جبروت الشيخ وقلبي
(البارت الثاني )
للكاتبه بنين الطائي 🦋🦋..
اول شي حابه اشكر كل الي يكتب تعليقات حلوة مثلهم ..اني طبعا اقرا كل تعليقاتكم ..وكلش يشجعني التفاعل حتى انزل اكثر من بارت باليوم ..فاريد الكل يحط نجمه ..ويتابعني اهم شي المتابعه وتعليق وياكم طماعه مو بيدي والله 😂 بس يشجعني هل شي كلش حتى استمر وياكم ❤..
شغل ثانيه بنات ..القصه واقعيه ميه بالمية
والاشخاص الي بالقصه هم ناس اعرفهم وهم كلهم اشخاص واقعين والله بنات ماجاي اكذب عليكم كلشي بالقصه حقيقي ..
بس طبعا طريقه الي وصلتها الكم الاحداث هي طريقتي ..وبعض الحوارت هي لزم تكون من الكاتب نفسه ..
حجيت هواي بس حتى اوصللكم القصه ..
وبس ..اتركم ويه البارت متابعه طيبه حبايبي ..🦋
………
……………
.………
شهاب .. جنت راجع من دوامي تعبان .. اني من ارجع اول يوم اكوم اشخبط وعصبي اصير بسرعه من التعب والبهذله الشوفها .. ثاني يوم لا ارجع طبيعي المهم جان المفروض اليوم اخواني يرجعوا لبغداد بس علمود دورة السنه مال ابوي .. بقوا
طلعن نفتر اني وزيدون ومهند .. جان علي مخلي جكم شغله علي من ارجع اخذتهم وخلصنه .. بسرعه عفت بيتنه متروس نسوان نسوان اخوي .. وبنات عمي وعماتي .. كلتهم من تكملون دكوا علي .. هم لو كملوا ناخذ الجدوره ونطلع كلنه للقريه بيت نسوان ابوي الكبار .. هناك بيتنه الجبير .. نتجمع كلنه حتى خواتي الكبار هن ورجولتهن .. فاامي تطبخ هي وعماتي ونروح كلنه هناك هيج كل سنه
المهم .. خلصت شغلي وكعدنه اني والولد على نهر ..نشرب اركيله واجه جهاد .. كمنه سوالف وضحك وراها طلع مهند وزيدون للبيت واخذوا السيارة .. واني كعدت ويه جهاد ..دك علي رقم
شهاب .. مااجاوب .. لو ماتريد تحجي كدامي
جهاد .. اسكت يمعود .. والله وحده لزكه صارلها اسبوع ..
شهاب .. هاا هي لزكه
جهاد .. وداعت ابوي حتى كتله مزوج .. وهي تكلي ميخالف كابله بيك .. شسويلها بعد
شهاب .. هههههه .. لا ياابوي شسوي عداك العيب .. شتريد لزكه لعد
جهاد .. تكلي معجبه .. وتريد صدك نوبات من فارغ وماعندي شي .. احجي وياها اكضي وكت هههه
شهاب .. شفت وتكلي ليش تكره النسوان .. بويه هاي ابوها لو اخوها لو يدري بيها شيصير بي .. يتعب ويربي وهي تروح تلزك لليسوا ومايسوا .. هاي نسوان
جهاد .. سويتني مااسوا مشكور يخوي هههههه
شهاب .. ههههه جا شنو فلمك ما فهمت القصد
جهاد .. اي يخوي فهمت .. خلنه نرجع لا امك تسويلنه سالفه ..
شهاب .. اي وعلي امشينه
رجعت للبيت جانت امي والبناات باره بالكراج ومشغلين العيون يطبخوا سلمت وطبيت بسرعه .. صايره هوسه .. دخلت تلكني عماتي تبوس وهلا بشيخنه وهلا .. سلمت عليهن .. وكالتلي عمتي تعال اريد احجي وياك اشوفك لاتجي ولاتسال .. كتله بس ابدل واجي
جاي اصعد وتلكتني لقاء بنت عمي ..
لقاء .. شلونك ابن عمي ..جا لاتسال لاتكول
شهاب .. هلا بنت عمي .. والله شغل وتعب ومالتهي .. ماعندي وكت
لقاء .. هيج .. صاير مانشوفك .. عمك دوم بطاريك .. يكول شهاب عندي مثل وليدي .. وانتي ماتسال علي
شهاب .. اي حقه عن قريب انشاء الله ازورا .. يالله من رخصتج ابدل وانزل ..
لقاء .. مرخوص ابن عمي
طبعا احجي وياها واني مارفع عيني بيها .. ولا انطيها مجال لان ادري بيها شتفكر .. وشتقصد .. واني وين ماروح اله وحده وراي .. امي مجلبتلي بهاي ثوله .. والي تشوفها جنها جهال بنت العشر سنين ماتكبر .. لو تاخر الخط عليها شويه تبجي .. حاسبته امي علي مرايه ..
