في طريقهم للبيت وقف نافع ومسك راسه تقدم له
اياد : سلامات يبه وش فيك ؟
الشيخ نافع : راسي بينفجر من هالركـود الله يهديه
ريان : بس يبه ترا نايف بعد زودها .. يحلف عليه ماياخذها! وهي حليلة؟
أياد يوافق ريان الراي : اي بالله انه ماهو عاقل ذا الـ نايف فيه احد يمنع رجال من حرمته !
قاطعهم الشيخ نافع : وش رايكم لو انه نايف اللي ماخذ اختكم ويبي الزواج نفس ماقاله ركـود ؟
سكتو ماحد رد رجع تكلم الشيخ : اخته وهو سندها وعضيدها لو ماوقف معها بالوقت ذا متى تبونه يوقف؟ وبعدين والله اني اشوفه رجال وسنافي وعلومه تجمله ومعه حق ركـود الله يهديه بعد فيه احد بالوقت ذا يخلي الزواج بعد اسبوعين؟
أياد : والله ماندري عنه امش امش بس يبه ريح وراك قومه الصباح
تنهد نافع وتقدم يمشي وقف قدام باب البيت : الضيف وينه؟
ريان : اي بالله ماشفته من رحنا للجماعه؟
جاهم صوت من وراهم وهو مبتسم انهم تذكروه
: موجود طال عمرك امر
لف صوبه الشيخ : مايمر عليك عدو يسنافي .. وينك يبه ليه ماحضرت عقد قران ركـود!
ضحك سلطان : والله يعم حسيت اني تعبان شوي وطلعت رحت للهًيب والحمدلله الحين طييب
ضحك ريان : انشهد انك تصلح خوي لركـود يرجال انت وياه مبليين بحب هالبهايم
ضحك سلطان : لا عاد العذر منك يبو فيصل الا الغالي لا تقول عنه بهيمه
ضحكوا كلهم ودخلوا داخل حصلو ركـود وراكـد واقفين بالحوش
راكـد مطير حواجبه بـ ركـود لف صوبه ركود: خير خير ان شاءالله وش ذي النظرات؟
راكـد : الحين يوم ابوي قرر زواج بعد شهر حسيتك بتقوم تخنقني وفجاءه بقدرت قادر خليت الزواج بعد اسبوعين؟ مريض يرجل مريض؟
ركـود ويده بجيبه : انت ماسمعت نايف وش يقول ،
على دخول نافع وسلطان واياد وريان ، الشيخ نافع : لا بالله مانت بصاحي يركـود !!
لفو صوب الباب وكان الشيخ داخل وهم وراه تقدم الشيخ وهو يوقف عند ركـود ، قبّل راسه ركـود
الشيخ نافع : علمني يـ ركـود وش السوات اللي سويتها عند العرب ؟
عقد حواجبه سلطان ولا هو فاهم شي شافه راكـد وجا وقف جنبه وهمس له : اسمع الصدمه الكبرى
ابتسم سلطان : وش مسوي ركـود ؟
ريان وهو يحط يده على كتفه : اسمع اسمع بنفسك
أياد وراهم : الحمدلله مارحت لبيتي ولا كان فوتت علي اللحظه الحلوه هاذي
ضحك راكـد : نذل من يومك ..
سلطان بتسأول : وش اللحظه الحلوه اللي بتفوتها ؟
ضحكوا الباقين، راكد : شف بعينك
ركـود وهو واقف قدام ابوه : وش سويت؟
نافع بحده : يرجال انت مريض فيه احد يعلق مع اخو زوجته بعد ساعات بس من عقد قرانه؟ مريض انت !
احتدت ملامح ركـود : يبه انت سمعت وش قال لي؟ سمعته كيف يحلف علي وكاني اصغر عياله؟
سلطان بعدم فهم : والله مافهمت شي فهموني؟
ريان : اصبر يرجال وتفهم
الشيخ نافع : انت اللي شكلك ماكبرت وتحتاح اعاده ظبط
ضحكو سلطان وراكـد وركـود ناظر لهم وهو يتعود فيهم
تنحنح سلطان يناظر فوق كانه ماسوى شي
ركـود : لا بالله رجال وشوري بيدي
الشيخ نافع بحده : يعني صامل؟ تبي العرس بعد اسبوعين !
ركـود تذكر حلف نايف عليه : اي بالله بعد أسبوعيين
جاء صوت راكـد من ورا ابوه : بس يـ ركـود بيتك مابعد جهز يخوك
ركـود عصب : بيجهز لا تخاف .. يبه انت ورا ماتزوجه كود انه يعقل
سلطان بردت ملامحه زواج اخته بعد اسبوعين والكل جنبه يتفق على زواج اخته ولا احد يعرف انها اخته حس انه لازم ينصر أخته حتى لو بعدهم ماعرفوه ، سلطان : انا اشوف انك تستهدي شوي مالها داعي العجله
لف صوبه الشيخ نافع بحيث ان جانبه الايمن صوب سلطان والباقي وجنبه الايسر صوب ركـود
احتدت ملامح ركـود : لا بالله بعد اسبوعين يعني بعد اسبوعين ولا يتمم علي حلفه نايف
ارتخت ملامح سلطان من سمع اسم نايف رد بصوت بينه وبين نفسه : نايف .. هاذا اسم اخوي اسم عضيدك يـ سلطان !
