2 - الفصل 2: الـقـا؏ الأول

الأدعج "قاع الظلام "

بقلمـَي زهرة الساعدي

لطفًا فراشاتي دوسن علىٰ النجمة وعلقن بين الفقرات

حساب الانستا

zahralsadi

قناة التلي

zahralsadi

تحذير ⚠️

بعض المشاهد تكون قاسية وغير مناسبه للقلوب الضعيفة

رواية ليست كـ الروايات

سوف تشهدون على اصعب الحكايات

ضوضاء . اصوات اثار اقدام تهرول . قلب ينبض بقوة

رئة تسارع الهواء لألتقاطة . جسد يسُارع الحياة للاستمرار

في مكان أظلم متهالك من اعمالهم السوداوية

بين أيدي وحوش لم تجرب ولا تعرف شيءٍ من الرحمة

هذهِ هيَ بطلتنا تحارب للبقاء على قيد الحياة .

صوتَ صفارات الانذار تزرف طبلة الأذن

واضوية سيارات الدولة محتلة الطُرق

اهرول بسُرعة مفرطة لدرجه أنقطاع النفس

وصلت لمنطقة أول مره ادخلها مهجورة ومابيها بشر

توقفت من گمت ما أحس باطرافي

دگيت على رجليه واردفت بخفه

- مو وكتها تعطلن عليه اركضن

القيت نظرة لهذهِ المنطقة العجيبة وتكلمت بيني وبين نفسي

- وينهم وين راحو ؟ قبل شوية چنه سوة وكلشي ماشي

مثل ما مخططين منو الخربها علينا ومنو كان تابع الهم ؟

شصار وياهم انلزموا لو جاي ينازعون علمود يهربون منهم !

ما تساءلت أو بالأحرى ماخلوني أتساءل

شفت سياراتهم جاية للمكان الأني بي و

وراهم وفد من الجيش يهرول

بدون لا افكر كملت بهروبي وحربي في انقاذ نفسي

كلشي أنتهى من وصلت لشارع مقطوع

وين اروح ماكو غير اذب نفسي بالـ بزل حتى اخلص منهم

والنفس عزيزة مو بهل سهولة افرط بيها

التفت ردت اتحرك وأبقى احارب وادور مكان اهرب منه بس !

تيبست بمكاني من تخله مسدس على جبيني

غمضت عيني وبلعت ريگي اجاني صوت خبيث يتكلم بانتصار

- وأخيرًا لزمنه الاعبه بينا لعب .. اقري الفاتحه على روحچ

كلشي انتهى و وقت اللعب خلص

حسيت نفسي بدوامة دخت واختل توازني

معقولة كلشي أنتهى ؟ خسرت وبالأخير هم الفازو !

اني واگفة وأتساءل ولابد انتم كذلك تتساءلون

شوصلني لهاي المنطقة .. وشنو الراح اخسرة وياهم الفازو ؟

للجواب على هذهِ الاسئلة

ارجعوا الى الزمن القديم حيث تقع تلك البناية من بداية الاحداث

مع الكاتبة زهرة الساعدي .

...

أهلًا بكُم في قلب العراق / بـغـداد في الحكم الصارم

سـ أتجول معاكم في شوارعها المزدحمة

بين احيائها السكنية وقصورها الفاخره

لنعود الى تلك البناية المتهالكة حيث تسكنها فتاة كالحلم !

بل هيَ تفوق الأحلام لتكون لنا ولكم كـ الخيال

من قوتها يأخذ الرجُل قوته

ومن رقتها نسُجت رقه حواري الجنِان

صنُعت نفسها بنفسها دعست على اوجاعها بـ عجلات احلامها

اصبحت كوبرا تجوبُ إرجاء الأرض وظهرها متُجرد مما يُدعى خيال .

في صباح من صباحات شتاء بغداد القارصُة من البرد

بأحد ازقتها البائسة. في الطابق الثالث من هذهِ البناية المتهالكة

وقفُت أمام الغُرفة التي تسكنها بطلتنا أحمل بيدي مفتاح الأذن

الذي حصُلت عليه من تلك الجميلة وبهذا تمُكنت وإياكم

لدخولها والتعرف عن مايحدث في حياتها ..

