جبروت الشيخ وقلبي
البارت الثالث
الكاتبه بنين الطائي ...
اشكر كل وحده تابعني اول باول ..وتدعمني
بس حبيت اكول شي بنات ادري اكوا اغلاط املائيه بالكتابه وادري بعض الحوارات بيها خلل
بس ترى هاي فقط بالاجزاء الاولى من القصه ..
بعدين راح تشوفوا غير شي ..
مثل ماكتلكم سابقا هذني البارتات عدت كتابتهن اكثر من مره ..وجانن كلش متعبات ..
بعدين نهاية القصه راح اكلكم سبب ..
اتركم ويه البارت واكوا بارت بليل هم ينزل متابعه طيبه حبايبي ..❤ 🦋
...........
………
.…………………………………
غاليه .. بالمدرسه جان عدنه استراحه رابع درس المدرسة مااجتي .. فكعدنه بالساحه بمكان بعيد عن الشمس .. قريب من عدنه اكوا شجره جبيرة مال نبگ .. رغم هي بنص الساحه وشكد ذب ورق بس محد يكصها يقولون هاي علويه وتشور .. فمحد يجرا يكصها .. من اول مانبنت المدرسه ولهذا اليوم موجوده ..
المهم احنه نحب نكعد قريب منها .. اني من نوع احب القراء كلش .. بنات عبالهم اراجع الدرس بس اني بصراحه احب اقرا روايات كلش .. وتعلق بيهن وخلي الروايه بنص كتاب الانكليزي واقرا بيها .. خالتي تكول امي جانت هيج تحب الروايات .. وجانت خالتي تروح لشارع المتنبي بس حتى تشتريلها قصص وروايات .. بعد وفاة امي خوالي جابولي كلشي يخصها جان بالبيت .. ومن ضمنهن هاي الرويات .. احس بيها روح امي .. نوبات الكيها ماشره على مقطع لو قصيده .. احفظها عن ظهر قلب .. نوبات الكي اسم والدي على الصفحات وداير ميدور كلب .. افرح من صدك .. كلما اقرا روايه احس ان الابطال امي وابوي .. كل ناس تحجي بحبهم .. غير بس شهاب دائما يكول امي سبب بموت ابوي .. ويخرب كلشي بداخلي .. المهم جنت اقرا روايه لاحسان عبد القدوس .. هذا كاتب مصري لكن كتاباته مشوقه وقصص روعه ..
جنت اقرا .. واخذ حب من ايد رقيه واكل .. وهي ملتهيه تحجي ويه البنات .. لحد ماصار حجيهم عن قصص الحب .. والي يحبن يحجن عن الاشخاص الي يحبنهم .. وجانن يسالن بعض .. ورقيه تحجيلهم ان كلش معجبه بي بس هو ولا يعبرها ولا مهتم بيها .. وكل مره تسوي نفسها وحده معجبه وتكعد تتصل بي .. وهن يضحكن عليها لحد ماوحده حجت ..
..جاا ليش ماتخلين غاليه تعلمج .. وكتها موبس يباوعلج حتى يعشكج .. ويجوز ياخذج بالاخير ..بما ان هي عدها خبره بهاي سوالف ..
وكتها نفضت ايدي وصحت بيها .. شقصدج .. شنو هل الكلام اني منين اعرف بهاي سوالف
رقيه .. شنو هذا حجي .. منين غاليه تعرف بهاي سوالف .. بحياته مامسويه علاقه بااحد بعد شنو هذا حجيج
ردت علينه وهي تعوج بحلكها .. انه شعلي روحي اسالوا بنات عمكم .. هي تكول اكوا علاقه بين غاليه وشهاب .. وتحلف اختها شافتهم واحد يبوس الثاني بالغرفه ..