انتبه على الشيخ نافع وهو يقول بحده : اسمع يـ ركـود بنت الناس ماهي لعبه بيدك انت ونايف وغيركم معاك اسبوع وخمس ايام اذا ماجهزت بيتها محد بيقرر تاريخ زواجكم الا انا
رد ركـود : ماعليك يبه بيجهز وبتجي معززه مكرمه حقها بيجيها وزود .. لكن حلالي محد يحلف علي فيه مين ما كان يبه
وطلع ركـود من عندهم وتبعّوه سلطان وراكـد
ريان واياد سلمو على ابوهم وطلعو كلن متجه لبيته
،
في طريقهم ركـود كان متقدم عليهم بمسافه قليله
وراكـد وسلطان وراه
سلطان بهمس : يرجال وش الهرجه مافهمت شي ؟
راكـد بنفس مستوى الهمس : ابدا والله بعد ما عقد ركـود وصارت البنيه للركـود وزوجته وحليلة جاء ابوي وقال الزواج بعد شهر لكن نقز نايف وحلف على ركـود ماياخذها وركـود سو اللي تسويه الا انك تحلف عليه بحاجه تخصه
سلطان عقد حواجبه : وليه؟ ليه حلف نايف كذا؟
راكـد : بيني وبينك نايف وركود يومهم صغار ما يفارقون بعض وحصل بينهم شيء وافترقو
سلطان باستغراب : يمكن حصلت بينهم مشكله.. بس تعال يرجال ماقول وش بينه هو ونايف اقصد ليه حلف على ركـود ما ياخذ زوجته ؟
راكد : مدري عنه يقوله زواج بتسوي سو لكن ماتاخذ اختي الا بعد شهرين ! مريض يرجل
سلطان : سلامات وش فيه نايف مو معقول .. معليش والله حركته ماترضي الله شلون خلقه !
ضحك بخفيف راكـد : اللي يضحك ركـود ماكان وده بالزواج يصير قريب بس فجاءه هو بنفسه حدده بعد اسبوعين
ضحك بخفه سلطان : يرجال ماينلام تخيل احد يحلف عليك بحلالك !
راكد : اي والله يرجال لعبو باعصابي قلت بس قبست
ضحك سلطان بصوت عالي وبسرعه مسكه راكـد وسد فمه
ركود بابتسامه بينه وبين نفسه تصنع الغضب : خله خله يضحك يـ السبك انت وياه من اليوم اسمع سوالفكم ماعندكم سالفه غيري انا ؟
راكـد بعد يده عن سلطان وهو يحاول يكتم ضحكته بس ماقدر وضحك لف عليه ركـود وهو رافع حواجبه : لا يشيخ تضحك بصوت عالي بعد؟
سلطان وهو ماسك بطنه ومنحني : اهخ ياربي دخيلك يـ ركـود والله انك ساطي توك مملك وبغيت تطلق بنفس الدقيقه !
ضحك راكـد : انشهد قلت بس الناس تطلع مبسوطه بعد عقد القران وحنا بنطلع شايلين واحد ركـود ولا نايف
ابتسم ركـود ووقف قبالهم : ياخي رفع ضغطي هالنايف يحلف علي بوش بحلالي؟ مريض يرجال !
وقف راكـد : اهخ الله يعين البنيه عليك انت وياه عزالله طاحت بينكم
وقف سلطان : لا بالله انا موجود ما اخليها تطيح بينهم !
عقد حواجبه ركـود وراكـد كذالك
حس على نفسه سلطان : اقصد اني مع ركـود بمسكه وابعده عن المكان اللي فيه نايف
راكد هز راسه مو مهتمه وتقدم للخيول ركود حس فيه شي من كلام سلطان وحس عليه سلطان ونظراته تنحنح : يرجال اشتقت للهًيب
ومشى تحت انظار ركود اللي بدا يشك في وضع سلطان
-
ديره السيوف الساعه 11 مساء رجع شجاع للبيت دخل رجع وكله امل امه صاحيه خاطره يشوف ابتسامتها دخل المجلس مافيه احد تقدم ودخل الصاله مافيه احد تنهد حسب الكل نايم لكن سمع اصوات ضحك من الحوش الخلفي مشى باتجاه الحوش ولمن دخل شاف اهله كلهم مجتمعين ابوه واخوانه وامه فارشين فرشتهم
وجالسين على ضوء القمر ويشوون ابتسم من شاف امه تضحك وتسولف عليهم تقدم حتى وصل وبصوت عالي: سلام عليكم ياهل البيت ورا ماتعزمرني؟
لفو كلهم صوبه ولفت مزون شافته وابتسمت
مزون : هلا يمه هلا يقلبيي .. وينك من اليوم ننتظرك !
نهئ : اخص اخص يشجاع من قدك شف شف امي كيف مبتسمه
تقدم شجاع وجلس جنب نواف وسهـم
ضرب على كتف سهـم : ارحب يالقناص وينك فيه!
ماعاد اشوفك بسم الله كانك مو اخوي ؟
سهم بطبعه هادي ولا ياخذ ويعطي كثير : ابدا موجود انت اللي ماندري وينك ؟
نواف : والله انت اللي غاط غطه قويه ماندري وينك
ضحكت سهى : والله كلكم زين نشوفكم
نهى : اي والله مره اعوذ بالله هاذا وانتو ماتزوجتو كيف لا صرتو راعين بيوت بعدين !
هناء وهي تمد فنجال قهوه لـ شجاع : ماعاد بتشوفينهم من غير شر محد بيهتم فيك
شجاع : لا بالله ابشرو باللي تبونه وش بخطركم ؟
نواف : اللي تبونه حاضرين فيه بس تمنو
نهئ : امم والله خاطري نطلع من جو الديره شوي
سهى وهناء وافقوها الراي : اي والله نبي نطلع نغير جو
شجاع لف صوب مزون : اي والله لازم نطلع يالغاليه وش رايك!
ابتسم سيف : ابدا تم اللي تبونه متى تبون نطلع؟
نواف : نشوف الغاليه متى تبين وحنا جاهزين
ضحكت مزون : اللي يبونه البنات متى تبون يمه
ابتسموا البنات وردت نهى : شرايكم بعد بكره؟
سيف ابو شجاع : بعد بكره بعد بكره تجهزوا
البنات صفقو والعيال انبسطوا عليهم وقضو الليله ضحك وسعه صدر وكملوا عشاهم ضحك وطقطقه بينهم حتى انتهى يومهم وناموا بسلام
-
في ديره الوادي وعند أيـه الي طلعت من المطبخ متضايقه وعيونها حمراء من البكاء والموقف اللي طاحت فيه جت تمشي وجلست جنب أثـار اللي لاحظتها ، كانو منار ومنال وعنقاء وهيفاء حول أثـار وميتين عليها وعلى منطوقها وجمالها
منال بهمس : يـ ماشاءالله تبارك الرحمن قمر قمر مصور
هيفاء بنفس مستوى الصوت : معقول الحلوه ذي الهاديه الانيقه اخت المسعوره هًيا ؟؟
دفتها بكفتها منال : اص اص لا تسمعك تفضحينا
منار : شفيك عليها وهي صادقه !