وهاي الثانيه ابوي من كبل حاجي كلمه ويه عمي على بنات وكايله اريدهن لولدي .. وعمي جان مزوج الكبار الثنين وباقيات الصغار وكايله هاي زمن و لقاء الكم .. واخوي زيدون اخذ زمن وماارتاح وياها وطلقه .. وهي تزوجت بعدها .. وهسه لقاء لزكه تريدين اخذها .. واني مامعبرها ..
صعدت .. لكيت غرفتي مرتبه هم .. خوش الخوف يسوي من زمان نبهت رقيه علي غرفتي وهي ماتخلي شي يوكع وملابسي دائما مرتبات ونظيفات.. شكد السانها طويل وطلع كلام اكبر من حجمها بس .. كونها تهتم بشغلاتي وترتب وتنظف كلش بغرفتي ماا حسبها خاصه ترتيبها للغراض يعجبني .. اني احب اخلي كلشي بمكان وهي ترتبهم بطريقه حلوة .. تعلمت على ترتيباتها .. المهم دخلت شمرت الدشداشه وساعه .. واخذت الخاولي ورحت للحمام ..
كملت سبح…
وطلعت امشي على كيفي بالشورت.. باوعت الباب مفتوح .. وانه سديته من طلعت .. وانه اتسودن لو احد يدخل غرفتي .. مشيت سريع .. اباوع احد فاتح الكنتور وشايل ملابسي .. اول ماصحت .. منووو هنااا
التفت الي وعاطت .. فضحتني والعالم كله جو .. ركضت حطيت ايدي على حلكها .. اش وجع فصحتينه
.. لو احد اجه شيكول .. وشي ثاني شسوي بغرفتي ولج اني مو نبهه عليكم محد يدخل لهنا .. هاا
اشرتلي واني ايدي ضغط على حلكه بيها .. هستوني نزلت ايدي .. وهي جاي تاخذ نفسها سمعت صوت الباب وحده لخ صاحت
دلال …
يمه .. جاي تسوون .. هاي شنو عمتي تدري بيكم ..عزا .. عزا…
وركضت قبل ماافهمه نوب مني بنت عمي سالم القبل الصغيره.. دلال هاي عمرها ١٥ سنه بس عدها استعداد تخرب بلد .. لبست دشداشتي بسرعه .. ولج .. كله منج .. امشي اطلعي باره .. امشي
جانت هاي اول خطواتي .. اول موقف غيرحياتي كلها .. ماجنت مصور بسبب هل شي راح يصيرهيج من كلشي جنت مامن نفسي…
وماحسبت حساب الي راح اوكع بي…
&&&&&&&&&&&&&&
غاليه .. جاي نطبخ بالطرمه .. وحاطين الجدوره .. بيومها
بيتنه نترس ناس .. عماتي ونسوان عمامي .. وبنات عمي .. ونسوان علي اثنين .. وجهال ماكللكم .. نصهم طلعوا باره يلعبوا بالساحه مقابل البيت .. ونص الثاني ترسوا الحديقه .. وهاي خالتي تجيب وتصيح .. ولكم الشجرات ولكم الورد .. مااكوا فايده تكولون فيران كرضوا كل الشجر ..هههههههه بس اني احب الجهال اموت عليهم ماضوج منهم .. بس رقيه لا ماله خلك الهم جيب وتضرب وتعيط .. ونسوان بس يسولفن ماايدرن بجهالهن .. عاد خالتي التهت بالطبخ وعافتهم ..
دخل شهاب .. ويه جهاد .. وبنات عيونهن اكلنهم تكول ماشايفات زلم.. بس هم عينهم مارفعوها وباوع سلموا ودخلوا كبل .. اما لقاء فباوع عليها مااكوا .. شكد حقيره .. تنتظر فرصه تنفرد بيها بشهاب .. بقت كارصه جوا .. وشكد خالتي صاحتله مااجتي .. اعرف سوالفه
خالتي شاورت رقيه بس اني واقف بصفه فااسمع .. يمه روحي اقفلي غرفت اخوج بس يكمل تبديل .. روحي امشي
رقيه .. ليش يمه .. خليها شويه واصعد اقفلها
ام علي .. ولج امي ياغبيه .. لا تروح وحده منهن تذبله بليه .. بيها ماعيزني .. يروحن يخبلن الولد .. امشي بسرعه
غاليه .. خاله اني رايحه .. وهم اخلي ملابسه مال طلعه غسلتهن وكويتهن خاف يحتاجهن ..
