نافع بكل حده : اجل علمني وش تفسر سواتك هاذي ؟
ركـود ابعد خطوه ورا : انا ماعاد لي نفس بزيجات يبو ريان ولا عاد ودي بالعر..
قاطعه الشيخ نافع : اعقب اي والله اعقب وتو يطلع لك لسان يركـود توه اللي يظهر لسانك !!
ركـود بقلة حيله : يبه يرحم اثنين جابوك خلاص لا تطولها وهي قصيره ماعاد ابي اتزوج وخلصنا وش غصب هي يعني ؟
الشيخ نافع هز راسه : لا بالله عليك الحين من اللي غصبك انا؟ انا يركـود ؟ ماهو انت بلسانك اللي قلت زوجني وتخيرت بنت الناس من بد العرب كلها والحين يوم وافقوا العرب انا اتراجع عن كلمتي؟
ركـود ثابت بمكانه وريان وأياد وأيه مصدومين
أياد : سلامات ركود وش الكلام هذا ؟
ريان : تعوذ من ابلس يرجال وخل مزحك اللي ماله داعي !
ركـود : لا بالله ماني بامزح ولاني استهبل انا رجال ماعاد ودي اتزوج وخلصنا !!
ارتفع صوت نافع : بنيه انت بنيه يومك تغير رايك؟
رـكود : اعوذ بالله منك يـ ابليس ييبه وش انا غلطان فيه ؟
نافع بكل حده : غلطان يولد الشيخ غلطان وغلط كايد بعد
اجل تخطب بنت الناس وتتخير ويوم يوافقون العرب تعود بكلامك! مريض انت مريض ؟
أيه تحاول تلطف الجو : تعوذو من ابليس .. يركـود يخوي علمني وش فيك انت سامع شي ؟
راكـد : اهدو اهدو خلونا نتعشى بعدين يصير خير
الشيخ نافع : اسمع يركـود والله وامان الله ماتسود وجهي بين العربان
ركـود قرب لابوه : اخسي اسود وجهك يبه اخسي بس انت..
قاطعه نافع وهو يرفع يده صوب أيه : ترضها لاختك ترضها يركـود؟ يجي واحد يسوي سواتك يخطب ويتخير ويوم توافق عليه اختك يهون؟ ترضها؟
ركـود : لا بالله ماارضئ عليهم لكن وضعي انا غير
الشيخ نافع عرف ان ركـود صامل ويعرف ان ركـود لاحط الشي براسه سواه ولو انه فوق الكل دخلت ام ريان على ارتفاع الاصوات اردفت بخوف : بسم الله الرحمن الرحيم علامكم اصواتكم واصلتني وانا بالمطبخ بكم خلاف؟
الشيخ نافع اشر على الجازي : طلاق من امك يركـود طلاق تحرم عليك امك ليوم الدين لو تسوي اللي براسك تحرم علي !!
شهقت أيه العيال انصدمو وتعالت اصواتهم
: تعوذ من ابليس .. أعوذ بالله يبه وش الكلام ذا .. وش دخل امي يبه ؟
على دخول منار ومنال وايان معاهم العشاء والصدمه تعلتي وجه الكل ماهم عارفين وش صاير
ركـود بصدمه ملت وجهه : تحدني بامي يبه ؟
الشيخ نافع : ماحديتك انت اللي حديتني على الردى يالردي
ركـود بحده : انا ردي انا صرت ردي الحين ؟
ارتفع صوت نافع اكثر : اي بالله ردي ولا هاذي هقوتي فيك يركـود اجل انا تسوي فيني كذا على اخر عمري تبي تفشلني قدام ربعي
لف صوب الجازي اللي كانت مصدومه من كلام نافع كيف كيف يرخصها بعد كل هاذي السنين ؟
تقدم صوبها نافع واردف بتردد : اسمعي يالجازي كان ولدك ماهدت شياطينه وهون عن الموال اللي براسه من باكر تعاودين لبيت اهلك وطلع تركهم تحت صدمتهم جميع ، تقدم أيـاد لركـود ومسكه من ياقه ثوبه وصرخ عليه صرخه قويه ووجهه مقابل وجهه ركـود : ايا النذل شف سواد وجهك وين بيودي امي ينذل !!