قبل أن ندخل في هذهِ الغُرفة

أنصتوا الهدوء واتبعوني

فـهذه الرحلة متعبة وشاقة للغايه

لاتحكموا على القصة من القاع الأول

فـ لازالت الرحلة في بدايتها

وأتمنى من جيشي الخلوق يتلزم الصمت

ويبقى كما عهد في قمة الثقافة

ويعبر عن الرأي بكُل ودً واحترام .

~~~~~~~~~~~~

2024/6/6

6:6 مساءً

بـدأت الـحكـايـَة

التاريخ هو كتابة هذهِ القصة ..

اتخلخلت مسامعي رنـة الجرس اليفزز كل سُكان هذهِ البناية

صار وقت نهوضي من الفراش

حضنت المخده ورفعت اللحاف اغطي وجهي

ماريد اگوم بـهذا البرد واعوف حنية الفراش الدافي

رجعت غفيت بدون لا أحس

فزيت بخوف من نرفع اللحاف مني

- دكومي داده لاتجي المدام تشرنا على الحبل

- هيچ يگعدون ؟ دحچي گولي مو گبل توخرين اللحاف

- اوي عيني موزين دا اگعدچ

رجعت اللحاف لجسمي ورديت

- وخري من وجهي ماريد اصبح بيچ

راحت واني مثل التنبل رجعت نمت

اي شسوي اموت على النوم وخاصةً بالشتاء

اجاني صوتها الهادء يردد

- ولچ اگعدي المدام راح توصل غرفتنا وتلگاچ نايمة

فتحت تك عين وابتسمت

- اي هاي الوجوه النصبح بيها لعد مثل ذيچ الططوه

خلت ايدها على شفايفها بخجل

- ولچ لاتسمعچ

- وخل تسمع شنو مثلًا اخاف ؟

- السانچ يمعوده هسة صبحنا

زفرت بضجر وگمت غسلت

فتحت الكنتور وشكو لبس بداخله لبسته

ختمتها بلفة اللثام على وجهي والكبوس على رأسي

ماظل يبين شي مني بس عيوني

طلعت واني شايله الغراض متوجها لمحطتي الأولى

امشي بالدرابين الي عندي بيهن ذكرى خالدة بعقلي

بكل دربونة إلي اثر . وعلى كل طابوگه محفور نقشي

بهاي المنطقه الـ تلم اتعس البشر

راسمة احلامي البسيطة . والحياة الورديه الاتمناها

وصلت يم عربانة عمو ابو فواطم وگفت اشتري

- صباح الخير عمو

التفت فتح حلگه بفرح ورحب بيه

- ابو فواطم : صباح النور ياهلا بجميلة الجميلات

ابتسمت ورديت

- هلابيك ، كاسة لبلبي رحمه لأمك

باوعلي بنظرة خاطفه وضحك رفعت تك شفتي وابتسمت

اخذت منه الكاسة انطيته ربع ومشيت

وصلت لمحطتي الخلصت طفولتي ومراهقتي بيها

وحاليًا شبابي .. من عمُري ثمن سنوات للآن

اني اجي هنا وحدي .. اواجه واحارب في سبيل

اطلع المطلوب مني واذا ماطلعته اشوف الويل

شمرت الغراض وگعدت مديت رجليه وبلشت اكل

خلصت گمت ذبيت الكاسة بالحاويه ولكيت ماء سبيل

غسلت وشربت .. رجعت للرصيف گعدت

هذا احبه أكثر منهم

رفيقي مايوم أذاني ولا مل مني

كان دائمًا يسمعني بدون ضجر

لميت رجليه لصدري وخليت راسي عليهن

ظليت انظر لجها السيارات التجي

اباوع لوجوهم واحدد شنوعايشين وين رايحين

مرتاحين ؟ سعداء ؟ عدهم مشاكل ؟ ووووو

صـح هذا التفكير والتدقيق يتعب بس هيچ يله يخلص وقتي

بالرغم من الابسته البرد قرص عظامي

والهوى يحرك خصلات شعري المنسدله على ظهري

رجعت راسي ليوره حركته ورفعت شعري

سويته كباية ورجعت لفيت اللثام على وجهي

لكن هالمره ضبيته اكثر حتى لايطيح

ورجعت الكبوس لشعري ضميته

ظليت ساعتين ومحد جاي ماخذ مني

لحد ماطبگت سيارة وگفت على حيلي بفرح

حچه وهو يباوع للوراي

- ابيش الباكيت ؟

- بــ ربع دينار

- يعني اثنين بواكيت بـ خمسمية

- اي

- والاربعة ابيش تحسبيهن

- بألف

ابتسم واردف

- ماعليهن تخفيض يصير

- لا مايصير

- دنطينا أربعه

شعرت بالفرحة تلامس خلايا روحي الباهته

واحد راح ياخذ مني اربع بواكيت لعد اليوم من صالحي

دنگت شگيت الچيس وطلعت اربع بواكيت اكنيلكس

قدمته اله اخذه خلاه يمه ورفع محفظته

غيرت نظراتي لغير مكان عيب ابقى اباوع على فلوسه

خاف عباله نفسي ضعيفه لو احسد

صار هيچ تفكيري من صار وياي موقف اسوء منه ماكو

قاطع وسوستي بصوته

- ام عيون هاچ الفلوس

عقدت حاجبي سحبتهن منه بنتر ورديت

- شكرًا

رجع ثبت نظراته وراي وتحديدًا على الرصيف

- تمسحين جام ؟

درت وجهي باوعت للغراض وهزيت راسي بـ معنى اي

- لعد تعاي مسحي جام سيارتي

ضميت الفلوس بجيب بنطروني ورحت للغراض

رفعت ارداناتي وبلشت امسح خليت الجام يلمع لمع

بعدت واني نظراتي متركزه على الجامه الأمامية

اخاف اكو وصخ مامسحته

- شگد تردين ؟

- اليطلع منك

طلع بعد ألف وانطاه إلي ابتسمت بفرح ولو بيدي اگمز

اليوم بوجهمن مصبحه ؟ تذكرت من گعدتني هيَّ

دخل ارجع اله ابوسچ من راسچ

حسبتهن صارن ألفين

بعد شگد ويصيرن عشرين ؟

ظليت احسب وعرفت شگد باقيلي حتى اگدر ارجع

غادرت محطتي الاولى وظليت افتر من محطة لمحطة

ابيع اكنيلكس وامسح جام .

غوربت الدنيا يله خلصت

رجعت للرصيف البلشت يومي منه

گعدت مثل المعتاد مديت رجليه وبلشت احسب

جمعت اكثر من المطلوب حيل فرحت

عزلت الزايد على صفحه حتى باچر اذا ماطلعت اخليهن فوگاهن

گمت بعد ماضميت الزايد ولزمت العشرين بيدي

بهذا الوقت والزمن صعب واحد يحصل هل مبلغ

لكن هيَّ تخلينه نطلعهن غصبًا عنه

تطلعنه من الصبح للمغرب ونشتغل أكثر من شغله حتى نطلع التريده

رجليه تگطعت يله وصلت يم المنطقه الاسكن بيها

شفت ابو فواطم وفواطم واگفه يمه طفرت حضنتها

- حقيره شگد مشتاقتلچ وين غاطه

- فواطم : بنص الخير