ام علي .. اي يمه عفيه .. روحي
عفت .. رقيه وخالتي يسوالفن .. وصعدت باوعت .. الباب مسدود .. يجوز كمل وطلع .. بس ماشفته جوا .. احتمال راح بالصاله ويه الولد .. دخلت لغرفتي جبت ملابسه ودكيت الباب تأكدت ماموجود .. فتحت ودخلت لكيته شامر الدشداشه بالكاع شلته وخليتها بالسله .. وفتحت الكنتور علقت الملابس .. واني جاي اعلق سمعت صوته صاح منووو هناا
كمزت واني فاتحه عيوني .. باوعت جان ملابس بس شورت .. ونوب وبغرفته .. مااجه ابالي غيراشهق و اصيح بصوت واريد اركض .. بس هو سرع مني لزمني وحط ايده علي حلكي
يمه .. كلبي يمكن كام يقرا الف .. جسمي كله يرجف .. ورجليني ماتشيلني واحس سخنت من المستحه خدودي صارن حمر .. يمه شكد فشله .. نوب هو يحجي ويعيط واني مااسمع احس عايشه بحلم مو واقع .. اول مره احس بي هيج قرب مني .. ونوب هاي اول مره اصلا رجال يتقرب مني .. هو عصبي ويصيح وعيط عليه وعيونه يجدحن نار .. واني عيني على شعر منكع ومن يتحرك نقط مي على وجهي .. اريد اكف احلف بالله ماعادت رجليني تحملني .. نفسي نقطع وكمت اشهق اريد اخذ نفسي بس ايدي ماتت مااكدر اشر يبعد عني و يوخر ايده اتنفس .. لان انكطع نفسي .. هووحده من شافني هيج .. وخر ايده .. واني جريت نفسي
وفجأ سمعت صوت .. يم الباب كمزنه اثنينه .. جانت دلال بنت عمي .. وتاشر بااديها .. وتصيح عزاا .. عمتي تدري بيكم وركضت .. هو صاح وراهه.. بس ركضت هاي شعله .. ماتضم سالفه بحلكه .. يمه عزا .. راح تفضحني نوب الموقف الي جنه بي اي احد يشوفه غلط
بالفرفه وهو جان قريب عليه ونوب مالابس ملابسه .. لزمة وجهي .. بعد مااعرف شسوي .. اخذ دشداشته وصاح بيه .. امشي اطلعي .. يالله كله من وراج ..
ركضت واني بالقوه اتنفس .. دخلت للفرفه اباوع علي وجهي احمر نار .. يمه صخام بس لا تروح تفضحني هاي نوب اليوم من دون الايام كله مجموعه…
بيها عليها يربي
كلت انزل احسن ماابقى واجيب الشبهه لنفسي .. نزلت ودخلت للمطبخ .. جانت هاي ابليس الصغيره كاعده ومدوراتها .. لقاء وبنات عمتي فاطمة.. ويبسبسن على كيفهن .. من شافني سكتن ويباوعن علي .. جانت نظرات بنات عمتي غريبه ومثل الي مامصدقات .. بينما هذنيج عيونهن كلها شماته .. عرفت حجت واكيد زيدات بنت رجاوي .. امهات البلاوي .. سويت نفسي ماادري وطلعت كبل للطارمه .. تلكتني رقيه
رقيه .. شكوا .. شبيج وجهج احمر
غاليه .. بعدين احجيلج ..اشرتله افتهمت اكوا شي بس مااكدر احجي
خالتي جانت ملتهي ويه عماتي وهن يسالنه بيها علي فاتن ليش مااجتي شعجب
ام علي .. خطيه تكيف تجي .. بس تدرون جهاله كلهم مدارس .. ماتكدر تطلع بس بالعطل
وحده من عماتي ام جهاد ردت عليها .. جاا اي فدوه لعينها الله يحفظها هي ووليداتها
ام علي .. امين
اجتي مرات عمي سالم رجاوي .. تتمشى وتباوع علي .. وتحجي من وراء خشمها
رجاء .. جاا .. ام علي لشوكت ابنج يبقي ساكت .. البنت تكبر ماتصغر شوكت تخطبوها
ام علي .. خيه اني شبيدي .. لو يريد جان من عيني اخذ بناتج .. بس هو كارهه طاري الزواج كلش
جاء .. جاا هو الكارهه .. لو انتي ماتريدين تاخذيله من بناتي .. عبن خاله باله غير وحيده
ام علي .. شلج بهذا الحجي كلشي ماخاله باله .. قابل اجيبه مربط كوه ياخذ بناتج
جاء ..هن بناتي لان .. محترمات نفسهن ماترديهن .. من كون انتي خاله بحلكه حلاوة شكوا يزواج بعد
خالتي علت صوتها وذبت الجفجير من ايدها .. ستقصدين رجاء .. شعندج سالفه .. احجي خلي افتهم
عاد عمتي ام جهاد ردت هم عليه .. جاا شنهي سالفتج .. كل مناسبه تسوين سالفه .. هو الولد ماهاوي زواج اصلا بعد شعندج هجي تحجين ويه مراه
رجاء .. جاا .. على كيفجن لا تاكلني بلسانج .. وشكلت اني غير .. اريد ارسالي على بر .. شنهي ذنب البنت تنتظره وهو تاليته لغيرها .. تحجي وعيونها علي ..
خالتي ردت عليها .. ماكتلج حبيبيه بقي بنتج .. تردين تنطيها الله ومحمد وعلي وياها .. دائم قسمه زينه زوجيها خيه ..
رجاء .. لا .. اني بنتي ماضاله الف الي يتمنونها .. اشو جمال ودلال .. وطالبة اداب سنه ثالثه .. كله تتمنى اضفرها والله .. واني ادري انتي مليتي راس ابنج بنت اختج .. مثل مابقيتي وراء زيدون لحد ماطلق زمن ..