راكـد وريان يحاولون يفكون من بينهم تكلم ركـود ويدينه على ياقه ثوب اياد : اقطع واخس يبو هيثم ولا ناسي علومك .. بغيت تموت لو ماخذت هنادي وش كنت بتسوي ناسي ؟
راكـد يحاول يفك يدينهم : يحيف يعيال الشيخ يحيف وسط مجلس أبوكم تتهاوشون فك انت وياه فك !
ريان مع راكـد يحاول : يرجال انت وياه مو وقتكم !!
البنات صدمتهم كبيره متجمعين حول اخوانهم يحاولون يفكون بينهم مع ريان وراكـد فجاءه صوت ارتطام على الارض الكل وقف هدت الاصوات بلحظه لفو صوب الباب امهم كانت طايحه بالارض تبكي بصمت ركـود دف إيـاد عنه وركض صوب امه الكل ركض معاه
ركـود وهو يمسك يدينها يحاول يقومها
: بسم الله عليك بسم الله عليك افا افا حلوة اللبن تبكي ؟
الباقين يساعدونه ورفعوها وتقدمو فيها داخل وجلسو كلهم حولها بشكل دائري وركـود كان عند رجولها -يكرم القارئ- والباقي يمينها ويسارها وتحت عند ركـود راكـد : سلامتك يمه يوجعك شي ؟
ايان قامت تجيب لها ماء رجعت معها شربتها اردفت وهي تمسك المويا من يدها : يمه بسم الله عليك خوفتينا وش فيك ؟
الجازي ام ريان ببحه : كسرني كلام ابوكم يـ..
قاطعها ركـود : مايكسرك شي وانا موجود لا تحاتين !
ناظرت فيه وعيونها مليانه دموع : يمه انت وش مسوي ليه ابوك واصل حده وش مسوي يركـود ؟
رد ريان وهو يناظر لركـود : ابد ولدك الشيخ فجاءه غير رايه بعد ما وافقت البنت عليه ويقول مايبي العرس
انصدمت الجازي وضربت بيدها على صدرها وشقهت والبنات مو اقل منها صدمه الجازي تمسح دموعها
: بسم الله ليه يمه وش صاير ليه غيرت رايك ؟
ابتسم ركـود لوجهها المايل للاحمرار من كثر ماكتمت البكيه كانت تبكي بدون صوت لو ماطاحت ماحد انتبه عليها حس ركـود جمر يتوسد صدره على حال امه وكيف انه بلحظه طيش قرر يتزوج ولمن صار الجد غير رايه اردف بابتسامة : لا ماعليك الامور طيبه ان شاءالله
وقف وعدل شماغه تقدم حتى صار قدام الباب لف عليهم رجع يحادثهم : يلا عاد يام ريان خلي الدلع وتجهزي لملكتي الجمعه ان شاءالله على ماقال ابوي
وطلع تركهم بصدمتهم راكـد قبّل راس امه وراح وراه يبعرف وش يفكر فيه ، البنات وام ريان واياد وريان مصدومين من ركـود
أيه : بسم الله الرحمن الولد وش فيه كل عشر دقايق براي ؟
ريان : انشهد انه مريض لعب فينا لعب
اياد : يمه .. المعالجه ام خالد بعدها تعالج؟
الجازي مستغربه : والله مادري يمه بس موجوده ليه عسى ماشر!
أيـاد بابتسامة : ماشر ان شاءالله ماشر .. لكن ولدك يحتاج معالج يقوم بحالته توه مقوم حرب بينه وبين ابوي يقول ماعاد وده بالزيجات كلها والحين طالع من عندك يقول جهزي لعرسي؟
ضحكو البنات وضحكت ام ريان وضربت كتف أيـاد بخفيف
: بسم الله على ركـود حبيبي لا تفاول عليه
منار : معليش والله انه لعب بحسبتنا غرير مو رجال !!