- كلنا على هالخير اختنگنا منه

- فواطم : هههه بشري گدرتي تطلعين المبلغ المطلوب ؟

رفعت الفلوس ورديت

- ويا يوم ما مطلعته

- فواطم : اي عيني بعد الكوبرا

رفعت حواجبي بغرور واردفت

- ماكو شي يصعب عليه

- ابو فواطم : شنو هذا الحچي على نفسچ بابه

انتِ فراشة ترد الروح

- يا عمو بهاي المنطقه والبناية ماتفيد وياهم الفراشة

- ابو فواطم : ميخالف بنتي لازم تكون عندچ رقه وانوثة

ثنيت شفتي ورديت

- على بختك هيَّ محسستنا احنا بشر انوب رقه وانوثة

هز راسه متأسف واردف

- ابو فواطم : حسبنا الله ونعم الوكيل

جريت نفس عميق وزفرته

حسيت بالخنگه وصلت لبلعومي

اختنگت حيل وضاگ النفس بصدري

ودعت فواطم وابوها وتمشيت

يم باب البناية شفت البنات يجن

بيهن الفرحانه لآن جايبه المبلغ المطلوب

وبيهن الخايفه لان مادبرته وراح تتعاقب

تراجعت للخلف صرت يم الشجرة انتچيت عليها وظليت اباوع

اباوع على البناية وعيوني تحچي قبل شفايفي على الشايفتة

عشت بحرمان وتعب بيها

ماشفت الراحه وشهدت على انواع العذاب

كلشي يجي ابالكم ومايجي شفته وعشته

اتعب واتعذب وابچي وارجع ارتمي بداخلها ماعندي مأوى غيرها .

سكتت عن التفكير من شفتها تمشي وتاكل چبس

ابتسمت وصحت

- هي عوبه اني هنا

اندارت عليَّ ضحكت واجتني

- شعندچ هنا

- اريد اشاهد الفلم

- مامليتي من مشاهدته كل يوم ؟

- مليت ولان مليت جاي اشاهد

- شناوية ؟

- افرها فر وافلش البناية على راسها

- لاتلعبين وياها تعرفينها شنو هيَّ

- واني اريد اخليها تعرف الكوبرا منو

گلبت عيونها بعدم رضا وگفت حضنتها بقوة

- ها شكو اجن السوادين

- وثول مو زين احضنچ

- لا اكو شي

- اي اليوم من صبحت بخلقتچ نرزقت

- يمة شگد احبني صدگ وجهي رزق

اگلچ لو اني هسه خرزة رزق مو احسن من هالعيشه

- طبعًا احسن لچ اني حتى صرصرة أتمنى اصير

- دتعاي ندخل لانصير صراصير من هالبرد

دخلت واني وراها صارت بوجهنا

يم الباب واگفه مخلية اديها على خصرها لا يا خصر هذا

جسمها مابي معاني عباره عن كرش

- طلعتن المبلغ

شمرتهن بوجها واردفت

- اني من يوم يومي اطلعه

مشيت وهيَّ حچت وراي

- شگد اتمنى تجيني مامطلعتها واعاقبچ

ضحكت بصوت وكملت طريقي

شمرت الدبه والماسحة ، باچر الصبح الكاها متروسه

والماسحة منظفة ، صعدت بالمصعد الباقي اخر نفس

وصلت للـ ممر البي الغرفة الاسكن بيها

تمشيت وإني اقرأ بالارقام المرسومه على كل باب

وصلت يم الغرفة المرقمه برقم الـ 12

جريت نفس ومديت ايدي ليده الباب فتحتها ودخلت

شمرت نفسي على چربايتي

ظهري ظل يطقطق من التعب بدون لا احس غفيت

فززتني أيـد ادغ بية

- ولچ اكعدي

فتحت عيوني الثكلانه رديت بنعاس

- لاتگليلي صار الصبح

- لا بعدها ليل

- وخري المن مگعدتني

- ولچ مطرت والجو يخبل گومي نكمز جوه المطر

- وخري مني ماري

- ماريا : گومي عفيه مو تدرين اخاف اطلع وحدي

- اي اتلفلفي باللحاف ونامي ولچ تگص گص وين نطلع

- ماريا : لاتخليني اتوسل گومي

خليت اللحاف على وجهي ورديت

- غير مرة

- ماريا : اطلع وحدي

- لا ونامي

رجعت راسها على المخده

چربايتها صايرة يمي

من جوه اللحاف مديت أيدي ادغدغها ضربتي ونترت أيدي

التفت الها واردفت

- تدرين اذا نطلع شنو يصير ؟

- ماريا : اعرف

- لعد المن تردينا نطلع ؟

- ماريا : مختنگه اريد اجر نفس نقي

- وتجرينا بالطرمه مال البناية لا ومنو واگف ينتظر هسه

- ماريا : ليش من كلشي محرومين وليش ابسط امانينا ماتتحقق

وليش ماعدنا اهل ؟

غمضت عيوني بتعب ورديت

- هذا نصيبنا من الدنيا

- ماريا : لا مو نصيبنا هم الي ذبونا وهيَّ الي تعذب بينا

سالت دمعتي من مدمع عيني رجعت نمت على ظهري

بده شريط ذيچ الليلة يمر على بالي

مثل الحلم المشوش اتذكر مقتطفات فقط

طفلة تايها ماتعرف وين تروح تبچي على اهلها

حاضنه الدُب مالتي واشهگ وارجف من ورا الخوف والبرد

گعدت على احد المسطبات .. خايفة شارده الذُهن

ماعرف شلون أتصرف

طفلة بعمُر الـ اربع سنوات شلون اگدر اتصرف وأني بهذا الموقف ؟

كلشي ماتذكر كلشي مشوش وما اگدر أفهما

ومثل كل مرة اعصر عقلي أحاول اتذكر منو اني

وذيچ الليلة وين چنت وياهيَّ العافتني ؟ أفشل وما الگه جواب لأسئلتي

گعدت ارجف ظليت اهتز بقوة

لزمتني خايفه

- ماريا : شبيچ وتيـن شصار ؟؟؟؟

- ليش ذبتني اني مو بتها اي بتها

حاچيني ماري گليلي وين أكو أم تذب بتها بالشارع ؟؟؟؟

ولچ طفلة ماعرف احچي ولا اتصرف ذبتني بليله ظلمة

بمنطقة الزلمه يخاف يدخل الها ليش هيچ ليش

- ماريا : استهدي وريحي بالچ

وتيـن ماتتذكرين ابيتكم چنتي شلون عايشه و ويامن ؟

عصرت راسي حيل ضربته بقوة واردفت

- كلشي ماتذكر . بس شي واحد اتذكرة

اني حاضنه الدُب والدنيا ليل والجو بارد

ابچي واصيح بصوت خافت من ورا الخوف

" لاتعوفيني " اصيح على الذبتني

ما اتذكر شكلها ولا اتذكر منو هيَّ

اتذكر شي واحد وهو ظهرها من عافتني وراحت

چانت لابسه عبايه اي اتذكر العبايه

- متأكدة امچ الذبتچ !

باوعتلها وقهر الدنيا كله بعيني