عاد خالتي وكتها علت صوتها .. لهنا وكافي .. ترى مسختيها هواي .. شملي براسه .. اني ابني لو املي براسهم جان هسه جهالهم بطولهم .. بس عايفته يقرر وحدها لان حياته هو وهو مو بس ابني .. هذا شيخ عشيرة مسوول عن الاف ناس .. مايمشي غير باليشوفه اصلحه اله.. وثاني شي زمن وزيدون ماعمري دخلت بحياتهم .. وبنتج يمج وساليها .. كل مشاكلها اني ورجلها واني ارجع اصالهم .. واخر مشكله انتي تعرفيها كل زين مالي دخل بيها .. ولادخلت بينهم لا من قريب ولامن بعيد .. وهاي العالم كله تشهد
عاد ردت عمتي هم ....
والله ندريج ام علي .. ونعرف المشاكل تصير بين الزلمه ومرته .. عاد انتي اصيله وبنت اجاود ودائم نكولها مااكوا مثل تربيتج الولدج وللبنات الله يحفظهم بجاه امير المومنين
كلها ايدت كلام عمتي .. بس مراة عمي عوجت حلكه وماعجبها .. بس ماحجيت شي بعد ..
بعدها كملنه عاد كلشي .. ورجعت الاجواء ضحك وسوالف وبنات التمينه على جهه نحجي .. رغم نظرات لقاء الي كله حقد هي واخواتها سبحان الله كلهن نسخه من امهن .. وعدهن قدره غريبه ان كل وحد منهن تحسيها تحجي بلسان الثاني .. لو حجيتي سالفه كدام وحده بيهن حسبيها وصلت للعمارة كله .. ماجنت ..اهتم هواي بكلامهن كله سم بس ماعبرهن .. حتى بنات عمتي شكد يتلوكن وياهن بس هن خطيه .. دائما ماينطن باله الهن .. ويحبنه اني ورقيه كلش فمن صار نقل للجدوره باره بنت عمتي اكبر مني هي مخطوبه صاحنلي علي جهه
دعاء .. غاليه .. اني اريد انبهنج من لقاء واخواته .. تري حاطتج بالهن .. ويتحجن عليج .. انتي انتبهي علي نفسج خيتي ..
غاليه .. شنو يحجن .. كالن شي
شفتها كامت تمتم ومبين نحرجت ماتريد طلع سالفه بس اكيد هل البليسه هاي حجت وسوتله سالفه ..
كتله لا تخافين مايهمني حجيهن .. غيره زايده مو اكثر
دعاء .. ضحكت .. جااا السانج حلو .. تتحجين مثل اهل بغداد .. علي السان خالتي فدوة
غاليه .. ههههه ماكوا فرق بس صدك الساني اني ورقيه .. اخذ علي حجي خالتي ..
طلع جهاد .. وكال تحضروا حتي نروح يالله
جنه اصلا لابسين شالتنه وصاياتنه .. رحت جبت حذائي .. ونزلت .. واجتي رقيه هم اخذته ونزلنه كلنه .. نص بعبي ونص هيج صايات
نقسمنه مجموعات ناس راحت ركبت ويه جهاد وعماتي اجاني ولدهن اخذوهن .. بقينه اني ورقيه وخالتي وبنات عمي سالم فبقى جهاد بسيارة وشهاب بسيارة .. لقاء اخذت خواته وركضن لسيارة شهاب…
بينما رقيه مجلبه بيه نصعد ويه جهاد .. خالتي كامت تحجي ودردم عليهن .. وهي من غير شي فاير دمها من امهن .. ركبنه والطريق كله خالتي تكرض .. امهات المصايب .. وسكتت خفت احجي ونوب صايره هوسه وسالفه ماتنحجي .. تخجل ..
لهناك دخلنه كلنه .. الاكل لكينهن قبلنه واصلات.. بيت جدي جان جبير كلش .. وبي ساحه جبيره .. تلكنه بنات عمي الله يرحمه اخوات شهاب من غير ام ...
هن اربعه بس مااجايت بس اثنين فاطمه وزهراء.. عماتي الي هن نسوان عمي الكبار هم جانن موجودات سلمن علينه كلهن .. وكعدنه جوا البيت جان جبير كلش وكله غرف .. بس هو قديم .. ومسوينه مال عرب اهل قبل .. درج خارجي ومابيه محجر كبل درجات .. وبرا حديقه وثيل جبيره .. وطرمه للنص فرشوا للزلم بالحديقه .. والنسوان جوا بالغرف .. واكوا نسوان كبار اثنين بوسني وصارن يبجن .. من ذكرن ابوي .. خالتي كالتلي هذني وحده عمة ابوي .. والثانيه مراة عمه .. المهم كلمنه الغدا .. وصبينه الجاي .. وكعدنه شويه نحجي ونسوالف .. نسيت وكتها الصار…
بعدها .. سمعت صوت شهاب دخل يصيح على خالتي .. جنت صافن لمن لزمتني رقيه من يدي
رقيه .. لج .. ماتحجيلي .. شنو الصاير .. احجي محد يسمع كلها بالداخل
جنت واقفت بالمطبخ ونباوع من الشباك على طرمه ..