منال تدف كتفها بكتف منار : اقول انتي اص لا يسمعك ركـود
منار : واذا سمع ان شاءالله وش بيسوي وانا صادقه غرير مير عمره اربعه وعشرين وش عندك!
ايان : لا حول ولا قوة الا بالله يـ منار الله يعين من بياخذك يبنت خلاص اص
منار ترفع خصله من شعرها بيدها : الا يهنيه يومه خذاني
ايان : الحمدلله والشكر .. مير قومو تعشو برد عشانا
اياد : اي والله الجوع شين يخوك
ريان : الا ابوي وينه ،
منال : رحت له وعيى يقول مايبي بينام
الجازي قامت : اجل بروح انام حتى انا ...
تصبحون على خير
الكل : وين يمه .. العشاء يمه ...
ماكلتي شي ؟
الجازي بابتسامه : تسلمو والله مالي نفس يلا سلام
وطلعت وتركتهم ، منار وهي تجلس على السفره
: والله اني جويعه بالحيل العذر مابنتظر احد ..
ضحكو الكل عليها تقدمو ياكلون سوا ، وبعد عدة دقايق طلع الكل متوجه لغرفهم ينامون بعد اليوم الغريب هذا ،
عند ركـود اللي قال ما قال وطلع لحقه راكد ووقفه
راكد : وين وين ؟
ركود تنهد : ودي اروح للكاسر والجلمود خاطري بشوفتهم
راكد : انت وش فيك .. مره تقول ماودي بالعرس ومره تقول لامي تتجهز!
ركـود ويدينه بجيبه : اوف تكفى يـ راكـد خلاص يرجال سكر الموضوع انتهى
راكـد باستغراب : وش اللي انتهى يركـود .. عويض الله من شرك ومن فكرك وش ناوي عليه يرجال خلاص ارضى وتزوج كود انك تلقى السعاده والرضى مع بنت الناس
ركوـد وهو يمشي بالظلمه متجه للكاسر : هاذا اللي بيحصل لكن ما بتجلس عندي كثير
راكـد عقد حواجبه وقف مسك ركـود من كتفه ولفه صوبه
: ويش انت تقصد؟
ركـود ويدينه لسى بجيبه وشماغه ملفوفه على وجهه
: خلاص بتزوجها وبعد ثلاث اربع شهور بطلقها
راكٰد تغيرت ملامحه لصدمه اقوى
: يرجال انت انهبلت .. تبي تطلق البنيه؟ وش صاير لك يركـود
ركـود طلع يدينه من جيبه ونزع شماغه من على فمه
: اجل ارضى على امي بعد كل هالعمر طلاق ؟ مريض انا
اتزوج واسكتهم عني بعدها بطلقها وتروح بحال سبيلها وانا اتبعى هوى قلبي
راكـد مسكه بيدينه الثنتين من عند كتوفه وهزه بشوي
: ركـود اصحى انت شكل بعدك نايم واعي على كلامك يرجل! وشو هوى قلبك الوديان والطيور؟
ركـود يبعده يدين راكد عنه
: اي نعم الوديان والطير فيها شي
راكـد تكتف : اجل ليه تطلق البنت؟ ليه ماتجرب يمكن تكون شريكه حياتك! وتعيشون بسعاده؟
ركـود ضحك رجع يدينه لجيبه ولف قدام وكمل مشي
: اي شريكه حياه واي سعاده انا قلبي متولع مع الطيور وهواها يـ راكـد ولا يهنى لي بال حتى نسافر انا وطيري ونشوف العالم والديار
ولا ودّي اظلم بنت الناس خلها تشوف حياتها
راكـد ضحك عليه
: يرجال الكلام معاك مامنه فايده .. اشهد انك تهوى الصقور صدق ولا مين يروح تالي الليول لجل تختفي ضيقة بشوفة طير ؟
ركـود ضحك طلع مسبحه لونها ازرق فيها بقع بيضاء وبدت تلعب على اصابع يده اليمنى تروح يمين وترجع يسار وعلى هذه ردد بصوت هجيني خفيف ركـود رد على راكـد : للطير حبا مستباح
مقناصه يُداوي الجراح ..