هيفاء : اي والله كفو بنت عمي
عنقاء : اقول الحين صدق ذي الحلوه بتاخذ ركـود؟
ضحكت منار : حياتي صحصحي شوي قبل شوي عقد اخوي وخلاص الحين اسمها حَـرم ركـود
عنقاء : اي صح
ضحكوا الباقين على عنقاء ، في جهه ثانيه كانت ايان وسمر جالسين يسولفون ومنبهرين بجمال أثـار
سمر : يماشاءالله البنت جميله مره بسم الله عليها مالوم امها لو تخبيها عن العالم
ايان : اي بالله اني مابعد شفت مثل زينها
سمر : والله ولد عمي حظيظ فيها
ايان : يحظنا كلنا فيها يشيخه ماشاءالله بس
ضحكت سمر : اي والله يحظنا بذا الزين
كانت تسمعهم هيا وهي ودها تقوم تقطع أثـار باسنانها
،
أثـار تركت منار وعنقاء وهيفاء يسولفون مع بعض ولفت صوب أيـه وبهمس : وش فيك!
أيـه تنحنحت : ابدا يقلبي مافيني شي
أثـار كانت جدا مرتاحه لـ أيـه وتحبها من اللحظه الاولى اللي شفاتها فيها : اذا فيه شي زعلك علميني لا تستحين ترا والله اني اعزك يـ أيه
ضحكت أيـه وهي تقرب لها وتضمها من كتفها الايسر
وحطت راسها على كتف أثـار وبصوت مسموع : واخيرا اخيرا واحد من اخواني رحمني واخذ وحده بعمري الحين انا محظوظه بتصيريين اقرب وحده لي
ضحكت هنادي : بالله وحنا وش صار علينا ؟
هيام بتمثيل الزعل : خليها خليها على راحتها
أيـه : والله شوفي أثـار تقريبا بعمري انتو كبار شوي
يعني من طقت منار ومنال وهيفاء وسمر وايان ومها
الحين حصلت صديقتي
وتضم أثـار اكثر لفت صوبها منار : لا يشيخه الحين صرنا كبار عليك!
مها جت وجلست جنبها : الله واكبر الحين بدلتيني ؟
أيـه بعبط : يقلبي تلومني من شفت أثـار وانا متولعه فيها احد يلومني
ردت الجازي بضحكه : لا بالله محد يلومك يمه .. بس ابعدي عن البنت اتركيها تتنفس
أيـه : لو سمحتي يمه خليني اشبع منها ركـود متسلط ماراح يخلني أشوفها حتئ
ضحكوا الكل عليها وضحكت أثـار بتسليك وبان عليها الخوف
تكلمت ام هادي : حسبي الله على عدوك يـ أيـه خوفتي البنيه..
ناظرت لـ أثـار .. يمه ماعليك منها ترا والله ركـود طيب ومافيه مثله
ام عنقاء : أيـه مستحيل تخلي حركاتها !
أيـه ابتعدت عن أثـار شافت ملامحها مليانه خوف ضحكت : يمه يغبيه امزح والله مافيه احن من قلبه والله ماتوقعت تصدقيني
منار : غبيه ذي لا تصدقينها يـ أثـار ترا ركـود طيب العشره وخفيف وحنون والله
ايان تحاول تهدي الوضع : يشيخه لو كان اقسى رجال بالعالم والله لو يشوفك بيصير خفيف عندك لا تحاتين
ضحكوا وضحكت أثـار معهم ، وانتهئ يومهم باكتمال العقد ورسميا أثـار محمد النّـهار زوجه وحليلة لـ الـركـود نافع الهـّزاع
ديـرة المعازف الساعه 10:00 مساء
ام سلطان صار لها اسبوع تبكي على ولدها ووحيدها دخل البيت الشيخ نمر بعد يوم طويل قضاه يشوف امور ديرته بعد ما كان طريح فراش تقدم حتى وصل الصاله وجلس جت سلمى ونزلت له الاكل ومشت
نادها الشيخ نمر : سلمى تعالي اقعدي معي .. وكولي لك لقمتين يبه مايصير هلون ؟
سلمى ببحه : لا يبه مالي نفس عليك بالعافيه
وطلعت متجهه لغرفتها وجلست على فراشها متربعه
قام على عكازته وتوجه صوب غرفتها دخل ووقف عند الباب : يبه مايصير العيشه ماتطب فمك حرام اللي تسوينه يابوك حرام !
