#فلاش_باك....
بسم الله توكلنا على الله ...
فحالهم فحال كاع الناس الي من الطبقة ديالهم ,, طبقة الشعب من العائلات الي معندهمش وماخاصهمش ومايمدوش ايديهم يطلبو ولو توصل بيهم العظم ،، هادشي الى وصلات بيهم العظم خصوصا الخوت بزوج تبارك الله كيتقاتلو صباح وعشية باش يدخلو طرف الخبز ومايعتامدوش على باهم وخا منعرف اش يوقع والى اعتامدو عليه ماياكلو غير الى بغا هو خصوصا هو من نموذج الاباء الي حاشا واش يكونو اباء .. الحكاية طويلة ومعاني كلامي كثيييير يتلخص فاحداثها وفي طياتها شلا وشلا ...
هادي عائلة غاتدخل لقلوبنا ب افعالها سواء زينة او شينة على مقولة الحكيم الخاتر فؤاد رمسيس ونتذوقو احداثها ...
عائلة فيها زوج خوت وبنت هي اخر العنقود وسط زوج عزارا واحد فيهم يحنت ليا عشرة اما الكبير دراعو گاد وعارف بحق الزمان يجيب لقمة من فم سبع رجولة فيه مزايا بزاااااف وفيه مساوء بزاااف كلهم غايبانو مع توالي الاحداث ...
ولاخور الي قبل من البنت حتى هو الرجولة وتاهو حنين فختو غير الفرق الاكبر احن بدرجااات علاش لا وهو الي رباها ملي كانت عندها شهرين فعمرها قايم بدور الاب والام فنفس الوقت بمساعدة جارتهم نجية الي كانت كترضع تاهي ولدها انذاك الي كان فعمرو عام وشهرين ...
#الرابعة مساءا قريب اذان العصر في واحد من دروب وازقة مدينة الجديدة المغربية اومدينة مازاگان بالبرتغالية قديما ايام الاستعمار ...
في حي من احياء المدينة حي السعادة بالضبط وفي واحد من المنازل بالدرب منزل فيه طابق الارضي مصلوح صليح زوين والفوق مكاملش فيه غير سطح مبني ب البريك فقط صالحين لتحت علاش قادين وصافي زوج بيوت كبار كيشوفو فبعضياتهم واحد صالون وواحد فيه تلفازة فين كيجلسو ياكلو ويتفرجو وبيت فين كينعس الخوت الكبير والي موراه وبيت فين كينعس باهم والبيت الي فيه تلفازة وواحد صغيير فيه سداري واحد وماريو صغير ديال شخص .. فين كتنعس البنت الصغيرة والي بزز باش تدار ليها كونها هي وحدها وسط منهم بنت ضروري خاصها بيت ديالها وكوافوز فين كتحط اشياءها النسائية الخاصة بيت مساحتو جد صغيرة ...
عاد كاينة كوزينة وطواليط مشروكة بالدوش ...
الفراش مفرشين على قد الحال وصافي الطابق تحتاني غير الخوت الي تشاركو وصلحوه على مقولتهم " نصلحو فين نعسو ونغطيو راسنا ونديرو فين يجي عندنا بنادم يلقا علاش يجلس ما يجلس فوق التبهديل والبريك " حيث هما عاشو فصغرهم فيها مصبوغة صباغة فوق البريك والمرطوب حيث باهم كان عسكري قدييم وهاد الدار شراها بزز فالقديم قبل مايشد التقاعد ديالو ...
فوزي"الي من ورا الكبير...
صونا تيليفونو" : نتا متصيبش تنساني واحد شوي ؟
شحال جابو تما ؟
حسب ليه تمنطاعش (تمنية عشر حيث دكاليين ) اشوف عزوز عيط على توفيق قوليه داكشي علاش وصاك فوزي يجيبو ليا لمحل قبل منسدو وقبل ميجي مول المحل نعطيوه الحساب حيث هاد اليومين جايين عمامي من البلاد لهيه ثلاث سيدي بنور يوجد ليا دوك طيور ليا انا وصافي ....
عزوز: شحاال درتي معاه ؟
فوزي: على ما وصاني عصام شي ستة يلاه نجيبهم لختي تكملهم فالتنقية وترميهم فالفريگو ...
عزوز: سير عالله ومتعطلش راني غا ايد وحدة هنا وشي عيالات وصاونا على دجاج لعرس ياكما نسيتيهم ؟
فوزي: نقصِّي مناكل وهانا معاك ...
قطع معاه وهو يسمع صوت الباب تحل كب ليه كاس ونتش ندغة من الخبز كلا بيها من اومليط الي صوب وشرب جغمة من اتاي حتى بانت ليه دايزة ....
