اول شي حابه أعتذر عن التاخير الصار والتاخير ابد مو مني ..جان بسبب اصحاب القصه لان جان اعتراض عن بداية القصه واشياء بيها بعض الخصوصيه فضطريت يا بنات ارجع اكتب هواي اشياء ..وهل شي متعب جدا..
اسفه مره ثانيه .. بس الي يكتب قصه واقعيه يعاني من هل شي يعني اصحابها اذا ماوفقوا على كلشي بيهاا ..مارح تكدر تنشر شي ..
المهم يا بنات القصه شويه بطيئه بالاحداث بالبداية فقط .. لان اني من نوع احب اسرد كلشي بالتفصيل ..
اتمنى تعجبكم طريقي واذا ماعجبتكم هم كتبولي ..
لا تنسوا المتابعه ..والتقيم وتفاعل هل شي يشجعني ويدفعني للمتابعه ..وووبس احبكم ..
🦋🦋🦋🦋🦋🦋🦋🦋🦋🦋🦋🦋
جبروت الشيخ وقلبي
……
..
(البارت الاول )
كعدت الصبح على صوت صياح .. جنت بين النايمه والكاعده بعدين صارت هوسه وصياح عالي .. كمزت اباوع من الشباك .. شباك يطل على الحديقه مقابل المضيف .. جان المضيف معزول عن البيت هوخاص بعمي الله يرحمه .. بس وسع وكبروا ولد عمي بعده هسه يستخدموا للكعدات والطلايب والفصول مال العشيرة ماهميت ورجعت باوعت على مرايه شصاير بيه عيوني سود من جو ووجهي تعبان .. غسلت ونزلت للدرج اول مادخلت المطبخ .. شتميت ريحة سقي مال الحديقه .. وصوت ناصي يغني ..
غاليه .. صباح الخير ياحلوو
رقيه .. صباحوو حبي .. تعالي تريكي جاي اقلي بيض .. كله اتريقت بس اني وانت بقينه
غاليه .. خالتي وين ..لعد
رقيه .. كاعد تسگي بالحديقه .. ماتعرفينها اذا ماتكعد من الصبح تسگي ماترتاح
غاليه .. اصل تعودت اكعد واشتم ريحة الحديقه الورد والزرع والتراب من الصبح .. يخلي الصبح اله طعم ثاني
دخلت خالتي.. صباح الخير .. حبايب كعدتوا .. يالله تريكوا وحضروا للغدا ترى مابقى وكت
غاليه ورقيه .. صباح النور
رقيه .. يمه هستونه كعدنه نتريك وانتي حايره بالغدا
ام علي .. اي غير اليوم جمعه وجيت اخوانج .. ومااريد نتاخر عليهم بالاكل
غاليه .. لا تخافين خاله مانتاخر .. بس نكمل نجهز الغدا
ام علي .. الله يرضى عليكم
رقيه .. لعد شكوا اليوم بالمضيف سمعت هوسه من الصبح
ام علي .. اكيد مشكله صايره .. الله يساعد الشيخ علي كله فوك راسه .. والله من يتسودن عليهم مايلام
غاليه .. هو ليش ماانتضر شهاب ولولد احسن هو مابي حيل بعد لهاي الطلايب
ام علي .. والله يمه مادري .. يجوز شغله مستعجله. مالحك ينتظرهم
بعدها شلنه الريوك .. وكعدنه نعزل ونظف واني صعدت اعزل الغرف الفوك .. جان اكوا ٣ غرف فوك وحده جبيره على اليمنه وهي خاصه بينه اني ورقيه .. والثانيه والثالثه على جهه اليسرئ وهن وحده خاصه بزيدون من جان يمنه عايش بس هسه متروكه.. والثاني غرفة شهاب دخلت اعزله وارتب كلشي بيها .. دشاديشه .. وغتره وساعاته .. وحذيته وملابس البيت .. وقوط الي يلبسهم بالمناسبات .. كلشي يخص شهاب جنت اني اهتم بي .. حتى ترتيب غراضه وتنسقهن من خمس سنين واني اهتم بكلشي يخصه .. حتى عطوره اعرف ياهو اكثر واحد يستخدمه وياهو يحط منه قليل شنو عطره المفضل ودائما من ارتب اخلي قريب علي ..عزلته وعطرته وطفيت الضوه وطلعت ..