حجيتلها كلشي .. وهي شهكت
رقيه .. يااا عزه .. ولج صابج يمعزايه ودخلتي .. هسه يسونها سالفه هذني بس يدورن مصايب
غاليه .. كافي اني اصلا من وكتها وبطني تلويني واحس بالم .. وخوفه عبالك انتظر حكم الاعدام .. شمدريني يصير هيج .. ولج والله كلها ماتعدت السالفه ربع دقيقه .. بس الحظ يريد يسويها ..
رقيه .. هسه اسكتي ولا تحجين شي ولو رجعنه .. نشوف شلون نحلها
جنت شايله هم بس من حجيت الرقيه ارتاحيت شويه .. بعدها رجعنه كلنه .. واني كبل للغرفه .. استحي اباوع بوجهه شهاب احس مسويه ويه مصيبه .. رغم والله كلشي ماصار بس اني خفت كلش يكول هي تقصدت تدخل وتسويلي سالفه .. جان طبيعي مااحسيت بي شي لو يمكن الهدواء قبل العاصفه ..
نزلت وكت العشاء سوينه اني ورقيه .. ونسولف بسالفه .. واستغربت من مراة عمي وبناته ماحجن شي .. كلت بلكي .. شافن محد يصدكهن وناس تحترم خالتي كلش ويحسبولها الف حساب .. وهم شهاب يدرون بي عصبي ومايتفاهم ..من هاي ماحجن .. ماكوا غيرها .. ارتاحيت شويه وكملنه عشاء وتنظيف وصعدنه نقرا .. جان صوت الولد عالي وهم يحجوا ويضحكوا .. كلت الحمدالله معانها ماكوا شي ..
ثاني يوم بدلنه من الصبح جان يومها الاحد .. داومن وعفنه خالتي وحدها وزيدون ومهند .. سلموا وراحوا لبغداد من السته .. احنه بالسبعه ونص رحنه للدوام .. جنه نطلع بصايات وهناك نذبها .. لان مايقبلون نطلع هيج بملابس المدرسه .. فمتعودين على هل شي .. وكل بنات تقريبا مثلنه .. لان يمنه ناس ذبت عشاير مايقبلوا بنت تطلع مكشوفه هيج .. رقيه جان دائما تضوج وتكعد تحجي .. متخلفين .. ومايطورون لزم نصخم يالله يقبلوا عبالك .. بينه جرب .. ابقى اضحك عليها اتسب الف مره قبل ماتطلع .. ولزم تكعد تراسل جهاد وتتغزل بي .. والله لو يدري بيها جان سوها فلم .. شكد احجي مايفيد بيها…
&&&&&&&&&&&&&&&
شهاب .. كعدت الصبح على صوت امي .. باوعت ساعه عشره ..
بوسته وصعدت اركض .. سبحت
امي .. يمه .. علي كيفك تعال تريك وروح
شهاب .. لا يمه .. مالحك عود بعدين .. يالله محتاج شي
امي .. لا حبيبي الله ومحمد وياك
شهاب .. مع سلامه
طلعت للسيارة .. وكبل رحت لعلي .. كالي تعالي نروح لفلان عشيرة عدنه وياهم كعده علمود طلابه .. البارحه حجيتلك بيها ..
طلعنه .. سويه وهمزين ماجنه متأخرين على ناس .. تلكانه جهاد ومرتضى .. وابن عم ابوي رجال جبيروكم زلمه من العشيرة و اخذنهم وطلعنه تلكونه العالم .. خوش ناس ودخلونه مضيفهم .. وحجايه منه وحجايه منهم .. نحلت سالفه .. جلبوا بينه للغدا ماقبلنه .. علي كلهم عندي علاج مااكدر اكل بدونه .. وتعذرنه وطلعنه ..وصلت الجماعه ورجعت ويه علي لاهلي .. لكيت امي .. دك وتلطم
شهاب ..شكوا شبيج يمه
امي .. بعد شيصير بيه .. تعال ابو علي شوف شصار بيه بعدك .. منين ماحطه تتصخم .. ولكم شلون بيه فهموني ..
