3 - الفصل 3: الـقـا؏ الـثـاني

الأدعج "قاع الظلام "

بقلمـَي زهرة الساعدي

لطفًا فراشاتي دوسن علىٰ النجمة وعلقن بين الفقرات

حساب الانستا

zahralsadi

قناة التلي

zahralsadi

انه المحد عرف وضعه

صوتي من التعب محد يكدر يسمعه

عيني صارت عين الميت طفت بعد مآبيها اي لمعه

ويسألني المادره بحالي

دمعتك تنزل بسرعه .!

ابتسم وسحب نفس حرك راسه ورد

- انـه الأدعج .

ركزت بعيونة دقائق بس قلبت حياتي كلها !

حسيت باحساس اول مره احسه ماگدر اوصفه

كان بعيونة سحر خلاني اصفن بدون لا افكر ولا اخجل

شفت بعيونة كلشي اتمنى

احلامي الوردية . والحياة الراسمتها بـ مخليتي

حتى نسيت ارد عليّ فززني هو من صدمتي

- الأدعج : خلصتي ؟

انحرجت بلعت ريگي ونزلت نظراتي

التفت اخذت الترمز ومشيت

شبيه ؟ ليش هيچ حسيت وليش جسمي قشعر !

طلعت من المنطقة كلها متوجها لـ قاع الظلام

طول الطريق سألت نفسي ألف سؤال واوهمت نفسي بكلمات

ماتشبهني ولا تشبه موقفه

يمكن لآن هاي اول مره شخص يحن عليّ ويهتملي ؟

ينطيني اكل واني جوعانه !

توقفت واردفت

- أي طبعًا يحن عليچ وعلى گولة صاحبه انكسر خاطره

لا اغفل عن وضعي ومنظري كافي اكابر

وارد الكلمة بعشر كلمات

وهيچ استمريت الطريق كله اسأل واجاوب نفسي

وصلت يم الباب اجت ماريا واضح على وجهها الخوف

- شكو ؟

- ماريا : ماگدرت اطلع المبلغ

- مو مشكله عندي زايد انطيچ

نزلت اللثام على رقبتي وطلعت الفلوس من جيبي

- شگد گدرتي اطلعين

- ماريا : 22 وعشرين، وداعتچ حاولت بس ماگدرت

مدري شبيه روحي رايحه وكل شوي ادوخ واطيح

باوعتلها بخوف

- بعدها الفلاونزه بيچ ؟

- ماريا : مادري بس هواي ادوخ وتلعب روحي

- باچر نروح للمستشفى

مسحت دموعها وردت بخنگه

- ماريا : اذا ماصرت زينه

هزيت راسي نزعت الكفوف الابستهن من وره البرد

ظليت احسب بالفلوس مالاتي طلعت المبلغ

والزايد بس ألفين وهيَّ ينراد ألها ثلاث ألاف

باوعتلي خايفة بلعت ريگها وگالت

- ماريا : راح اگلها اتحمل إي عقاب بس لا اطلعني

- ياعقاب شايفه حالچ ! ولچ وجهچ مصوفر

وعيونچ مغورگه

- ماريا : عادي هلبت تضربني واموت ماريد هاي الحياة

تعبت

رفعت ايدي ضربتها على شفتها بخفه ورديت

- لاتحچين هيچ اش

- ماريا : تعبت حيل تعبت شنو ذنبي حتى اتحمل عذابهم

تدرين بالشارع ششوف وشتحمل ؟

خليني اموت وارتاح واني أصلًا حيل مشتاقة لماما ولبابا

اريد اروح بحضنهم

- ادري الجاي نعيشه صعب وادري بكلشي جاي يصير

بس لاتعوفيني ماريا اني ماحب شخص غيرچ

انتِ التخلين الحياة تهون عليّ وحبيتها بسببچ

انتِ اختي مو بس صديقتي

تشهگ وتحچي برجفه

- ماريا : واني حيل احبچ تختلفين عن العايشين هنا

وتستاهلين حياة حلوة مثل ما راسمتها بـ مخيلتچ

- راح نعيش الحياة النريدها سوة وراح نطلع من هذا القاع

بس اصبريلي اطلعچ منا وداعة لوعتنا

حضنتني تشهگ طبطبت على ظهرها واردفت

- ماريدهم يشوفون دمع عيونچ خوش ؟

ابتعدت مني مسحت وجهها وردت

- خوش

- وهسة هاچ واذا اسمع اعتراض اطرگچ

نترت معارضة

- ماريا : مستحيل

- باعي مبين اذا احچي مايفيد خليني افعل

شمرت الفلوس عليها وركضت بسرعة

وهيَّ وراي تصيح بصوت قوي واني ارد بكل برود

- ماريا : اشگگها

- خوش

- ماريا : اگلها چذابة

- هم خوش

- ماريا : اوگفي ماگدر اركض

توقفت زفرت بضجر التفت عليها ورديت

- ماري اذا ماقبلتيها مني نخرب

- ماريا : اقبلها وانتِ تتعذبين !