ونزلت .. ساعدت رقيه وخالتي بالغدا .. ودخل فجاه علي وهو ضايج
الشيخ علي .. جا والله مو شغله هاي كلش تعبت وحدي اركض هيچ وهيچ .. ولدج كل واحد رايح بمكان محد يفكر يقف بالعشيرة يشوف شكوا ماكوا
ام علي .. اي والله سوده علي .. تعبت وحدك شسويلهم غير انت كلت خليهم يشوفون مستقبلهم .. وهاي تاليتها
علي .. بوويه لمن كتلهم يشوفون مستقبلهم .. ويكملون دراستهم جان قصدي يسوا خير لنفسهم ولديرتهم .. مو يتعلمون ويهج كل واحد منهم بمكان .. جا لو اكضهم اليوم الا اني علمهم
ام علي .. هدي حبيبي واستهدي بالرحمن .. بعدين هذا شهاب وياك و يعاونك
علي .. هو هذا وينه عاد يقف وياي مو كلبي نشلع بهل العالم هاي .. كل شهر اشوفه مره .. والله تعبت مالي حيل بعد ولا قوه .. الا موت وارتاح عود يذكروني
ام علي .. يمه اسم الله عليك من عمري على عمرك .. بس اهدى هسه هم على جيه واحجي وياهم
علي .. يصير خير
بعدها كملنه الغدا وطفينه صارت الساعه تقريبا ب12 جنه بيومها مسوين دولمه ودجاج شوي .. سمعنه صوت دك بالباب
طلعت خالتي فتحت دخلوا سيارتهم مهند وزيدون جاين سويه ..
سلموا ودخلوا وبدات سوالف وضحك بينهم عاد وكتها علي من شافهم نسى التعب والهم والتهه يسولف ويضحك وياهم
ام علي .. يمه زيدون لعد شهاب وين ليش لسه مااجه ماجبتوا وياكم
زيدون .. والله يمه جان يمي الصبح تريكنه سويه وطلع كال انه اجي وراكم .. ورحت على مهند وجينه سويه
علي ...
انه دكيت علي قبل مااجي وكلي نفس الكلام .. راح اجي بس اخلص شغله ضروريه
ام علي .. انشاء الله خير بس غير يتغدا ويانه
مهند .. يمه صبي جا شنو يكتلنه الجوع والله شهاب مو اجه
ضحكوا علي
ام علي .. دومك كاتلك الجوع .. صبوا يابنات
مهند .. اي انه تعرفوا دكتور .. واصرف طاقه هوواي
رقيه .. يبووو كام يتباها .. ترى اخرك تخلع السن الي من اكع ينخلع لحاله ..
مهند .. اش ..لج ..بلا لغوي كومي صبي جابج انتي وشفهمج بالطب ..
صبينه وتغدوا .. وشربوا الجاي وبقوا كاعدين يلعبوا بلي للعصر .. اني ورقيه جنه بصف السادس الاعدادي .. اثنينه بالعلمي .. جانت عدنه امتحانات وكاعدين نقرا .. فصعدنه نقرا .. وعفنه خالتي وعلي بالمطبخ يحجوا ..
فجأ سمعت صوت سيارة دخلت الكراج طفرت اباوع
رقيه .. مادري شعاجبج بهذا الخبل
جانت عيوني مركزة على الي نزل من سيارة .. الهيبه وكشخه وطول .. وضحكه تارسه وجهه لبس دشادشه رصاصي غامق وشماغ لفه ليفوك .. وليحه وشوارب زايداته وسامه .. ابتسمت وحجيت
غاليه .. كلشي .. بعدين مو شكله هذا جهاد الي يمشي وياا.