علي .. اسكتي كافي صياح .. فهمينه شصار
جاي نحجي ودك جهاز امي .. فتحته وكامت تغلط .. وتصيح واليوم اني اعلمهن .. والله لسوي بيهن الماصار .. سدت وقامت تصيح .. بنات رجاوي .. امهات السحوره نوب علي .. اني اعلمهن .. اني يحجن بيه وبناتي .. والله لخليهن فرجه للعالم .. كله هاي علمود تمشي بناته براسي ولج مالكيتي غير .. هاي سالفه .. اووف اني علمهن
شهاب .. شنو فهميني .. شصار تخبلتن انتن
ام علي .. ولك يكولن .. عليك انت وغاليه .. تتوعدون سويه .. وبيت .. ولك سونه سالفه ونشرنها بكل مكان .. اني تالي عمري هيج يطلع علي بنات وابني وين بيتي والله لو الزمها رجاء ..اكلها بسنوني
وكتها عرفت اكيد سالفه ماتضل بحلوكهن .. كله من هاي الغبيه .. ولكم اني شيخ شهاب .. هيج يجبوني بسالفه ونوب عيبه بحق بيتنه لو نعرفت وطشت هيج سالفه .. نوب بنت عمي وعايشه وياي .. جاااا بعد شخلصه
علي .. يمه كافي .. لايروح يصير بيج شي .. جاا هي تايهه يااهو اااليجي يحجي .. غير لوصدك طالع منهن نص جلمه على شهاب لو غاليه .. الا اكص السانتهن وحق علي
امي .. يمه .. دك علي سهام وسالها هن حاجيات كدامها .. دك وشوفها
علي .. سهام مرتي .. جاا كون هي جابتلج السالفه لعد
ام علي .. هي لو مو هي سالفه كله سمعت بيها .. دك وسالها
علي .. لا هاي حتى سالفه صفيره تكبرها .. ادكن على رحمه هاي احسن ماتزيد بسوالف ..
جنت اسمع واني ساكت اشوف تاليها .. ودك علي علي مرته الاولى هاي ماعدها كاله وكلت .. تحجي سالفه مثل ماهي .. بالبدايه ماحجت بعدين علي عصب عليها وكلها اجي .. اشمرج لبيت اهلج .. لو طلعتي سامعه هيج سالفه وماحجيتي .. حجت ويه وسد .. وباوع علي بنظرات غضب ..
علي .. انتي قبل ماتهدين علي عالم .. اسالي ابنج .. ليش ساكت .. شيخ شهاب .. ماتحجي .. جاا شنهي صار بينكم بالغرفه .. وشايفتكم دلال بنت عمي ..
ام علي .. ضربت علي صدرها .. يمه .. عزه العزاني .. شصار ولك .. ماتحجي
شهاب .. شنهي .. تركبوني ذنب بالكوه .. ترى ماصار شي .. وهي بنت اختج الثوله .. جاا اني طلعت من الحمام لكيتها بغرفتي جنت بطرك الشورت .. وتكلب بغراضي صحت بيها .. وهي شافتني ثبرت الامه تصيح .. سديت حلكه ماردت العالم تسمع وكله جوها .. كلت يحجوا غير سالفه .. وصيحت عليها لان دخلت للغرفه بلاماادري .. بلحظته اجتي هاي دلال وفهمته غلط .. ردت الحكها افهمها ركضت بسرعه .. هذا كل الصار .. بعد شنو ذنبي سالفه وكعت بحلوك نسوان
امي ..اصخام بوجهي .. وبعدين .. اخليهن يحجن بكيفهن .. لا هذني يخلني علج بحلوك العالم
علي .. يمه يكلج سالفه مامقصوده .. واذا علي بنات عمي اني اروح علي عمي سالم العصر .. وخلي يظبهن شويه .. جاا وانت نوب لاتطلع بطرك شورتك تفتر بالبيت البيت بي نسوان .. احترم نفسك شويه .. يالله اروحن اني
امي .. ابقى تغدا ويانه يمه .. سوده عليه دومك تجي تلكه مصايب كدامك
علي .. صدك ..جذب يمه .. هاي شنو سوالف عاديه تصير وداعتج .. ولزم اروح لان عندي دواء قبل الاكل مااكدر اكل بدون ..
امي .. روح يمه الله وياك
تغدينه اني وامي .. هن بالمدرسه وكعدت اخدر جاي وامي كاعد على ميز الطعام .. كملت صبيت الي واله .. شويه وهي راحت تنام بس ظلت تحجي وتدعي على بنات عمي وامهن .. لحد مانامت .. عفتها وصعدت سبحت واريد اطلع .. تذكرت علي من يكلي لاتطلع بعد بشورتك .. ضحكت .. جاا هو منو اكوا هسه .. طلعت ورحت للغرفه باوع على كنتور ملابسي مال طالعه مكويات ومحطوطات .. تذكرت هاي جانت دور بملابسي .. ايجوز رقيه انطته الملابس تحطهن .. لا رقيه تخاف مني وماتخلي احد يدخل للغرفه غيرها .. تمددت ونمت على جربايه ..
كعدت العصر على هوسه وصياح بالبيت .. ركضت اريد اطلع تذكرت مالبس شي .. اخذت دشداشه لبسته ونزلت اركض على درج .. جانت رقيه وامي .. ومرات عمي ودلال وعمي وصياح وعركه .. دخلت اركض ..
شهاب .. شكوا شبيكم ياستار .. صوتكم وين واصل شصاير
عمي سالم رد .. عمي هاي وياشر على بنت .. شافتكم بغرفتك انت وبنت عمك بوضع مخل لو لا احجيلي الصدك
شهاب صدك عصبت وطلعت روحي .. جاا شنهي بوضع مخل .. خو كولول جنت ازني ومادري .. بسرعه عاطت مرته .. ياا شوف رده مال واحد بايع ومخلص .. وهذا شيخكم .. هو هذا الي ملزمي العشيرة .. لودرت ناس شتحجوا شتسولفون .. نوب ويه بنت عمه .. جاا من كون مايتزوج .. اثاري شبعان بلحمكم وانتم نايمين ..