- اول وتالي راح اتعذب عادي خليني فد نوب

- ماريا : ماگدر اتقبلها وتين ماگدر

حضنت وجها بكفوف اديه وهمست

- ياروح وتين انتِ صدگي بس هالمرة اساعدچ

ما اتحمل اشوفچ تتعذبين وانتِ بهذا الوضع ماري يروحي

اتقبليها مني بس هالمرة وعد

ظلت تبچي بصوت حضنتها وابتعدت متوجها للبناية

قليل بحقها كلشي اسوي ويمكن غيري مايتجرأ ويسويها

هو منو اليگدر يتحمل عقوباتها وعذابها غيري ؟

دخلت شمرت بوجهها بس خمسة

اي اول وتالي اتعاقب تردون انطيها اكثر تخسي

- ماطلعت المبلغ

ضحكت بصوت وردت بسعادة

- ابساع اتحققت امنيتي

- ديله على اساس كل يوم من اطلع المبلغ

تستقبليني بالاحضان والقبُل شو كل يوم تصرفچ يصير اخيس من القبلة

گلت هيچ و وگفت على صفحه بصف بنات ألي راح يتعاقبن

دخلت ماريا متغرغرة بعيونها الدموع وتحچي

- مدام سامحي وتين بس اليوم

- شعليچ بيها ؟ انتِ طلعتي المبلغ لو لا

هزت راسها ورفعت الفلوس

- ماريا : مالتها هاي

خزرتها وهيَّ مستمرة تحچي

- شنو مالتها شجاي ترطنين ؟

تدخلت ابيناتهن ادارك الوضع

- من خوفها عليّ ماعرفت شتحچي روحي حبيبتي

ولاتخافين المدام تموت عليّ ماراح تخلي عقابي قوي

ضحكت بصوت واني دفعت ماريا للمصعد

شفته مسدود بسبب العطل رجعتلها للدرج

- ابساع اصعدي واگعدي على الچرباية انتظريني

- ماريا : ماگدر اعوفچ حبابة خلينا نتعاقب سوة

كزيت على اسناني وصحت بحذر لا تسمعني

- اصعدي گتلچ لاتلحين

صعدت تشهگ جريت نفس بتعب ورجعت يمها

بين ماخلصت واستلمت الفلوس من البنات اخذتنا احنا الراح نتعاقب

طلعنا بره بوسط الساحة الصايرة مقابيل البناية

وداير مادارينا بنايات وسكان

راحت هيَّ وتكها الثاني "الحارس" دخلو جوه

صابتني الرجفه مليت من الجلد والعقابات مليت وتعبت روحي

وجسمي ظل مايحس بوجع من گد ما تعلم

حچت البنية الگاعده تتبسبس هيَّ والبصفها

- عليمن هذا الرجيف ماكو أحلى من عقابات المدام

ركزت بملامحها هيَ هاي الخسيسة الماگعدت لماريا من صخنت

التفت اباوع لباقي لبنات هذن كلهن ويانا بالغرفة

شجاهن كلهن اتعاقبن بيوم واحد ؟

بس وجهن مورد ومبينات فرحانات

جاوبت واني الف سؤال ابالي

- برأيچ الجلد حلو ؟

- جلديش ؟ اها لا ماكو سادين قليل

صفنت عليها هاي شگالت شنو سادين

- مافهمت قصدچ

- هههههههه اليوم اخلي ابن الباشا ياخذچ وافهمي قصدي

- شجاي تخرطين يا ابن الباشا يانعال

- يبوووو راح تبيع شرف براسنا

باعي ترى كلنا متعمدين ما مطلعين المبلغ ونريد نعاقب

واكيد انتِ هم يعني لاتسوين نفسچ غشيمه

كُلنا بالهوى سوى هههههههههههه

فاكه حلگي هاي شبيها مسودنة ؟

ردتها واجتني اني من ذاك اليوم حاقدة عليها

طفرت ملختها تملخ كل البنات يدافعن الها

واني وحدي بوسطهن ، اجت تصيح بصوت قوي

- ها ها شبيچن ******

ابتعدن وتراجعن گمت باوعت لايدي بيها خصلة شعر

مدري منيا شعفه جارتها

حچه الحارس

- عبد : مدام ناخذها وياهن ؟

- ملوك : لا ماتشوف شكلها شفتها مشوها

الجسم ضعيف وكله اثار منو يگلبها

- عبد : اي صدگ بس مدام بالرغم من هذا حلوة

- ملوك : حلوتيش تخرع ولاتحچي زايد

اخذهن وروح

تقدم سحب البنات اليمي وهن طارن فرح

تقدمت سحبتني من شعري للبناية

شمرتني بأحد الغرف رفعت صوط وظلت تجلد بيه

بقيت هادئه جواها ولا اتحرك وهيَّ اتخبلت اكثر

صاحت بصوت عالي

- ملوك : شكرية تعاي

اجت شكرية تركض

- امريني مدام

- ملوك : اريدچ تحمين خاشوكة ماتبعدينها من النار اله تصير جمرة

هزت راسها وراحت

لا تتفاجئون حتى لو شكرية تحبني وزينه وياي

ماراح ترد المدام وراح تنفذ اي شي تگوله الها

بقيت انتظر وهيَّ فايره فور من الغضب

شوي واجت سلمتها الها وطلعت

ابتسمت واردفت

- بيا مكان هالمرة تردين تخلين أثر ؟

تقربت يمي وگالت بنبرة متغلغلة بالحقد

- ملوك : بگلبچ اريده يتهشم وبعد ماينبض

بكل برود وعدم مبالاة نزعت القمصلة والتشيرت شمرتهن و

بقيت بس بالبنطرون عدلت الكبوس المغطي شعري ورديت

- يله بساع

بدون اي تردد لزگتها على گلبي

انمردت مرد بقيت بس مغمضه واتنفس بسرعه

شلعتها وشلعت لحمه وياها

صرت اتنفس بصعوبه واشهگ بدون صوت

بدون لا تلتفت گالت

- ملوك : عقاب خفيف هالمره

بالرغم من وجعي ماگدرت اسكت

- صـح وحده مجرمة مثلچ الحرگ عدها خفيف

- ملوك : تردين تنجلدين بعد ؟

ماجاوبت خفت لاترجع تجلدني ماگدر بعد روحي خوت

طلعت رفعت التشيرت لبسته وانتهيت

مكان الحرگ ظل يسمط بيه ، رفعت التشيرت من مكان گلبي

وهيچ خلصتها لحد ماوصلت الغرفة

مالگيت احد بس ماريا گاعده تاكل بـ اظافرها

بالباب ونزعت التشيرت ظليت اگمز من الوجع

- ماريا : كله مني اني السبب

- اش فدوه ماگدر احچي

لطمت على وجهها وگعدت بالگاع

مابيه احچي واواسي ولابيه افهمها مو ذنبها

باوعت لمكان الحرگ ورم ومحتاج تنظيف

- ماري صيحي لشكرية

سحبت نفس وگامت

- ماريا : تاذيچ ؟ كله من وراي مو

فقدت وبدون ماحس صحت عليها

- كافي شنو من وراچ يعني لو ما انتِ تعاملني زين !!!

شو ليل ونهار امطيحه حضي وتحرگ بيه بعد شنو

هزت راسها ونزلت تركض گعدت على الچرباية

وعيني تتنقل على كل اثر حرگ موجود بجسمي

كل حرگ بي ذكرى حزينة الي ، وسعيدة الها

على كل جزء من جسمي تاركه أثر ومتفننه بي .