وكتها كل البنات الواكفات صاحن .. عزا .. شنو .. معقوله .. وحده تباوع للثاني اني خشيت بنص هدومي وماعرف شرد بعد .. حتى الساني نعقد .. وجهي صار احمر واحس اذاناتي كامن يوشن .. مابيه اوكف علي رجليني .. ساعه السوده يربي دخيلك هو اني شسويت وهيج يصير وياي .. ماحسيت غير دك الجرس وطلعت كل بناات ونترس الساحه .. كلبي وكع .. احس نفسي بنصهن مثل المشوهه لو مصلخه .. وناس تباوع علي
رقيه .. بس عاد ضبي السانج .. وخلي بحلگج وقسم بالله اذا عدتيها لروح احجي للمديرة .. وانت تعرفين شلون تحب تسمع هذا الحجي .. والله الي يطلع نص كلمه على بنت عمي اكص السانها .. وهذا الي جيبتنه بطاري شيخ شهاب .. كله تهابه وتخاف منه .. ولو طلعت نص كلمه من وحده .. لاخلي يطلع الحق من اهلها وانتن تعرفن اهلجن .. كبل يكعدونج من المدرسه .. وترى بنات عمي كلها تعرفهن ماغايتهن غير يشوهن سمعت غاليه .. بلكي شهاب ياخذ منهن بس لو يموتن امي ماتلفيهن .. سمعتن لو اعيد كلامي
كلها سكتت وخافن من حجي رقيه .. بس اكيد لو ماحجن كدامنه ورانه شراح يحجن .. اخذتني ودخلنه للصف .. حاولت الزم نفسي شكد مااكدر وخلص الدوام .. صار الدرس الاخير شطوله عليه .. المدرسه تشرح .. واني بالي وين اكيد كلها هسه تحجي بيه .. وناس صارت تشوفني بطريقه مو خوش بنيه .. اوف يربي وين جانتلي هاي ..هو اني شسويت الكل هذا ..
رجعنه للبيت.. اني ركضت للدرج اريد اوصل .. وشمر نفسي وابجي .. وعفت رقيه ركضت على غرفة خالتي تحجيلها ..
رقيه .. كافي حبيبي كومي بدلي .. وتعالي ناكل .. والله امي متحلفتلهن اليوم .. كومي
غاليه .. والله مااشتهي اكل .. تعبانه واحس جسمي كله يوجعني
رقيه .. ميخالف حبيبتي هاي لان انقهرتي .. انشاء الله قهر بكلوبهن .. ادبسزيات .. شكد محملات علينه مايستحن ماعليج والله امي وشهاب ماراح يسكتون عليهن ..
كمت غسلت وبدلت .. ونزلت جو اول مانزلت خالتي صاحتني اني ماتحملت وبجيت هي قامت تفور وتكرض بنفسها ..
ام علي .. روحي يمه تغدوا .. اني اعرف شلون اعلمهن بنات رجاوي .. اذا ماخليتهن يتوسلن اني مااطلع بنت ابوي .. اني اعلمهن .. الساقطات امهات السحوره .. ولجن شفنه كلشي وسكتنه وطمطمنه كلنه عيب .. بنات عم ومحسوبات علينه .. لو طلعت سالفه منه .. تالي يشمرن سوالفهن علينه اني اعلمهن .. اووف خلي الزمها هاي دلولي الا افصم ركبتها ..خرابات البيوت ..
رقيه .. تعالي نتغدا .. ماعليج هسه امي تعلمهن
عفنه خالتي دك على عمي سالم .. ودخلنه المطبخ صبت رقيه اكل .. وخلته علي ميز اني غسلت وكعدت .. مااشتهيت اكل .. اخذت لقمه وكمت .. كامت تحجي عليه رقيه .. اكلي يمعوده .. ماعليج هذني بس يغارن .. لاتقهرين روحج مايستاهلن هن يردن يقهرنه والله ..