- مادري معقولة مو امي ؟ اي خاف مو امي

ماكو أم تذب بنتها هنا وهيَّ طفلة ماكو

امي تلبس عباية لو لا ! مادري اني ماتذكر منو امي

كلشي ماجاي اتذكر ليش !!!!

رجعت اضرب بنفسي واشهگ حضنتي حيل تهديني

جريت نفس تنهدت واردفت

- سولفيلي على حنية الام وحضن الاب وسوالف الخوان

اوصفيلي شعور البيت الدافي

عافتني وصارت على چربايتها

- ماريا : ماكو احلى من حنان الام من تمشطلچ وتخاف عليچ

وحضن الأب اليستقبلچ بضعفچ .. وحزنچ وتطلعين منه

وانتِ فرحانه وقوية

واخخ ياسوالف الأخوان تخبل من تتناگرون وتتشاقون

وبالأخير واحد يراضي الثاني وتنامون سوه

ويا محلى البيت الدافي المليان حنية

بي راحه مو طبيعيه

- يعني ما تگعدين غصبًا عنچ وترحين تشتغلين

واذا ماطلعتي المبلغ تنجلدين ؟

- ماريا : لا كلشي يتوفر الچ وانتِ گاعده

- تكملين دراسه وتحققين حلمچ

- ماريا : ومن تجيبين الشهاده وانتِ ناجحه يبوسون راسچ

وينطوچ هديه

- وماتشوفين اشياء غير مناسبه لعمُرچ

- ماريا : اذا بالتلفزون تطلع لقطه سيئه يغطون عيونة

- ماعشت ولا راح اعيش هل شعور

- ماريا : أحسن لاتعيشي

- ليش ؟

- ماريا : من تعيشي وتتعودين عليّ من تفقدينا راح تتأذين اكثر

- ماكو اذيه اكثر كل الهنا مامرتاحين

- ماريا : لا اكو مرتاحين مثل المدام وزبائنها والحارس

واليشتغلن برضاتهن

- هم السبب بـ عدم راحتنا

- ماريا : ماراح نرتاح

نتهدت واردفت

- ماري شوصلچ لهاي المنطقه وهاي البناية بالتحديد ؟

- ماريا : باعوني للمدام

عقدت حاجبي ورديت

- منو باعچ

- ماريا : جدي وجدتي

- واهلچ !

جرت نفس وردت

- ماريا : چنت عايشه ويا اهلي عيشه تخبل

احنا مسيح ابوي چان يحب امي وراداها بالحلال

بس جدي وجدتي ماقبلو خالفهم وازوجها من وراهم

تبرو منه عافهم وراح سكن باربيل

عاش هو وامي واثنينهم موظفين

جابت امي قبلي اثنين باسل و ارام واني اخر العنقود

ماتتخيلن شگد سعيدين ومرتاحين

يخافون علينا من الهوى لو مر وزعجنا

مدللينا احلى الدلال ، كل اسبوع نطلع للجبال نتونس

بيوم وليلة أختفى كلشي واتبخر واحنا طالعين للجبل

صار ويانه حادث أخر شي اتذكرة شكل الدم بالگاع

بعدها

انغمى عليّ و وراها فقت وياريتني مافقت

لگيت كلشي متبخر وحياتي مگلوبة گلاب

ابوي وامي واخواني ماتو !

راحوا بلمح البصر وصارو ذكرى اذكرها بكل وقت واحن الها

ماعندي أحد اروحلة اخذوني جدي وجدتي وهنا عشت اسوء أيام

عيشوني بذل وطلعوا انتقامهم من أبوي بيه

وختموها بـ بيعي للمدام .. وهنا عشت اسوء من العشتة يمهم

سحبتها لحضني اواسي بيها واني وضعي اسوء منها

لا اعرف اهلي منو عايشين ميتين ولا اعرف ياهي الذبتني بذيچ الليلة

جعت ما ماكلة منهد كاسة البلبي

باوعت للبنات كلهن يشوخرن من التعب

خفت اطلع وحدي اعرف خارج باب هاي الغرفة شمنتظرني

لزمت بطني وغصبت روحي ونمت واني جوعانة ..

صبح الصبح واني مازلت على قيد الحياة !

غمضت عيوني بتعب لازم اگوم واواجه يوم كامل شيخلصة

بيه مابيه گمت ومثل كل يوم لبست وطلعت لعربانة ابو فواطم

وهالمرة خليتة يسويلي لفة لبلبي

اكل وامشي واباوع للناس كلها سكارة وتطوطح

محلات الشرب مفتوحة ويجون يشترون من الصبح

البنات والشباب والاطفال يجدون وقسم يبيع

باوعت لمرأة حاملة طفلة زغيرة

تترجى اليمشون حتى ينطوها ربع

بلعت الصمونة بغصة واني اتذكر اول ما اجيت هنا

وعيت وصرت افهم من دخلت بعمُر الـست سنوات

چانت تخليني اروح وي وحدة من اليشتغلن وياها

تفرش بالشارع وتنومني بحضنها وتجدي

بشمس العراق وبنص تموز و آب اني بالشارع وبحضن الشمس

تمرضت وصارت بيه سحايه وبالگوه عشت

ماتابت ورجعتني وياها وهم قاومت البرد والمطر وتمرضت

واول ماخلصت السنة السابعة ودخلت للثامنة

سلمتني الشغل وصار غصبًا عليّ اروح اطلع التريده واجي

تنهدت وكملت طريق بعت چيس الكنيلكس كله

وبلشت امسح جام ، وحدة من السيارت وهي الأخيرة

گلت بس اخلصها اروح لان صار عندي خمسة دنانير ضبط

بس اريد اطلع بعد حتى مثل البارحه اضخر على صفحة

واني امسح بالجامة صارت عركة مال ولد درت وجهي اباوع

صوفرت بصوت من طگه بوكس طشر معانية

مندمجه وياهم ولو بيدي اروح افزع

بالغلط رشيت الماي والزاهي على السايق واني نظراتي عليهم

خلاني ارجع انظرله من صاح بصوت عالي

- ثول الثولچ يا غبية ماتشوفين !!!

باوعت مصدومة خزرته وضربت على سيارتة ورديت

- هيو ويامن تحچي

- وياچ يا عمية ماتفرقين بين الجام وبيني !!

انتبهت للمسويتة بلعت ريگي ورديت

- ما انتبهت

- مرة الثانية انتبهي خوش !!!

ضل يصيح بصوت قوي نبه الناس كلها ضلت تباوع إلي

شگد ما احاول التزم بالعهد المنطيته لعمو ابو فواطم

والزم الساني الرشاش يجي واحد يتجاوز يخليني اخالف العهد

طبطبت على مقدمة السيارة وحچيت بنفس نبرته

- عدل اسلوبك لا افرك حلگك

- لا والله تالي وكت بنت شارع تفرك حلگي

ضربت تاير السيارة برجلي وصحت

- ماكو غيرك ابن شارع ياسرسري يا مستهتر

لو بيك ماتحچي هيچ وي بنية ياعرة الزلم

- باع السانچ اي شترجة منچ وشحچي هو انتِ تبيعين بالشوارع