اجت شكرية شافتني شهگت

- مو گتلچ لا تتحارشين بيها

- ماتحارشت بس ماطلعت المبلغ

- شكرية : اول تالي ما اطلعينه ؟

- ماريا : طلعته بس كله مني

عطت بصوت اغطي على چفصتها

- تعاي نظفي الحرگ

- شكرية : تحتاج ممرضة

باوعت للحرگ غمضت عيني من هول المنظر

مورمه وصايره شكبرها منظرها مرعب

- ماريد بس تعاي افتحيها خل تطلع الجراحة

واني انظفها

- شكرية : ماگدر اتخربط گومي اخذچ للمستشفى

بس شلون ولا سايق موجود كلهم وي المدام والبنات

- ماتحتاج مستشفى انطيني إبره

- شكرية : لاتلعبين بروحچ انتظري للفجر نروح

- يافجر هذا ؟ روحي مفرفحه لاتشوفيني گاعده جاي

اتگطع من الوجع

- شكرية : تردين دبوس لو إبره ؟

صكيت على سنوني ورديت بقلة صبر

- اي شي

نزلت جوه دقائق ورجعت حاملة بايدها ابرة

اخذتها منها هواي ترددت وماگدرت اسويها

باوعتلها بترجي

- بس چكيها ماگدر اني اسويها

تقدمت اخذتها مني ملت راسي

عطت بصوت قوي من چكتها حسيت بحرارة تنزل

باوعت شفت ماي وجراحه ، بالكنيلكس ظليت انظف بطني

سالت عليها الجراحة

لحد ما وصلت مكان الحرگ بس طخيته نگزت

ظليت ابچي

- تعاي انتِ نظفيها ألي

- شكرية : ما مسويتها من قبل اخاف اذيچ

- اكثر من هاي اذيتي ماكو تعاي فدوة

تقدمت وظلت تنظف بيها عضيت الحاف وبرجليه ارافس

ختمتها بالمرهم ولفتها إلي ، ماگدرت البس شي

تمدتت جريت الحاف وغطيت نفسي

صابتني نوبة مرض صخنت وارجف أخر شي اتذكره

من شربت حباية ، ثاني يوم گعدت جسمي مكسر

وماگدر اگوم باوعت البنات راجعات ويشوخرن من التعب

ردت راسي ماگدرت افترت الدنيا واسودت بعيوني

ومكان الحرك كله خدران ويبزز بيه

انفتح الباب دخلت شكرية تمشي بهدوء

صارت يمي وهمست

- شكرية : ماريا اخذت چيس الكنيلكس مالچ والچاي وطلعت

تلاويت وي وجعي وصحت بصوت عالي

- اشلون تخلينها ؟؟؟

- شكرية : اش صوتچ المدام عبالها طلعتي

لاتگعدين لبنات تدرين بيهن يگرشن

- شكرية ليش خليتها تاخذ غراضي وتروح

- شكرية : شبيدي اني هيَّ عاندت ودگت رجلها

- تعاي گوميني اروح وراها

- شكرية : گوم ماتگدرين تكومين انوب ترحين وراها

بلعت ريگي الناشف ورديت

- انطيني علاج وخليلي مرهم

حچت وهيَّ تطلع

- شكرية : بالاول اجيبلچ اكل و وراها العلاج

هزيت راسي وبقيت انتظرها

اخ يا ماري تردين تردينها الي لان ساعدتچ

اجت شايله صينية خلتها گدامي ورفعتني اكلت شوي ولعبت روحي

شربت العلاج ورجعت خلت المرهم ولفت الحرگ

اتسكنت وبدون لا ادري رجعت نمت

وهيچ مرن الأيام اني بس اصخن وأنام شبه الفاقدة

وماريا تطلع تشتغل وتطلع مبلغنا اني وياها

من بعد ما يبس الحرگ ورجعت وگفت من جديد

خذتني النومة وماحسيت بالجرس من رن

ولا وحدة گعدتني حتى اروح للشغل

فزيت بخوف من أيد تهز بية

- ماريا : ابساع البسي وانزلي

- شكو

تحچي باستعجال وتوتر

- ماريا : المدام بالمكتب شوي وتطلع يم الباب

انزلي انتظريها وانطيها هذا المبلغ

- ليش محد گعدتني راح عليّ الشغل !

- ماريا : بعدين نحچي ابساع گومي

- ماگوم هذا مو ذنبچ اني اليوم تكاسلت ولازم اتعاقب

- ماريا : بس اليوم ولچ طلعت مبلغي ومبلغچ

- صدگ ؟

- ماريا : اي ويله گومي راح تتأخر واثنينا نتعاقب

گومتني ولبستي ابساع ابساع

نزلنا سوه جوه صرنا يم الباب منتظرين طلعتها

تسألت بشك

- طلعتي مبلغي ومبلغچ ؟

باوعتلي بنظرة خاطفه ودنگت

- ماريا : اي

- ليش ماجاي اصدگ ؟

- ماريا : اني طلعتها ومو اخذت الچيس مالتچ

ضحكت باستهزاء ورديت

- ماصدگ

- ماريا : ومسحت جام هواي وبعت چاي

- ماجاي اصدگ ماري احچي الحقيقي وداعتچ مريضة وتعبانة

بهل اثناء طلعت هيَّ بحركة سريعة حضنتني ماري وراحت

هرولت وراها بس مالحگت وصلت قبلي

اهتزت كل ذرة بجسمي من گالت الها

- ماريا : ماگدرت اطلع المبلغ

عصرت الفلوس صرت گدامها وحچيت

- چذابه طلعته هاچ هاي مالتها

ردت بفرح وكأنُ منتظرة هاي اللحظة !

- ملوك : ههههه هيَّ كل يوم ما مطلعه لاتحاولين

تغطين عليها تعال عبد اخذها

اجه سحلها واني روحي فرفحت ظليت اضرب بي

جرتني من شعري زلغت رگبتها عافتني رجعت

اريد الزم ماريا ماگدرت راحت واخذوها مني

لطمت صرخت بچيت اتوسلت مافاد ولا كأنُ موجودة

راحت تمشي برهاوة واني فايره فور

هرولت للمطبخ شفت شكرية تحف وحده من لبنات

بدون لا اركز زايد واحچي سحبت سچين وتوجهت اقتلها

ماعاد يهمني شي ومن الاساس اني شنو يهمني ؟

هم حاسبه روحي بشر عايش بهاي الدنيا !

خليني انسجن انحكم اعدام عادي بس خلي اريح گلبي

قبل لا اوصل الها انسحبت من وره شفتها شكرية

صرخت ماخلتني اتحرك سحبتني للغرفة

صرت على الچرباية رفعت رجليه لصدري خليت راسي عليهن

حضنتهن وظليت اهتز بسرعة

صوت وسواسي يرن بأذني ويگلي اقتليها

والصوت الثاني يگلي لا ابقي هنا واخذي حقچ من عيونها

رفعت الدوشگ مالتي طلعت دفتر الرسم والالوان

ظلت شفايفي ترجف ودموعي تجري من شفت راسمه

احلامي اي هنا أحلامي الوردية الاحلم بيها واتمناها

حديقة چبيرة بوسطها بيت متواضع

يم باب البيت راسمة عائلتي الماعرفها

أب ، وأم ، واثنين اخوان ، واخت واني بصفها

بالرغم ماعرف أهلي ولاعرف عددهم بس راسمتهم

وبمخيلتي اتوقع هذا عددهم

يحبون بعض ويخافون لا واحد من عدنا يتأذه مليانين حنية

أحلامي بسيطه ما أحلم بشيء مستحيل

مارايده غير البيت الدافئ يحتويني والاهل اليخافون عليّ ويحبوني .

بقيت على گعدتي للفجر ماغمضت عيني ولاتحركت

البنات حچن وطلعن واني فاصلة عن العالم

انفتح الباب رفعت راسي شفتها دخلت گمتلها اريد اعاتبها

بس وصلت يمي وگعت بالگاع فاقدة

صحت بصوت هز البناية هز

- شكرية الحگيلي

ما اجاني جوابها حرت لابيه الاعوفها وانزل ولا البيه أبقى

ضربت على وجها اريدها تصحى ماكو

وجها شاحب وتعبان انتبهت على الأثر الصاير برگبتها

هذا أثر جرمهم وممارسة قذارتهم عليها

عقل ماظل براسي نزلت والطريق صار شطوله عليَّ

انزل بالدرج وبين باية وباية اعثر واطيح وارجع اگوم

وصلتلها اتنفس بسرعه واحچي

- شكرية ماريا طاحت فقدت يمكن ماتت تعاي الحگيها

عافتني وصعدت قبلي

گعدت على باية الدرج ماگدرت اكمل واصعد

ظليت اصرخ والطم ، طلعوا يتساءلون هاي شبيها تخبلت ؟

نرلت شكرية شايلتها وتصيح

- شكرية : عبد يا غضب تعال

اجاها يركض شاف ماريا انصدم وبقى جامد بمكانه

- شكرية : عليمن صفنت

شني سويتها جواك تعال اخذ البنية مني

راد يشيلها تقدمت ضربته

- راح اخليك تلمسها ولجراثيم البيك تلامس جسدها

لان ماكو غيرك يشيلها هنا

ماچنه سمعني عافني واخذها

جاي اطلع وراهم صاحت هيَّ

- ملوك : شصاير هنا

أجتني برجليها واني اسنوني عطشانه لدمها

التفت باوعتلها ارجف

بدون مقدمات سحلتها من شعرها وظليت اضرب بوجها

- كلبة حقيرة شريرة لچ حتى طراگاتي ماتبرد گلبي بيچ

ماريا ماتت ماتت

گلت هيچ وابتعدت اركض وره عبد

وگفت بنص الساحة خليت اديه على راسي ودرت حوالينها

ماكو ماخذها ورايح

رجعت لشكرية اشهگ شفتها تحاچي بيها

وهيَّ فاكه حلگها من الصدمة ، مسحت دموعي رفعت اصبعي اهدد

- تعرفين لو صارلها شي شسويلچ ؟

تدرين بيه مخبلة وعقل ماكو براسي مو !