سمعت صوت خالتي تصيح .. ادري انت لعد مورجال البيت ماتعرف تسكتهن ..…
شلون وهن ماخلن واحد ماحطن الحجايه بحلگه حتى بالمدرسه نوب .. من عزه بعينهن مرتك وبناتك خرابات البيوت .. لاهن يرتكبن على عالم .. اي كله المرتك الماتستحي كافي عيب خاله هل يتيمه انتي وبناتج وبالياتها …
. اي .. مثل ماكتلك .. سدته وهي ترجف .. وتحجي
ماطولت نص ساعه اجه عمي وجاب ويه مرته وبنت .. واني كعدت بالمطبخ .. مادخلت لان ماعندي قابليه احجي ولا ادافع عن نفسي دائما جان السكوت هو طريقي يمكن لهذا السبب هواي تاذيت بحياتي ..
المهم خالتي اول شافتهن كامت تحجي وتصيح .. ومراة عمي تحجي .. وعمي كل شويه يرزلها ويسكته بس بدون فايده .. اخر شي نزل شهاب على الهوسه .. وهم كام يصيح ويتحلف لمراة عمي .. وهي تكله تحلف بنتي بالقران شافتكم .. وهو يغلط بدون ماينطي مفكه .. بعد شهاب وعصب خبطه كلها .. عمي فقير ورغم غلط شهاب على مرته كدامه بس ماحجى وكله اهدا ابني كلشي ينحل بالتفاهم .. بس مرته ماسكتت وردت علي .. وهو رجع يصيح .. اخر شي تخربطت خالتي .. واجتي رقيه تركض تلكيتها يم الباب ..
..شبيها خالتي .. رقيه
ركضت جابت العبايه .. لاتخافين هسه راح ياخذها شهاب للطبيب
اني كلبي كام يخفك .. خطيه خالتي شصار بيها من وراي .. والله لو صار عليه شي منو الي غيرها بالدنيا .. دموعي جان عشره عشره
عمي راد يروح ويه شهاب .. بس شهاب كاله اني اخذها وراحوا .. عمي اخذ مرته وبنت وهو يدردم عليهن .. ويصيح ساعة السوده العرفتج بيها .. وهي تحجي ماتسكت .. لان كشفت حقيقة اهلك ماترض .. اي لان اليحجي الحق محد يريده .. طلعت من طرمه وهي دردم
رقيه غمتها من الجامه .. كشره ام المصايب .. ماتسكت هاي والله لو ماامي تخربطت جان شهاب بعد شويه يلزكها بالكاع ..
اجوا وراء ساعه .. ولكوا خالتي مرتفع ضغطها .. رحت سويتلها نوم بصره .. واجيت هي ماقبلت تدخل للغرفه كعدت بالصاله ..وخطيه بس تون ..وهم يباوعون عليها واحس كلش نقهروا ..
اني هم مقهور عليها وكلبي نار ..نوب يروح يصير بيها شي من وراي ..وياريت على شي يسوا لو صدك مسويه شي قسم بربي محد راح يلزمني وراح العالم كله تحجي ماكوا مثلها ولا مثل اخلاقها ..
استغفر الله ..بس هو الفقير الناس تبلي بلوه خاصه اذا جان ضعيف مثلي مايكدر يدافع عن نفسه ..
ثاني يوم .. الصبح
اجه عمي سالم .. وصار حجي بينه وبين الشيخ علي ..
اني وكتها نص الحجي ماسمعته جنت ابجي وراسي ورم وعصابي نهارت عبالك مسويه ذنب .. وافكر شلون بعد اواجه الناس .. وشكد احب المدرسه واحب اكمل بس وكتها حتى فكرت اترك الدراسه .. مالي قدره احط عيوني بعيون احد بعد .. ماحسيت غير على حجاية عمي من كال
ماكوا حل غير غاليه تتزوج شهاب ..هيج بعد محد يجيب طاري حجايه
ماعرف شصار .. واني صح احبه بس بحياته ماتمنيت اتزوجه .. حتى مبينتله يوم حبي اله
اني جنت احبه مثل اي شخص يحب شي حلو يدري هذا مواله بس هم يحبه .. مثل الناس من تحب النجوم تدري بحياته ماراح تلزم نجمه ومارح تصير بيدهم بس يحبوهم وهم بالسماء .. مثل اي بنيه تحب بطل روايه تدري مو اله بس تتعلق بي وتتخيل اله بس حيقيه تدري مو اله .. حب من طرف واحد وادري بي مايفكر بيه ولايريدني اصلا ..فراح اكون الخسرانة الوحيدة بهل العلاقه .. بخيالي جنت اعيش ويه قصص خياليه .. قصص حب ماعشتها ولا راح اعيش بيوم لان للاسف واقعنه مو مثل خيالتنه
يعني بخيالي رستم شخصية شهاب .. وحطيت بيها كل صفات الي احبها ..