سلمى وعيونها امتلت دموع : وشلون يهنئ لي بال ويرتاح ضميري وولدي مادري وينه مادري وين اراضيه مدري هو عايش ولا هو جايع ولا .. نزلت راسها وبكت
تنهد الشيخ نمر وتقدم حتى صار قبالها وجلس قدام وجهها رفعت وجهها صوبه اردف الشيخ نمر : باذن الله يعاود بأذن الله مير والله ان يزعل عليك لا شاف حالتك قومي يبه قومي كولي لك حاجه يبوي قومي معي
هزت راسها بالنفي وبصوت باكي : لا بالله ماريد شي ولا اريد زاد ولا اريد حاجه غير ولدي سلطان يبوي ابي سلطان
الشيخ نمر بترجي وعيونه دموع: عشاني يبه عشاني قومي معي ونسيني ماحب اكل وحيد .. من بعد المرحومه وانا وحيد وانتي وسلطان سليتوني .. واليوم بعد سلطان قلبي جريح يبه والله انه قطعه من قلبي يبه لا تكسريني فيك بعد يـ سلمئ
سلمى ناظرت لابوها اللي كانت عيونه مليانه اردفت بينها وبين نفسها : فوق كبر السن يبه الحين همك كبير؟ كل ذا لجل سلطان اهخ يمه يسلطان ويش سويت فينا
قامت ومسكت يد ابوها ورفعته معها : يلا يبه العشى برد امش ناكل سوا
ابتسم الشيخ نمر وطبطب على يدها : الله يخليك لي يبه ويرد سلطان لنا سالم
ابتسمت سلمى : امين يارب امين يلا يبه يلا
وطلعت من الغرفه للصاله تعشو وكل شخص يجامل الثاني لجل خاطره ولا بعد سلطان حتى الاكل ماله طعم
-
في ديره السيوف الساعه 9:30 صباحا
نواف وهو يتثاوب : يالله صباح خير يرجال مانمت زين
شجاع وهو يرتب الاغراض والعزبه على ظهر احدى الحصن جنبه : تستاهل محد يقولك لا تنام بدري يلا يلا اعجل شف وين الباقين
نواف تقدم لداخل البيت : قسم بالله انه شايب الرجال ذا
سهم ضحك بهدوء وطلع من البيت معه فروتين وكذا بطانيه خفيفه ناظر فيه شجاع : وشوله هذول؟
سهم : مزون الغاليه تقول كود يجي برد نتدفى
ضحك شجاع : الله يطول بعمرها .. ماحن بمطولين ان شاء الله
طلعت هناء ونهى وكل وحده عليها جلالها وكل وحده معاها غرض
ثواني وطلعت مزون بيدها حافظه تقدم لها شجاع واخذها منها : يمه الله يطول لي بعمرك وش الاشياء ذي كلها ؟
مزون وهي تعدل جلالها الاحمر : فطور يبوي ليه ؟
جاهم صوت من وراهم صوت الشيخ سيف جاي من مجلس الديره بعد ماخلص لزوم ربعه وعلمهم بغيابه اليوم تقدم ووقف جنب مزون ومد يده عى طول كتفها : اليوم مافيه طبخ لكم بترتاحون والطبخ والامور الباقيه كلها على العيال
طلعت سهى على كلام ابوها وبيدها حافظه فيها تمر ومعها فناجيل وكاسات وطلع معها نواف وبيده حلى مسوينه البنات فاليل
البنات بصوت واحد : الله وناسه .. الله يطول بعمرك يبوي ..
ضحك عليهم شجاع وتقدموا معلنين بدايه يومهم الجميل خارج ارجاء ديره السيوف بعدين عن الازعاج والصخب
،
في طريق الرحله البسيطه حيث كانت البنات على الحصن والعيال يقودونهم ومزون على فرس الشيخ سيف
بعد عدة اميال بعيده عن ديره السيوف استقرو في ارض وادي محيط بها الخضار من جميع الاتجاهات اللون الاخضر سيد المكان والنخل العالي في بدايه الوادي وتضمها جبال عاليه زادت الارض جمالا فسبحان الله الخالق بعد ما استقرو وفرشو الزل الاحمر والمراكي شب شجاع لهم نار ورتبو جلستهم وجلسو وكل اخذ له مكان افطرو وبعد عده ساعات كانت الاجواء عليله نسمة برد خفيفه تهب عليهم وضحكهم مالي المكان سهئ وسهم يركضون حولهم يتلاحقون ونواف وشجاع يركبون غداهم ونهئ وهناء يتمشون في الارجاء وسيف ومزون جالسين يناظرون اطفالهم بحب لفت صوب سيف وهو يضحك على سهئ وسهم تاره وتاره يناظر لـ نهى وهناء وين صارو وتاره يشيك على شجاع ونواف وغداهم كانت تتسائل بينها وبين نفسها : لو بنتها عايشه معقول بيحبها سيف كانها من صلبه؟ معقول بيرضى فيها تتربى مع اخوانها؟ ولا ..
قطع حبل افكارها سيف : الزين مشغول باله وين وصلتي ؟
ابتسم تنهدت مزون : البال مشغول من زمان يـ سيف
فهم سيف انها تفكر ببنتها كالعاده : الحمدلله على كل حال والله يعوضنا
ناظرت فيه مزون بعدم فهم : الله يعوضنا يارب ويعوضني .. سيف ودي اسئلك شي ؟
سيف مد لها فنجال قهوه وقرب منها التمريه : كلي فداك وش ودك اسئلي !
مزون بتردد هالمره قررت تسئله وتعرف جوابه بدال ماكل جمعه تجلس تفكر بدون لا تسئل تنحنحت وبصوت خفيف : سيف لو بنتي عاشت وفكتها الايام
سكتت شوي حست بغصه بنص حلقها رجعت تكمل كلامها : لو انها عايشه عادي كنت تربيها وتعتبرها وحده من بناتك؟ يعني مدري كيف بس مـ..
قاطع كلامها سيف وهو يحط يده فوق يدها : والله يـ مزون والله العظيم اني اعدها بنتي وهي تحت الارض كيف لو كانت فوقها .. يـ مزون انتي حتى السم منك قابله كيف تقولين لي اعتبرها وحده من بناتي وهي بنتي بعد؟ من عرفت انك جبتي بنت وانا اعدها بنتي واندب حظي انها ماهي مني والله يسامحني يوم عرفت ان محمد طلقك ماصدقت خبر !
