في ديره المعازف وتحديد مجلس الشيخ نمر بعد ماطلع سلطان من عنده ومعزم على الرحيل انهار الجد واليوم ثالث يوم طريح فراش
سامي : يبوي خذ اكل ماهي بحاله حالك كذا ماهو بزين لك
الشيخ نمر بحزن : وشلون يهنئ لي بال وسلطان ماهو جنبي وشلون يـ سامي
هز راسه سامي بمعنى لاحول ولا قوة الا بالله اردف بصرامه : يبوي انت وشلون تبي سلطان يقوى لشافك ضعيف قم واسترجع قوتك لجل لاعاود سلطان مايشوف ضعفك طول عمرك قوي وربيت سلطان احسن تربيه وابوه عايش مادرى عنه قم يبوي قم شد عزومك
سعود اللي كان ضايق على حال جده وحال رفيق عمره اللي قرر يتبعه لكن رفض ابوه وجده رفض قاطع : يجد باذن الله يعاود سلطان مايقوى على فراقنا لا تذبح عمرك بالتكفير يجد
الشيخ نمر صد بوجهه عنهم وهو ضايق حيل على سلطان كيف مايضيق وهو مربيه بنفسه وشافه وهو يكبر قدام عينه
-
في ديره السيوف تحديد اخر الديره مربط الحصن لكل اهالي الديره حيث يجتمعون فيها من عصر حتى مغيب الشمس مبارزه وسباق وسعه صدر، الا شخص واحد كان جالس تحت ظل شجره وهو يفكر بحال امه وناوي يطلع لديره الوادي ويشوف بعينه حياه محمد بعد ماخرب حياه امه اللي لها سبع طعشر سنه تبكي على ضناها اللي كانت تشوف فيه الحياه بعد فقد الزوج والأولاد والاب
عياد : وين وصلت يبو سيف ؟
شجاع التفت على الصوت ابتسم ابتسامه ملت وجهه وقف واخذ عياد بحضنه رفيق عمره اللي غايب له اربع شهور عنه رجع اليوم
شجاع ويده على ظهر عياد يضمه لصدره ويطبطب عليه : البال معاك يرفيق دربي
ابعد منه عياد وهو مبتسم : والله العظيم اني مو مصدق شوفتك قدامي يعضيدي
شجاع دخل عياد تحت ذراعه : ايوا وعلوم العرب والديار اللي زرتها
تقدم يمشي هو وعياد صوب المربط عياد اردف وهو ماسك يده اللي فوق راسه وكتفه : ابدا علومهم تسرك لكن والله مالها طعم يبو سيف بدونك
ضحك شجاع : ابشر باذن الله المره الجايه نطلع سوا
رد عايد : تم تم تم
ضحكوا وكملوا سوالف حتى وصلوا لمربط الخيول وجو الباقين يسلمون على عياد كونه من احباب هاذي القريه
-
في قريه الوادي يوم الجمعه الساعه 4:38العصر
في بيت الشيخ نافع تقدم الشيخ نافع : وش رايك يام ريان البس البشت السوداء ولا الرصاصيه!
لف على ام ريان اللي جالسه فالارض تلبس بناجرها
الشيخ نافع : علامك ليه ماتردين علي ؟
لفت صوبه الجازي ورجعت انظارها للبسها اللي كان بلون الاخضر مطرز تطزير كامل بالخرز وفوقه وشاح باللون الاسود شفاف جدا يظهر اللون الاخضر
انحنى صوبها وهو جالس على ركبه - يكرم القارئ -
بعد ماعرف انها زعلانه عليه ولها يومين ماتكلمه اردف بضيق على الحاله اللي وصل نفسه لها : العذر والسموحه منك يالجازي مير والله ولدك اللي ماخلى فيني ذره عقل
ناظرت فيه الجازي : وتقوم تحطني بوجه المدفع ينافع؟ طيب واذا ركـود فعلا نفسه طايبه من الزواج ليه ماافهمت منه ليش ليه تحده فيني ؟
ناظرها نافع ورفع يده على يمسح راسها : المعذره منك يالجازي والله العظيم اني حطيت بناتي بمكانها واللي خلاني اصر يصير ذا الزواج اخو البنيه الكبير مابقى احد بديره الوداي الا وعلمه ان ركود يبي اخته ومتخيرها بعد الرجال الظاهر انه مريض ولا شلون يمشي ويتكلم كذا ليه مافكر باخته العالم ماترحم يام ريان وخفت على بناتي
انصدمت الجازي : سلامات مريض الولد ذا وش ذا الهرج ولد الشيخ متخير اختي؟ اكيد بعض العالم بتكفر بالبنيه بالشينه كود انها بعد ماتطلع ولا احد شافها وش بيقولون الحين
هز راسه نافع ووقف ووقفت معه الجازي اكمل كلامه نافع : والله العظيم سمعت لي هرجه صبت عظامي صب يام ريان ولمن سمعت ركـود ماعاد وده بالعرس على البنيه ضاق صدري عليها
عقدت حواجبها الجازي : وش سمعت يـ نافع؟
تنهد نافع : هاذا وانا راجع البيت ليلة ان ركـود ماعاد يبي يكمل بزواج سمعت اثنين ورا سور الديره واحد متلثم بعمامه سوداء والثاني ماظهر لي غير يده عليها جرح من عند ساعده الايمن
الجازي باستعجال : عسى خير يارب وش فيه يبو ريان ؟
اكمل نافع : سمعتهم يتكلمون ان ركـود شايف البنيه ومتواعد هو وياها ولجل كذا ما تخير من بنات محمد الا هي والثاني يقول له ان اخته شافتها وتمدحها عنده
نرجع لليوم اللي ركـود قرر يرفض الزواج من أثـار ويصير اللي يصير
قبل لا يدخل الشيخ بيته بساعه طلع من المسجد بعد ماصلى له ركعتين لله سبحانه
وهو يمشي سمع حديث شخصين واقفين ورا السور ومو باين منهم شي الا واحد بيده اليمنى واضح فيها خدش كبير واجد
مجهول 1 : يرجال انا اختي الصغيره ام ثلاث طعشر سنه شافتها تقول قسم بالله انها موت حمر
مجهول 2 : لجل كذا ولد الشيخ مهتويها الظاهر انه شايف له شوفه
مجهول 1 : لا يرجل البنت ماتطلع من بيتهم علم العرب فيها قبل عشرت سنين وش عرف ركـود فيها ؟
مجهول 2 : يرجال اقص يدي اذا مو شايفها ركـود ولا وش غير رايه بزواج الحين؟ عز الله راحت علينا
مجهول 1 : ماراحت ولا شي ولد الشيخ مهون
مجهول 2 عقد حواجبه باستغراب : كيف ويش انت تقول؟
رد مجهول 1 : سمعت انه ماعاد يبي العرس بس مادري هل هو صامل ولا لا
مجهول 2 : من مين سمعته ؟!
مجهول 1 : انت وش فيك تحقق معي انا علمتك بالعلم وحدى هاليومين تشوفها طلابه بينهم يخطب ويتخير ثم يكنسل ..
مجهول 2 : زين جت منه انا ناوي على شي
مجهول 1 باستغراب : وش ناوي عليه!