فوزي: العجلة فين تعطلتي
هي "شيرات ليه وشادة تحت كرشها ومشات "
فوزي "عقد حجبانو الكحلين وعينيه السوداوين شافو جيهتها بقلق ...
عوج راسو كيطل عليها غير من تم " : مالك ؟
"سمعها ردات عليه بصوت عيان بالي عيانة شوي وضراتها كرشها عرف بان البيغيود هاديك اي الام الدورة شهرية بمجرد ماقالت ليه غير ضراتني كرشي كيعرفها مالها وبالي هي هاديك هادشي يعرفوه بزز كونها هي البنت الوحيدة الي عايشة وسط ثلاثة رجال منهم زوج عزارا ...
" : عندك الفنيد "جاوبات ب اه وبقات غير وحدة منو " انا خارج الى مرضتي بزاف عيطي ليا ولا لعصام ماديري والو لعشا غير الي كان نديبانيو بيه جاب الله مكاينش بوك بعدا ...
خاصاك شي حاجة ؟
هي: لا بغيت غير نعس
فوزي "هز تيليفونو وساروت الموطور " : انا تحركت ل لالة زهرة (بلاصة فين كاين سوق فين متواجد المحل ديالو وفين كاين حتى محل خوه الكبير ) ...
خاصاك شي حاجة "جاوبات بالنفي" اشوي ويجي عصام الى سالا ..
هز ديك صينية وجمع دنيا تما وتحرك خرج فاتجاه المحل بالموطور سوينغ ديالو للسوق فلالة زهرة حتى داز من قدام محل تجزارت فين كاين خوه لقا غير الولد كيوجد باش يضربها بتسييقة لحانوت حيث وذن العصر ولحم بدا يسالي من تما غير الكواح الي سالاو فالصباح حيث يوم الثلاث عندهم دبيحة باقا جديدة جات من ثلاث سيدي بنور نيت حداهم ...
فوزي: معاد فين عصام ؟
معاد: هاهو جاي مشا يصرف ...
فوزي: صاف انا مشيت .."يلاه تم غادي حتى رجع شاف فيه " نتا لديلمك مابغيتيش توب من صايكو ورباعتو تعطيهم تيساع ؟
معاد: الله ممرافق معاهم غير كنتلاقا بيهم
فوزي: متصيبش تنخلهم ياك مصواب ؟
تگطر بالصواب يا صحبي والكذوب عندك حرام داكشي علاش متتكذبش عليا مسكين ...
اسير الله يمسخك
معاد: وهانتا تشوف "بان ليه طوا لسانو عضو وعينيه الكبار خنزرو فيه وحجبانو غلاض مع ملامحو حرشين وخا ضحوكي ووجهو بشوش لكن فاش تيخنزر مع دوك الحجبان متعرف واش غاينوض يخلطك ولا يقوليك غاتنضحك معاك ههه " ....
اصلي عالنبي
فوزي: والله كون ما وصاني باك عليك تنوصلها لعصام يتَرْبك بالعصا انا مانيش عصام تلقا معايا سلاكة لا وصلتها ليه مانتا فخير كمل خدمتك وسير لداركم تحفض الوطني قرب وداكشي الي خدمات معاك الخوادرية ميجيبش نتيجة غا هي تجلس عليك خراك مايجمعوه شراوط ...
معاد: تا ناجح كون هاني ...
صاف صلي عالنبي ها عصام جاي لبدها عايش خويا ...
بزاااف د الشباب فهاد البلاد قاريين واصلين لشواهد عليا وماساعدهمش الحظ انهم يخدمو بمستواهم التعليمي ...
كاين الي كيقول ماعليش نمشي درجة بدرجة حتى نوصل لبوسط الي نستاحق وكاين الي مباغيش ديك درجة درجة باغي يطير لبوسط الي باغي نيشان فهاد القضية كاين الي ساعفو الحظ وكاين الي مالقاش تا اصغر درجة وراه تلات بيه لايام وشو فين تلات بيه ...
نجيييو لشباب الي فضل يخدم ويدمر وخا عندو شهادة ضعيفة متعاونوش فهاد البلاد او عفوا نقدرو نقولو مانفعاتو بوالو وقضا الغراض بلا شهادة كاين الي عندو الي يتم مايتحرق وامي وكاين الي عندو غير مستوى ابتدائي وكاين الي عندو الرابعة اعدادي منهم واحد الفئة الي غانشوفوها فهاد الحي وهاد العائلات الي فهاد الحي او القصة ككل ...
منهم شبان منهم شابات منهم الي خذا طريق الحلال وخدام كيترزق الله وحامد ربي وشاكرو على نعمه وفضله ومنهم الي خذا طريق الحرام باش يدخل فلوس وطريق #الفساد باش يعيش كيف بغا ويوصل لحياة الرفاهية وكاين الي فالحرام معايش رفاهية ماوصلها هههه ...