بل الواقع مر .. وشهاب غير خيالي .. بعيد كل بعد ماعنده اصلا ذرة رومانسيه ولا يفكر بالمراه غير ان هي شي ماله اهمية مجرد ادوات نخلقت حتى تخدمهم وتسعدهم ..
فنصدمت ماريد اعيش ويه واحتك اكثر .. لان اكيد راح انصدم وعيش بظلم ..
هيج احساسي بشهاب .. نصدمت وماعرفت احجي لكن ماردت اتزوجه .. اعرف ماراح يكون الشخص الي اتمنى بس استغربت كونه ماحجه لحد هسه .. بس ماطول دقايق ونهض من التخم وهو يصيح
كام .. بس علي كدر ياخذ وكت من عمي سالم ..راح خطيه كوة يمشي مبين تعبان هم نشلع كلبه ويانه ..
ماحسيت غير علي صاحني .. دخلت واني عيوني مغوشه ماشوف طريقي من الدموع الي بعيوني ..
كعدت بصف خالتي .. صارت تحظني وتدعي على رجاء وبناته .. وهي تمسح بدموعي حسيت بامان بحظنه وان كلشي راح يعدي بخير ..
علي صاحلي ..اكعد يمه .. كعدت اني جنت اعتبره ابوي ..ولزلت اشوفه والد الي ..كبرت واني اكوله بابا .. لان هو يتعامل وياي فعلا كنما ابوي من اني صغيرة ..
فدائما من يشوفني ابجي لو مكسوره ياخذني بحظنه احس بامان ..وحنان كنما ابوي الي حاظني ..بس اني من كبرت كمت استحي منه لان ادري بي ابن عمي ولوجان جبير بس مايصير ..
بس خطيه من شافني هيج كلبه حن علي كنما ابوي الرباني ..اخذني بحظنه وصار يمسح دموعي ..
صراحه نسيت كلشي وحسيت بامان ..وحنان واحس الدنيا كل مو بعيني بعد
حتى حجيه حلوو ..ويدخل الكلب ..يربي مو اخوا ونهار كله ويه بس ماخذ منه اي شي بس الهيبه ..انما الاطباع فختلاف واضح ..
من طلب مني وسالني .. حسيت ان همه احن علي من نفسي وخجلت احجي كلمة وتفشلهم .. فااحسن شي هم يعرفوا شنو الاصلح الي .. وهيج كتله انت اعرف بمصلحتي وعفته وراهم…
بس بعدين اكتشفت ان اكبر غلط بحق نفسي ارتكبته
خليت غيري يختار الي حياتي .. ونسيت ان هذه حياتي اني واني الي اقرر واختار الي اريده
بس استغربت سكوته لحد هاي لحظه
بس مجرد ماكله علي ان خلص لزم تتزوجوا .. بركان ونفجر…
شهاب .. جاا شجاكم تقروا وحدكم .. اني شمسوي عمي وحق الله لو زاني مايصير بيه هيج .. شنو سالفه .. بسرعه قررتوا تزوجوني .. كسرت وجهكم لو تعديت عليها .. وداعت ابوي مااخذ هاي .. لو بس هي تبقى بنيه وطفر وكام ..