مجهول 2 ضحك ضحكه طويله : يعلمك الوقت وش ناوي عليه انا امش امش
تقدمو ماشين لمكانهم ولكن ماكانو يعرفون ان الشيخ سمع كل حديثهم وحس بعظامه ماتقدر تشيله تقدم حتى طلع للضوء وشاف عياله قدامه ورفع ظهره وتقدم هو والباقين للبيت وبعد كذا رـكود جاء وحس انه يحلم توه سامع كلام وخاف على ركـود يجيه شي وخاف على سمعة أثـار ...
نرجع للواقع عند نافع اللي حكى كل شي للجازي وحست الارض ماعاد تشيلها كانت بتطيح لولا يدين نافع اللي سندتها وجلسها على الأرض تكلمت الجازي بصوت فيه بحه دلاله على الغصه اللي فيها : تكفى يـ نافع هذول ناوين على ولدي اكيد !
نافع بحده : يخسون يلمسون منه شعره
الجازي مسكت يدينه وعيونها مليانه دموع : ليه ليه تخلي رـكود يكمل بالزيجه دام الوضع كذا يـ نافع
نافع انحنى لمستواها : الخسيس ناوي الردئ فيه وفالبنيه واذا جمعتهم عندي مايصير عليهم شي بأذن الله وفوق كذا البنيه مالها ذنب يالجازي بمزاجية ركـود خفت على سمعتها .. اذا حنا ي اهله وناسه قلنا انه شايف له شوفه كيف الناس يام ريان كيف ؟ كيف بتواجه العالم وهي صغيره سن بسبب فعايلنا يالكبار والله مـ...
قاطع كلام نافع صوت راكـد اللي كان واقف برا غرفتهم وسمع كل شي انصدم وتغيرت ملامح وجهه تماما
راكـد بحده : انا انا السبب انا اللي حطيت البنيه براس ركـود
ناظرو له نافع والجازي بعدم فهم كمل كلامه راكـد بصرامه
: انا يبه اي انا اللي قلت لركـود يخطب الصغيره
نافع عقد حواجبه اردفت الجازي بعدم فهم: وليه يمه ليه تسوي كذا وش لك فيها ؟
رد راكـد وصدره يرتفع وينزل من هول الصدمه اللي سمعها : ركـود علمني انه شاف بنت أياد وطار بالعجه وقال لي انه بيقول لابوي ماعاد يبي العرس بس انا انا الغبي اللي شرت عليه الشور الغبي ذا وقلت له اخطب بنت محمد الصغيره لاني سمعت نايف وواحد من اخوياه يتكلمون بالخطبات للبنات الصغار وانه ظلم لهم ونايف قال لو يموت ما يزوج اخته وهي صغيره
نافع حط يدينه على راسه من هول الصدمه الجازي ماكانت اقل منه صدمه ونزلت دمعتها رد نافع بحده وصوت عالي جدا : غبيي انت غبيي.. ومن قالك اني برفض لو عاود ركـود عن قراره وانا لسى ماكلمت العرببببب الله يعيننيي عليييك يـ راكـد الله يصبرني
وطلع نافع من عندهم متوجهه للمجلس يشوف سلطان
الجازي بكت بصمت على حاله ركـود وكيف انه صار مهدد هو وأثـار بشي مالهم ذنب فيه ومالهم علم فيه اصلا
تقدم راكـد صوب امه وانحنئ لمستواها قبّل راسها
تكلم ببحه : نذر علي يام قلبي نذر علي مايجيهم شي والله انهم بوجهي ليوم الدين نذر علي
رفعت راسها صوب راكـد وضمها راكـد لـ حضنه اردفت بصوت باكي : تكفى يايمه لا يجي ركوـد شي ولا يجيك انت شي والله ماعيش بدونكم والله يايمه
باس كتفها راكـد : ابشري بالخير يالغاليه ابشري بالخير والله مايجهم من سود اليالي ضرر والله وانا راكـد ولد بطنك عيني من الله خير وقومي اجهزي تاخرنا على ركـود
رفعت راسها ومسحت دموعها وهزت راسها بالايجاب قام وطلع من عندها وجلست تستدوع الله ركـود وأثـار من كل اذى وتنهدت ووقفت وكملت تجهيزها
-
في مجلس الشيخ نافع تحديد عند سلطان اللي توه قام وكان يكمل فرضه اللي ماقدر يصليهم من نام دخل الشيخ عنده وجلس يتقهوى حتى خلص صلاه سلطان تقدم حتى وصل عند نافع وانحنى وقبّل راسه استغرب نافع من حركته لكنه ماتكلم وجلس قباله سلطان
الشيخ نافع يمد له فنجال قهوه : تقهوا تقهوا وعلمني بعلمك واسمك
اخذ الفنجال سلطان : اسمي سلطان يشيخ وعمري ثلاثه وعشرين سنه وانا داخل على الله ثم عليك يشيخ
استغرب نافع : لك اللي تبي تقهو وعين من الله خير يـ سلطان
ابتسم سلطان : تسلم يشيخ تسلم .. الحقيقة يشيخ ابيك تعطيني وقت افكر بنفسي وبعمري لين اجيك واعلمك بعلمي كانك ترضى يشيخ ويشيخ
سكت شوي تنهد سلطان ولاعاد كمل كلامه ، ناظر له الشيخ نافع وحس ان فيه كلام وشي كبير ورا سلطان قرب فنجاله لفمه واخذ رشفه نزل الفنجال وقال مكلم سلطان : وصلت يـ سلطان وصلت ودامك عندي مايجيك شي باذن الله.. كمل كلامك اهرج ويش بغيت ؟
تحنح سلطان كان منحرج بالحيل لكن اقنع نفسه انه لو مايسوي كذا ماراح يعيش ولا راح يقدر يعرف اهله : يشيخ ابي لي شغل ابي لي بيت اعيش فيه وانا راضي لو اصير خدامك يشيخ راضي
ضحك الشيخ : بس هذا اللي ودك يبوك!
ناظر فيه سلطان : اي بالله هاذا اللي ابيه يشيخ
الشيخ نافع : تعرف بالخيول انت؟ تعرف للسيوف.. والرمايه؟
ناظر فيه سلطان : اي بالله طول عمري وانا معاهم وربيت بينهم وجدي الله يطول بعمره ويخليه لي ماخلى علي قاصر من ناحيه خيل فانا باذن الله خيال ومن ناحيه السيف فانا والسيف واحد اعرف الرمايه واعرف لكل شي بأذن الله
ارتاح الشيخ لـ سلطان كثير وتنهد وهو يرفع يده صوب كتف سلطان ويطبطب عليه : اجل اسمعني يبوي يسلطان مابي منك ترعى حلال ولا ابي منك تقهوي ولا ابي منك شي ابدا مير يبوي يسلطان
سكت شوي عقد حواجبه سلطان باستغراب كمل الشيخ نافع
: ابيك تلازم ركـود وين مايروح وين مكان ركـود ابيك معاه وتنتبه لكل حركه من يمينكم ويساركم وابيك خويه بالشدايد يـ سلطان
استغرب سلطان طلب الشيخ وحس ان ركـود في خطر رفع يده صوب يد الشيخ اللي على كتفه ومسك يد الشيخ وحط يده بيد الشيخ : ابشر على خشمي يشيخ لك اللي تبيه وركـود بدون لا تقولي والله العظيم فزعته لي انا ارخص عمري لجله يشيخ ابشربي وقت ماتبي وباذن الله ماحد يمس منه شعره يشيخ
تنهد الشيخ نافع براحه تامه مايعرف ليه وثق بـ سلطان لكن حس بشي اتجاهه وكانه يعرفه من زمان اردف الشيخ : تبشر بالسعد يعضيد ركـود تبشر بالسعد .. ولك بيت ولك كل المال اللي خاطرك فيه يبوك
ضحك سلطان واتزن بجلسه لف الدله صوبه وصب للشيخ فنجال ومده للشيخ : لا بالله مايجيني ريال واحد كفيت ووفيت يشيخ بالبيت وانا لو هي خيمه انام فيها عن البرد تفكيني ماقصرت معي لا انت ولا ركـود الله يجملني عنده وثم عندكم ويقدرني وارد جميلكم علي
رد الشيخ نافع وهو يوقف : لا بالله ماهي بخيمه يـ سلطان بيت وكامل مكمل وجنب بيتنا باذن الله...