ضحكت مزون وضحك معاها سيف وكعادته سييف السيوف كان الحب الاول والاخير الشخص اللي كان يستاهل مزون ومزون تستاهل شخص نفس السيف
،
ابتسم بصمت وهو يكمل غسل الرز بعد ما ضاق على حال امه اللي متدهوره بسبب هالبنت وكان مزون ماولدت ولا حملت قبلها لف على صوت نواف
نواف : شجاع الحين انا وانت نشتغل هنا والسرابيت ذي تلعب يمين ويسار ؟
ضحك شجاع : يرجال ابشر بعزك بس نخلص الغداء لعيون السيف والمزون نبيها سباق ينواف وش رايك؟
ضحك نواف : تم يالشجاع تم
-
في ديره الوادي بعد الساعه الـ 10:45 صباحا
في بيت الشيخ نافع تحديد في غرفه البنات
منار : عنقاء والله لو ماتتكلمين غير تنجلدين اخلصي وش علمك؟ لي يومين احاول فيك تهرجين !
عنقاء : اف وربي انك مصيبه لابغيتي الحاجه بتعرفينها اقولك مافيه شي وش فيك انتي
منار بغمزه : علينا علينا يشيخه انتي وراك بـ...
قاطع كلامها صوت الجازي
: منار وينك انتي يلا اعجلي يبنت انتي وياها يلا مشينا
قامو البنات وطلعوا متوجهين للجازي وطلعوا الكل صوب احدى الوديان القريبه وكعاده عائلة الشيخ كل بدايه شتاء يطلعون للوديان يغيرون جو
،
نرجع ليوم قبل الوقت الحالي :
الساعه الـ 3:30 عصرا في مجلس الشيخ العائلي وكل عائلته موجوده ريان وهيام واطفالهم واياد وهنادي واطفالهم
والباقين كلهم بنات وعيال ماعاد سلطان وركـود وراكـد كانو برا البيت
هيام : والله ياليت نطلع يعمي نغير جو والشتاء على وصول قبل البرد يشتد ودنا بطلعه توسع صدورنا
ايان : اي بالله ودنا بطلعه توسع خطرنا يبوي
الشيخ نافع : اللي تريدونه متى ودكم نطلع ؟
نطت أيـه بحماس : بكره بكره تكفون نبي بسرعه نطلع
ضحكت الجازي واردفت : هاه يـ نافع بكره زين؟
ابتسم الشيخ نافع : اي بالله زين وليه ماهو زين
اجهزو بكره الكل بيطلع باذن الله
الكل : تم .. ان شاءالله .. وناسه مابغينا .. تم باذن الله
منار : اقول يبه نبي عمامي معنا وخوالي
منال : خالك جايز له اربع سنين مسافر برا الديره
هنادي : المهم نبي نطلع بالله والله ترا تعبت من البيت
هيام : اي والله نحتاج نغير جو يبنات ..
اياد : خلاص ان شاءالله بنطلع كلنا سوا
ريان لف صوب ابوه : يبه انا اكلم عمي ماعليك ازهل
الشيخ نافع : بعدي بعدي .. يلا ودي اقوم اعاود للمجلس
-
عند مربط الخيول وفي مقيض الكاسر تحديد
راكـد : يرجال ابلشتنا بطيرك ذا ؟
ركـود طلع هو وسلطان سكر الباب وراه : اقول ورا ماتذلف محد قالك تعال
سلطان : بالله يـ ركـود علمني عليهم احب الصقور وودي اخاوي لي صقر مثلك وشرواك
ابتسم ركـود تقدمو ورفع ذراعه فوق كتف سلطان : ابشر ابشر ماطلبت شي .. لكن لازم لك صقر بالاول
ضحك راكـد وهو يمشي وراهم : ياليل الورعان اللي امشي معاهم ..
لف عليه ركـود وناظره : والله الورع اللي ورانا ولا هو فاهم بأمور الرجال
ضحك راكـد : اجل حتى انا بتعلم وبصيد لي طير معاكم
ضحكوا سلطان وركـود باعلئ صوت وانحنى سلطان من كثر الضحك وهو ماسك بطنه
عقد حواجبه راكـد : سلامات يالاخو انت وياه؟ وش الضحك السامج هذا!
سلطان بضحكه : يرجال وشو بصيد طير لعبه هو!
ركـود بسخريه : انشهد ان اللي مايعرف الصقر يشويه
راكـد ناظر لهم من فوق لتحت ومشى تاركهم على سخريتهم
الساعه 5:45 مساء
رجعو البيت وحصلو ان الكل قرر يطلع بكره ، سلطان حس نفسه غلط بينهم وقرر ينسحب بكل هدوء وطلع من عندهم بخفه بدون محد ينتبه له لكن ركـود كان حاس عليه وجت فكره في راسه
،
نرجع لليوم الحالي بعد ما الكل جهز واخيرا عند باب بيت الشيخ نافع كان اياد وريان وهادي يرتبون الاوضاع والاغراض المهمه
في داخل البيت كانو البنات يلبسون جلالهم وقدامهم دلال القهوه فاضيه وفناجيلهم وكل شي ممكن يحتاجونه بالعزبه من صحون وقدر وغيره من لوازم بقيت اليوم
طلعو منار وعنقاء من الغرفه بعد ما نادت لهم الجازي
منار تهمس لـ عنقاء : اصبري والله غير نروح لمكان لحالنا وغير تعلميني علمك انتي وسلطان
عنقاء ناظرت لها فوق تحت ومشت من عندها بصمت تقدم الكل مستعدين للرحيل
ركـود مسك ابوه على جنب وهمس له : يبه الضيف ماوده يمشي ويانا ولا ودي احرجه والصدق انا ماحب الطلعات ذي واجد ف بجلس انا وياه بديره
الشيخ نافع : لا لا بتمشي معي انت وياه يلا لـ...