رقيه .. جذب .. كمزت بصفي .. يمه كلبي فدوه للطول لج شوفي هذا الي ينحب .. باع الدشداشه والغتره ياكلن منه ..
غاليه .. دمشينه ننزل بسرعه
تركضنه للباب بعدين رجعنه .. اني جبت الشال ورقيه وقفت على مرايه تعدل بنفسها وتلف الشال زين .. وقفت بصفه وكعدت اباوع علي شكلي مرتب بي شي .. صرنه نتعارك على وقفت المرايه هاي واحنه نركض نريد نخلص وننزل
رقيه .. شويه بس اعدل كذلتي .. وخري عاد
غاليه .. ياا هو منو شايف كذلت سعاد حسني .. فضيها انطيني المرطب .. اخذته وخليت شويه علي خدودي
رقيه .. شسوين اكوا اختراع اسمه احمر خدود .. اكفي .. هااج حطي منه
غاليه .. لا هيج احلى يبين طبيعي :)
رقيه .. انتي قديمه شسويلج ابيض واسود .. 😁
غاليه .. دمشي .. لااسويج ملون
ركضنه على الدرج .. وقبل لا نوصل للاخير خففن ونزلن ندافع نوصل للصاله طلعت بوجهنه خالتي
خالتي .. احم .. جاا شكوا الي تكول عرايس .. وين تردن والله لو اريد شي ساعه ماتنزلن
جانت تحجي وهي تفر بديها علينه .. استحيت ودنكة اني بس رقيه قربت كرص خد خالتي وهي تغمزلها
رقيه .. شنو ماتخلينه ماترحمين ولا تخلين رحمة الله تنزل ..
ام علي .. اخ .. لا ياطيحت الحظ .. دمشي شوفي الولد متغداين لو لا
دخلنه سويه .. وسلمنه رد جهاد بالبدايه وبعدين شهاب .. بس جهاد بقى يسال شلون بدراسه وشلونه السادس وينه .. ورقيه ترد .. اما شهاب اكتفه رفع عينه باوع ورجع يحجي ويه زيدون ..
شهاب .. بس واقفات تلغن روحن صبن الغدا يالله
طبعا ركضنه اثنينه واحنه وحد تضرب بالثانيه .. شهاب عنده عصبيه .. ويرزل لو اكبر واحد كاعد .. والناس كله كاعده
رقيه .. شفتي .. شعاجبج منه تكول غول .. يطب من الباب شاد انذار .. عبالك كاعدين بجيش كلشي بصياح يريده .. عوذه من بشر
غاليه .. عوذ عليج .. لج لاتتعوذين عليه .. كلش بي حلو حتى عصبيته .. ولج هو الرجال لو ما العصبيه ينحسب زلمه ..
رقيه .. كبر لهذا العقل .. ولج هذواله كلهم الزلم كاعده ماشفت واحد يعيط غيره .. بس تدرين ..تستاهلين واحد مثله يكومج بكتل ويكعدج بكتله .. :)
غاليه .. ياا .. شفايتلي ولج اتمنى .. بس بالاحلام تصير
كاعد نحجي ودخلت خالتي .. رايحه انام .. تعبانه كاعده من صبح وهاي الحبايه تخليني انعس .. يمه ماوصيكم شوفن شيحتجوا وانطنهم .. وبعدين تروحن تقرا خوش
غاليه .. اي خاله .. لا يظل بالج روحي حبيبتي ارتاحي
ام علي .. اي حبيباتي ..يالله دربالجن
كملنه ودخلنه نقرا .. من اصعد سمعت صوت شهاب بغرفة خالتي .. جانت الباب مردوده .. وصوت مسموع .. نايم بحضنها ويسوالفها على جيش واقتحاماتهم .. وشلون يدخلون ويفتون المقرات .. وشلون يصير رمي عليهم .. جنت رايح اصعد لمن قاطعته خالتي…