وكاين الي تزاد وسط الفساد ولقا راسو تولد منو وعاش فيه وكبر فيه وخدم فيه وكاين الي وخا عاش فيه وتزاد فيه ومنو ماخدمش فيه....
في احد محلات الجزارة الكبرى ف حي لالة زهرة وسط السوق من بعد ماتحرك فوزي من تم مبقاش تكلم مع عصام خوه الكبير شاب فعمر السابعة وثلاثون رجل مكافح من الصغر ماكملش قرايتو وصل حد الرابعة اعدادي وتوقف مع الاسف لضروف خارجة عن ارادته والي غانعرفوها من بعد ونعيشوها وعلاش وكيفاش تا وصلات بيه الوقت يخدم فتاگزارت (الجزارة) وفنفس الوقت يكون شناق اي يبيع الغنم وسط السوق نهار العيد الكبير لكن خدمتو كلها فالمحل الي الاصل تاع مولاه وهو داخل معاه بنسبة قلييييلة داكشي الي كيصورو كيعطيه ليه ويعطيه خلصتو فاخر شهر او الاسبوع او الكانزة كيف كنقولو الي هي كل خمسة عشر يوم ....
معاد"هز شطابة وسانيكروا وتيد خلطهم فالسطل وشاف فيه فين جالس كيحسب فالكناش ديال مالين الكريدي عاقد غوباشتو وحجبانو ملاقيين وشوفاتو يخلعو فاش كيكون مركز كيبان معصب حيث كيتستريسا مع الحساب وكثرة تفكير باش يحسب اش ناقص وشكون خلص وشكون يتسال خاص يقاد المسائل مزيان وينضيها على قولته ...
" : نسيق هنا ونمشي دابا عندي الحفاضة...
"مجاوبوش ...
ولا معاد حدر راسو وبدا يحك تما دنيا من فرتيت لحم الي كيقطع فالقطاعة ويطير تما ولا فوق الجدع ديال شجرة فين كيهرس العضومة وجيهة طحانة الكفتة ويحيد شحمة ...
ضربها لحانوت بحكة من داكشي وجافيل ريحتو تعطعط تا نقا ونشف وسمع اذان المغرب " المعلم هاني مشيت "حرك ليه راسو الي داير ليه طاقية كحلة ديال صوف حيث البرد وشتا ...
فوق سداري داك البيت صغيور فين متكية كتغلي بالسخونية ماشي سخانة وانما غير سخونية الوجع ديال ليغيگل وحاطة قرعة اتشي معمراها بالما طايب ودايراها تحت كرشها كتكمد بيها الوجع الي هلكها من العصر وهي تلوى تيليفونها صونا وعاود بدون متجاوب بنت فمعمر ستة وعشرون تقريبا...
وجهها تقطع منو دم بالالم كتعذبها وكتعرف كيفاش تعذبها ،،وهي فهاد الوقت مخشية فبيتها تحل باب الدار وتسمع صوته البح بحة الصوت الرجولي الخشن صوته الاصلي تزاد عليه كماية الگارو ...
كيعيط باسمها كيسمع انينها من بعيد حيث عرفها مريضة بيها من فوزي الي قالها ليه وحيث كتوجع بزاف حفضوها من نهار بلغات كيعرفوها كتعصب مكتبغيش تهضر كتديرونجا مع الوجع...
هو غير سمع صوتها المنخفض عرفها را مزيان رغم ذلك ...
حط شنو جاب فوق بوطاجي ومشا لبيت هز فوطة وخرج لطواليط فيها دوش نيت شعل شوفو وتطلق ما خلاه كيسخن فالسطل وحيد حوايجو بقا غير ببوكسر ،، طولة عندو كتلفت وكتاف عراض ماكيترينيش فلاصال معندوش ليزابدو عندو شي شوية الكرش هو طاگتو او كسدة ديالو هكاك دايرة حيث كان غليض فصغرو وطويل ولكن مع خدمة وتمارة الكحلة ضعاف على كيف كان عندو فورمة الگزارة هههه ...
كيف كيقولو كثير ماشي بدرجة ضخم نقولو مگضر باش نقربكم للصورة او الوصف شعر كحل ولحية سوداء كثيفة ملامح حروفه كحلة وبشرة سمراء بالشمش وتمارة الزنقة والخدمة ،،طبعه حنين بزاااف مع ختو بزاف ولكن فوقت الجد صعيب بزاف واعر ومجهد ،، تفاصيل فيه كل حدث كل بارت غاتبان اكثر فاكثر ونعرفو الشخصية ديالو اكثر ...