ضحك راكـد ودخلو المقيض لعند الكاسر صقر ركـود
تقدم ركـود قدام الكاسر قال وهو مبتسم
: اشهد ان هاذا اللي شوفته تبري العله يخوك
ضحك راكـد بدون رد
،
في جهة اخرى من ديره الوادي عند بطلتنا
من لمن راح الشيخ من عندهم وهي بالمخزن وتبكي تفكيرها كله حول الحياه الجديده اللي ابوها رماها فيها بدون اي تفكير أثـار وهي جالسه بفراشها تحت الشباك واضاءة القمر عليها كانت تبكي بصمت وتمسح دموعها الحاره اللي تطيح على وجهها البارد اردف بصوت مايسمعه الا هي ببكاء
: يارب اختر لي ولا تخيرني اختر لي يارب العالمين يارب العالمين انه يكون خير لي عن كل شي واجهته يارب يكون لي العوض هو واهله يارب
قامت تصلي ركعتين في اخر الليل ركعه لا يرها الا الله تعالي تشكو اليه وتبكي
..ومن لنا ملجئ في هذه الحياه الا الله تعالئ ..
-
على مشارف الفجر في نفس الديره ولكن من جهه اخرى في بدايه الديره شخص يحاول يمشي بكل ثقله ومعه حصانه يجر رجوله -يكرم القارئ- وكانه يحتضر لاحظه ركـود من بعيد وهو يمشي بثقله تقدم له ركـود وهو مستغرب من وضعه ثوبه مليان غبار ووجه شاحب مع انه مغطي وجهه بعمامته لكن مع ذاك واضح لركـود وجهه زين تقدم حتى صار قدمه تماما اردف ركـود بكل هدوء
: عسى ماشر يالاخو ؟
سلطان حس انه نجئ من الموت بأعجوبة رد بثقل
: انا رحال .. كح تنحنح وكمل .. رحال يالطيب وابي الماء والزاد صار لي ثلاث ايام لا ميّ ولا زاد !!
ركـود تقدم صوب مسكه من يده اليسرى واسنده حتى يوقف بشكل صحيح ابتسم سلطان وقال
: عز الله انك ..كح مرتين .. انك سنافي يطيب .. سكت شوي .. والله اني نصيت رجال
ركـود وهو يحط يد سلطان على كتفه ويسنده حتى يوقف صحيح ويمشي معاه صوب مجلس ابوه : تسلم تسلم يالاخو .. تقدر تمشي
سلطان بتعب : اي بالله امشي .. وشلون ما امشي وانت سندي !