اني صعدت عندي وكمت اصيح .. جاا لو مو حرمه .. ومرت عمي جان هسه لزمت لسانج وكصيته .. وعرفج شلون تجيبين طارينه على السانج ..
عمي كام يصيح .. ويسكت بيها .. وهي تكول نجيب قران ونحلف ونشوف منو الجذاب .. امي كامت تصيح وصارت هوس .. بالاخير امي تخربطت وركضت بيه للمستشفى .. ضربوها ابره مال ضغط لكوا صاعد عدها .. ورجعنه
عفته نايمه بغرفته .. وصعدت بقيت اليوم كله اكل بنفسي واريد اروح اسحلهن هذني هن وامهن بس عيب من عمي خطيه هو هم صار بموقف ..
ثاني يوم الصبح كعدت على صوت رقيه
رقيه .. شهااب .. كوم .. ترى اجه عمي سالم ويه علي ويصحولك بالصاله
كمت بتضايق .. شكواا ..خير
رقيه .. مادري انزل شوف
نزلت لكيت عمي وعلي كاعدين وامي .. سلمت وكعدت
حجه عمي .. بوويه ..انه اجيت حتى اخذ بنت اخوي وياي للبيت .. جااا هذا احسن حل .. انه بيتي كله نسوان وماعندي غير اياد وبعد صغير
امي .. لااااا ..شلون ترضاها ابواياد .. بنت اختي كل عمره عايش يمي وماتطلع من بيتي .. هاي امانة اهله .. وترى حجين مية مره ساالفه كله مجرد سوء تفاهم وانت اعرف ناس بشيخ شهاب ماتطلع منه الموزينه .. وهاي بنتي ترباتي مااتغلط بشي وترها طفله وبلا قصد دخلت لغرفة شهاب انه كتله تحط ملابسه بكنتوره .. وهو دخل فجاه وصار الصار قابله سوا شي مو زين ياسامح الله ..
عمي سالم ..بوويه ادري كل هذا ..الحجي بس بالعالم الي بعد ماتكدر تسكوا حلوكهم .. وانه ادري برجاء لواموته كتل ماراح تجوز من سالفه .. وراح تظل تسولف بيها بالقرية وبالمنطقة واشوف انسب حل ان نجيب البنت عندي ومثل مانت خايفين على هل امانة انه هم حاسبه بنت من بناتي وماريد العالم تجيبه بالطاري
كمت افور بالكوه اصبر بنفسي ماحجي بس وصلت لخشمي بعد ماكدرت اسكت .. جاا شنهي صدك جذب منو هذا اليجيب عرضنه بالطاري لو يحجي علينه نص كلمة والله لسحله وسوي فرجه للعالم ..
علي التفت علي وحجه .. هدي بويه .. عمي كلامك على عيني وراسي واريد بيك تريد تسكت الحجي .. بس بوويه لو سوينه هجي .. راح نثبته على نفسنه وراح نكول احنه مو كد الامانة وماكدرنه نصونها .. وهجي نثبت للناس ان هم صدك غلطوا ..وانت ماترضها بحقهم
عمي سالم .. لا بووية مارضه .. بس هم نسد اذانه ونكعد ماترهم .. وانت تعرف هناا عدنه لوطلع نص جلمه عن بنت تصير سمعته بحلوك الناس وانه كلت دام سالفه باولها خلنه نحله وانه ابوك ..
امي ..اهم شي عندي بنت اختي تبقى كدام عيني مااريدها تتركني ولاتبعد عن حظني لا اني اكدر على فراكها ولا هي تعيش بعيد عني ..
عمي سالم .. خلص بويه ماكوا غير حل واحد
علي .. كول عمي شنهو ..
عمي سالم .. احسن حل شهاب يتزوج غاليه .. هيج تعيش بنصكم ومحد يكدر يحجي نص كلمه .. وانه اكول تعجلوا بالسالفه وخلنه نخلص من هاي السالفه ..
جاني حجي عمي مثل الصاعقه بقيت مصدوم شنو اتزوج .. شنو احسن حل .. ماالكيت نفسي غير نهضت وحجيت
شهاب .. شبيكم انتوا كل عقلكم تحجوا .. هو انه شسويت تركم كبرتوها وعضرتوها .. بس تردون تحطونها براسي .. والله لو تنكلب الدنياااا ماتزوجهااا وانه كلت ماغلطت بشي والي يريد يحجي نص كلمة والله ثم والله الا اطق ركبته وخلي بعد مايحجي عمره كله ..
عمي سالم .. بووويه ..ترى مو هيج مايصير تندفع وتصرف بهل شكل .. هو راح تكعد تفصم ركاب العالم واحد واحد ادري مجرم .. لو ارهابي هو هيج الحجي بعدين تعال كلي وشبيها بنت عمك بوويه والله الكل تتمناها وردة وبلسم للجروح ..