قبل لايطلع الضوه اخلي بغداد كلها تغرگ بدمچ

لو صار لماريا شي

ماردت عليَّ صافنه وبالها شارد

انسحبت وراحت لمكتبها

مسحت وجهي صعدت جبت القمصلة

لبستها وسديتها باحكام خليت كبوسها على راسي قدمته على عيوني

چتفت اديه وكعدت يم باب البناية انتظر

صار الفجر والضوه طلع يله أجو

شفتها تسحل بروحها سحل ركضت سندتها

اباوع عليها بالگوه ترفع رجلها وتصعد الدرج

سألت خايفة

- شبيـچ

باوعتلي بنظرة حزن بعيونها هواي حچي بس ماتكدر تگوله

ردت بصوت هزيل

- ماريا : الزمي أيدي وساعديني اصعد

تعبانه اريد انام

هزيت راسي وسبقتها باية وحده

انداريت عليها ومديت ايدي اساعدها تصعد

وصلنا للغرفة تمددت والوجع طاغي على ملامحها

ظليت اراقبها لحَد ما نامت

بخوف تقربت اتفحص انفاسها

من سمعتهن منتضمات يله تراجعت للخلف

نزلت ادور ولا واحد موجود كلهم اختفوا

رجعت للغرفة طلعت اللثام لبسته هو والكبوس

وطلعت

قليل الناس طالعه لآن اليوم كلش بارد

مارحت للشغل رجعت للافرع الورانا

بهاي المنطقه البيها أخطر عصابات المافيا اتمشى وحدي

واذا تسألوني تخافين جوابي لا تعودت من صغري

فارتها فر أمشي بيها مغمضة واتفاده عصاباتها

وصلت يم المكان المطلوب

وگفت ورفعت راسي اباوع لطوابق هاي البناية

ياغرفة هم ؟ بعدهم هنا راحوا !