ويقصد بكلامه مساندة ركـود له ،
ضحك ركـود وحس برضى حس انه سلطان هون عليه من كثير من عقب سالفه البارح مشى فيه حتى وصل لمجلس ابوه وقام الشيخ نافع وهو متروع من شكل الرجال اللي داخل عليهم شكله يرثئ له جدا
تقدم سعد وساعد ركـود حتى اسندو سلطان على المجلس وخلوه يرتاح اردف ركـود لـ سعد
: سعد يبعدي انهج صوب المعالج ازهم عليه ياتي بساع
هز سعد راسه بالموافقه وراح يركض للمعالج يناديه
الشيخ نافع تجنب ركـود وجلس عند راس سلطان
: يالاجودي عسى ماشر .. وش صاير عليك ؟
رد ركـود يحاول يلطف الجو بينه وبين ابوه
: يقول انه رحال وله ثلاث ايام ماذاق الماء والزاد
مارد عليه الشيخ نافع وناظر لـ سلطان
دقايق وجاء المعالج وسعد فحص سلطان ماهي ثواني الا وتكلم المعالج
المعالج : باذن الله انه ماعليه خلاف مير انه داخله برد والظاهر عليه الجوع ، مريره ان شاءالله ويصحصح يبي له تغذيه ويتدفى زين
هز راسه الشيخ نافع وناظر لـ سلطان اللي كان منهلك وواضح فيه التعب انحنى صوبه وجلس قدام وجهه
واردف بدون لا يناظر ركـود : اسمع يركـود تاخذ الاجودي للبيت وتعطيه من لبسك وخله يتروش بماء دافي كود انه يطيب ويصحصح ويعلمنا من اي ديره هو ووش اسمه اكيد ان اهله يدورونه
ركـود هز راسه بالايجاب تقدم صوب سلطان مسكه حاول يقومه حتى قام معه سلطان وتوجه فيه صوب بيت اهله
ركـود وهو يسنده ويمشي معاه اردف سلطان بتعب
: اللهًيب .. تكفى يالاجودي حصاني وينه ؟
ركـود ابتسم رد عليه وهو ماسكه بيدينه الثنتين يد من عند يده اليسرى ويد تمتد من ورا ظهره لحد يده الثانيه ع شان مايطيح قابلو راكـد بوجهم شاف راكـد ركـود يسند واحد جاء يركض ومسكه يساعد ركـود باسناده حتى يوقف بشكل صحيح
راكـد بستغراب : سلامات وش السالفه من ذا ؟
ركـود : اعلمك بعدين امش امش صوب البيت
راكـد : وليه مو صوب مجلس ابوي وش له للبيت
ركـود : يرجال اشهد انك تسولف لا اله الا الله امش وبعدين اعلمك
سلطان يحاول يتكلم تنحنح لين نطق
: انا ..كح مرتين تنحنح .. اسمي سلطان سلطان بن ..
وقف ماقدر ينطق اسم ابوه حس بجمره تجري بعروقه حنى راسه وامتلت عينه دموع لاول مره يحس نفسه ماله اصل ولا له اهل لاول مره تمنى يقول انا سلطان محمد من ديره المعازف لاول مره كان يبي يعرف بنفسه للاشخاص اللي حبهم حيل وهو توه عارفهم حس بالانتماء لهم وخصوصا لركـود بس ماقدر يتكلم اكثر مسك نفسه لا يبكي بيدينهم
ركـود حس ان فيه شي كبير بالانسان هذا شد على يده
واردف : حي الله سلطان يمرحبا يـ سلطان نورت ديرتنا بين اهلك وربعك ماعليك الحين ماله داعي الكلام تطيب ان شاءالله ولاحقين على كل شي يسنافي امش امش
تقدمو حتى وقف ركـود ماسك سلطان وتركهم راكـد وفتح الباب ودخل البيت ارتفع صوته
راكـد : يبنات يهيه معي رجال ولا وحده تطلع بدون جلالها
البنات اللي بوسط الحوش قامو واللي داخل بقو داخل
منال : غريبه اول مره راكـد يجيب احد للبيت ؟
ايه : اي والله ماعمر الضيوف الرجال جو ببيتنا اول مره
منار : اكيد انه مو ضيف عادي
ايان : الله لا يبلانا صدق انكم فاضيات
ايه : تعالو نشوف منهو من شباك الصاله ماحد بيلاحظ
منار : اي والله امشي امشي
دخلو الصاله وفتحو جزء بسيط من شباكها وشافوا المنظر
راكـد رجع وفتح الباب وقف جنب ركـود تكلم بصوت خفيف
راكد : وين بنحط الرجال؟
ركود : ياربي يـ راكـد شفيك انت وش صاير بك .. بالمجلس وين يعني امش امش عاوني بس
تقدم راكـد وسند سلطان حتى دخلوا داخل وشوي شوي حتى دخلوا مجلسهم وسندوا سلطان على الارض
ركـود : رحّ جب لرجال فراش
راكـد : طيب
طلع من عندهم ، عند البنات انصدمو بشخص اللي ماسكينه اخوانهم ويدخلونه المجلس شهقت منار شهقه عاليه ضربتها على كتفها ايه
أيه : وجع ان شاء الله ليه كل ذا ؟
منار : ليكون بيذبحون الرجال !