مايحتاج ولا بيننا سوالف الجمايل هاذي مير قم قم انهج امش معي يبوك
وقف سلطان اردف بكل ثقه : سم سم
،
طلعو الكل متوجهين لبيت محمد حيث كانت الملكه عباره عن جمعه عائليه فقط ، في بيت محمد النهار الساعه 3 عصرا
البيت عباره عن مبخره رايحه مبخره جايه نايف ومازن توهم راجعين من برا ومعهم ذبيحتهم وثيابهم مليانه دم ساير نايم مايدري عن شي
دخلو داخل على مها وهي تبخر المجلس وحاطين القهوه والشاهي مها وأثـار من الصباح يرتبون البيت
مها وهي ترفع نفسها تقدمت صوب مازن ونايف مسكت خشمها : اوف منك انت وياه وش الريحه ذي اطلعو اطلعوا روحوو تنظفوا ترا اختكم اللي بتعقد اليوم
مازن ناظرها بخبث وهو يفتح يدينه لها : تعالي يبعد قلبي ودي اضمك ماضميتك اليوم
مها وهي تطلع من الباب بسرعه : تخسي ينذل اذلف اذلف اعرف حركاتك
طلع نايف يدور أثـار تارك مازن ومها بلجتهم وراه
شافها واقفه عند باب الصاله تلبس حذيانها - يكرم القاري- ورافعه نص ثوبها لفوق وطالع بنطلونها الاسود من تحت
ضحك نايف وهو يتقدم صوبها : لاه لاه عروس وهاذي حالتك
أثـار رفعت نظرها صوبه وابتسمت له : هلا والله يقلبي ليه ملابسك كذا؟
نايف ناظر لبسه ورجع ناظر لها : عندك لبس تلبسينه الليله؟
أثـار وهي تتصنع القوه ردت بتردد : هاه .. اي اي ولا يهمك
نايف ناظر لها وعرف انها تكذب مسكها من يدينها وسحبها لين غرفته ودخل ودخلها وراه وقفها وهو ماسك يدينها ومنحني لوجها من فرق الطول : يبنت قلبي انتي تحسبيني ماعرفك لكذبتي؟ الحقيقه انا جبت لك شي معي بس مادري اذا بيعجبك ولي يومين متردد اعطيك اياهم بنفس الوقت بقلبه نايف تكلم - لا بالله مو متتردد ولا مخوفني رده فعلك خايف امي تاخذه منك وتعطيه لـ هيا -
ردت أثـار بابتسامة : انت لو وش ماتجيب لي ياخوي يعجبني والله مايحتاج تجيب شي انت كل شي بالسنه لي
ضحك نايف وراح صوب خزانته انحنى للارض وفتح الخزانه وطلع منها قماشين باللون الاسود
وتقدم فيه صوبها ناظرت فيه أثـار باستغراب
جلس وجلسها معاه وفتح اول قماش كان فيه فستان عنابي جميل وناعم فيه تطريز بالون الذهبي من الجوانبي وجلال لونه مايل للبني الغامق وفيه مشط مصنوع من خشب وحمره ومرايه صغيره وكحل
وفتح القماش الثاني وكان فيه اربع بناجر ذهب واسوارتين وخاتم وعقد صغير
لف صوبها نايف وقال : انا داري انك طول اليومين ذي تفكرين وش تلبسين لاهل زوجك .. والله ماينقصك شي وانا عايش يبنت قلبي
مسح على راسها بيده ورجع كمل كلامه : والليله بتغطين على بناتهم كلهم بجمالك وبتلبسينهم الليله تمام!
أثـار كانت جالسه جنبه وكتفه صوب كتفها غورقت عيونها دموع ناظرت فيه وبدون اي تردد ضمته وبكت على كتفه نايف حس بالحزن عليها دايما اللي يبادرون بالاحضان اخوانها عمرها مابينت مشاعرها لاحد لكن هالمره ماقدرت تمسك نفسها قدام نايف اخوها وشلون تقدر تمسك نفسها ولا تبكي بحضنه وهو معوضها عن حنان ابوها وامها ! وشلون وهو العضيد والسند لها بكل شي ولا يرضى عليها ابدا وحتى وهم اطفال كان يتلقى الضرب عنها احيانا لتخفيف عنها كبرت أثـار ويكبر حب نايف معها كل يوم
بعدت عنه ومسحت دموعها واردفت بصوت باكي : ابشر بلبسهم الليله الله يخليك لي
ابتسم نايف لها وقام : الليله تتجهزين بغرفتي يلا انا اتركك تاخذين راحتك
وقفت أثـار بسرعه وقبل تتكلم تكلم نايف : اقول كلامي ينسمع يلا مع السلامه
طلع تاركها بغرفته تاخذ راحتها وهو طالع شاف مها وهي تركض بالحوش ويلحقها مازن ضحك عليهم وراح لهم
ومسك مها وهي تلهث : اسمعي روحي لغرفتي وساعدي أثـار لف صوب مازن ومشى له ..وانت الحقني
راحوا كل واحد لدوره مياه-يكرم القارئ- ع شان يتسبحون
تقدمت مها صوب غرفه نايف ودخلت وشافت أثـار جالسه وبعيونها دموع وتناظر لمكان بالأرض ناظرت شافت الاشياء وعرفت ان نايف جايبهم لها ابتسمت وهي تتقدم صوبها وتنحني لها وضمتها وقالت : الف مبروك يقلبي الله يوفقك ويهنيك ويجعله لك هين لين يارب العالمين
أثـار ويدها على يد مها اللي وفوق راسها : ابيه نفس نايف
وبكت انحنت لها مها ومسكت وجهها بين يدينها : لا تبكين انتي اليوم ملكه هاذي الليله قومي تجهزي الله يخلي لنا نايف يارب وانا بساعدك لا تشيلين هم
هزت راسها بالرضى أثـار ودخلت دوره المياه اللي بغرفه نايف- يكرم القارئ- لجل تتسبح
،
في جهه اخرى من البيت في غرفه ام ساير
صيته : يلا البسي هاذا كود ام ريان تخطبك لراكـد
هيا : يمه ليش اخطبوا أثـار وهم ماعمرهم شافوها؟
صيته : وانا وش عرفني المريض ركـود يقول ان يبي صغيره
هيا : وش قصده يعني قليل ذوق !