خوا عليه الما سخون وبدا يدوش دار عليه شمبوان كادوم ودوز عليه بالصابون ديال لكف ونقا حالتو مزيان من زفورية د.م حتى كمل ولوا عليه الفوطة نشف حالتو ولبس تما نيت حيث كاين البرد وخرج لايح فوطة فوق شعرو...
عينيه حمرين بالسخونية مشا لكوزينة رد المقراج ديال الما يطيب،، وجد براد دار اتاي فيه شللو ودار فيه سكار غير صفر المقراج طاب الما وخواه فيه وردو تاتشحر مزيان على عافية مهيلة ويدندن بصوت خافت اغنية الشاب بلال ...
"درجة درجة الى بغيت تربح،،عنداك غير طيييح ترضى بغييير الريييح تندم ندمة تخسر في لافيير...
" .عاد طفا عليه وقادو فالصينية ودار فيه نعناع تيميجا مخلط بالنعناع الحمرة قاد المسائيل سمع دقان الباب ومشا حل لقاه سيمو عشييييير ختو بزاف هو البيست ديالها معند عصام تا مشكيل بحكم سيمو وختو مراضعين يعني خوها كيهنا عليها وهي معاه ...
سيمو"تيحك فراسو حيث باقي مبوق بالنعاس " : هاكا الخو مشيت لي ف جوهرة هي الي فيها نوبة ...
الله يشافي تاندوز غذا ونشوفها .."خذا من عندو ساشية دوا سباسفون و خنشة دشفنج حدر راسو ومشا ماهضرش معاه عصام عارفو معصب بغا يكمي الله يعفو عليه مبلي بالجوانات وشراب وهو فعمر صغير صعييب عليه ...
" اما العيصومي او با عصام كيف كيناديو عليه صحابو ااو الاقارب ف تحرك حط شفنج فالطبسيل وقاد الطابلة فالبيت فين كيتفرجو جا فوزي تاهو بدل عليه ودخل عندها لقاها مكلكمة ف مانطتها مكيبان فيها والو عرا عليها المانطة وقلب راسها لقاه عادي غير هي غفااات وخا كتكمش عويناتها بالالم من الي جات من المركز وهي كتصارع فالوجع الما بارد الى شافتو يشدها الوجع بقات على نفس الوضعية فين حسات بيه حبس عليها شوي ...
عصام"نطق بصوت عندو غليظ اجش" : شوية دابا ؟!
"عاقد حجبانو كيتسناها تحاوب وتبين وجهها باش يركز مع تفاصيل ملامحها كيف كيدر معاها من وهي كانت فالگماط وهادشي الي خلاه يعرفها امتا مريضة وامتا جيعانة وخاصها لحليب ولا دارت فالكوشة البلدية اي تسرويلة زيوفة بيضين وكيتجمعو بكيلوط الميكة مرة مرة كتجيها ليكوش من بنت جارتهم الي كتجي من برا ....
بالمختصر دوز معاها دور الام والاب والاخ الاكبر ملي خلاتها مها وطجات من الدار ولحد الان لا يعرف شنو تلات بيها الحال !!!
"
فوزي" من البيت" : وتي نوضي العجلة تشوفي اش محطوط فالطابلة على رقبتي من هن وهن تادوزي فالخضر واليابس وتنساي المرض وحليب م م م كككك كريييم مريم كتبت مريم كتب كريييم ...
عصام"عض على سنانو ونطق " : فوزززي راجع البراد ولبدها (راجع البراد هي قلبو)...
فوزي: وااااخا ..
عصام: يلاه فرح ...
"هزات المانطة وطلات عليه بعينيها العسليين غامق شعرها خارجين منو شعبيطات ونطقات بصوت رقيق وعيان " : تقادا ليا دوا ...
عصام "مد ليها ساشية الي فيها دوا " : نوضي كولي ورجعي شربيه ....
فرح "كمشات عينيها" : واكلة شي تخربيق فالجمعية ...
غادي نشربو دابا ونوض عندكم ...
لهلا يخطيك اخويا ...
#يتبع...
━━━━━━━━━━━━━━━━━━━━━━━━━━
🔥 هل ترغب في قراءة بقية فصول هذه الرواية كاملة وبدون انتظار؟
✨ جميع الفصول متوفرة ومكتملة مجاناً وبدون إعلانات على موقعنا الرسمي:
👉 https://kimostories.site/novel/331/ولادة-من-رحم-الفساد
🌸 انضموا الآن إلى عائلة كيمو ستوريز واستمتعوا بآلاف الروايات الحصرية! 🌸
━━━━━━━━━━━━━━━━━━━━━━━━━━