قاطعه ركـود : يبه الله يطول لي بعمرك تراني ماعادني ولد صغير خلاص اطلع انت والباقين وانبسطو وان شاءالله اعوضك مره ثانيه .. وبيتي باشرف على وضعه تعرف لازم ارتب الوضع قبل اسبوعين ولا
ضحك الشيخ نافع اقتنع : طيب اللي تريده مير المجلس انتبه له والضيف لا يضيق يلا فمان الله
ابتسم ركـود ولوح له بيده يسلم عليهم وهم ماشين
،
الجازي فوق ظهر الحصان : علامه ركـود والضيف ما مشو معنا ؟
الشيخ نافع ماسك لجام الحصان ومتقدم فيها : ماودهم يمشون وتركتهم
الجازي سكتت بدون اي رد اكتفت فقط بهز راسها
جنبهم رافع وهدى كذالك هدى فوق ظهر الحصان ويقود طريقها رافع حيث كانت السوالف بين الاخوان وضحكهم ،
وراهم ريان وزوجته هيام معاه وريف بنت هنادي اختها ومعاهم حصان فوق ظهره بعض الاغراض وهي جنبه وتسولف معاه ويضحكون على وريف
وجنبهم اياد وزوجته هنادي وكذالك حصان وهم يمشون معه
بنص بينهم فيصل وهيثم وفرح يلعبون
وراهم البنات منال وسمر وهيفاء و ايان وأيـه ومنار وعنقاء
راكـد وهادي اخر الصف مع احصنتهم ،
وصلو احدى الوديان ورتبو امورهم حيث فيه فارق بسيط بين الرجال والحريم حتى ياخذون راحتهم الحريم مر الوقت وتغدو والان الساعه الـ 5 عصرا بدا الجو يغيم شوي ولكن بدون اي سحاب تدل على وجود مطر
منار قامت وهي تاشر لـ عنقاء قامت معها عنقاء وبدو يمشون ويسولفون حتى وصلو اخر الوادي وجلست منار وتربعت وجلست قدامها عنقاء
منار تنزل طرحتها من على وجهها : يلا عنقاء تكلمي
عنقاء تنهدت : اف منك لازم تعرفين يعني ؟
منار وهي تقرب لها : اي لازم نظراتك له ذاك اليوم مو طبيعيه انا بس بعرف من وين تعرفينه؟
عنقاء تدفها بيدها : اقول ماعرفه ولا يعرفني سلامات منار لو احد يسمعك !
منار تكتفت : خلاص يشيخه لا تقولين شي مليت منك
ضحكت عنقاء : صدقيني بقول لك بس مو الحين اصبري اتاكد من شغله
منار لفت صوب الجهه الثانيه : اقول لا تكلميني اول مره بحياتي اصير فضوليه لدرجه ذي وانتي قليله حياء ماعبرتيني حتى
وقفت عنقاء بغضب : اقول عاد تراك غثيتني بس ودك تعرفين السوالف خلاص يشيخه مابي اقولك غصب الدعوه؟
منار وقفت بصدمه اشرت بيدها على نفسها: انا ابي اعرف السوالف يـ عنقاء؟ انا؟
ناظرت فيها عنقاء بدون رد كملت كلامها منار
: والله العظيم مقصدي خوف عليك يـ عنقاء خفت انه ناوي لك شي ، ماكان قصدي اتدخل فيك وف حياتك بس كنت بتاكد ان مافيه ضرر عليك بجلسته عندنا بالبيت كنت خايفه عليك يحيوانه وانتي تقولين لي كذا؟
عنقاء حست انها جرحت منار بكلامها تقدمت لها ومسكت يدها : يشيخه وش اسوي فيك غثيتني مو بعادتك تجلسين تزنين كذا خلاص اسفه
بعدت عنها منار وتقدمت لقدام كملت طريقها لحقتها عنقاء ووقفتها منار : لا تلحقيني ولا والله بيكون اخر عهدي فيك يـ عنقاء ودي اجلس لحالي اتركييني
عنقاء ببحه : سلامات مستحيل اخليك لحالك ؟
منار بحده : اقولك اتركيني يـ عنقاء مابي اشوفك
وصدت عنها عنقاء زعلت منها ولفت جهة جلستهم ورجعت ادراجها صوب اهلهم
منار مشت لقدام وهي مو واعيه على نفسها ولا انتبهت ان عنقاء رجعت كانت تظن انها وراها كانت تكلم عمرها بصوت عالي : ولا كلمه يـ عنقاء خليني اطلع اللي بخاطري عليك اخاف تكبر بيننا بسبب شي تافه ك
ومشت لقدام تتكلم جاهله ان عنقاء غيرت اتجاه طريقها للعوده وهي كملت طريقها جاهله وين متجهه
: انا الحين صرت ادور السوالف يـ عنقاء يرفيقة دربي ! انا صرت غثيثه! والله العظيم من خوفي عليك ولا انتي مو كفو الحين يالغبيه يوم اني اقولك علميني السالفه لاني شفت نظرات سلطان لك حسيته يعرفك من سنين وخوفك انتي كان مبالغ لمن ضربتي فيه وبعدين ترا لمن كنت نمشي متجهين لبيت زوجة ركـود كان ينتظرنا ندخل البيت واقف ويـ...