صيته وهي تتقدم للباب : البسي واجهزي بس بروح اشوف ساير الغبي بس نايم
طلعت وهي تشوف ترتيبات البيت دخلت غرفه ساير تصحيه من نومه
،
بعد انتهى الساعه الـ 5 عصرا وعلى مشارف غروب الشمس الكل كان جاهز ببيت ابو ساير ومنتظرين الشيخ وعياله واهله
في غرفه نايف كانت مها مصدومه من جمال أثار في الفستان وشعرها اللي كان نصه مرفوع والنص الاخر متروك على راحته
مها بإعجاب: بسم الله عليك الرحمن..يمه يمه تهبلين وش ذا الزين
ابتسمت لها أثـار بدون رد تقدمت لها مها تحصنها وتستودعها الله
،
ام ساير ماكنت مهتمه لأثـار وشكلها قدام الجماعه المهم عندها هيا ولبسها هي وكشختها ،
وصلو عيلة الشيخ نافع الكل اخوانه وعياله وزوجاتهم وابناءهم وكان معاهم سلطان حيث يوقف سلطان باخر جهه جنب راكـد
الشيخ نافع معه اخوه رافع متقدمين بالصف وراهم ريان وولده فيصل واياد وهادي وركـود اخر الصف راكد وسلطان
،
كانت ام ريان الجازي وام هادي وام عنقاء وهنادي وبنتها الصغيره وهيام متجين نحو بيت اهل أثـار
سمر وهيفاء ومنال وايان وأيه معاهم ، ووراهم بكم خطوه بعيده
منار وعنقاء لان طاحت منار وجلست ترتب لبسها
ام هادي : بسم الله عليك يمه طحتي ؟
ام ريان : وين عيونك بسم الله
منار وهي توقف : روحو انتو وانا الحقكم مع عنقاء حنا متاخرين اصلا
ام عنقاء : شلون نخليكم لحالكم !
عنقاء : يمه شدعوه ترا كم خطوه ونكون قدام باب بيتهم روحوا وانا برتب معها لبسها ونجيكم مانطول باذن الله
ام ريان : يوه يمه اعوذ بالله الله يصلحك .. يلا يلا مشينا لا تتاخرون
تقدمون الباقي حتى وصلوا للبيت فتحت لهم الباب كالعاده هيا
وبغنج اردفت : حياكم الله تفضلوا
ودخلت ام ريان ومعاها الباقي ..
،
جهة الرجال تقدم محمد يفتح الباب لشيخ واردف بصوت عالي : يالله حيهم حياكم الله تفضلوا تفضلوا
الشيخ نافع واخوه رافع : الله يبقيك ...
تسلم تسلم
في هاذه الاثناء ومحمد ونايف ومازن يسلمون على الشيخ واللي متقدمين بصف محمد كانت الابتسامه من بدايه وجهه لنهاية جاهل تماما اخر شخص في الصف وصدمته اللي وقعت عليه وكانه مصبوب عليه ماء بارد رجع خطوتين ورا ولاحظه راكـد رجع صوبه راكـد حتى صار مغطيه بظهره اردف راكـد : بسم الله وش فيك يضيف ؟
سلطان مارد عليه رجع راكـد يسئله : وش فيك يولد اهرج يوجعك شي ؟
سلطان بتردد حس عظامه صبت صب تكلم بينه وبين نفسه : ابوي هاذا ابوي!! معقول اللي اشوفه!! لا لا لا مو معقول اكيد اني احلم!! وعئ سلطان على صوت راكـد اللي يناديه لف صوبه مسك شماغه ولفه عليه حتى غطئ وجهه كامل اردف وهو يتنفس بصعوبه : لا مافيني شي بس ودي اعاود للبيت احس اني مقدر اوقف على رجولي تكرم ..
راكـد عقد حواجبه : ليه يضيف .. تونس شي؟
سلطان : اي والله احس اني دايخ شوي بعاود لمجلس الشيخ وعلمه عني .. يلا سلام
ومشى بدون اي رد على صوت راكـد اللي ماكان يسمعه ابدا
راكـد : بسم الله علامه الرجال هاذا؟
لف ودخل وسلم على نايف ومازن والباقين وجلس جنب ركـود
رـكود باستغراب وبصوت شبه مسموع : وين سلطان؟
راكـد بنفس المستوى : مادري علامه عاود ولا يرد علي
ركـود استغرب : وين راح؟ ليه هو فيه شي؟
راكـد: مدري يرجال .. يقول بيروح لمجلس ابوي
،
في هاذه الاثناء كان سلطان يمشي ويحس بدوخه ماهو قادر يتوازن ولا هو حاس بنفسه وين رايح بس وده يبعد ويستوعب اللي صار كان يمشي بدون وجهه ولا تركيز حتى ارتطم بجسد صغير مقابل جسده رجع خطوتين ورا ، عنقاء : ايً وجع ان شاءالله ماتشوف اعمئ!
رفعت نظرها وكون على وجهه سلطان اضاءه خفيفه واضحه فيه عيونه وكيف انه عيونه حمراء مثل الجمر من حر مايونس ، ارتخت اعصاب عنقاء لمن عرفته وكيف ماتعرفه وهو ماراح عن تفكيرها من اول ماقال لها البيت وهي تفكير فيه وفقصده ،
رجعت خطوتين لين ضربت بـ منار اللي كانت تعدل لبسها وجلالها ارتفع صوت منار : يوه عنقاء وش فيك ابعدي عني عمياء انتيي ،
لفت وناظرت بـ سلطان وعرفته .. عرفت انه الضيف اللي عند اخوانها ادرفت منار تحت استغرابها من رده فعل عنقاء : وش بغيت يـ ضيف؟
لفت لها عنقاء تستوعب كلامها
رد سلطان بعصبيه : وش تسوون هنا انتي وياها؟
ردت عنقاء : وانت شدخلك فينا ..
مسكت يد منار وتقدمت ومشت من عنده اخذ نفس طويل سلطان ولف جهتهم وناظرهم حتى دخول البيت وكمل طريقه وهو يفتح ازارير ثوبه مو قادر يتنفس
،
دخلو البنات البيت وللان علامات الاستفهام على وجهه منار من عنقاء وسواتها تقدمو وجلسوا منار بهمس بينها وبين عنقاء : انتظري لين نعاود والله ان تعلميني علتك
قرصتها عنقاء وهي تاشر لها تسكت ،
في وسط مجلس الرجال عند محمد بعد السوالف والأخذ والعطاء وصل المأذون عقد القران وبعد السلام توسط صدر المجلس على جهة يده اليمنى ركـود وعلى جهة يده اليسرى محمد النهار
المأذون :
الحمد لله، نحمده ونستعينه ونستغفره
ونعوذ بالله من شرور أنفسنا ومن سيئات اعمالنا اما بعد،
اعوذ بالله من الشيطان الرجيم بسم الله الرحمن الرحيم :
وَمِنْ آيَاتِهِ أَنْ خَلَقَ لَكُم مِّنْ أَنفُسِكُمْ أَزْوَاجًا لِّتَسْكُنُوا إِلَيْهَا وَجَعَلَ بَيْنَكُم مَّوَدَّةً وَرَحْمَةً ۚ إِنَّ فِي ذَٰلِكَ لَآيَاتٍ لِّقَوْمٍ يَتَفَكَّرُونَ
(سورة الروم: 21)
اكمل المأذون : والان يابني رـكود صافح محمد بيدك اليمنى
مده يده ركـود تجاه محمد ومحمد كذالك حتى صار سلام بينهم وظلت ايديهم ببعض لف صوب محمد واكمل الماذون : قل زوجتك ابنتي أثـار على سنه الله ورسوله وعلى الصداق المسمى بيننا
كرر محمد وراه ، لف الشيخ صوب ركـود : قل قبلتها زوجةً لي على سنة الله ورسوله وعلى الصداق المسمئ بيننا
كرر ركـود بعد الشيخ : قبلتها زوجةً لي على سنة الله ورسوله وعلى الصداق المسمئ بيننا
ابعد الشيخ ظهره لورا وبصوت عالي :
{وَأَخَذْنَ مِنكُم مِّيثَاقًا غَلِيظًا}
(النساء: 21)
بارك الله لكما وبارك عليكما وجمع بينكما في خير ...