ايه خافت راحو يركضون للمطبخ عند منال وايان
منار تهز يدها : بنات يمه يمه شفنا منظر يروع
ايان : بسم الله وش فيكم ؟
منار : راـكد وركـود بيذبحون واحد
كانت تتكلم مانتبهت لراكـد اللي وقف وارها ضربها ضربه خفيفه على راسها
راكـد : انتي متى تكبرين عقلك وتبطلين الافكار السوداء ذي وش نذبحه مانذبحه ؟
منار وهي تتحسس مكان الضربه على راسها
: بعيوني شفتكم تجرونه للمجلس قل كذب
قرب منها راكـد ومسك اذنها
: يعني تطلطليين على الرجال وهو داخل ولك عين تألفين بعد مريضه انتيي .. لو شافك الرجال الحين
منار تحاول تبعد يده من اذنها : ايّ ايّ يحيوان اذني !!
تركها راكـد وهو يضحك عليها
: اشهد ان اللي بياخذك امه داعيه عليه من بيصبر عليك انتي وحتى تفكيرك اجرامي .. امشي امشي هاتي فراش وبطاطين امشي لا اهفك كف
منار وهي تتحسس اذونها : هين هين يرويكـد هين والله لاعلم ابوي
ايه بضحكه : اجل بيذبحونه مريضه انتيي مادري كيف للحظه صدقتك وجيت اركض معاك يقال اني بفزع له !
ايان ومنال ضحكو على غباء أيه ضحك راكـد تقدم صوبها ومسك اذونها : بالله حتى انتي مو بهينه يحبة الرز تطلطلين على الرجال
صاحيات انتم صاحيات؟
ايه بوجع ويدها عند يدينه راكـد : والله اسفه اخر مره
ترك اذنها وهو يضحك اردف
: زين تكلمتي وانا موجود ..يلا يلا بسرعه هاتو اللي قلت لكم
طلع من عندهم والبنات يضحكون
منار بضحكه ويدها على بطنها : اهخ بطني يمه اهخ غبيه انتي غبيه فضحتي نفسك بنفسك محد جاب طاريك تقومين تناقزين ليه
ايه بصوت شبه باكي : اص بس اص حسبي الله
منال وايان ميتين ضحك عليهم
دخلت جازي بابتسامه : ويش صاير وش فيه راكـد طالع يضحك من عندكم ضحكوني ؟
منال بضحكه : ابدا والله منار اكلت لها ضربه محترمه ومحد جاب طاري للشيخه ايه قامت علمت على عمرها واكلت لها جلده محترمه
ضحكت الجازي : ليه جلدكم وش مسويات ؟
ايان علمت امهم بسالفه ضحكت الجازي اكثر حتى شافت وجهه ايه محمر تقدمت صوبها وحضنتها وهي تضحك ،
راكـد بعد ماطلع من المطبخ شاف امه قدامه وقبّل راسها وهو مبتسم
الجازي : عساك دوم يبعد قلبي مبسوط ووجهك مسفهل يارب
راكـد : تسلمين ليي يالغاليه .. يمه عندنا رجال بالمجلس انتبهي ويمكن يدخل غرفتي او غرفة ركـود يتروش
الجازي : ليه منهو اللي عندكم ؟
راكـد قبّل راسها : والله مادري بعدين اعلمك
وراح لصوب المجلس ودخلت الجازي للمطبخ ..،
بالمجلس عند ركود وسلطان
ركـود : قم معي تاخذ لك دش الحين تريح كود ان لو عليك حراره ولا شي ينزل منك
سلطان هز راسه بالايجاب حاول يوقف تقدم صوبه ركـود يعاونه حتى وصل راكد وساعده وراحو صوب غرفه ركـود بعد ما بلغو البنات لاحد يطلع
، بوسط غرفه ركـود كانت غرفه ركـود اكبر غرفه بالبيت ومنفصله لذالك هي بعيده شوي عن البيت كامل
لكن يجمعهم حوش كبير محاوط البيت كله من مجلس وبيت مكون من خمس غرفه ومطبخ وصاله ومخزن وحوش داخلي ومجلس خارجي وغرفه لركـود
غرفه ركـود وفراشه وصندوق ملابسه اللي كان كبير بشكل مستطيل على الارض يرتفع شوي عن الارض فتحه وطلع منه لبس داخلي وثوب ابيض وشماغ وعقال طلع من الغرفه وتقدم صوب المطبخ حصل ايان فيه ركـود : ايان سوي شوربه للضيف وحطي فيها فلفل