- اسواك واسوة راسك المدوحس اطلع فلوس حلال مو نهب

وغسيل اموال واصعد افخم السيارات بالبوگه واشيل خشمي

لك فـد نعال انتَ شايف نفسك

مو امرعدك واطرگك براشدي يغير تقويم معانيك المرعبلة

تراجعت للخلف من نزل رفعت حجارة

حددتها على الجامه الأمامية وضربتها تكسرت

باوعلها بصدمة واني استغليت صدمته

شلت غراضي وركضت ، أسمع صوته يصيح وراي

- الزموها هاي حراميه

حچيت واني الهث

- هالمرة انعلست ورحت بيها

اركض وهو يركض وراي خليت وافتريت وتيهته

وصلت يم عربانة عمو ابو فواطم توقفت القط النفس

گمزت واني اصرخ

- عمو ضمني يمك اجاني

باوعلي محتار

- ابو فواطم : ها طلعتي السانچ للوادم

شمسوية من مصيبة جديدة ؟

- وسفه عليك عمو اني اسوي مصايب وام السان !

دا لبدني فدوه لشيباتك

هز راسة متعود عليّ كل ما اتعارك اجي يضمني يمه

سحبني ودخلني للبناية اليمه

خلاني ورخ الباب مال مدخل وطلع ، رفعت ايدي لصدري

يصعد وينزل بسُرعة من وره الركضة

شگول عليك يابو راس المدوحس اخ لو كاضتك

اله اعضك من راسك .. رجعت جاوبت

- انچبي ليش شردتي لو بيچ خير باقية

إعلان

كملت واني اهز راسي

- لا انوب يسأل وين عايشة وتطلعله المدام واحصل جلدة

واني اسولف وي نفسي صاح ابو فواطم

- ام الطلايب اطلعي

رفعت الماسحة والدببه وطلعت

- اني ام الطلايب شنو هل سمعة ياعمو الجميل

- ابو فواطم : ليش اني مچذب كل يوم جايتني تركضين

عمو لبدني شوكت تجوزين من طلايبچ مو اهل بغداد

راح يطلعون مضاهرات ضدچ

- اوي شسوي هم يتحارشون وتدري بيه ما اسكت

- ابو فواطم : لازم تسكتين بوية لا تگطعين رزقچ بأيدچ

- ماينگطع اغير مكاني ومن ينسوني ارجع الهم

صدگ عمو شنو رأيك ارجع ابيع چاي ؟

- ابو فواطم : اي وترحين تصلخين العالم مو

- لا بعد ماتنعاد

- ابو فواطم : ولا انسى من اجيتي تركضين ولبدتچ

واجو وراچ زلام يتراكضون و وراهم واحد وجها مصلوخ

- يعني عمو تقبلها يتحرش بيه واسكت ؟

- ابو فواطم : لا طبعًا بس مو تسبحينه بالچاي وتموعين معانية

- حتى يتوب وما يظل يبصبص ويذب كلام خايس

- ابو فواطم : امه داعيه علي اليندگ بيچ

هزيت حواجبي ورديت

- الكوبرا اني

رفع بطل عصير اليمون يريد يضربني يضوج من هاي الكلمة

ركضت مسافة وتوقفت انداريت أله واردفت

- شايف لو ما انتَ عمو الجميل واحبك

چان اراويك الكوبرا شتسوي

اتقدم الي عود معصب ضحكت بصوت وكملت طريقي

انقبضت روحي واختنگت من دخلت للمنطقة

يباوعولي بنظرة مرعبه ومقرفة

ولو ما يعرفوني اني من سكان المنطقة وداخله الها

ينهشوني نهش وياخذوني يبوگون اعضائي بدون تفكير

اسوء منطقة واخطر مافيات العراق بالدعارة

وتجارة الاعضاء يسكنون هنا ولابد البناية الاتعايش بيها

شريكة بالجرم اليصير واحنا احد ضحاياهم

كلشي تذكرت والصار وياي بالتفاصيل ظل يخطر ابالي

تأذيت واختنگت ، گمت ماشوف بعيوني

دخلت للبناية شمرت الغراض ودخلت الها للمكتب اصيح

- وين اهلي حاچيني وينهم ولچ دليني عليهم

گامت من الكرسي عدلت شعرها بهدوء وضحكت

- شنو هسة يله اتذكرتي !

- كل يوم اگلچ وينهم وانتِ مثل الحيوانة ماتجاوبين

بس گليلي منو الذبتني بذيچ الليلة؟

تقربت وبحركة سريعة ضربتني

وگفت بوجها وصرخت

- مجرمة كافرة شريرة لچ ياعجوزة البين

خليها ترچيه بأذنچ راح اعرف منو الذبتني وافلش البناية على راسچ

وجها ظل ينطي الوان باوعت وراي شفت اثنين گاعدين

لابسين قوط ومخلين رجل على رجل

رفعت ادية اثنينهن غميتهم وطفرت

دخلت للمطبخ جريت نفس واردفت

- حياية بطني فطست من الجوع

- حتى بهاي مو مثل الناس العادين

عوجت حلگي ورديت

- اي عيني موختلفة

- ههههه شنو هذا الصياح الصار

- تعاركت وي التسمونها مدام

وغميت جماعتها واجيتچ ميتة جوع شمسوية اكل ؟

صفنت وفتحت حلگها رفعت ايدي لوحت گدامها

- عيني شكرية الصفنه مو الچ داده

- شكرية : معناها اليوم تقوم القيامة

سحبت ورقة خس أكلتها ورديت

- عادي هيَ كل يوم قايمة

- شكرية : ولچ منين مصنوعة انتِ ماكو بقاموسچ الخوف !

رفعت اصبعي أشرت ورديت

- إلي ترجف منها الزلم تهزها مدام ؟

جاي تجاوبني اجانه صوتها يصيح بعصبية

طلعت اتمشى برهاوة صرت مقابيلها بالطابق الأرضي

بوسط الصالة او الساحة الدائمًا تجمعنا بيها وتنطي قراراتها

داير مدايرنا البنات والولد يشاهدون الراح يصير

تقدمت سحبتني من شعري لزمت معصم ايدها وعضيته

صاحت بصوت على الحارس النذل

اجة سحب ادية خلاهن ورا ظهري مقيدني

صارت گبالي ضحكت بصوت واردفت

- يله اضربي واجهي

رفعت رجلي ودفرتها بالمثاني

نطت عيونها واتغلغلت بالغضب تقدمت وبكل قوة عدها

ظلت تضرب بيه راشديات ، وجهي صار جمرة اشتعل شعل

سمحتلة يعوفني رفعني ليفوگ ورجع رگعني بالگاع

راحت هيَّ يله صرخت بصوت

- حوضي انكسر

للحظة ظنيت نشليت وجع مو طبيعي

اباوع للوجوه كلها خايفة وتباوع محد يگدر يوصلني

وينقذني من بين اديها ، خليت راسي بالارض ودموعي تجري

حسيت بنفسي ضعفت وحققت غايتها

ردت اگوم صار وجع قوي بحوضي وبكليتي