كام علي يصيح ويغلط علي…
وخالتي تصيح ..بقى يحجي ولاعبرهم صعد فوك .. وركع الباب بكل قوة
خالتي شويه .. وهم تخربطت بس هل مره طگ خشمه دم .. وصرنه نصرخ ونبجي مثل الجهال الصغار .. علي كمز لزم راسها .. رفعه وصاح شهااااااب تعااااال بوووويه
اررررركض
جنه نبجي ولزمين اديها وعلي رفع راسها اني خليت وصله علي خشمها اكطع نزيف .. نترس الوصله1 دم واني ايدي ترعش .. نزل شهاب يركض تخبل من شاف خالتي لزمها هو وعلي وطلعوا .. للسيارة جنت لزمه خشمه .. خله شهاب ايده بدل ايدي وركبها بالسيارة وراء وكعد يمها وعلي طلع كبل بيها للمستشفى
بقينه وحدنه واحنه ساعه وحده صبر بالثانيه وساعه نبجي .. طولوا هل مره وصارت الدنيا ليل .. ودك علي علينه بالعشرة كال لاتخافون مابيها شي هستوها وعت وكام تحجي .. راح نطلعها .. وسد ماكمل ..
رقيه .. الف الحمدالله وشكر قلبي راد يطلع عليها
غاليه .. والله الحمدالله وشكرا .. اني منظر الدم ماراح من بالي كلبي راح .. كلت صار بيها شي
اجوا تقريبا بالعشره ونص بليل .. دخلوها كايدينها علي وشهاب كل واحد من جهه .. وخلوها بالجربايه
علي .. يمه نامي هسه ورتاحي .. وبعد تفكرين هسه لو صاير بيج شي . جان شكلنه .. شحجينه .. كله من وراء سوالف تافهه وتنحل .. لاتقهرين روحج فدوه اروحلج .. باسه من يدها وكصتها
خالني كوه تحجي .. اريد ابدل .. اهدومي هذني كلهن دم ..
علي .. بويه بدللها يابنات .. طلع هو وشهاب
واني ورقيه كمنه نبوس بيها ونبدل اله .. وهي كل شويه تبوس وحده وتحظنه .. وتحجي لاتخافن مابي شي .. سوده عليه هبطتجن بليل .. وجوهجن صفر صايره
رقيه .. يمه فدوه الج من رجعتي بخير
غاليه .. خاله فدوة لاتقهرين نفسج بعد .. فكري بينه بلايج وين نروح .. ترى لو صار بيج شي نموت وراج والله
ردت بس كوه تحجي .. اسم الله عليكم يمه ..
جانت نعسانه .. يمكن منطينها فاليوم .. بسرعه غفت وصاح علي علينه .. رحنه للمطبخ جانوا يحجوا هو وشهاب .. ويكله الحمدالله طق خشمها دم .. لان ضغط هواي صاعد .. لو مانزفت جان صارت عدها جلطه .. بسرعه شهكنه اني ورقيه .. صاح بينه علي
علي .. اشش .. لا تكعدنها .. علكيفجن واحمدن الله وشكرونه عدت بسلامه
كعدنه واحنه نحمد الله انه هي بخير ماصار بيها شي .. باوعت شهاب شكله باجي عيونه حمره .. لو احتمال لان نقهر وضاج هيج شكله .. حجه علي
علي .. جاا بويه اكلوا هذا كباب جبنه ويانه .. تعشوا ولاتخافن مابيها غير العافيه .. واني اليوم ابات يمكم خاف يصير شي بليل
ماشتهينه ناكل كلوبنه صايره نار .. بس علي طلع وكام يحجي علينه .. اكل وخطيه كام يسوي لفات الي ورقيه .. وشهاب ماقبل ياكل .. كله ادري بيك شويه نوب تجوع عفتلك .. بالعلاكه .. صاح جاي بسرعه راسي صاير طبل
كمت سويتله وصبيتله وكعد يشرب.. وشهاب راد يكوم صاح علي اكعد عندي سالفه وياكم
جاا شوفوا انتم الاثنين حضروا روحكم .. الاسبوع الجاي عرسكم .. ومااريد نقاش ولا حجي بالموضوع .. وشهاب شفت شصار باامك مااريد نعيد الحجي .. خلص بنت عمك اخذها واسكت وسد حلوك ناس .. وارضي امك ..وهاي اخر مره احجيها .. وانت بكيفك بعد يخوي مو صغير انت واني اعلمك .. بكدك اني ابني صف اول بتدائي .. بقت يمك يخوي
شهاب ماحجه غير .. يصير خير
نام بيومها يم خالتي .. وعلي بالصاله .. واني ورقيه نمنه بغرفتنه .. بس ماكدرت انام بقت سالفه تجيبني وحده توديني ..