صالي هواي ما شايفتهم ولا ادري بأخبارهم

واني اسئل وي نفسي طلع الحارس مال البناية وگال

- رايده شي

- اي

- شرايده

- رايده شمشون وبطنج

موجودين ؟

- اي موجودين بس شتسوين بيهم

- مالك غرض روح صيحلهم

- منو اگلهم

- الكوبرا

فتح عيونه كأنُ انصدم

- انتِ الكوبرا النسمع بيها

- شسامع

- هواي تعاركين

- خوش صيت روح صيحلهم حباب

هز راسه ودخل يصيحلهم تراجعت وگعدت على الرصيف

شوي واجاني صوته من ورا

- بطنج : يا ألف هلا بالكوبرا

التفت عليّ ابتسمت ورديت

- انچـب

- بطنج : بنت الطحال بعد المن جايتنا

- جايه ادوس بمصارينك الخايسة يامعفن

- شمشون : اسكت انتَ ماتتراهم وياها

ماسامع البطنج والكوبرا مايتوالمن

- اگلكم منين جايبين اساميكم ؟ ولكم الحقيقيات شحلاتهن

- شمشون : هذا بطنج السرسري مشاهن علينا

- طبعًا عرفت هاي الاسامي الجايفه هو جايبهن

ولا سوه شي بي خير

- بطنج : عاد انتِ الوحيدة المايحقلچ تحچين وين اكو بنيه لقبها

الكوبرا

- انچب ما اسمحلك

- بطنج : شمشون سكتها لا ارفسها

گمت گباله رفعت اديه ورديت

- خفت شوف شلون جاي ارجف

روح منا لك لا اطرگك بطراگ يطشر معانيك

- شمشون : اشتعلت صفحتكم كافي

وانتِ شجابچ هنا مو تدرين المكان خطر

- ديله على أساس اني وين گاعده

شو بعُد خمس درابين عنكم

- بطنج : شمشون يحبچ بس يستحي يصارح

شفتي شلون خاف عليچ

- انچب

رفع نعاله راد يضربني صرت وره شمشون ورديت

- دنزله لا اخليك تتريگ بي

صاح بصوت قوي متنرفز

- بطنج : شمشون خلي تلزم لسانها

طلعت لساني ولزمته

- شمشون : كافي خلونا نفتهم لا ارگعكم اثنينكم

جريت نفس وحچيت بحده

- احم لا صدگ رايده فزعتكم

- شمشون : عد عيناچ

- بطنج : انـه ما اسوي شي اله تعتذر

التفت عليّ ورد

- شمشون : انچب

- بطنج : اذا ما اهج وافضحكم سهله

- شمشون : كملي ويامن متعاركه وتريدين نهد وياچ ؟

لو كتلوچ وضميتها الهم وتردينا نعلسهم

- لا هاي ولا هاي

- بطنج : بايگه ولگفوها

- انچب لك عمُري كله مابايگه

- بطنج : والچباسه الچنه نبوگهن سوه ؟

- يبو چنه صغار عادي

- بطنج : اي ولحلو بالموضوع اثلاثتنه مشاركين بالجريمة

ابتسمت بخفه واني اتذكر شلون چنه نبوگ حلويات

بطنج وشمشون تؤم من أول ما اجيت للبناية صرنا اصدقاء

من چنت طفلة هم إلي يخافون عليّ ويداروني

واني ميزتهم عن الكل بس هم الحبيتهم چنا نخاف منها

ماتخلينا نصير اصدقاء ، نطلع بره ونظل نسولف

وشكم مره تلزمنا ونتعاقب سوه

صارولي اخوان وسند كلش أحبهم وميانتي وياهم قوية

چنه نلعب سوه ونبوگ چباسه ومن انلزمنه وتعاقبه بعد ماعدناها

انطينا عهد لبعض نبقى طول العمُر اصدقاء ومايفرقنا شي

من كبرت عرفت ليش اجو للبناية طلعوا

يتامى وماعدهم أحد اجو سكنو يم المدام وضلت تشغل بيهم

ومن كبرو باعتهم لباشا چبير بمنصب الدولة

صرت ماشوفهم هواي بسبب الظروف لكن معزتهم باقية بگلبي

اتنهدت وگلت

- ماريا مو زينه

انتفض شمشون گام خايف

- شبيها ؟

- ملوك دمرتها

- بطنج : لا يا طحال

اتربعت وشرحتلهم كلشي صار اتخبلوا

ماريا اجت للبناية وراي بهواي بس صارت صديقتنا

عرفتها عليهم وحيل حبوها بس شمشون حباها اكثر واحد بينه

وبينت نيته اتجاها

حُب . ولهفه . وأمان . احنا مفتقدينهن

- بطنج : شسويلها امرعدها ؟ لو امرد طحالها

- اي شي سوو هاي العضلات والدك ولشكول التخلس

ماريدها بس منظر

- شمشون : وين ضربتها ؟

باوعتله حايرة اتنهدت وگلت

- ماضربتها بس اخذتها لجماعتها اغتصبوها

إعلان

ظل صافن ما مستوعب وبطنج نزل عليها فشار وسب

- شمشون : سهلة

گمت ردت ارجع باوعتلهم واردفت

- بقت يمكم اخوتي ارفعو راسي

- بطنج : صار

- انتَ انچب كل ما اگول اسمك يصير عندي جالي

رفع انعاله واني شردت

وصلت فحطانه خليت ايدي على گلبي واردفت

- كون تتبطنج وماكو علاج غير طراگي الك

دخلـت لگيتها بعدها نايمة وشبه فاقدة

نزلت حاچيت شكرية تحضر ترمز الچاي

حضرت نفسي وطلعت اشتغل

روحي وگلبي وعقلي يمها بس ماگدر ابقى لازم اطلع

واني امشي نزلت دمعتي بساع مسحتها وظليت اتفلت خاف

واحد منهم شافتني ابچي

رفعت اللثام لوجهي وكملت طريقي

وصلت يم عمو ابو فواطم جريت نفس واردفت

- صباح الخير ياعمو الصاك شلونك

قهقه بصوت خافت ورد

- ابو فواطم : ياهلا بالجميلة نحمد الله انتِ شلونچ

- مو زينة عمو

- ابو فواطم : ليش بوية شبيچ ؟

نزعت اللثام و وخرت كبوس القمصلة من عيوني ورديت

- تعبت حيل تعبت واني اشوف صديقتي وروحي تتعذب

تعبت واني اشوف روحي خوت ومابيها تقاوم

ماريد اكمل لان اعرف بعد سنه شراح يصير بيه

- ابو فواطم : تخسي تاخذچ لهيچ أماكن

بوقتها لو صارت اني اتدخل واشردچ

وخلي شيصير يصير

- مو بهاي السهوله عمو احنا العدها محددات

وتعرفنا ومراقبتنا تتذكر أخر مره من شردت شصار بيه ؟

مو علگتني بالسگف وظلت تجلد بيه

- ابو فواطم : يجي يوم وتخلصين منها

- شخلص لا اني ولا إلي بالبناية راح يخلصن

احنا بقاع مظلم عمو مو سهل نخرج من عنده

- ابو فواطم : كافي تقهرين بنفسچ بوية هاي قسمتچ من الدنيا

كل عبد اله قسمه وانتِ حضچ وگعچ باسوء قسمه واختبار

تعاي اكلي وجهچ مصوفر

حچيت واني ارجع اللثام على وجهي

- ماريد لعبانه روحي

- ابو فواطم : اكلي وقوي نفسچ حتى توگفين بوجهم

- لاتخاف عمو حتى لو ما اكل اوگف نسيت اني منو ؟

خزرني محذرني اكمل تحمحمت ورديت

- وين فواطم مشتاقتلها

- ابو فواطم : وي أمها

عقدت حاجبي مستغربه لإن ادري بعلاقتها هيَّ وأمها شنو

- شتسوي ؟

- ابو فواطم : ظلت تطلع وياها للصالون تشتغل

- شعجب فواطم ماتحب تروح هناك انوب تشتغل

- ابو فواطم : ليش هيَّ بكيفها ؟ خلينا ساكتين بوية

وتعاي اخذيلچ لفه واليوم على احسابي

- ابد ولا اشتهي

رفع صمونه يريد يخلي بيها لبلبي ابتعدت واردفت

- كلمتي وحده ماريد

- ابو فواطم : ماتنگدرين

تراجعت وصرت بعيده علي مسافة

رجعت كبوس القمصلة لراسي ورديت

- الكوبرا اني

رفع بطل الليمون ركضت وضحكت بصوت

خلصتها هيچ لحد ماوصلت للمكان الابيع بي

رتبت الغراض وگعدت انتظر يشترون مني

صار العصر واليوم بعت قليل طلعت اقل من المبلغ المطلوب

همزين ضاخره على صفحها ، خليتهن فوگ الفلوس

لكن بقيت گاعده قانونها الى يصير الغروب يله نرجع

اجاني صوت من وراي فززني

- اريد اكنيلكس

گمت طلعت باكيت الاكنيلكس باوعت بوجها ورديت

- هو هذا بقى أخير واحد

غير ملامحه وصار مشمئز

غمز وتقرب صحت بصوت قوي

- خير ؟

- على كيفچ يابه شسويت هسة

- اها اثاري انتَ تريد تنطرگ

- شنو هالمصطلح

- مابيه حيل اشرح تريد تجربه ؟

- اويلي صـح بنت شوارع بس ما اتوقعتچ بهاي السرعه

تقربت واني أحرك بأيدي احضرها وهو مبتسم ومكمل بقرفه

- انزعي الثام و وخري البكوس

وخليني اشوف جمالچ مبين يسطر هن بس عيونچ كافي

رفعت ايدي وبأيدي الثانية نزلت اللثام بصقت اباطن ايدي

رجعت اللثام لوجهي وبحركه سريعه طرگته براشدي فره فر

لزم خده مصدوم واني نهديت علي

- اطرگك بطراگ يطشر معانيك الفالته يا سرسري ياعرة الزلم

لو بيك خير ماتجي تحچي هيچ وي بنيه يل مابيك خير

روح لأختك وامك شوفهن شجاي يسون بغيابك

امشي استر على عرضك الفالت

رفع ايده راد يضربني لزمتها ولويتها

- ابتر ايدك واعلگها على رگبتك لو فكرت تسويها

دفعني بقوة وگعت بالگاع اتخبلت ردت اگوم

صارو گدامي اثنين لزمو وگعو بالگاع وضلو يضربون بي

و واحد منهم ردمه بگصته خلا يدوخ وتنسحل روحه !