جريت نفس بتعب دخل الهوى ريتي بالحسرات

مسحت وجهي باوعت لـ ماريا گاعدة على باية الدرج

حاضنة نفسها وتبچي أشرت الها بعيوني بـ معنى تعاي

وگفت رادت تتقدم صاح الحارس

- اگل للمدام واخليها تعاقبچ وياها

- ماريا : طاح حظك انتَ والمدام البنية راح تموت

رديت بصوت هزيل

- رجعي ماري لاتخافين ما اموت بهاي السهولة

رجعت ماريا ودموعها على خدها مالومها ومالوم اي واحد هنا

بس يتقربون إلي معناها نهايتهم ، اجت التتسمى المدام

شايلة بيدها ملعقة اكل من بعيد واني بعُز وجعي انتبهت الها حمرة

سحلت نفسي للخلف وهيَّ تتقدم وعيونها تجدح شرارة

وصلت يمي رجع الحارس قيدني وخله ادية وره ظهري

گعدت على ركبها وصارت بمستواي

ردت اخلص نفسي ماگدرت هم أقوى

من وحدة هزيلة الجسد وضعيفه الحركة

لزمني من شعري وثبت راسي الها

لزگتها على شفايفي بكل برود

ضليت ارافس وهيَ تضحك بصوت قبيح وقوي

شلعتها واحس شفايفي انشلعن وياها

ظلت ترجعها وتوخرها برهاوة وخبث

وصوت ضحكاتها يتعالى اكثر كل ما اتوجع وابچي

روحي فرفحت واني جواها اطلب الرحمة

لكن وحدة مثلها ما تلمتلك ذرة منها

گامت رفستني ورفعت ايدها موجها كلامها للكل

- خلو هاي الـعار مثال الكم شوفوا اليتطاول

لو يتكاسل عن الشغل شيصير بي

واليگول وين اهلي دليني عليهم هاي نهايتة

وخلوها ترچية باذنكم كلكم اهلكم ذبوكم عليه كلكم انغولة ونشمرتوا

واني هنا لفيتكم اوكلكم واشربكم وطبعًا مو ابلاش

بيكم اليروح يبيع وبيكم اليشتغل شغل دسم

أسكتوا واسترو على نفسكم لان اني ماراح ينكسر خاطري

ولا اعوفكم في سبيل حالكم

انتو وگعتو ابين ادية ودخول هذا القاع مو مثل خروجه

ردت اجاوب واصيح بس ماگدر

اشفايفي تحرگ و وحدة لازگه بالثانية

رفعت ايدي بـ أصابعي تلمستها حسيت بـ ملمس مقرف

راحت يلا گدرت ماريا تجيني . سندتتي وصعدتني الغرفة

ظليت اشهگ بقوة

ابچي من كمية الظلم والآلم الامر بي

شنو نهاية هذا القاع ؟ وبعد شگد راح اتعذب واني بي

بچيت لحد ماطفت عيوني رفعت نفسي وظليت ارگع بيها

ماجاي اگدر اتحمل وجع الحرگ يكتل

اجت تحچي وهيَّ تشهگ

- ماريا : جبت معجون اگعدي اخلي للحرگ

ردت احچي ماكو ماگدر حتى الكلام حرمتني منه

گعدت صرت گبالها قدمت رأسي منتظرتها تخليلي

اريد اي شي يطفي النار المشتعلة بيهن

عقدت حاجبها من هول المنظر ، اخذت المعجون منها

وردت اخلي لروحي عارضت

- ماريا : عبالچ لعبت روحي ؟ ولچ تگطع گلبي شفتچ اشوهت

هزيت راسي وغمضت عيوني

- ماريا : ليش تعاركينها وتتلاسنين وياها

ماشوفين كل الهنا ساكتين مو يعرفون اذا حچو شيصير

ولچ تشوهتي اتشوه كل يوم عركة وكتلة كافي وتين لخاطري

تغرغرت عيوني بالدموع ردت ابچي لزمت نفسي

خلتلي معجون وگامت ترجعة لشكرية

تلفلت ودرت وجهي للحايط

سمعت صوت البنات دخلن الغرفة

شوي واجت شكرية المسؤلة على أكلنا وشربنا هنا

- يلا تعالن اكلن

حسيت بشخص گعد يم رجليه باوعت شفتها شكرية

- گومي اكلي

باوعتلها بنظرة حيرة هو حچي ماگدر احچي من وره شفايفي

انوب اكل ؟

رجعت درت وجهي ضلت تحچي وياي لحد ما ملت وراحت

بقيت بمكاني اون والافكار تتضارب براسي

فرفحت من الوجع من حلات روحي

گمت للحمام فتحت المي وخليت اشفايفي جوا

ابتعدت من خف الوجع ، ترست الدولكه ماي بارد

اخذته وياي للغرفة خليت جوه فكي

كل ما ترجع يوجعني اظل اشمر ماي عليها

اجت ماريا شايلة صينية خلتها گدامي وگعدت

- ما اكل الة وياچ

رفعت راسي وباوعتلها

- ماريا : المعجون ما هده الوجع ؟

هزيت راسي بـمعنى لا وبچيت

ماگدرت اقاوم ولا اكتم الوجع فضيع

المي الاغسل شفايفي بي يسكن ويرجع وراه وجع أقوى

تقربت تمسح بدموعي وتردد

- ماريا : لا لا ماريدهم يشوفون دمعتچ

لاتخلين حيوانات مثلهم يبچونچ

ماگدرت اگلها اني جاي ابچي من الوجع مو منهم

اله اني متعودة على الظلم والقهر والجوع والتعب

اجت شكرية مخلية اديها على ضهرها

- گومي داده المدام گالت اخذوها للمستشفى

رفعت ايدي وحركتها بـ معنى ماروح

- ماريا : لاتعاندين وتين مو وكتها روحي

باوعتلها بحزن رفعت كف ايدي باسته وهمست

- بداعة غلاتي عندچ روحي

بيه مابيه لميت شتاتي ونهضت أخذت قمصلتي

لبستها وطلعت ، تلگتنا يم الباب

شفتها هيَّ ومجموعة البنات ألي هسة بلش شغلهن

ملت راسي لعبت روحي من مناظرهن

سحبتني شكرية للسيارة خليت راسي على الجام اباوع

وهاي اول مرة اطلع بهذا الوقت المتأخر

شگد ماهي تخوف بالنهار بالليل بعـد تخوف اكثر

ماكو بشر كلها بالشقق والبيوت واذا اكو فـهذا جاي يمارس قذارته هنا

وصلنه للمستشفى دخلنا للطوارئ بلشو ينظفون شفتي

شلت روحي ورگعتها الم مو طبيعي ماجاي اتحملة

دموعي تجري واكمز والطم كلهن نفس الوقت

والممرض ينظف ويعقم ، اخير شي خلالها مرهم

جريت نفس بتعب و وجع ، نزع كفوفه واردف

- ممنوع يوصل الها ماي واشتري من هاي العصارة

كل ما تنشف رجعي خلي

طلعنه اني صعدت السيارة وشكرية راحت أشترت العصارة

رجعنا للوكر المُظلم الاحنا بي ، بدون لا احچي زايد

شمرت روحي التعبانة على فراشي