انقطع صوتها من لفت على ورا ماشافت احد ابدا توسعت عيونها من الصدمه لفت يمين ويسار لفت على نفسها مرتين وثلاث وبصوت عالي : عنقاء؟ يغبيه مو وقت مقالبك ! هيه بنت وينك! تكفين عقناء والله اني خايفه..خلاص والله مااسئلك لين تتكلمين انتي تكفين اطلعي عنقاء
وبدا الصوت يتردد عليها لكن للاسف المكان فاضي تماما مافيه احد الا صدى صوت منار ف المكان كان فيه جبال من على يمينها وقدامها ووراها اشجار ونخل كانه غابه وعلى يسارها فيه ارض خاليه صحراء مليانه خضار وادي جميل جدا يشرح الخاطر لكن مو بالنسبه لـ منار وقت وعت على نفسها وخصوصا ان الوقت الان على بدايه مغيب الشمس وبدت تضلم الدنيا شوي شوي
انحنت للاسفل لمن ادركت انها ضاعت ولا عرفت طريقه للعوده ضمت رجولها -يكرم القارئ- ونزلت راسها وجلست تبكي بصوت خفيف مرت عشر دقايق وهي تبكي ماهي الا ثواني قليله رفعت راسها على صوت ارعبها صوت صهيل حصان رفعت راسها وتفاجات بمحافر قدم لـ حصان قدام وجهها صرخت صرخه قويه هزت اركان المكان ورجعت على وراء وطاحت على ظهرها وانكمشت تحاول تحمي نفسها ووجها من حوافر الحصان
،
في نفس المكان من جهه اخر بعد ان انتهوا من غداهم راح وقتهم ضحك وسوالف وامثله حتى جت الساعه 5 عصرا وقف شجاع ومشى صوب حصانه الكايّد : يلا ينواف
قام نواف واتجه صوب حصانه النايف كا تسميه قريبه من اسمه : اسمع يشجاع شفت الوادي -واشر بيده- اللي قدامنا اول من ياصله ثم يعاود له اللي يريده من الثاني
ضحك شجاع واعلتى الكايّد : لك اللي تريده ان فزت علي يـ النايف
ضحكوا الكل كون النايف اسم حصان نواف
تقدمو وبدو يركضون ووراهم غبرتهم وماهي الا دقايق ورجع شجاع وكان الاول على نواف ضحكوا الكل وكان التصفيق والمتعه تعم ارجاء الرحله وتقدمو للمره الثانيه وفاز نواف هالمره وكان لازم يلعبون فاصله تفصل بينهم حتى يعرفون من الفايز الاخير اردف شجاع بالموافقه ولكن قاطعهم صوت
سهئ : وش رايكم كل واحد ياتي من اتجاه ع شان يصير التحدي اصعب ؟
سهم وهو يصب له كاست شاهي : اي بالله مو كلكم من اتجاه واحد غيرو خلو الفاصله امتع شوي
ضحك سيف : اي بالله وع شان ننصفكم انا اللي بحدد من وين تاتون يـ شجاع انت من الجهه ذي
واشر على نهايه الوادي اللي هم فيه واشر على بدايه الوداي لمكان انطلاقت نواف وبدو يتجهون نحو مكانهم ماهي الا سبع دقايق ووصلو لمكانهم كان شجاع مستعد حتى ينطلق لكنه وقفه صوت غريب عليه صوت يطلب النجده او كانه يستغيث لف على يمينه ولف بحصانه متجاهل تماما اشارت سهم لهم بالبداء
تقدم خطوتين لقدام وفجاءه شاف ارنب صغيره يركض ضحك وحب يلعب معها شوي وبدا يركض بسرعه فائق من فوق ظهر الكايّد حتى لاحظ شي اسود مايل للارض وكانه قطعة قماش اعتلت ملامحه الصدمه من شافها ترفع راسها وبسرعه بديهه منه لف الحصان على الجهه اليسرى مما ادى ان الحصان يرفع رجوله للاعلئ -يكرم القارئ
،
ووقف الحصان بعد ماهدى نزل منه شجاع وكان خايف يكون مالحق عليها وضربها الحصان قرب صوبها وشافها مجمعه نفسها على راسها وتبكي انحنى صوبها وتنهد براحه اردف بصوت واضح : عسى ماشر؟ من انتي؟
جمدت ملامح منار من سمعت الصوت ورفعت يدينها من على وجهها وطاحت عينها بعينه كانت عيونها مليانه دموع ووجها احمر من البكاء تعدلت بجلستها على طول ووقفت وسحبت جلالها من الارض وتغطت فيه ،
شجاع من شاف وجهها وعيونها اللي مليان دموع عقد حواجبه ووقف وتقدم صوب الكايّد ومسك لجامه اردف : كانك جنيه فـ انا اعوذ بالله منك ومن فعايلكم وكانك انسيه فـ وش قصتك؟
منار جاوبته ببكى : مالت عليك الحين انا جنيه والله مادري مين الجني انا ولا انت
وكملت بكاء , ضحك شجاع : الحمدلله انس
عقد حواجبه ولف يمين ويسار ورجع كمل : وين اهلك يبنت وش عندك هان وش تسوين لحالك هنا؟
منار بطقطقه ممزوجه برُعب : والله اتمشى وحبيت اسلم عليك .. سكتت ورجعتت تتبكي مسحت دموعها : ياخي انت من وين طلعت لي انا ابي امي ودني لامي
شجاع بسخريه : مو كنتي بتسلمين علي .. وش عندك واقفه بعيد تعالي سلمي
منار بكت وجلست بالارض من حست بجديه الوضع : الله يخليك ابي امييي ابي ارجع لامي
شجاع ناظر فيها بصدمه وتقدم لها صرخت ووقفت وهي تبعد وبصوت كله خوف : لا لا .. لا تقرب ابعد عني خليك بعيد .. شهقت ابييي اميي
وقف شجاع تهند وهو يمسح على وجهه : عن المزح والخبال اللي ماله داعي يبنت الناس وش قصتك وش جابك هان .. كانك تبيني ارجعك لامك علميني قصتك ؟
منار ببحه : كنت اتمشى مع بنت عمتي .. بلعت ريقها مسحت دمعتها اللي تسابق الثانيه .. وكنت امشي احسبها وراي لمن لفيت ماحصلت احد وراي ولا اني عارفه من وين جيت
ورجعت تبكي ، شجاع تكتف : طيب انتي من اي ديره؟ وش اسمك او اسم ابوك !
ماردت منار خافت منه كثيير تنحنحت وبلعت ريقها بصعوبه : انا في وجهه الله ثم في وجهك يـنشمي عدني وحده من محارمك ولا تمسني بضرر
ونزلت دمعتها تنهد شجاع وعرف انها خايفه منه واردف : وصلتي خير يبنت الاجواد لك مني الله وامان الله مايمسك ضر لين تستقرين بحضن امك .. وانتي الحين بوجهي وبشنبي يبنت الرجال ..
مسك لجام الكايّد كمل كلامه :
لكن امشي معي اهلي موجودين معي بالجهه الثانيه كود ان يهدى لك بال وتعلمينهم من اي ديره انتيي لجل تعاودين لهلك سالمه
ترددت منار كثير وهزت راسها بالرفض : لا مابي اروح مكان يـ..