بقيت بمكاني مصدومة بالگوه گام وشرد منهم

التفتو عليّ شهگت واني اتذكر هذول منو

جر نفس مسموع ابتسم بخفه واردف

- الأدعج : اريد چاي

- البارحه الليل كله يون ويگول

لو چاي ام عيون الحلوة لوماريد

باوعتله رفع حواجبه ونزل شفته السفليه ورد علي

- الأدعج : بدينا

- مچذب قابل ؟

- الأدعج : انتَ تچذب حشاك

- غصبًا على خشمك

كز على اسنانه ورد

- الأدعج : أدم

رد وأخير كلمة حچاها بتنعوص

- أدم : ياروحه لأدم حبيبي

كل هذا صار وجاي يصير واني فاكه حلگي

وهمزين ملثمة وماشافوا صدمتي

گمت نكتت ملابسي وابتعدت منهم

- أدم : شنهاي مو گتلچ يريد چاي دشوفي راح يموت

مثل المفطوم

- الأدعج : وحگ الگطعو چفوفه غدر راح اهينك

- أدم : اوي حبيبي ليش هيج وياي انتَ عصبي اوي

- الأدعج : تمضرطك خلي ابيناتنه لاتطلعه وتفضحنا

- أدم : صار حبيبي

اتنرفزت منهم صبيت الچاي قدمته أله وحچيت

- هاك واتفضل روح

- الأدعج : ابيش ؟

- مو مشتري مني قبل ؟

- الأدعج : نسيت

باوعت بوجها بلع ريگه ونظراته تركزت على عيوني

رفعت حواجبي ورديت

- ربع دينار وبعد لا تنسى

ثنه شفته وهز راسه

- الأدعج : خليها دين باچر انطيچ

- أدم : شگد فگر اذا انتَ ماعندك انه الفيترچي شعندي ؟

- الأدعج : انطم أدم

- أدم: هو وين أكو كـ

راد يكمل تلاحگه الأدعج وخله ايده على حلگه مانعه

بعده ورفع أدي

- أدم : فهمت فهمت

- الأدعج : اذا ماسديت حلگك ادگه وتعرف بيمن

- أدم: عرفت حبيبي لاتشرح

مارد علي التفت الي وگال

- الأدعج : عادي باچر

- خليها على احسابي ماريد

- الأدعج : لا مايصير

- عادي اعتبرها رد للـفة والعصير

- أدم : العصير الصار نقش للدشداشة ؟

باوعتله ورديت

- شگد غثيث انتَ

- أدم : اتقبلها منچ زوجة أخي الكريم

زفرت بضجر ورديت

- اتوكلوا

- أدم : شو اتطردين بينا مو شارع الخلفچ هذا

بكيفنا نروح نظل شلچ غرض

- انتَ محتاج طراگ

- الأدعج : بسكم مو جهال أنتم

ضحكت وعلامة الاستغراب بعيوني

- ههههههه شبيكم منو انتوا وشتردون مني ؟

اخذ صديقك الغثيث وروح بدون كلام

خزرني وسحب صديقة الغثيث مشه مسافة وألتفت إلي

- الأدعج : رايح بس راجعلچ عرمتي

هزيت أيدي والتفت

- هذا شبي يمكن مو بعقله ؟

كل ما افكر شبي هذا الازرگ ومنو ذول الثنين

يجون يشترون لو امسح جام ويجرون سوالف

وأنسى وارجع افكر ويقاطعوني وهيچ مشت الساعات وصار المغرب

والدنيا غوربت يعني هسة يله اگدر ارجع

جاي احسب بالفلوس واضم الزايد

سمعت صوت وراي يصيح

- اي هيَّ هاي

التفت شفت هذا الضربنا جاي وجايب ويا عشيرة كامله

وكلهم حاملين تواثي " عصاة للضرب "

بهدوء ضميت الفلوس بجيب البنطرون

دنگت حضنت الترمز

شهگت وركضت نفس اللحظة بس انتبهوا عليَّ

ركضوا وراي

افتريت من ورا حتى اتيهم ماگدرت

بالدربونة اليسكنونها شمشون وبطنج دخلت اركض

والحض الفگر خلاهم گدامي لزمني شمشون خايف

- شصاير

ماگدرت احچي التفت شاف وراي القوم الهاجم

صاح بصوت قوي يحذر بطنج الواگف يطگ أصبع ويرگص

- شمشون : بطنج افلت

ركضنا ثلاثتنه من دربونة لدربونة وهم ورانا

دخلنا على المناطق القريبة من عدنا دخلو هم بالنفق

واني رجعت لمنقذي من هاي الشدد

شفته يدفع بالعربانة راجع للبيت ، صرت يمه

حچيت بجديه وخوف

- لبدني اجوني

احتار وين يضمني چانن اكو بابين بالعربانة جوه

هاي يضمون بيها القنينة ، طلعها ودخلاني

حشرت نفسي بيها سداها وظل يمشي بيه

بلعت ريگي بخوف من سمعت يحاچونه

- ماشايف وحده ملثمة ولابسه كبوس مبينه بس عيونها

- ابو فواطم : لا ماشايف

- حجي اذا شايفها گول هاي هانت اخوي هيَّ والوياها

تقبلها بنية تضربه راشدي ؟

- ابو فطوام : چچ لا طبعًا ماقبلها مبينه صلفه

عوفها بويه يمكن مسودنه

- اعقل مني تبيع والسانها شطوله

وايدها الصغيرة تطرش الأذن

- ابو فواطم : لو اعرفها وشايفها اگول

بس صدگ حتى لمح مالمحتها

- مصدگينك حجي الله وياك

مشت العربانة خليت أيدي على اشفايفي وضحكت

بعدها عجبني الوضع وخليت رأسي على رجليه وسرحت بالأفكار

اتوقف وفتح الباب حچه بنفاذ صبر

- ابو فواطم : ام الطلايب انزلي

مديت رجليه وطلعت شفته موصلني يم باب البناية

- بعد روحي عمو الصكصوك

- ابو فواطم : وتين هذا أخر تحذير تبطلين لو لا ؟

- عمو هو الاتحارش

- ابو فواطم : وتضربينا ؟ ولچ خده بي اثار اصابعچ

- حيل يستاهل

- ابو فواطم : لو لازمينچ متخيله شيصير بيچ ؟

سكتت فتره ورديت

- بعد ماتنعاد

- ابو فواطم : اي مثل كل مره وترحين تعيدينها

برطمت اشفايفي ونزلت راسي

تقدم رفعه وباسا

- ابو فواطم : ماريد هذا الراس يدنگ

اني خايف عليچ عزيزة انتِ مثل فواطم

ماريد يأذيچ شي

- لاتخـاف على الربت نفسها بنفسها وخلصت عمُرها بتعب

- ابو فواطم : ماكو منچ وثاق بيچ واعرف لو اذبچ

ابوسط عرابيد تطلعين من بينهن ما ملدوغه ولادغه

مسحت وجهي وابتسمت

- ها صرت تحچي بالحياية وين عمو الصكصوك المايقبل بيها

ضربني على راسي بخفه ورد

- ابو فواطم : الساني أخذ سوالفچ ام الطلايب

- هههه صدگ عمو وين القنينة

- ابو فواطم : خليتها يم صديقي هسة راجعلها

تقدم للعربانة رفع الغطه المخلي على كارتونه الصمون

طلع منها الفه تقدم خلاها بيدي واردف

- ابو فواطم : ضامها الچ اكليها .

دمعت عيوني من حنانه حضنته ورديت

- حسيت بحنان الأب من وراك

طبطب على كتفي واردف

- ابو فواطم : ديري بالچ على رويحتچ

وما اوصيچ صيري بسمار بعين ألي يحاچيچ منهم

من خلص جملته باوع للبناية فهمت يقصد البيها

هزيت راسي ورديت

- بدون ماتوصي اني بسمار بعينهم وشوك بوجوهم

ابتسملي دفع العربانة ومشه

دخلت جوه شمرت البيدي واكلت الفه

- شكرية ماري گعدت ؟

- شكرية : اي واكلت ورجعت نامت

- وشلونها ؟

- شكرية : زينه حتى رادت تطلع للشغل بس المدام ماخلتها

رفعت حاجبي ورديا بـ استهزاء

- المدام ماخلتها ؟

- شكرية : اي داده وداعتچ

- الـه اكو سبب وضامتلها شي چبير

- شكرية : لا بس يمكن انقهرت على وضعها

- انقهرت ؟ من شوكت هيَ تنقهر !