ابعد ركـود يده من يد محمد جلس لحظات يستوعب الشي والمسؤوليه اللي طرح عمره فيها اردف بينه وبين نفسه : ايوا هاه يرـكود الحين بذمتك بنت ناس لا لها ذنب ولا لها حق ولا باطل بطيشك الله يسامحني على طيشي لعل ف الامر خيره ..
رفع راسه على الاصوات اللي ارتفعت قام وسلم عليهم كلهم تحت تباريك الجميع واصوات الفرحه اللي جمعتهم
الكل : مبروك الله يبني بيتك ...
الله يهنيكم مبروك ...
مبروك الف مبروك
ركـود : يبارك فيكم جميعا..
تقدم نايف صوب ركـود ومسكه وسلم عليه وقرب لحد اذنه وهمس فيها : عطيتك اغلئ ما املك يركـود والله وامان الله لو يلحقها ضيم لا تلوم الا نفسك .. ماقول لك مبروك لك .. اقولك مبروك عليك أثـار لان اللي ياخذها ويحظى فيها حظيظ دنيا ودين
ابعد منه نايف وبابتسامه : مبروك
وأبعد عنه ركود هز راسه وهو يتمتم : الحمدلله والشكر .. شفيه يبارك لي فاخته وكاني ملكت العالم ..
ضحك بضحكه خفيفه من تذكر كلام أيـه ،
تقدم صوبه راكـد وهو يحس بتأنيب الضمير عليهم
ضمه : الف مبروك الله يهينك يخوك .. وابعد عنه .. انا معاك فالحال والمال واللي تبيه
ضحك ركـود : الله يبارك فيك .. والعقبال عندك يشيخ .. ماتقصر تسلم وافي
،
في جهة النساء بعد السلام والأخذ والعطاء
ام عنقاء : اقول وين العروس مانشوفها .. وش فيك يام ساير مانلمحها حتى بعقد قرانها..؟
ام هادي : خلاص الحين البنيه بنتنا يام ساير ناديها تاتي بنسلم عليها
ام ريان : اي والله نادي بنتي ودي اكحل عيني بشوفتها
ضحكت ام ساير بتسليك : والله ماهو بانا اللي امنعها مير هي خجوله شوي
قامت مها : ابشرو الحين اناديها لكم
وراحت صوب غرفه نايف تنادي أثـار ، دخلت الغرفه وحصلت أثـار تدور وتلف ضحكت مها وقربت منها وضمتها
مها : وش فيك رايحه جايه اهدي ؟
أثـار : يمه يمه صدق العالم ذي كلها جايه تشوفني !!
مها : وش فيك خفتي .. يلا يلا اطلعي معي يبونك
أثـار بتوتر : لا لا مابطلع بجلس هنا
ضحكت معها ومسكت معصم يدها : امشي بس ووريهم جمالك
أثـار تحاول تفك يدها بس بدون اي جدوى : تكفين يـ مها خايفه
لفت صوبها مها وتركت يدها : لا تخافين قوي عمرك .. وبعدين ام زوجك تقول وين بنتي بشوفها
وقفت أثـار وهي تحاول تقوي عمرها واخذت نفس حتى تهدى وتفكر بكلمه ام ريان : بنتي .. يالله يحلو الكلمه ..
طلعت مع مها ومشت وراها وشابكه يدينها ببعض بتوتر
حتى وقفت مها قدامهم وقالت بصوت مسموع : ام ريان عروسة ولدك وجبتها ...
ابي هديه
ضحكت ام ريان ووقفت وتقدمت حتى وضحت لها أثـار اللي كانت ورا مها ومنزله راسها وقفت قدام وجهه أثـار تكلمت بصوت حنون : يمه .. ارفعي راسك خليني اسلم عليك واكحل عيني بشوفتك
رفعت راسها أثـار بهدوء وطاحت عينها على انسانه ماليه وجهها الابتسامه وجهها بشووش وحنون وواضح عليها الفرحه مشت صوبها ام ريان ومسكت وجهه أثـار بيدينها وباست راسها ورجعت للخلف : بسم الله ماشاءالله تبارك الرحمن الف من ذكر الله عليك يمي .. والله ان ولدي حظيظ فيك وفقربك ماشاءالله عليك
رجعت لها وحضنتها وهي تمسح على راسها وتسمي وتحصنها
في هاذي اللحظه أثـار بحضن دافي حضن غريب عليها حضن ماعرفت ايش معناه لكنها حبته حييل حضن حنون ودافي مليان رقه ورحمه تمنت تموت بذي اللحظه ولا تفارق حضن الجازي مسكت نفسها لا تبكي بهاذي اللحظه اللي حست نفسها فيها ضعيفه جداً ..
كيف ماتحس بالضعف وهي بحياتها امها ماقالت لها كلمه زينه او كلمه حنونه او حتى حضناتها حتى وقت تعبها ومرضها مها ونايف ومازن هم اللي يهتمون فيها
ابعدت من حضن الجازي واسمعوا تباريك الكل وعرفو انها الان زوجه وحليله لركـود وانها الان رسميا زوجته امام الله سبحانه وتعالي وامام الملاء ..
،
قامو الكل يباركون للجازي وصيته وأثـار ..
الحريم الكبار سلمو على بعض تحت التباريك
الكل : مبروك يـ ام ريان .. الف مبروك يام ساير
مبروك الله يهنيهم
البنت كانو صافين وحده وحده تسلم على أثـار
سلمت منال وهيفاء ورجعو لمكانهم وبهمس
هيفاء : لا اله الا الله.. ملاك ملاك بسم الله عليها !
منال : والله ماشفت اجمل منها لاقوة الا بالله
سلمو منار وعنقاء وسمر وابعدو
جت أيـه وضمتها وهي تقول : الف الف مبروك لك الله يهنيك ويوفقك يحبيبة قلبي .. ابعدت عن أثـار والله انك كثيره على ركـود .. لو اني ولد والله محد ياخذك غيري
ضحكوا عليها كل اللي بالمجلس
ام ريان : ماعاد ينفع الكلام الحين هي زوجة ولدي زوجة ركـود الغالي ...
