راسي ونمت، كعدت المغرب ميته من الجوع بطني تطلع اصوات وعبالك بيهه زرف..
گمت من الفراش على كيفي وتمشيت للباب استندت عليهه الى ان طلعت للممر وجفلني صوت نانا تصيح..
-من كل عقلكككك
-اجيت اشوفج شبيچ
-ولك هذا الدم منينننن شنوووو ليش چتفك ينزف احجي ولككك
-ماكو شي سويت حادث بسيط
مديت راسي اشوف ولاحظت الاطلس كاعد على القنفة ملابسه كلشي مابيهن بس كتفه ينزف ونزل على القنفة دمرهه..
-هذا مو مال حادث مو حادث هذا احجي شكووو
-الاطلس: نانا كتلج حادث گوة تردين تطلعيني چذاب
يحجي ببرود قاتل وهي مفرفحة شگت قميصه وشهگت وهي تدگ على وجهها..
-عزه بعينيي صخام الصخمنييي رجعت على سوالفكك تريد تموت ابوك وامك انتَ بس فهمنيي
دفع ايدهه وكام على حيله ركضت اختل روحي واسمع صوته عله..
-الاطلس: ما صار شي مواجهة بسيطة همه هجمو عليه بالسلاح اني مادري بكل هذا
-نانا: شرجعه مو سافرر هو ليششش رجع على حظظظي رجع على حظظييي
تضرب على وجهها وتبجي لزم ايدهه حيل وحضنهه لصدره يهدأهه..
-ماكو شي والله اهدي عليج الزهرة لا يصير بيج شي وين انطي وجهي اني
-اطلس راح اموت ناقصة عمر من وراك اطلس
تضرب على صدره وتحجي بتعب، خلاهه توكف كدامه وباس ايديهه وضمهن لصدره..
-لا تخافين عرج ما يصير بيه
-وينهم؟ تيهت مكانهم احجيي اندلو البيت؟؟
-لا مسلم تولاهم وحمزة وصلني للبيت
ماعت روحهه بين ايده متت خوف عليهه ردت اروح وتراجعت، نيمهه بحضنه وصار يضرب على خدهه خفيف يصحيهه جر المي الموجود على الطاولة شربهه صحصحت وبقت رايحة روحهه..
يبوس بيدهه وراسهه وحاضنهه لصدره عبالك راح تطير گلبي لعب واحتاجيت استفسر واعرف شنو الموضوع وشنو سبب حالة نانا ليش احس خافين شي ومو شي هين...
وفعلاً طلع احساسي بمحله......
يتبع ♠️💸...
• ━━━━━━❪♣❫━━━━━━ •
😉🙃💣
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/541/الاطلس-دمليج-أسود-3
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━