ثاني يوم رحنه دوامنه .. وماصار شي رغم جنت مالي رغبه بكلشي .. بس جسمي وحده يتحرك وعقلي بمكان ثاني مامصدكه كل الي يصير وياي
من رجعت تفاجت بخالتي تكلي عماتج على جيه .. ياخذنج حتى تجهزين جهازج مال عرس ..
رديت عليها .. خاله وشهاب
ام علي .. دكومي .. ماعليج منه .. هو اجاني الصبح اول ماكعد وكلي .. موافق بزواج وشتريدين اني حاضر وباس ايدي وراسي
غاليه .. يعني معقول شهاب وافق .. بعدين كله حتى مايخسرج لان شافج تخربطتي وافق .. مو صدك مااريد اني هيج زواج عفيه خاله.
ام علي .. كاافي ولاتضلين غبيه .. هو حس بغلطه ورجع وافق .. بعدين ياامي الولد اكثرهم قبل زواج يكول مااريد .. واريد ابقى بدون قيود ومسؤولية .. بس وكت يشوفون المريه ومدارتها والحنيه.. والمحبه يبطلوا ويكولون وين جنه وهسه وين .. بسرعه يجلبوا بنسوانهم .. يمه كل الي اريده منج .. تعتبري مو بس زوج لا اعتبري ابنج تحملي منه وداري وگومي بكل واجباته وانتي شوفين شلون يكوم مايستغني عنج .. خوش بنيتي
غاليه .. مااشي خاله الي تشوفي
ماعرف ليش بس وكته امنت بكل كلمه كالته خالتي .. وكلت ليش لا .. يجوز بمرور الوكت شهاب يتغير ويبطلع يتعامل وياي هيج
جنت افكر وصعدت على درج .. باوعت جانت رقيه مبدل وجاي تنزل
رقيه .. يالله بدلي وتعالي راح احضر الغدا اني .. اشرتله بااي وكملت الدرج .. قبل مااوصل لغرفتي حسيت علي
نزل فصرت بوجهه دنكت خجلانه اباوع بوجهه
فصار كدامي .. حاولت اروح للجهه الثاني ..بنفس وكت حركته هم صار كدامي
ماحسيت غير دفعني بيده .. دوخري .. شكد فاهيه الخاطر الله ..
بقيت لااخذ ولا انطي ..يربي مايتعامل وياي ابد بالحسنه لزم يهيني شراح يخلصه ويه ..
اخذت نفس وصعدت للغرفه جانت دمعتي بطارف عيني ..اول مادخلت نزلت وتبعته الثانيه والثالثة .. صارن يذبن عيوني دموع وحدهن احاول اوقفهن .. مايفيد
بعدين مسحت دموعي .. كافي مايفيد بعدني بالبداية من هسه راح اضعف شراح يخلصه .. زواجي منه .. راح يدمرني .. هذا انسان متسلط .. بس كلبي شسويله هم مايقتنع يبعد ولا ينسى ولا جاي يتاثر بااي كلمة ولافعل .. من شهاب
بس نزلت وراء مابدلت .. وتصرفت عادي .. مابينت قدام خالتي اي ردت فعل مابينت حتي ان اني مااريد اتزوج ..
شهاب وجان كلش عصبي .. ويتعارك ويه الكل
شهاب ..جاا جيبن السم .. لو اليوم مانتغدا للعصر
خالتي ...
علي كيفك يمه تري اختك جاي تصب
شهاب .. شمسويات زقنبوت اليوم ..