ام هادي : وش ذا الكلام يذا العيل ؟
ضحكوا الكل عليها ، أيـه بلكاعه : والله العظيم لو اني رجال محد ياخذها غيري .. بس يلا لخوي ولا للغريب
تعالت ضحكاتهم على كلام أيـه الغريب
استمر الضحك والسوالف حتى ، قامت مها متجهه صوب المطبخ اللي كان متوسط البيت ولكنه يجمع بين البيت كامل حيث يقدرون يجون الرجال من جهه الباب الخارجي والبنات يدخلون من جهة الباب الداخلي قامت وراها إيـه ودخلت المطبخ ورا مها
أيـه : مها تكفين ابي ماء مره عطشانه
مها طلعت من المطبخ بعد ماغسلت الفنجايل : شوفي عندك المطبخ اشربي على راحتك دقايق شوي وجايتك
أيـه تنهدت اخذت لها كوب واتجهت صوب الترمس اللي تحت بالارض ومرتفع كم سانتي عن قاع الارض حيث يسهل الوصول له انحنت وهي تصب لها بدون اي ادراك للشخص اللي دخل من الباب الخارجي ومعاه صحن كبير شاف اللي منحنيه للارض تصب لها ماء نزل الصحن فالارض ورجع اخذ الثاني من مازن ودخل ونزله بالارض
تقدم لها ضنً منه انها مها كونها من الخلف تشبه مها
تذكر اليوم كيف انها تهرب من مازن ع شان ريحه الدم ومشى على طرف اصابعه حتى يروعها انو ريحه الاكل لاصقه فيه ومها ماتحب الشي هاذا وصل لها بهدوء وهي ماكانت مركزه كانت تشرب ماء بشراهه ماذاقت الماء من العصر وهي مشغوله ونست تقدم لها بخفه حتى صار ورا ظهرها مباشره شاف الروج على حافه الكوب وابتسم
مد يدينه وحاوط خصرها استغرب ريحه عطرها بس مااعطئ اي انتبها وقال باذنها : الحين مالك مهرب بتلصق فيك ريحه الاكل
وضحك أيـه جمدت ملامحها تماما من حست بشي يضمها من ورا ارتخت ملامحها من سمعت صوته قريب لاذنها عرفت انه غلطان مسكت نفسها لا تصرخ طاح من يدها الكوب بالارض استغرب ردة فعلها نايف وشاف يدها ترجف بقوه ابعد عنها شوي
اردف بخوف عليها : مها وش فيك .. امزح معاك يبوي بسم الله والله اسف !
أيـه بتردد وخوف وبدون لا تلف صوبه : الله ياخذك ينذل .. من وين شفتني مها.. !!
ارتخت ملامح نايف من ادرك انها مو اخته حس بالاحرااج رجع على طول عشرين خطوه لوراء
ولف وجهه عنها تكلم بصوت مسموع : العذر والسموحه يبنت الاجواد العذر والسموحه .. العذر من الله ثم منك يبنت الناس والله اني اضنك اختي مها العذر منك
أيـه حطت يدها على وجهه ونزلت دمعتين من عيونها بصوت باكي: اطلع اطلع ينذل الله لا يسامحك ...
ورا ماتتكلم او تتنحنح وانت تعرف ان عندكم ضيوف
،
طلع نايف برا المطبخ ووقف عند الباب وهو يحس بدوخه وتمنى الارض تنشق وتبلعه ادرف نايف وهو يمسك شعره : ياربي دخيلك ...
وش سويت انا وش سويت ..
شده صوت مها اللي دخلت .. وانتبه على اسمها
تنهد ومشى اتجاه مجلس الرجال
،
دخلت مها المطبخ وشافت الاكل بالارض وناظرت يمينها
لاحظت أيـه ترجف وتبكي راحت لها وبصوت مسموع :
بسم الله عليك أيـه وش فيك بسم الله فيك شي ؟
أيـه وهي ترجف وبصوت متقطع ردت : فيه ...
رجعت تبكي
ضمتها مها وهي تمسح على شعرها : بسم الله عليك بسم الله عليك.. لفت صوب الاكل اللي فالارض وعرفت ان فيه احد دخل وشافها .. وكل توقعها انه شافها فقط ، بكت أيـه لين هدت شوي مسحت دموعها ناظرت بـ مها ، مها : فيه احد دخل هنا صح؟
أيـه هزت راسها
مها : وشافك صح؟
إيـه هزت راسها للمره الثانيه ، مها ضحكت : وليه كل ذا البكي كل ذا لانه شافك
أيـه مسحت دموعها وطلعت من عندها بدون اي رد
،
في جهة اخرى عند مربط الخيول كان يمشي بدون اي ادراك منه حتى وصل لمجلس الشيخ وعرف انه للشيخ كونه كبير ومتوسط الديره تقدم ودخل للبيت ومكان مركز سعد لاحظ قدوم احد اتزن بوقفته دخل عليه سلطان رفع يده اليمنى وبدون اي توقف : سلام عليكم .. كيف الحال.. لو سمحت ابي مربط الخيول وين ..
سعد وقف شوي يستوعب : ومين انت يالطيب؟
سلطان قرب له : انا سلطان ضيف الشيخ .. دلني على مربط الخيول الله يعافيك
هز راسه سعد بالاجابه : امش اوريك
وقف سلطان: لا بالله دلني وانا اروح ماله داعي تبعد عن مجلس الشيخ .. كود انه ياتي احد مايحصله ..
سعد ضحك : محد بياتي يالاجودي .. الديره كلها تعرف ان ولد الشيخ بيملك الليله على بنت ابو ساير ..سكت شوي وابتسم .. مير اللي تريده ووصف له مكان مربط الخيول
طلع سلطان من عنده وكلمات سعد ترن باذنه : بنت ابو ساير .. يملك الليله على بنت ابو ساير .. بنت ابو ساير.. ابو ساير...
طول طريقه والكلمات ذي تتردد على مسامعه وقف وتقدم للهًيب ومسكه وحضنه وتنهد تنهيده كبيره لاول مره يحس انه مخنوق وبنفس الوقت ماتوسعه الدينا من فرحته فرحته فرحتيين الاولئ باهل ديرته والثانيه بإخوانه جلس سلطان تحت رجول اللهًيب -يكرم القارئ-
وبدا يسولف على اللهًيب وكانه يسمعه ويجاوبه
تاره يضحك .. وتاره يضيق .. تاره يتنهد .. تاره يصفق يدينه
سلطان : معقول يـ لهًيب معقول؟ انا عندي اخت؟ لا مو بس اخت عندي اهله وربع عندي اخوان يـ لهًيب عندي اخوان وعندي عزوه .. ضحك شوي .. الرجال اللي عاوني وفداني بروحه الرجال اللي عطاني ملابسه.. صار زوج اختي؟ رجع يضحك بشكل اقوى .. لا لا دقيقه .. انا شفت اثنين ورا ابوي .. عندي اخوان يـ لهًيب عندي اخوان وخوات عندي ربع واهل عندي عزوه يـ لهًيب !!
نزل راسه وبكئ بكئ على عمره اللي ضاع بعيد عن اخوانه واهله وربعه.. بكئ حزن على حالته وعلى كلام الناس اللي مارحمه.. بكى على قسوة ابوه كونه مبعده عن اهله وعن اخوانه .. بكى على كل الايام اللي تمنى ان له اخت وحده .. رفع راسه للسماء ورفع يدينه اردف بصوت شبه مسموع
: يارب العالي يارب السماء اللهم لك الحمد والشكر اللهم لك الحمد ياربي .. كنت اطلب نجمه وعطيتني قمر .. كنت اطلب سحابه وعطيتني مطر ...
كنت اطلب امل وعطيتني رجاء ...
اللهم لك الحمد اللهم لك الحمد
لاول مره انسان يبكي على خيبة ظنه الحمدلله الحمدلله كنت اظن اني وحيد وخاب ظني كنت اظن اني غريب وخاب ظني اهخ ياربي الحمدلله الحمدلله
وسجد سجود شكرا لله سجود امتنان ومحبه لله رفع من سجوده سكت شوي رجع يحادث اللهّيب : كنت اظن ان مالي اهل وربي عطاني بلاد ..
فجاءه تذكر عنقاء واللي حصل بينهم ابتسم ورفع يده لصدره واردف بامتنان لها : انشهد انك بنت اصول يبنت الاجواد ...