- شكرية : نتأمل ههههه

- عوفچ من طاريها الزفت ، شمسوية اكل ؟

- شكرية : مرگه باذنجان وتمن

- هو الباذنجان وحده ما اطيقه انوب مرگه ؟

مرتكبه جريمه انتِ بحق الأكل

- شكرية : الثلاجة فارغه مالگيت غير الباذنجان

والمعجون

- شگد فگر تنهب وتغسل اموال واتجار بينا

ماتجيبلها أكل بي خير خرب راسها مال طراگ

- شكرية : يبو اشتغل الرشاش اسكتي داده لا تسمعچ

- خل تسمع شنو خايفه منها مثلًا ؟

- شكرية : على بختچ وتين روحي للغرفة مالنا

خلگ مشاكل خلي البناية هادئه

طلعت واني احچي بصوت عالي

- ها هسة وتين الطلعت مو خوش

يعني اذا اصعد البناية تبقى هادئه قصدچ اني الاسويها هوسة

بالممر صادفتها هيَّ و وراها وحده

بس شافتني ارتبكت

- ملوك : شعندچ هنا

- اريد اصعد للغرفة لو ماتقبلين وترديني اطير ؟

- ملوك : السانچ لا ينگص

- بطرانه انتِ گاعده هنا فايخه وتردين تتعاركين

هاچ الفلوس والصمي

شمرت بوجهها الفلوس ومشيت

وهاي الوياها ولا رفعت عينها مني

رفعت ايدي بالهوى واردفت

- ها سالمين مضيعه شي بوجهي !!

كتمت غصبها وصاحت

- ملوك : اصعدي

- اوي عيني ديري بالچ لايطگچ عرج ولو انتِ عار مايصيرلچ شي

فتحت عيونها مصدومة صعدت الدرج والتفت عليها

- قوبلاتي الحاره الچ ملوكه المفلوكه

لو بيدها تاكلني بس البصفها لزمتها

الصراحه ضل بالي يمها تباوعلي بنظرات غريبه وكأنُ

تعرفني وبعيونها هواي حچي بس خايفه تحچي

دخلت للغرفة طردت شكو تفكير من رأسي

گعدت بصفها بستها من راسها واردفت بهدوء

- شلونها حلوتي ؟

- ماريا : زينه مابيه شي

- متأگدة ؟

هزت راسها بابتسامة حزينه ردت

- ماريا : اي متأگدة

جريت نفس ورديت

- جوعانه ؟

- ماريا : لا هسة اكلت

- شنو رأيچ نطلع ؟

- ماريا : مابيه حيل

- يبو صايرة كأبه

- ماريا : بس اگوم ادوخ و أطيح

- ليش ؟ ما منطينچ علاج صخام !

- ماريا : لا

- باچر نروح للمستشفى خوش

- ماريا : اذا ماصرت زينه

- حتى لويصير حيلچ حيل مطي نروح اريد اعرف سبب دوختچ

هزت راسها وسكتت

گمت گبال الكنتور ، كنتور چبير بي عدة بيبان

وكل وحده تسكن بهاي الغرفة الها باب

مديت ايدي بجيب بنطروني طلعت المفتاح

فتحت الخانة من جوه ملابسي طلعت الفلوس الضاخرتهن

چملت عليهن ألي اليوم طلعتهن ورجعتهن

طلعت لبس وقفلته ، جاي اطلع للحمام سمعت صوت صريخ

منبعث من جوه ، أبتسم بانتصاره ودخلت اسبح

وادندن بـ سعادة طلعت نشفت شعري ومشطته

طلعت الديرم والكحلة خطيت عيوني ورسمت اشفايفي

- ماريا : اليوم شكو ؟

ابتسمت واني اباوع لنفسي

- يمكن فرحانه

عفت المراية وباوعتلها عقدت حاجبها وردت

- ماريا : الچ دخل بضرب المدام ؟

ضميت الكحلة والديرم ورديت

- ليش شبيها بشنو نضربت

- ماريا : ماعرف البنات انخصبن بس يگولن ضرب قوي

وحتى بمنطقتها مضروبة

- تستاهل

- ماريا : انتِ السويتي هيچ ؟

- يبو موچنت اسبح

- ماريا : اشو باوعيلي خل أقرأ عيونچ

تمشيت برهاوه وصلت يمها دنگت بستها من راسها

واردفت بهدوء وراحة

- رجعلچ حقـچ و وين ما أذتچ تأذت

رفعت راسها باوعتلي بنظرة خوف وردت

- ماريا : تعرفين لو درت شتسوي بيچ ؟

- منين تدري إله اذا انتِ فتنتي

- ماريا : الحيطان إلها اذان

- گرصتهن وبعد مايسمعن

- ماريا : مطلوبه الچ بدين ماگدر ارجعه

هاي ثالث مرة تاخذين حقي

- وليش تعتبري دين ؟

- ماريا : لعد شعتبره

- كلمة احبچ بس بطريقتي

ابتسمتلي بتعب وغمضت عيونها

- شجاي تحسين ؟

- ماريا : دايخه حيل ولعبانة روحي

هزيت راسي وگمت

- رايحه ادور مسكن شي منا للصبح

ماردت علي عفتها وطلعت

نزلت للمطبخ شفت شكرية تحف لوحدة

- شنو رأيچ تفتحين المطبخ صالون حفافه ؟

- شكرية : هم مفكره بيها

- اي هواي تستفادين أحسن من راتبچ الشهري المابي خير

- شكرية : ماتجين احفچ

- لا شكرًا احب شواربي ويحبني

- شكرية : ذنيچ هن خضر وخاطات فشله تعاي

وحواجبچ ثخينات حيل يرادلهن تعديل

- عشرة عمُر اني وياهن تردين بسهوله تحفيهن ويرحن مني

حتى عيب منهن عاد خل اصارحهن

- شكرية : يا لا تطلعين سوادينچ عليهن

- عوفچ منهن اكو مسكن ؟

- شكرية : المن الچ

- لا اني ماشرب مسكن استحي منه

من يدخل لجسمي يضل صافن مثل المطي

يحتار شيسكن

- شكرية : ههههههه بلوه انتِ

- هسه اكو مسكن لو لا ؟

- اي بالدولاب الفوگ

أشرت وين ضامته تقدمت اخذته وطلعت

اجه صوت أنين من وراي باوعت للمدخل مال البناية

شفت الحارس ولبنات ملتمين وساندينها وهيَ مضدمه

وبالضيم حالها وگفت انتظرهم صارت قريبه مني

ثنيت شفتي ورديت

- سلامتج متستاهلين

ظلت تنوص بعدت الكبوس من يم اذاني لزمتها بحركه

معناها ما اسمع

- جاي تسمعون صوت هاي الذبانة لو بس اني

رادت تهد بس ماگدرت قهقهت بصوت هادئ واردفت

- صيري زينه واطرگچ هسه أخاف عليچ لاتموتين

واذا تموتين منيلنا مدام عار مثلچ ؟

ماگدرت تجاوبني بس البنات الوياها والحارس ظلو يغلطون عليَّ

باوعتلهم من طرف رجليهم لشعرهم هزيت ايدي وعوجت شفتي

تمشيت بهدوء وهم احترگو حرگ على اول باية ضحكت بتنعوص

وصعدت شربتها المسكن وطفيت الاضويه

تمددت وخليت أيدي على عيوني

بلشت الأفكار تتضارب براسي

تذكرت هذا الاسمه الأدعج وصديقة الغثيث

شيردون من عندي !