وهربت من واقعي التعيس لاحلامي الوردية

من بعد عدة أيام مخلصتها بس نايمه لا أطلع للشغل ولا اتحرك

رحمت بيه وانطتني اجازة ، فزيت على صوت الجرس يرن

شگد اتمنيت ما اصبح وشگد اتمنيت بعد ما اسمع هذا الصوت

خليت اديه على عيوني وگعدت صارت گبالي ماريا

وجهها مصوفر وحيل تعبانة

گدرت احرك اشفايفي وانطق بس بثكل وبالگوة تنفهم الكلمة مني

- شبيچ ليش وجهچ هيچ صاير ؟

- ماريا : مابيه

عقدت حاجبي رفعت راسي باوعت للغرفة بعد بيها بنات

سحبتها للحمام سديت الباب واردفت

- صاير شي احچي بساع

- ماريا : المـدام عاقبتي چي ماطلعت المبلغ

- شوكت ماطلعتي ؟

بلعت ريگها وردت

- ماريا : البارحه

قبضت أيدي وغصبت روحي اكمل حچي

- شو اني مادري ليش ماحچيتي

- ماريا : صالچ أربعه ايام شبه الفاقدة من وره عذابها

شلون اگعدچ واگلچ !

- ميخالف ماري ميخالف ليش ماحچيتي

تدرين بيه اطلع اكثر من المبلغ المطلوب

والچ فدوة انطيهن

- ماريا : ماگدرت احچي واني اشوف وضعچ

مسحت وجهي بحيرة وجاوبتها

- وشنو عقابچ ؟

مسحت دموعها وابتسمت

- ماريا : شفتچ صارت أحسن العصارة فادتچ ؟

- لاتغيرين الموضوع احچي شنو عقابچ

- ماريا : اليوم انتِ ما اطلعين اني اخذ چيس الاكنيلس مالچ

وابيعه والفلوس العندچ چمليهن عليهن وانطيها المبلغ

ضربت الباب دست على وجعي وصحت

- احچي شنو عقابچ !!!!!

شهگت وبچت تخبلت ضليت الح عليها لحد مانطقت وخلتني ارجف

- ماريا : البارحه طلعتني وياها وخلت ثلاثة يغتصبوني

فقدت عذريتي وكلشي بيه إنتهى

غطت وجهها وظلت تنحب واني واگفه مصدومة

عفتها وطلعت وروحي ثايرة دفرت مكتبها ودخلت

لگيتها تمارس الرذيلة وي واحد حثلي مثلها

صفنوا عليَّ مصدومين واني انتهيت وروحي لعبت

رفعت ادية واردفت

- ها اجيتكم بوقت غلط ؟ اعتذر عيني

بس عندي شغله وي الشريرة بس طراگ طراگين

ارتب ملامحها وارجعها الك

تقدمت سحبتها من شعرها صاحتله يخلصها مني

عافاها وبقى يستر بروحه

ماعرف منين اجتني القوة الخلتني اسحلها

لنهاية الممر فعلًا الأنسان تجي ساعات يفقد بيها

ويدوس على ألمه ويعمى اذا تأذى اليحبه

خليتها بالگاع وظليت ادفر بيها بكل قوة عندي

گعدت على بطنها رفعت ايدي بصقت عليها واردفت

- هذا طراگ يطشر معانيچ

ضربتها راشدي ورجعت ضربتها مرة ثانية

- وهذا حتى يرجع يلمهن

التمو الموجودين يباوعون باستغراب

ومدري يامطي صاح للحارس اجه يركض

سحبني منها وكفت وخلت اديها على مناطق جسمها

- لاتخليها تتحرك هسه جايتها

- اني هنا منتظرتچ لچ تغافليني وتطلعين ماريا

اليوم انهيچ بس تعاي

عافتنا وراحت وهذا المطي بعدة مقيدني

شوي واجت تقربت دفرتها برجلي صاحت

- عبد ثبت رجليها

ثبت رجليه بـ رجلي ظليت ارافس

تقدمت وبهدوء رفعت موس لزمت فكي

وبكل سرعتها شرحت الحرگ

ظل بس الدم ينقط واني أنتهيت حتى انغمى عليه جواها

اخر شي اتذكرة نشمرت بالگاع

بعدها صار غشاء على عيوني وفقدت

فقت وجسمي يون وراسي يريد يطگ وشفتي !

ماحس بيها ولا اگدر احركها ولا احچي

رفعت اصابعي اتلمستها عقدت حواجبي من الوجع

مورمه وعليها مرهم ناشف ، غمضت عيوني فزيت من

سمعت صوت انين باوعت للغرفة ظلمة ماگدر المح

گمت بتعب فتحت الضوة شفتها ماريا تون وترعش

انخبصت خبص شسوي لاگدر اتحرك بسرعه ولاگدر احچي

صرت بأديه احرك بالبنات اگعد بيهن اطلب المساعدة

بس وحدة فزت رفعت راسها

اشرت الها على ماريا هزت ايدها واردفت

- بطرانه انتِ دطفي الضوة خل انام

عفتها وتوجهت لباب اركض شفت شكرية

سحبتها من اديها للغرفة من شافت وضع ماريا فهمتني

راحت جابت طاسة ماي و وصله ضلت تسويلها كمادات

- شكرية : فكتها الصخونة تعاي خلي راسها على رجلچ

رايحة اجيبلها علاج واجي

تقدمت شلت راسها خليته على فخذي

راحت شكرية واني گبل دمعتي سالت

ماريا الوحيدة الاحبها واثق بيها هنا البقية كلهم تابعين الها

حتى ألي بهاي الغرفة مايشبهنا شاردات من اهلهن

واول شي خلتهن يبيعن وماتعاقبهن ابد

بس اني وماريا وكم وحده اذا ماطلعنا نتعاقب

واني اعرف ليش تعاملهن غير عنه وهن ليش يحبنها

عدهن مأرب وغايات اخرى بس كم شهر وتاخذهن منا

وبرضاتهن طبعًا ، بس اني وماريا من الاجينا هنا

للان ماطلعنا ومحافظين على شرفنا ونتحمل الضرب ولجوع

والحر والبرد في سبيل ماتاخذنا لغير اماكن

مسحت دموعي ومسدت شعرها

اجت شكرية رفعتها وشربتها العلاج وتقدمت خلتلي عصارة

بليتها نمنه والوجع ينهش بروحنا قبل جسدنا

ثاني يوم طلعنا للشغل غصبًا علينا

بس هالمرة بقينا سوة و وحده ساندت الثانية

وهيچ مشن الأيام ، ماريا تعقدت من وره الصار

واني احاول اواسيها بس ميفيد وحقها

شفتي تحسنت بس بقى أثر

مثل كل مرة تبقي اثارها عليه وتثبت نقش تعنيفها بيه

ظليت ابيع چاي واكنيلكس وامسح جام ثلاثتهن

يله اگدر اطلع المبلغ التريده .

وبيوم الراجعه بي وحدي من الشغل

لان ماريا رجعت تبيع بمكانها

امشي اريد اطلع من هاي المنطقة الشعبية

اول مره ادخل هنا رجليه بدون لا احس مشتني الها

اباوع نسوان وبنات صغار و ولد لابسين اسود