ايان : ابشر على خشمي
ركـود : تسلمين عليه الشحم
طلع من المطبخ ورجع لغرفته على طلعت سلطان من دوره المياه -يكرم القارئ-
سلطان صحصح شوي اردف : والله مادري وش اقول لك لكن الله يقدرني على رد الجميل
ركـود وهو يوقف قدامه وطبطب على كتفه : ماله داعي الكلام مابينا مابينا امش امش معي
طلعو من غرفه ركـود وتقدمو صوب المجلس كان فيه راكـد معدل فراش لـ سلطان
راكـد : نم وريح يضيف ولا تشيل هم
سلطان : الله يبيض وجيهكم والله ماقصرتوا والله
ركـود : وجهك ابيض يـ سلطان وجهك ابيض ريحّ ريحّ
تقدم سلطان وكان بينام لكن استوقفه ركـود
ركود : لا دقيقه لا تنام كل بالاول وبعدها نوم العوافي
سلطان انحرج : لا بالله ماودي لا تتعبون عمركم يـ
سكت شوي
ضحك ركـود : ركود اسمي ركـود .. واشر على راكٰد بيده .. وهاذا راكـد اخوي
ابتسم سلطان : والله ونعم
راكـد وركـود : ماعليك زود
قام ركـود توجه للمطبخ وحصل ايان مجهزه اللي قاله
تقدم لها وقبّل راسها تعبير عن الامتنان لها
ركـود : تسلم يدك الله يعافيك
ايان بأبتسامه : الله يسلمك .. حق وواجب
طلع من عندها متوجه لـ صوب سلطان وراكـد
دخل عندهم نزل الشوربه قدام سلطان اردف
سلطان : الله يعافيكم ويقدرني ربي وارد جميلكم علي
راكـد : يرجال ازعجتني جميل وجميل كل كل واسترد قوتك وتعال للمربط نبيها سباق ووناسه
ركـود ضحك عليه ، فز سلطان بلهفه وخوف وكانه نسى شي : تكفون يربع اللهًيب اللهًيب كان بيطلع لكن مسكه ركـود ؟
راكـد وقف : بسم الله.. وش جاك يرجل
ركـود فهم عليه : الحصان مع الحصن بالمربط ماعليه خلاف ان شاءالله تعال يرجال عيشك برد
سلطان تنهد ومسح على صدره ورجع لمكانه
تنهد : العذر والسموحه منكم لكن .. لكن اللهًيب والله انه اغلى من روحي يركـود
ضحك راكـد : عز الله اجتمعت بصاحب روحك رـكود يرجال حياته عند الجلمود والكاسر والله اني اشك انهم اغلى مننا
ركـود بضحكه : لا تشك تاكد بعد
راكـد ضحك : شفت شفت علمتك
ضحك سلطان : انشهد ان حبهم يكفي عن حب بعض البشر
ابتسم ركـود مؤيد كلام سلطان طلعو من عنده تاركينه ينام واضح عليه وعلى ملامحه التعب والإرهاق مع ذالك حاول قد مايقدر ماينام والعيال عنده ، دخلو عند امهم والبنات بالصاله
الجازي : يمه الضيف منهو ،
راكـد : واحد الله يستر عليه رحال والله العالم انه ضايع او مفقود
منال باستغراب : طيب ماقال لكم شي ؟
ركـود : اسمه بس .. الظاهر الرجال وراه سالفه الله يعينه
ايه : ليه وش سالفته ؟
ركـود : مدري زين عرفنا اسمه .. المهم لا احد يجي صوب المجلس اليومين ذي الرجال بيجلس هنا حتى نشوف له حل
وطلع رايح لغرفته بينام دخل نافع ولاحظه رـكود تقدم صوبه قبّل راسه
الشيخ نافع : وين الضيف وش صار عليه ؟
ركـود : مابغيت تهرج معي .. نايم ضيفك
الشيخ نافع هز راسه وتقدم لقدام بيكمل طريقه بدون اي رد على ركـود لكن وقفه صوته ، تنحنح ركـود ووقف قدام ابوه : ييبه ليه ماتهرجني .. وش مزعلك علي ؟
الشيخ نافع بحده : ولك عين تسئل يركـود لك عين؟ عقب سواتك فيني البارح وانا خايبه هقوتي فيك بالحيل !