لولا الله ثم انتي ماتوجهت لديره الوادي لديره اللي كنت اظن اني غريب عنها .. طلعت ولد هاذي الديرة ولو اني ماولدت وتربيت فيها انا ولدها ..
-
في ديره السيوف بعد العصر دخل شجاع البيت بعد ماغاب عن البيت يووم وشي توجه للمجلس مافيه احد وراح للداخل حتى شاف البنات جالسات وكل وحده ساكته مو عارفه وش صاير
استغرب وضعهم عقد حواجبه وارتفع صوته : سلام عليكم .. يهل الدار
لف البنات صوبه واستهلت وجيهم بالابتسامه وقامو يسلمون عليه
شجاع : عسى ماشر وش فيك!
هناء : مافينا شي .. بس ضايق صدرنا على امي
استغرب شجاع : ليه وش فيها امي؟ فيها شي؟
سهى : لا لا طيبه الحمدلله
نهى : وين طيبه .. الا والله يشجاع من امس تبكي مو عارفين وش فيها
انصدم شجاع وبسرعه تحرك صوب غرفة امه طق الباب وفتحه ودخل
سهى : يمه منك شفيك روعتي الولد !
نهى : لا نضحك على بعض كلنا نعرف ان شجاع مو بس ولد لامي الا اخو وصديق وكل شي واشوا انه جاء عاجبكم وضع امي حتى الماء ماشربته من امس
هناء : حتى ولو لازم الواحد يركد ولا يخوف الناس كذا
نهى : والله يقلبي ماعندي ركاده انا
في غرفة مزون اللي من امس ماوقفت بكئ طلع من عندها سهم ونواف بدون اي فايده مع تكرار محاولتهم لمعرفته سبب بكاها بعيدا عن سيف اللي كان تتركها على راحتها لانه عارف ايش سبب بكاها
شجاع وهو يتقدم لامه بعد ماسكر باب غرفتها : عسى ماشر يالغاليه وش فيك؟
مزون بدون اي رد مسحت دموعها ولفت للجهه الثانيه
اتجه صوبها ومسك يدينها : يمه .. ينظر عيني علميني وش صاير فيك!
مزون مسحت دموعها : لا يمه مافيني شي .. وينك انت يومين مو شايفتك ؟
شجاع : والله يمه مع عياد رجع وماتركته تعرفين شكثر اعزه
ابتسمت مزون : الحمدلله على سلامته
شجاع ناظر فيها : الله يسلمك.. علميني وش سبب بكاء عينك الحلوه؟
لفت صوبه ورجعت امتلت عينها دموع : مافيني شي
شجاع اصر عليها : يمه دخيلك علميني والله العظيم مايهون علي شوفتك كذا ..
مزون واخيرا بعد عدت محاولات من الكل الا انها بائت بالرفض الا شجاع اللي قدر يقنعها : ابكي فرح وحزن يشجاع ابكي ضناي اللي راح من بين يديني بلحظه طيش ابكي فرح لشخص كان المفروض يكون لها مايكون لغيرها
نزلت راسها وبكت عقد حواجبه شجاع بعدم فهم كملت كلامها مزون :
اخت اختك يشجاع .. رفعت راسها له وعيونها حمراء من البكاء.. اخت بنتي سنينتها .. بكت سكتت شوي ...
اليوم عقد قرانها اليوم تنزف لولد الشيخ اللي كان مفروض يكون لاختك يشجاع ..
مسكت ثوب شجاع من عند صدره وهزته : حتى الشخص اللي كان من نصيبها خذوه خذته صيته لبنتها ودفنو بنتي وفرحتها يشجاع دفنوها ..
رجعت تبكي بصوت اعلئ ، مسكها شجاع والصدمه تعتلي ملامحه وضمها لـ صدره وهو يمسح على راسها ..
كملت مزون بصوت مهزوز يملاه الضعف والحزن : يوم .. يوم اني كنت حامل فيها كان ..شهقت شهقات متتاليه .. يوم كنت حامل فيها كنت .. را.. راجعه للبيت ومعي قماش فيها ملابسك وانت صغير من بيت ابوي ..كنت اظن انها ولد وانا امشي....
طاح مني القماش وحاولت انزل اجيبه رفعت راسي حصلت ولد صغير ركض صوبي ورفع القماش لي واخذتهم ماكنت اعرف انه ولد الشيخ حتى سئلته عن اسمه وقالي اسمي ركـود ...
نعود الئ قبل 17 عشر عام حيث لقاء ركود وام أثـار ..
كانت تمشي وبيدها اغراض للطفل اللي في بطنها راجعه من بيت ابوها بعد ماخذت كذا غرض ينفعها وقت ولادتها طاح منها القماش نزلت للارض بتاخذه الا انه استوقفها صوت طفل صغير
: انا انا اجيبه
نزل للارض ولمه ورفعه لها اخذت وهي تمسح على راسه ونزلت يدها لوجهه وقالت
مزون : شكرا يمه الله يحفظك يقلبي .. وش اسمك ؟
رد عليها بصوت طفل بريء يبلغ من العمر سبع سنوات
: وشو هذا ليه شايلته لحالك ؟
ضحكت مزون له : هاذي اغراض لولدي او بنتي ان شاءالله
لف راسه ركود مستغرب : ووينهم ماشوف معاك احد !
ضحكت مزون : ان شاءالله اسبوعين بالكثير وتشوفه
كتف ايدينه ركـود : وليه مو الحين .. ؟
لفت انظارها صوب صوت وحده تنادي من بعدين
: ركـود يمه ركـود .. يمه بسم الله خوفتني وين رحت ؟
ناظرت لها ام ريان وابتسمت سلمو على بعض
الجازي : يوه يمزون كم لي منك حرام عليك يشينه ماشفتك من سنين
ضحكت مزون وهي تستوعب : الصغير ذا ولدك !
ضحكت ام ريان : آي بالله هاذا ركـود يمزون
واخذتهم السوالف حتى اتفقت الجازي تجي لمزون يوم ثاني وبعد مرور اسبوعين ونص وصل الخبر الجازي ان مزون ولدت كونهم صديقات راحت لها وكان معها ركـود ومنار ودخلت وسلمت عليها وكانت جايبه معها تمره وشوربه وجلس ركـود عند مزون ويناظر فيها ضحكت ام ريان : هاه يمه وش رايك؟ تبيها؟
ركود : اي يمه بالله خلينا ناخذها معنا للبيت
ضحكوا كلهم عليه
مزون : لا يولد الجازي ماتاخذ بنتي بسهوله هاذي .. لارم تمشي لها مهر وجاهه يسولفون فيها العربان كلها ولا احلم فيها
ركود طلع مسبحه من جيبه كانت باللون البني والحليبي ومدها لمزون واردف : خلاص انا اذا كبرت بجي اخذها وخلي هاذا عندك .. هديتي لها
مزون : يعني تحجزها يولد الجازي؟
ضحكت الجازي : ابدا تم بس هاه يمزون ماتعطينها احد غيرنا واللي يجيك علميه انها لولدي ركـود
مزون : باذن الله بس اذا كبرت وغيرت رايها مالي دخل
ضحكوا مبسوطين فيهم وركـود ومنار يلعبون مع الطفله الصغيره اللي هي أثـار..