واصوت نعي وقصائد حزينة تنبعث من داخل البيوت

واكو شباب ناصبين چوادر ويطبخون

اتعجبت جاي شيصير شكو ؟

واني امشي واباوع واتسائل قاطعني صوت رجولي خشن

- ياولد تبيع چاي ؟

توقفت والتفت لمصدر الصوت ثبتت نظراتي للابس دشداشة سوداء

ولاف الغتره على راسه لفتت انتباهي عيونة واسعه لدرجه مخيفة

وسوادهن داكن ويلمع ، ملامحه حادة وسماره متوسط

شكلة مميز لدرجة أنتبهت لتفاصيلة واني ما أهتم!

يمه واحد بعمُره

بس لابس قميص وبنطرون ، باوعتلهم ما فاهمة منو الصاح

حچه ابو الدشداشة

- انه الصحتلك تبيع چاي لو مخلص

تقربت وبدون لا احچي خليت الترمز على الميز مالهم

رفعت الگلاص خليت بي شكر صبيت الچاي بعدت الكبوس

من حواجبي رجعته ليوره رفعت راسي ركزت عيني بعينه واردفت

- تفضل

صفن مندهش حچه ألي بصفه

- طلعت بنية لو منچ حتى چاي ما ابيع اله

حولت نظراتي اله ورددت

- عادي

حچه هو بتلعثم

- ابيش الگلاص

- ربع دينار

طلع من جيبه وقدمهن الي شلت الترمز والگلاصات وتراجعت

درت وجهي مشيت خطوتين و وقفني

- اوگفي

توقفت مستعدة ابصق على باطن أيدي واطرگه بطراگ

لو سوة شي غلط

حسيته صار وراي نزلت الترمز ورفعت ايدي والتفت

فتح عيونه على وسعهن

- تردين تضربيني ؟

- لو نچلبت وسويت شي غلط اي اطرگك

- شنو اطرگك !

- اطشر معانيك بقاموسي

ضحك بانزعاج واردف بحديه

- ههه اهـدي ماجاي اغلط جاي انطيچ لفه

وعيب هذا التصرف بويه

قدملي لفه باوعتلها وحچيت

- منو يگول ما مسسمها ؟

- شنو السالفه وين عايشه انتِ بابا

هذا ثواب لموسى بن جعفر

وكلها جاي اوزعلها شمعنى انتِ اسممچ

اخذتها منه وجاوبت

- اندري يمكن عندك عداوه سابقا وياي

ضحك بصوت مسموع ورد

- مبينه اكشن

- اي كلش واحب اطشر معاني

مسح على شواربه وباقي لحيته واردف

- ضحكتيني الله يسعدچ

باوعتله من فوگ ليجوه هزيت ايدي والتفت

- مسوين خوش شربت تردين

بدون لا التفت رديت

- لا

ضحك صديقه وصاح بصوت عالي

- هيچ احسن الك

ضجت من طريقه كلامه عناد بي التفت علي واردفت

- اي اشرب

گلتها وباوعت لذاك حك ارنبه انفه ودخل جوه الچادر

رجعت نظراتي لابو الدشداشة مشه واردف

- تعاي وراي

اتبعته صرت ورا الچادر سحب كرسي خلا وراي واردف

- اتفضلي خانم

ارتبكت اول مره شخص يعاملني بهاي الطريقة

ماصدگت گبل گعدت بس ماخذه الحذر خاف يطلع ملعب

قدملي گلاص متروس عصير ، حرت شلون اشربه وانزع الثام

دنگت راسي فتحت الفه شفتها لفه كباب عروگ

و وياها طرشي وخضره بوية متت من الجوع

بدون لا افكر زايد نزلت لثامي لرگبتي وضليت اكل بيها

رفعت راسي أشرب العصير

شفته مچتف ادي ويراقبني بكل هدوء

خزرته ابتسم بخفه و ورث جكارته

اجه هذا الغثيث ضحك وردد

- ترى انكسر خاطره عليچ

باوعتله باستغراب ورديت

- على شنو انكسر ؟

خزرة ورد

- ماعليچ منه هواي يخرط

رديت بنرفزه

- لا خل يگول على شنو انكسر

- اشاقه وياچ وعلي شبيچ اتحولتي

- ماحب هاي الكلمة

- واذا انكسر خاطره عادي ترى

- اكسر رگبة كلمن ينكسر خاطرة عليه

صوفر ورد

- انـه اخوك

تقدم سحب كرسي وگعد گبالي وذاك الغثيث راح

انحرجت وتلعثمت وگمت ماعرف اكل واشرب

ردت اگوم لزم الكرسي مانعني صحت بصوت متوتر

- شبيك !!

- تدرين بنفسچ وكحة ؟

خزرته ورديت

- اي ادري وهسه وخر لا اشطر معانيك بطراگ

رفع حواجبه وهز راسه

- زين اذا تدرين عبالي غافله عن عرامتچ

دفعته و وگفت وهو كذلك صار گبالي

شمرت گلاص العصير علي انثر على دشداشتة وتملطخ

ما اهتم سحب نفس من جكارته وشمرها

رفعت اصبعي اهدد

- اظاهر هواي شفت نفسك يل ازرگ

لا تتماده لا اكسر راسك واطرگك بطراگ يطشر معانيك

عبالك من اخذت الفه تگدر تذب ميانه وتتجاوز ؟

لا غلطان بعدك ماتعرفني واذا ماتعرفني روح اسأل عليَّ

سحبني من ذراعي اله طخ راسي بصدره

تخبلت من فعلته ردت ادافع رفعت راسي

تلاگن نظراتنا وبلشت عيونه بصراعاتها

تشنجت من گال بهدوء

- اي اعرفچ منو انتِ

خفت بس ماردت أبين اله ضحكت بصوت عالي ورديت

- هههههههه شبيك داده هاي أول مرة ادخل

هنا وأول مرة اشوفك منو انتَ حتى تعرفني

ابتسم وسحب نفس حرك راسه ورد

- انـه الأدعج .

للـحكـايـة بـقـية

آهلًا وسهلًا من جديد

بدت رحلتنا القوية

رحلة الادعج " قاع الظلام "

فراشاتي صوتو وعلقو بين الفقرات اريد اشوف تشجيعكم

دللوني بالتفاعل وراح ادللكم بالنشر 💕

أستودعكم ألي عينه ما تنام 💕

-أستغفر الله.

-سُبحان الله.

-الحمدُ لله.

-لا إله إلا الله.

-الله أكبر.

-سُبحان الله و بحمده.

-سُبحان الله العظيم.

-أستغفر الله و أتوبُ إليهِ.

-لا حول و لا قوة إلا بالله.

-اللهُم صلِ على مُحمد وآل مُحمد.


━━━━━━━━━━━━━━━━━━━━━━━━━━

🌸 هل أعجبتك أحداث القصة؟

💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:

🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام

نتشرف بوجودكم دائماً في عائلة كيمو ستوريز! 🌸

━━━━━━━━━━━━━━━━━━━━━━━━━━

2026/11/15 · 0 مشاهدة · 5824 كلمة
yare.yare
إعلان
نادي الروايات - 2026