رقيه .. تمن ومركة مال فاصوليا
صبينه وكعد ياكل على ميز .. شنو هاي التمن ماامستوي زين .. ومركه مابيها ملح .. شبيجن ماتعرفن تطبخن .. كل وحده شكبرها بس فالحات بس بالمسلسلات وتلفزيون 24 ساعه مگابلاته . .
خالتي .. علي كيفك يمه .. تري مابي شي الاكل .. وهذا ملح حط .. ماتسوا كل هاي العصبيه
شهاب .. مااريد حتي سم .. كايم اروح بره البيت صار يخنك
رقيه .. يااا جاا شبي هذا .. يريده بس حجه .. اصلا الاكل مابي شي والله
غاليه .. خاله شهاب يتصرف هيج .. لان ماايريد يتزوج .. تخيلي لو تزوج شراح يسوي لعد .. خاله السالفه ترى نسدت وعمي هددها لمرته وكتلها هي وبناته .. وبعد محد يحجي بسالفه .. لا تزوجينه .. ترى مااريد اخذ واحد مجبور بيه . راح ابقي طول عمري احس بالذله .. ماابحياتي راح ارتاح ويه .. تركينه هيج احسن
رقيه .. يمه والله حجي غاليه صحيح .. هذا خبل ماينعاش ويه .. الا باجر يسوي بيها فلم هندي .. ماينحمل اوي شنو من بشر
خالتي. . بس .. دكافي لا تضلن تحجن بكيفجن .. ولو سكتت هسه باجر لو صارتلج قسمه كل حجايه شكبرها يطلعن عليج .. اخذي ابن عمج ولاتاخذين الغريب .. وبعدين من شنو خايفه اني يمج .. وعلي ويانه وداعتج بس بالبدايه باجر .. بس تصيرين مرته كل هاي العصبيه الفارغه تروح .. كومي يالله حضري نفسج
غاليه .. احضر نفسي لشنو
خالتي .. خابرت عمتج .. تجي تشتريلج جهاز مال عرس .. اني مابيه اكوم من لهنا .. تعبانه لسه
رقيه .. جاا يمه فدوه خلي اروح وياهم
ام علي .. شنو انت عروس هم .. اكعدي واسكتي هن يروحن ويرجعن بسرعه
غاليه .. خلي تجي وياي خاله .. تسويلي واهس لان مالي واهس
صدك .. جنت ماامرتاحه .. ولا عبالك عروس تحضر عرسها .. خايف واحس حياتي راح تصير صعبه بسبب شهاب .. بس مابيدي شي اسوي .. جان بعد يوميا وشهاب يلتحق .. خالتي بلغت الكل زواج شهاب الاسبوع الجاي .. وصارت تحضر كلشي علي سريع .. واني ماعندي اي راي يكلولي تعالي هيج اروح .. تعالي منا امشي .. ماعرف شبي عقلي .. واقف ماايتحرك .. مثل ان تحس كلشي يمشي بسرعه وانتي ماتعرف هذا قرار صح لو غلط .. مااتعرف تحس كنما موحياتك هاي .. الكل يتحكم بيها الا انت .. مااجنت احجي ولا اسوي كلشي هم الكل مخبوص .. الا اني بس اصفن ..وكت عماتي وحده تروح وحده تجي .. هن تكفلن كلشي .. حتى جهازي كلشي ماختاريت منه جانت عمتي هي تختار .. ورقيه هم اختارتلي كم شغله اني كلشي ماعرف بعد حتى اختار ماعرف عبالك دماغي مو براسي
صار الكل يعرف ان غاليه وشهاب راح يتزوجون .. وكلها مستغرب ليش وشبسرعه .. جان جواب واحد يوصل للكل
بنت عمنه ومنا وبينه .. وانتضرناها تكبر حتي نزوجهم بس هيج بالاختصار ..
شهاب جان كل يوم يزيد بعصبيته اكثر .. ويدور مشاكل من جوا الكاع لحد ماجان المفروض باجر يلتحق .. جنت كاعد اعزل بغرفتي من سمعت الباب نركعت باوعت…
نهبطت دم مابقى بوجهي ..