يمكن هذول من الطارگتهم وجاين ينتقمون اي ماكو غيرها

عصرت عيوني استرجع ذاكرتي شوكت طرگتهم

بس كلشي ماتذكرت ولا اشكالهم ماره عليه من قبل

قررت اكتشف الموضوع من نفسي واعرف منو وشيردون

بحركه سريعه گمت لفيت اللثام على وجهي ولبست الكبوس

ختمتها بالقمصلة وكبوسها الچبير

انخفت ملامحي وشعري وبس بياض عيني ظل يبين

نزلت بهدوء الطلعه بهيچ وقت اعتبرها مجازفه

من غير الوحوش البرى جيش الدولة محتل الطرُق

الزعيم مايخلي واحد يطلع هيچ وقت انوب بنيه يبوي انتهي

لو انلزمت ، وصلت يم باب الخروج مفتوح

طلعت التفت ماشفت احد طگيتها بركضه

وصلت يم بنايتهم فحطانـه اجاني صوت الحارس يگول

- هم الكوبرا يا مصيبه جايبتلنا !

رفعت راسي وخزرته

- ادري بسمعتي طايح حضها وادري اسمي الكوبرا

بس بعد اذا اجاوزت اطرگك طراگ واطشر معانيك صفح

- شتردين

- شمشون وبطنج

- بنت وبهيج وقت جايه يم شباب

- أول شي شمشون وبطنج أكثر من اخوه

وثاني شي ياسماحه الشيخ انتَ لازم حراسه

على بناية كلها دعاره مو على باب جامع حتى جاي تذب

حچيك الماصخ

- روحي منـا لا ادخلچ الهم واخليهم يشوفون شغلهم بيـچ

رفعت حواجبي باستهزاء تقربت بخطوات ثگيلة واني اردد

- شگلت عيد ؟؟؟ ماسمعتك كرر

لزمته من ياخته سحبته إلي رفعت ايدي

بصقت عليها وطرگته

- اطرگتك طراگ واطشر معانيك يا سرسري

يا كلب لك اشفتني ها ؟ وجاي تهددني

ولك اني الكوبرا ماخاف ولا اهتز بتهديد حيوان مثلك

- هاي ضربتچ ولزمتچ اسوي بيها سوايه

صحت بصوت قوي

- دروح لك ياعرة الزلم

- اذا ماتطلعين نغله ما اتسمه ابو

بعده ممكمل طرگته على حلگه

انهاريت من كلمته ضليت اشفايفي ترجف واردد

- مو نغله اني عندي اهل عندي

- لو عندچ ما مشموره هنا بالبتـ

صرخت بقوة وخليت اديه على أذاناتي

- كافي اش كافي

على صوتي نزلو شمشون وبطنج متخبلين

حاولو يهدوني يسكتوني ماگدرو ولا اني الاگدر اهدء

من بعد ماينذكر هذا الموضوع واتعير

ماريد شي منها ولا من هاي الدنيا

غير اعرف اهلي وين ؟ وياهي الذبتني بذيچ الليلة

معقوله امي ؟ لو وحده ماخذتني منهم

لو ماعندي أهل أصلًا والگاله صحيح !

كل هل اسئلة ادور براسي وماكو غيرها تجاوب

هيَّ التعرف كلشي بس عناد بيه ماتحچي

تريد تخليني معلگه وتايها

اريد بس الزم راس خيط واني بنفسي ادور

افتر بغداد كلها واظل العمُر كله ادورهم

وصلت يم البناية ومادري بنفسي من مشيت

وشحچيت راسي بس يفكر بيهم

وعيوني مغوشة من وره الدموع

التفت لشمشون والبطنج يمشون وراي بهدوء

- ارجعو وصلت

- شمشون : لاتسوين وياها مشكله تدرين كل

ما تضربينها وتتعاركين تعاند أكثر

هزيت راسي سالت دمعتي وكأنُ منتظرتني بس اتحرك

حتى توگع تقرب مسح خدي وحضني

- شمشون : دمعتچ أغلى منهم كلهم لاتطيحينها

ابتعدت منه ابتسمت ورديت

- راح ادفعها ثمن كل دمعه طاحت بسببها

- شمشون : مو هسة من تلگين اهلچ يله

- ومنو يگول الگاهم

- بطنج : تفائلي بالخير ياوجه الفگر

- انچب

- بطنج : خرب روحچ

- وروحك الخايسه

- بطنج : شمشون امشينه لا افجر طحالها

بعدني ما مجاوبته شفنه سيارات الدولة جايه باتجاهنا

هم ركضوا لشقتهم واني دخلت للبناية

يم الباب نزعت القمصلة ونزلت اللثام على رقبتي

مشيت باتجاه مكتبها طرقت الباب اجاني أذن دخول

بس لمحتني وگفت وتراجعت ورا المكتب خايفة

- ملوك : بس تضربين اعاقبچ واموتچ

رفعت شفتي مستهزئة

- لاتخافين ماجايه اتعارك

ظلت تباوعلي وعلى وجهها علامة استغراب

دفعت الكرسي برجلي وگعدت سحبت نفس باوعتلها واردفت

- أهلي ميتين لو عايشين ؟

- ملوك : اني شكم مره گايلتلچ لاتسئلين هذا السؤال !

- ليش اني من دونهن ما تجاوبيني ؟

ليش كلهن يعرفن أهلهن

وليش صارن هنا اله اني ؟

- ملوك : لآن انتِ السان و وكحة

ظل جسمي كله يرجف وگلبي يريد يطلع من مكانه

مسحت دمعتي النزلت غدر على خدي وجاوبت

- اصير عاقله وتگليلي ؟

- ملوك : أنسي بيوم من الأيام اگلچ

- واذا وافقت ؟

باوعتلي بمكر وگالت

- ملوك : عليمن

دنگت راسي وضحكت بخفه حكيت ارنبه أنفي

وگمت خليت اديه وره ظهري صرت قريبه يمها ي

همست باذانها كلمة وحده مني خلتها تحچي

الاريده من سنين

ابتعدت مني صارت عيونها بعيوني

هزت راسها وگالت كلمتين خلتني انشل عن الحركـة .

للـحكـايـة بـقـية

رأيكم ؟ توقعاتكم ؟

أستودعكم ألي عينه ما تنام 💕

-أستغفر الله.

-سُبحان الله.

-الحمدُ لله.

-لا إله إلا الله.

-الله أكبر.

-سُبحان الله و بحمده.

-سُبحان الله العظيم.

-أستغفر الله و أتوبُ إليهِ.

-لا حول و لا قوة إلا بالله.

-اللهُم صلِ على مُحمد وآل مُحمد.


━━━━━━━━━━━━━━━━━━━━━━━━━━

🌸 هل أعجبتك أحداث القصة؟

💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:

🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام

نتشرف بوجودكم دائماً في عائلة كيمو ستوريز! 🌸

━━━━━━━━━━━━━━━━━━━━━━━━━━

2026/11/15 · 1 مشاهدة · 6363 كلمة
yare.yare
إعلان
نادي الروايات - 2026