ام علي .. يمه .. دخيلك ادري شجابرك على هاي المخاطرة
يمه عوفها هاي شغله .. وكعد ويه اخوك شوف الكاع الزرع الفلاليح .. الحلال ..شوف كيعانكم عشيرتكم شبيها مابيها…
شهاب .. يمه هي بربج شضل بالكيعان ترى اغلبها راحت الي نباعات والي صارت بيوت .. وزراعه وفلايح شو جاي يشتغلوا لحالهم .. ويطلعوا وارد وجهاد ومرتضى وحسين واكفين عليهم .. يمه ترى ماظل عدنه حلال تقريبا كله صرفه علي .. لان محد بعد يهتم بيهن والعالم اغلب الفلايح تجهت لشغلات ثانيه .. مثل البناء وحراس مدارس بعد ماتلكين فلايح قليل تردين اني اعوف الجيش واكعد اباوع على سعف النخل
ام علي .. لا ترجع بس تزوج .. خلي اشوف جهالك
شهاب .. بويه هذا الكلمه العاصيه بحلكج .. يمه ماتملين من هاي سالفه .. مااريد اتزوج خليني مرتاح هجي
ام علي .. ولك يمه الى متى .. العمر يمشي وانت يمه باجر عكبه تكبر تحتاجلك مريه الي دير باله عليك .. الي تعينك .. تحتاجك لابن يعينك على كبرتك
شهاب .. يمه شتعيني .. خليني مرتاح ماريد احد يعيني الله موجود .. بعدين هذوالك خواني ماشفت واحد منهم مرتاح .. الي ماخذ اثنين ومشلوع كلبه .. والي اخذ وطلق .. والي ماخذله وحده لامنها ولاجفايت شرها ..عوفيني راسي بارد
ام علي .. ياا .. انت ماتشوف بس الشغلات موزينه .. عوفك من اخوانك وخليني اني ازوجك الي بالي
شهاب .. يمه اعرف الي بالج فسدي سالفه احسن
ام علي .. ليش .. وين تلكه احسن من بنت عمك .. منه وبينه وترباتنه .. وتحطه على جرح يطيب بلسم .. وبنتي هاي اني ربيتها .. ويتمه تكسب بيها اجر لو اخذته
شهاب .. يمه .. هو زواج لو جمعيه خيريه .. بنت عمي على عيني وراسي .. لو شيصير ماتقبلها .. من غير سوالف امه ونوب هي جنها جاهل لا فهم ولاعلم .. من غير شي اني كارهه نسوان نوب هاي .. الا هاي
ام علي .. دفرته من حظنها .. كوم ياقليل التربيه هاي خالتك .. جيب طاريها كدامي .. ولك مو صوجك صوجي اني الي جاي .. احجي وياك .. والله ماتستاهل اظفره شهبان .. ماتعجبك دور امهات الحمر والكحل
شهاب .. اهوو .. اروح اصعد انام احسن .. راح تكلبيها علي مناحه شويه نوب ..
اني سمعته يريد يطلع ركضت ودموعي علي خدودي .. شكد كلامه قاسي ويجرح .. بس عادي تعودت دائما يعيده حتى كمت مااستغرب .. صعدت كم درجه وسمعته فتح الباب وطلع .. وخالتي تحجي وترزل وهو يضحك ولا عبالك…
.
رقيه .. شبيج مبوزه .. وكابه خلقتج عبالك واحد ماكل عشاج ..
غاليه . .ماكوا ..بس اسكتي
رقيه .. فوك ماجاي اطمن عليج
غاليه .. احس نار تطلع من صدري جاي احترك .. ومااكوا شي يطفي ناري
رقيه .. شنو شهاب اكيد ..