شهاب .. كومي .. لج روحي كليلهم ماريد اتزوج ..وفضيها اني مامجبور بيج .. انتي اخر وحدة افكر بيها .. شنو ماصدكتي كيفتي وافقتي .. كل ظني راح تبطلين وتحسين وحدج بس الظاهر مثل امج .. تركضن وراه الزلمة لحد ماتودنه لكبره بديجن ..
همزين جان شالي علي راسي .. بالعاده من ادخل غرفتي اذبه بس هل مره باقي علي راسي عدلته وحجيت .. صدك ضوجني من جاب طار امي
رديت علي بس بخوف واني مدنكة .. واني رفضت والف مره .. بس خالتي مصره وماتقبل اتناقش وياها .. وبعدين انت زلمه وشيخ وكلمتك مسموعه جاي تطلب مني اني اسوي الي المفروض انت تسوي
وكته ماحسيت غير تقرب مني اني لا ارديا نزيت ورجعت ليوراه نضربت بالكنتور ..عصب علي وصك سنونه وحجه
.. لج زلمه وشيخ غصبن عنج وعن اكبر واحد .. بس لو مااخاف علي امي يصير بيها شي وعلي اكبر واحد مايطخ راسي بي .. بس امي تسمعلج ..تروحين هيج مثل شاطرة وتكليل انه .. ماريد هذا الزواج
غاليه .. واني مااكدر اكله ..
تقرب مني اكثرورجعت علي كنتورلزكت بي واني احس كلبي طلع من قوة ضرباته
حجه .. جاا يعني مااخايفه وتحجينها بنت امج والله .. لو ردتن زلمه تجيبنه تجيبنه .. بس مو اني يااغاليه .. انه مو مثل عمي ماطيح بنفس الشبجه .. اني شهاب كلها تحسبلي الف حساب ..حضري روحج للعذاب والجحيم
عافني وطلع .. بقيت ارجف من خوفي منه رغم جنت لزمه نفسي كباله ...
هذا شبي شنو عباله اني سويت كل هذا متعمده حتى اتزوجه ..شهل المصيبه يربي لا بيه ابطل ومااتزوجه ..والا بيه اكمل ويه واستمر احس راح يدمرني ..بس المشكله ان احبه ..وكل الي يسوي مااجاي يغير هل شي
مادري هذا حب لو عذاب ..
حب لو غباء واكثر من هيج هوس يجوز .. بس ردت الوكت يمشي ويخلص كلشي ..
ثاني يوم التحق هو بعد مااطلبت منه خالتي .. ياخذ اجازت زواج .. وخابرت كل اخوانه وكلتلهم الاسبوع جاي زواج شهاب وغاليه .. تعجبوا بس كلهم فرحوا ان اخيرا اقتنع يتزوج لا وياخذ بنت عمه…
خلص تقرر زواجنه ........
اه ياكلبي ليش انته حبيت
وانه ادري بمحبتك من طرف واحد
كتلك مايحبك افهم شبيك
تعرف مايريدك لاكن تعاند.
اه ياكلبي الجرح بين عليك
اه ياطعان غدرك من محب حاقد
..احبك والكلب مايكدر يبوح
وانته تدوس بيه بدمك الجامد
..حييييل تعذبت بس انته ماحسيت
بنار كلبي وكلبك البارد
..جنت بس انته اشوفك ماشفت ناس
وصافن بس افكر والذهن شارد
..انته تعيش صافي وهادي البال
..وتشلع باب كلبي بصمتك الجاحد
..اه من الدمع شككلي الخدود
اه من الالم وي همي متواعد
..اه شكد صعب من تحب باخلاص
وتعرف تالي حبك من طرف وااااااااااااااحد
يتبع ......
للكاتبه بنين الطائي .....
🦋🦋…
………………………………
.🦋🦋
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/122/جبروت-الشيخ-وقلبي
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━