قاطع كلامها اصوات الذيابه اللي من سمعتها شهقت وبدون اي ادراك منها تقدمت مسرعه حتى وقفت قدامه بالظبط ناسيه نفسها وتلتفت يمين ويسار من رعبها من الاصوات رفعت راسها صوبه وكملت برجفه كلامها : بروح معاك بس انا في وجهك وفي جاهك مايجيني منك ضرر
ابتسم شجاع : انا قلت لك انتي فمان الله وفي وجهي وفي شنبي انتهى يبنت الاجواد مايلحقك ضيم باذن الله وانتي بحمايتي
ابعد عن الكايّد وكمل كلامه : مير المسافه بعيده شوي مشي ومامعي غير خيل واحد
لفت صوبه منار : وش السواه اجل ؟
شجاع وهو يعتلي الكايّد : السواه انك تاتين معي على ظهر الخيل قبل يملئ المكان الليل وتضلم الدنيا ولا عاد نقدر نشوف
ارتعبت منار واهتزت كل خليه بجسمها رجعت ورا خطوتين ابعد : لا لا مستحيل مستحيل انسى انسئ اني اطلع معاك على ظهر خيل واحد مستحيل !!
شجاع تنهد : اجل بروح وارجع انتي خليك مكانك لا تتحركين ماطول ان شاءالله
منار بخوف : لا سلامات تروح وتخليني واجلس لحالي هنا ؟
عصب شجاع : اجل وش تبين اسوي لك اقولك تعالي معي معيه اروح اجيب لك خيل ثاني معيه وش تريدين !
منار ودموعها غطت الرويه بالنسبه لها : امشي على رجولي اهون لي -يكرم القارئ-
شجاع بقلة صبر : المسافه يبنات الناس مااتقدرين عليها على رجولك -يكرم القارئ- بعيده ولا انتي حول شي حوالي ثلاثه كيلو من هنا لو كان المكان قريب كان مشيت انا وتركتك انتي فوق ظهر الخيل
عمت اصوات الذياب المكان خافت كثير منار لفت صوب شجاع مد يده لها واردف : الله وامان الله يبنت الناس وش تبيني احلف اكثر من كذا .. الله يحرمني مزون كان ضريتك بشي تعالي كان ودك تجين ومد يده اقرب لها ، ناظرت فيه لثواني وهي تستودع الله نفسها وتوكلت على الله اردفت : بس بشرط !
شجاع بقلة صبر : وشهو شرطك ؟
منار : اجي وراك
شجاع : اللي تبينه يلا اخلصي علي الليل اظلم
مدت يدها ليده ومسكتها حس ببرودت يدها رفعها صوبه وجلست وراه
اردف شجاع : تمسكي زين
هزت راسها بالموافقه وهي تحاول انها تمسك اطراف ثوبه انطلق الكايّد بسرعه فائقه مما ادى اللي خوف منار وتمسكت بصدر شجاع بقوه وبدون وعي منها وحطت راسها على ظهره ارتخت ملامحه من حس ببرودت وجهها ماتكلم كمل طريقه حتى وصل لعند اهله اللي لهم نص ساعه ينتظرونه وخافو عليه كثيير
،
في نفس المكان من جهه اخرى رجعت عنقاء وهي زعلانه بالحيل على منار جلست تقريبا نص ساعه بدا المكان يعلن عن غروبه
عنقاء كانت تتوقع ان منار جالسه مكانهم ولمن ترتاح ترجع لكن لمن اخذت نص ساعه خافت عليها
تقدمت لمكانهم واعتلت الصدمه ملامحها من شافت المكان خالي من ووجود منار رجعت صوبهم تركض بسرعه ماهي الا دقايق واعتلى صوتها المكان تنادي بكل صوتها : يـ خالي نافع خالي نافع
قام الشيخ على صوتها
الشيخ نافع : علامك يبنت علياء صوتك يلعلع !
عنقاء برجفه : منار يـ خالي منار
بلعت ريقها ، وقف راكـد وهو ياشر بيده : وش فيها منار اهرجي ؟
عنقاء بتردد : ااا .. كنا.. كنا جالسين قرب الوادي وتزاعلنا وقالت لي اتركها لحالها ورجعت هنا واخذت يمكن نص ساعه ورجعت اشوفها مالقيتتها بمكانها اخاف اخاف انها ضيعت طريقها تكفى يـ راكـد
الجازي اعتلت الصدمه ملامح وجهها : وشو ويش انت تقولي يـ عنقاء منار ماهي بمعاك!
لفت صوبها عنقاء : لا يـ خاله تركتها لحالها وماعاد ادري وينهي
شهقت الجازي ونزلت على الارض تبكي بصمت اردفت بحزن : يمه بنتي يمه يـ منار
راكـد وهادي بسرعه اخذو حصنهم وتوجهو صوب الوادي القريب منهم
اما بالنسبه لـ اياد وريان فـ قبل نص ساعه رجعو ادراجهم للديره بعد الساعه الـ4:30 عصرا لا اشتداد البرد عليهم وعلى اطفالهم ،
اياد : يبه عن اذنكم والله وريف تعبت من الجو وخايف عليها وهيثم تعب بعد
ريان وقف : اي بالله يبه حتى عيالي اشتد عليهم البرد ولا معنا شين ثقيل يتدفون فيه
الشيخ نافع : اللي يريحكم يبه حنى ودنا نجلس شوي بعد ونلحقكم ان شاءالله
تقدم ريان ونادا هيام وهزت راسها بالايجاب وبلغت هنادي سلموا على الباقين وطلعوا متجهين للديره
نرجع للباقين وحالتهم حاله بعد اللي سمعوه من عنقاء كانو في حاله استنفار وتحقيق مع عنقاء وليه تركتها وعلمتهم باللي حصل لكن بدون لا تجيب طاري سالفه سلطان ...
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━