غاليه .. اي مثل العادة .. لوعرف شبي وياي جان ارتاحيت
رقيه .. عادي مو انت بس عنده مشكله ويه كل النسوان .. عوفج وتعالي نكمل قرايه
للعصر خالتي كعدت وصاحت علينه نزلنه لكينه مهند وزيدون وشهاب وعلي كلهم كاعدين بالصاله .. اجيت اكعد صاحت خالتي
ام علي .. يمه الورقه مال البارحه الكتبناها وينها .. جيبها للولد يرحون يتسوكونه
ركضت جبتها .. وخليتها بيد خالتي
ام علي .. يمه شهاب هاك .. هاي مال باجر دورت السنه مال ابوك .. تدري كل سنه نسوي طبخ .. جيبلنه هاي الغراض
شهاب .. زين يمه .. بس اكتبيلي شكد تحتاجين حتى مابقى حاير هناك .. زيدون تجي وياي
زيدون .. اي بس اصعد ابدل واجيك
مهند .. يمه اني ماكدر ابقى الباجر .. هم عندي عياده وهم اسراء وحدها
خالتي .. عوجت حاكها .. هي ماتريد تجي لا تجي .. خاف مو من مستوى الدكتورررره.. بس انت شجاك ماتبقى .. ماراح يصير شي اذا مافتحت العيادة يوم .. باجر دورة السنه مال ابوك .. وعمامك وعماتك كله تنكلب علينه وانت تريد ترجع تخاف من مرتك لا تزعل ..
مهند .. شنهي سالفه…
شدخلها مرتي .. اني علمود العياده .. وهاي اخابر وعزل باجر .. علمود لا تكولين تخاف من مرتك بعد ..
خالتي .. والله .. يمه حتئ لو بقيت .. انت لو ماتحسبله الف حساب جان هسه عندك خمس جهال .. ماتخلف ومجلبه بيك .. لا تخلف ولاتخليك تزوج
مهند .. يمه وكته هاي سالفه لو انتي الا تفتحين موضوع كلما تشوفيني .. يمه اني هيج مرتاح والحمدالله
شهاب .. بوويه انت لو ساكت من الاول جان خلصت منها .. مو تدري اذا بلشت بعد ماتعوفك ههههههه
خالتي .. هاا ولك هاي اني .. ولك صوجي اني خايفه عليكم واريد مصلحتكم ..
كام شهاب وباس ايدها وراسها .. يمه .. اشاقه انتي بكيفج احجي .. واحنه نسمع ونعبر عادي ههههههه
ضربته على صدرها .. دكوم كله كوم وانت كوم وحدك
شهاب .. راح تلوفينها علي .. اكتبيلي الورقه خلي امشي احسن
خالتي …
غااليه جيبي قلم واكتبيله شكد نحتاج
غاليه .. اي خاله
جبت قلم وخالتي .. تمليني واني واقفه بصفه وكتب شهاب كاعد كدامي على تخم .. وهو كل شويه يكلي .. ها خلصتوا .. واني اكتب وخالتي تكله لا بعد .. بالاخير سحب الورقه مني
شهاب .. جيبي شكثر فاهيه يربي .. انطيني اني اكتب .. هاا…
اها خلص .. سويتها قصة عنتر .. امشي زيدون
طبعا .. لزم يفشلني علي كلشي .. صارت عاده .. نوبات ازعل نوبات عادي .. وتقريبا بطلت ازعل لان ماتفرق عنده ازعل لو لا .. بس الواحد يستهضم بداخله .. اني تعلمت ابلعها .. واحاول مابين نفسي زعلانه بس خالتي تحس بيه ودائما كلامها يريح القلب ..
جنت واقف اعزل بالمطبخ من دخلت علي
ام علي .. يمه لاتزعلين من كلامه .. هو ارعن مايعرف يحجي عدل .. وادري انت حبيبه وعاقله وكلامه ماياثر بيج حبيبتي
غاليه .. خالتي .. عادي ماضجت ترى .. تعودت وانتي ماتعودتي كل مره تجين تصبريني بكم كلمه .. رحت حضنتها .. شيصير لو الناس كله عده مثل كلبج ياخاله
ام علي .. حبيبتي .. شعندي غيركم اني .. الله يفتحه بوجهكم وينطيكم كل واحد علي كد نياته
غاليه .. امين .. يارب
رقيه .. شنو هاي .. متحضنين واني مالي حضن .. لا دعوه حلوه ..