علي .. عمي خلص .. نطينه وكت انه راح احلها.. بس خلنه مانستعجل ونظلم احد بقرارتنه
عمي سالم .. خلص بوويه اعتمد عليك انت حلها شيخ .. انه هم تعبت كفيلك الله ورسوله صارلي اسبوع ماضايق النوم .. وهاي هي وبناته دزيتها لاهله اريد اخلص منها ومن منكراتها الماتخلص وانه مريض مابيه حيل ..بوويه اعتمد عليك انت عاقل ورزن وتحلها بعقل ..يالله في امان الله ..
علي .. خلص عمي ..توكل بالله ..واعتمد علي ..الله وياك
بعد ماطلع عمي ..انه بقيت على وكفتي ..اشرلي علي اكعد
امي حجت…
شوف علي .. انت شيخ وجبير اخوتك .. وهاي سالفه صارت لو جذبنهم .. اليوم باجر تكبر .. وتصير اكبر .. وتاليها يمه بنت عمك تصير العار طول عمرها .. واخوك محد يحترم .. علي ابو ماحفظ على عرض يحافظ علي عرض الناس .. هاي بنت عمك وامانة امها وابوها .. وهذا اخوك وشيخ من بعدك وصغيركم .. انت حلها يمه اني تعبت بعد مابيه هبطات .. ترى لو طشت السالفه شماتن هواي يمه .. والله نصير سالفه بحلوك العالم .. وادري ماذنب بيها لا غاليه ولا شهاب .. بس يمه العالم ماترحم لو سمعوا طارف سالفه من واحد لواحد تكبر .. ونوب البنت عايش ويانه من صغرها .. بدال مانحافظ عليها ونصونها نخلي ناس تحجي بيها .. انت شوف شلون تحلها لان تعبت اني مابيه بعد .. مابيه
علي صاح على غاليه
هي دخلت وتمسح بدموعها .. كعدت بقف امي .. اخذتها بحظنها
وهي تحجي .. كاافي يمه ..سوده علي صار بيها كون الله لا يوفقهن على سواتهن كون الله يطلع حوبة هل اليتمه بيهن ..
علي ..تعالي بويه يمي تعالي غاليتي صدك جذب هذني يبجنج وانه اكول بنت ابوها هاي .. محد يكدر يهزها تالي تفشليني هيج ..
تقربت كعدت بصفه هو حظنه ويمسح دموعهاا .. انه ادري بعلي يحب غالي وكنما بنته وهي صغيره جانت كلشي متعلقه بي .. بس من شفته هيج حظنها ويمسح بدموعهاا مدري ليش ضجت واحس اختنكت بودي اكوم واسحله
علي .. جااا شنهي هااي مكليلي منين تجيبين كل هاي الدموع .. مصنع عندج ماال ماي ..كاافي بوويه وفري شويه راح تخلصيهن كلهن ..
غاليه ..ابتسمت على حجي علي .
علي .. اي ..هاي الخدود مايلوكلها غير الضحكه ..بوويه شوفي احنه مانريد نجبرج على شي اهم شي ماتنظلمين ويانه .. سمعتي اكيد حجي عمج .. وانه هسه اسالج .. بوويه انت مو افقه تتزوجين شهاب ..
هي خجلت وخدوده صارن حمر دم ..تكرفست على نفسها .ودنكت ..
علي .. شنو تستحين مني ..ترئ انتي لحد مارحت للمتوسطه وتكليلي بابا .. شنهي كبرتي وصرتي تستحين ..بويه هاي حياتج محد يجبرج على شي ..
ماحجت كلشي بقت ساكته ..
امي .. يمه انتي بنيتي وتبقين طول العمر وحده منه ..وزواجج من شهاب يطمنه اكثر ويخلينه نامن انت تظلين بحظني وكدام عيني .. وانت حر بقرارج احجي يمه وكولي الي تردي حتى ماردتي تزوجي علي يشوفله حل ثاني .. بس فكري بالاول ..
علي .. خلص يمه ..عوفيها براحته تفكر .. كولي بويه انت تردي شنو .. لا تضلين ساكته احنه اهلج وماله داعي تخجلين كدامنه وهاي حياتج تردين تفكرين .. لو تردين هسه ..
غاليه وهي مدنكه .. لا خلص ..الي تشوفه شيخ انت سوي .. وانه مثل ماكلت اعتبركم اهلي وماعندي غيركم .. انتم قرروا واني الي تكولوا اسوي ..
علي .. الله يحفظج .. ويكملج بعقلج .. بنت ابوج صدك ..ترباتنه .. وخليتيني افتخر بيج غاليتي
امي .. تربايتي .. الله يريح كلبج مثل مادومج مريحه كلبي ياغاليه يابنت الغاليه ..
علي .. خلص .. شهاب .. تحضر لزواجكم ..
اني بوكتها واحد وضربني على راسي .. وبقيت صافن .. شنو انه مالي وجودي .. شو اخذوا رايها ..وخلص اني لزم انفذ .. لو تموت ماتزوجها……
..
يتبع……
.. 🦋🦋…………………………………
🦋🦋
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/122/جبروت-الشيخ-وقلبي
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━