،
نرجع للواقع مازالت مزون بحض شجاع وهي تحكي له عن اللي صار أبعدت عنه شوي وراحت للصندوق اللي كان بنهايه الغرفه فتحته وطلعت منه شرشفها وطلعت منه مسباح ركـود ضحكت على نفسها وكيف انها للحين محتفظه بمسباح ركـود
رفعته قدام شجاع اللي كان مصدوم من امه
مزون : شوف يمه شف للحين المسباح معي .. وطيف بنتي معي .. بس
رجعت تبكي قام لها شجاع : اعوذ بالله يمه اعوذ بالله خلاص قضى الله وقدره وش فيك يا يمه تعوذي من ابليس
مزون : لاحول ولاقوة الا بالله .. بس ليه ليه اختها ليه يشجاع ليه اختها ؟
شجاع حس وده الارض تنشق وتبلعه ولا يشوف امه بالحاله هاذي تقدم لها وحضنها وقبّل راسها : يمه ودي اطلع ماعاد اقدر اشوفك كذا واللي يسلمك ابي ارجع احصلك بصاله تضحكين وتسولفين صدقيني لو بنتك عايشه ان عاتبتك على سواتك بنفسك كذا
وطلع من عندها بدون اي رد منها ..
-
في ديره الوادي
تحديد بيت ابو ساير الساعه الـ10:30
بعد عقد القران والعشاء وقفو الجميع طلع رافع وولده من عندهم تقدم ابو ريان ، الشيخ نافع : اكرمكم الله يلا فمان الله
وقف شوي ورجع لابو ساير واقف تحت أنظار الجميع واستغراب الكل راكـد بهمس : هاه وش فيه ابوي رجع حتى قبل لا يطلع ؟
ركود هز اكتافه بعدم معرفه
الشيخ نافع وقف قدام محمد وابتسم له : اول شي يبو ساير الله يبارك لهم ويجمع بينهم على خير
لف انظاره للركود وتاكد انه يشوفه اردف بصوت اعلى من الاول
: الحقيقه يبو ساير واذا ماعندكم مانع ودنا الزواج يصير بعد اربع اسبايع وش قولك؟
انصدم ركـود من ابوه واستعجاله مسك نفسه غصب لا يتكلم او يقول شي يخالف فيه ابوه
رد نايف وهو عاقد حواجبه : وليه العجله يشيخ ..
لف صوب ركـود وكمل كلامه : معليش يالعريس لكن وين ودك ان شاءالله تعيش اختي؟ العذر والسموحه منكم جميع لكن اختي لزوم يكون لها بيت خاص فيها يـ ركـود
ناظره ركـود بتحدي : والله انا رجال وشوري بيدي يـ اخو زوجتي العزيز وبكيفي وين اعيشها لو بخيمه مالك شغل !
احتدت ملامح نايف ومسك اعصابه ارتفع صوت محمد
: نايف اص يولد انا اعرف اتكلم
رد نايف : وانا اعرف اتكلم يبه .. معليش يولد الشيخ لكن مهو باختي اللي تعيش بخيمه بزمن صارت البيوت موجوده فيه
ركـود بنفس مستوى علو صوت نايف : والله الشور شوري والراي راي والبنت زوجتي يـ نايف واطلع منها احسن لك
قاطعهم الشيخ نافع : اسمع يولدي يـ نايف اختك الحين حَـرم ركـود وبنتي ولا ارضى لها الا اللي ارضاه لبناتي يولدي واكيد ان بيكون لها بينت لحالها وخاص فيها يبوك .. لكن انا ودي نعجل بزواج ودي افرح فيهم ونبي شي يفرح الديره الافراح غايبه عن الديره من سنين يبوك
نايف استحى من كلام الشيخ ومنطوقه الطيب
ركـود حس شياطينه تعلتي من نايف اللي حس فيه يتحداه وبعد كلامه وقت بارك له ورفع صوته بتحدي : انا اللي بحدد الزواج وعن اذنك يبوي ويبو ساير ودي العرس بعد اسبوعين
انصدموا الكل خصوصا راكـد اللي حس انه ركـود مو واعي على نفسه قرب منه وبهمس : يولد اصحى على عمرك وش اسبوعين مريض انت !
ركـود مارد عليه وكمل كلامه : وان شاءالله يومين بالكثير ويوصل المهر كامل
نايف بحده : اعذرنا يولد الشيخ لكن اسبوعين صعبه
ركـود احتد صوته : هاذا اللي عندي وهذا زواجي وبكيفي يولد النّـهار
رجع نايف : زواجك وبكيفك مير اختي ماتاخذها من هنا الا بعد شهرين اقل شي
ناظر فيه ركـود بحده : لا يشيخ احلف بالله؟ زوجتي يالاخو ولا ناسي؟
الكل اعصابه انشدت منهم وحسو شوي وتصير معركه من نايف وركـود اللي مستحيل يهدون
ارتفع صوت الشيخ نافع: بس انت وياه.. لف اتجاه نايف .. عسى ماشر يـ نايف وش الكلام ذا؟
محمد بيتكلم لكن قاطعه نايف : يشيخ اسبوعين صعبه على اختي ترتب وضعها .. وبعدين زواج كان وده فيه بعد اسبوعين يسويه بكيفه لكن اختي ماياخذها من بيتها الا برضاها ومرتبه امورها وعمرها
ركـود حس المكان ارتفعت حرارته شوي وينفجر من غضبه تقدم حتى صار بينه وبين نايف مسافه متر وش بسيط ضحك ركـود : باخذها يـ نايف باخذها وانت تشوف بعينك
ضحك نايف وتقدم خطوه : والله ماتاخذها يولد الشيخ الا وانا متاكد انها راضيه ومرتبه امورها !
احتدت ملامح ركـود اكثر لدرجه حس اسنانه بتنكسر من قوت مو ضاغط عليها ضحك باستهزاء : والله غير اخذها وعينك تشوف واعلى مابخيلك اركبه
جو العيال وابعدوهم عن بعضهم راكـد وريان يمسكون ركـود ويبعدونه
ومازن واياد ماسكين نايف
الشيخ نافع وقف بينهم : انا ولد ابوي ولده ! ولد انت وياه رجال انتم رجال؟ وش اللي تسونه هاذا وش علمكم !
ركـود رد على ابوه وهو يخفض نبره صوته العاليه احترام لابوه : مادري عنه رجال طاير .. انت تسمع وش يقول لي! كاني اصغر عياله يحلف علي ماخذ حلالي؟
لف صوب نايف واعتلت نبرة صوته : والله وامان الله غير اخذها يـ نايف غصب عليك وعلى اللي مايرضى ماهو بانت اللي تمنعني من حلالي يـ نايف !!
بيتكلم نايف ولكن قاطعه صوت محمد : اي بالله وانا عمك بتاخذها ومتى ماتبي لو تبيها تمشي معاك الحين ناديتها ولا عليك من نايف ولا عليك من غيره
أنصدم نايف من ابوه وكلامه : لا بالله ماياخذها بالسهوله ذي الا وبهودج وانا ازفها لبيتها لكن انه ياخذها كذا لا والله لو على جثتي
لف صوبه محمد : ولد اسكت احسن لك يـ..
ركـود حس بالانتصار ولكن ارتفع نايف بعينه كونه مارضى على اخته تطلع بدون هودج وعرس وحس من نبره محمد انه لو ماتصرف بتروح معاه الليله ويبلش قاطع كلام محمد ركـود : ماعليه يعم حق وواجب زواج وهودج واللي تبيه انا جاهز .. يلا مع السلامه
وطلع من عندهم وتبعه راكـد سلموا عليه الباقين وطلعوا وهم متجهين صوب البيت وهم يمشون وقف نافع ..
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━