فتحت خالتي ذراعها وصاحتها ام علي ..تعالي يمه .. الله ينجحكم ويحققلكم كل الي تتمنوا بجاه امير المؤمنين ..
رقيه .. من حلكج للسما يمه .. انشاء الله
بعدها طلع مهند كال رايح .. عند علي .. واني ورقيه صعدنه نقرا .. وهي رتبت الغرفه واني طلعت اجيب مي .. بعدين باوعت على غرفة شهاب بس اجه كلبه كلها .. كمت عزلتها .. وشلت الوسخات وشمرتهن بالساله .. ومال الدوم علكتهن .. بعدين اغسلهن .. رتبت الغرفه ومسحته وعزلت غراضه .. من اريد اطلع اخذت الوسخات وبدلته ..العسكرية غسلتهن بيدي لان مايحب ملابسه ينغلسن بالغساله .. وشريتهن فوك ونزلت اقرا اني ورقيه .. لليل .. سمعنه هورن نزلنه .. طلع جايب الاغراض وكام يصيح كالعاده
شهاب .. يالله نزلن .. لو تريدن تاكسي توصلجن للسيارة حتى تنزلن الغراض
رقيه .. اي ..اي ..رايحين .. اعصابك ماعندك كلمه حلو ويه المقابل ..
شهاب .. ولج .. شكلتي
غاليه .. اخذته من ايدها وطلعت بسرعه .. ماكالت شي ..
غاليه .. مشتهيه كتله لو شنو ..
رقيه .. يمعوده .. يولي شايف نفسه .. عبالك بس هو شيخ مو ذاك علي شحلاته .. بس هو حجيه كله تهنتر وصياح
غاليه .. بس عاد لايسمع .. مالنه خلكه .. بعدين هو بس من اول يوم يجي هيج .. باجر يهدا ويحجي طبيعي
رقيه .. اي مو ناس على مزاجه عايشين
غاليه .. اش ..وشيلي ولحكيني
نزلنه احنه الاشياء الخفيفه .. وهو نزل الثقيلة .. طبعا شهاب هو وعلي اطوال كلش وضخام .. وخاص شهاب مبين اكبر من اخوانه بضخامته .. بس شكله مرتب وحلو هو احلى واحد بيهم .. وحنطاوي على بياض .. بينما علي اسمر ومهند لا ابيض بشقر .. وشويه متروس واكصر واحد بيهم .. ويلبس نظارات طبيه .. اما زيدون هم طويل بس ضعيف كلش و حنطي .. رقيه هم حنطي فاتح وشعرها بي نوع من الشقار .. هي وشهاب .. بس زيدون لا شعره وعيونه سود كلش .. اما اني فجنت حنطيه فاتح وشعري اسود كلش واكثر شي يميزني عيوني واسعه وحواجبي ثخان كلش وسود ورموشي طوال وسود وطويله اني اطول من رقيه رقيه جسمها اترس واقصر مني .. اني كلش ضعيف شكد حاولت اسمن ماكوا فايده باختصار…
تكدرون تكولون ان العائله كل واحد بيهم شكله يختلف عن ثانيه .. فخالتي شقر وبيضه بس گصير موحيل طويله .. وعمي الله يرحمه لا اسمر وشعر اسود .. بس طويل كلش وضخم وابوي هم طويل وضخم وناس تشبهه شهاب باابوي دائما حتى بصفاته ويمكن من هاي اني حبيت .. وتعلقت بي لان احسيت روح ابوي بي ويمكن لان طفولتي كله ومرهقتي جانت متعلق بي وبشخصيته .. مادري غير اول ماوعيت واني كلبي دگاته اله ..
أحبك وكأنك قد وضعت أمانة في عنقـي وكأن أمـك قد أستودعتـك في قلبـي ومضت مطمئنـة ، وكأن الكـون كلة قـد أوصـاني عليك 💜احبك
..…
. يتبع
للكاتبه ..
فراشة الياسمين ....
بنين الطائي ...............
🦋🦋…………………………………
.🦋🦋
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/122/جبروت-الشيخ-وقلبي
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━