ركـود تقدم وقبّل راسه ويده : افا اخسي والله اخسي اخيب هقواتك يبو ريان ..لكني صرت طايش شوي
الشيخ نافع : والله انك مانت بركـود اللي عرفته وربيته
تقدم بيدخل داخل الصاله لكن وقفته يد ركـود
تكلم ركـود بعد تردد كثير لكنه رضى بالامر الواقع وخصوصا كونه هو السبب الرئيسي في السالفه كلها : خلاص يبه ..بعد بكره ان شاءالله اروح انا وانت واملك على بنت محمد وش بغيت بعد وابشر بي اسويه لك
الشيخ نافع لف صوبه وابتسم له : ايه ابعدي ابعدي يبوي هاذي علوم الرجال هاذي العلوم السنعه ..
سكت شوي ورجع يحادثه : مير عندي شرط يـ ركـود !
ركـود استغرب : ابشر به يبه ويش بغيت ؟
الشيخ نافع : زواجك انا اللي احدده يـ ركـود متى مابغيت؟
عقد حواجبه ركـود : تم ولك اللي تبي بس طالبك يبوي لا تستعجل بالتحديد لين ارتب اموري طالبك
ضحك نافع واردف وقال : انا طلبتك شرط وانت عطيتني جهز عمرك من الحين ..
ومشى متجه للغرفته بينام بعد يوم طويل متعب له كونه الشيخ
ركـود حط يدينه على راسه : والله من ضحكته انه ناوي يعجل بالزواج ياليل الضيقه بس
طلعت أيه من ورا ركـود وجت قدامه وهي مبستمه
: اشوفك غيرت رايك يركود ،
ركـود : بسم الله الرحمن من وين طلعتي !!
أيه : اسمع اسمع .. انا اختك واقرب وحده لك صح؟
ركـود عقد حواجبه : وش عندك يـ أيه وش تبين !
أيه ابتسمت : صارحني انت شايف أثـار ؟
اعتلت الصدمه على وجهه رـكود من بجاحته السوال حط يدينه بجيبه : لا يشيخه تبيني اهفك كف يعدل ملامح وجهك وش ذا الاسئله البايخه؟ بعدين مين أثـار ذي؟
أيه تستعبط : زوجتك .. فيه احد مايعرف اسم زوجته المستقبلية ؟
ركـود قبل عيونه وتنهد من اخته تقدم بيمشي لكن استوقفته ييدينها لمن وقفته وهي تقول : اوه اوه طيب طيب مابقول شي ثاني بس والله يأنك ذويييق يقلع راسك ماتوقعت ذويق بطريقه ذي !
ركود تعب منها ونزل يدينها من عليه : يعيل انتي متى تفكيني بلحالي ؟
ايه بعبط : بروح بروح .. بس والله لو اني رجال شفت .. والله لو تصير حرب وحرايب بيني وبينك ما تركتك تتزوج أثـار
راحت وهي تضحك عليه ركـود هز راسه
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━