الأدعج "قاع الظلام "
بقلمـَي زهرة الساعدي
لطفًا فراشاتي دوسن علىٰ النجمة وعلقن بين الفقرات
حساب الانستا
zahralsadi
قناة التلي
zahralsadi
تفز لشوفتك عيني الثگيلة
ابتعدت مني صارت عيونها بعيوني
هزت راسها وگالت كلمتين خلتني انشل عن الحركـة .
- ملوك : اهلچ عايشين
فتحت عيوني على وسعهن بصدمة رجفت اشفايفي
بالگوه طلع الحچي مني اردفت برعشه
- باعوني ألـچ ؟
التفت بنظراتها حول الغرفة وماخلت عينها بعيني بعد !
اتحمحمت ونترت والارتباك وأضح بنبرتها
- ملوك : انتِ ردتي جواب هذا السؤال غير جواب بعد ماكو
- احچي فدوة بس جاوبيني هم ألي باعوني ألـچ !
- ملوك : اطلعي بره ولاتنسين اتفاقچ وياي
باچر بالليل عدنا وجبه جديدة
نزلت نظراتي لأيدي الترجف قبضتها بقوة
حشرت اظافري بـ باطن كفي ظل ينقط دم وما حاسه بألم
صعد النفس لبلعومي وثكل على صدري
رجليه وحدة اطگ بالثانية والرجفه احتلت جسمي الضعيف
- ليش هيچ تسوين بيه ؟ بس جاوبي شسويتلچ
ليش وتين من دونهن شادة وياها
- ملوك : وي الكل شادة وأعاقب الغلطت
- تعاقبينهن اذا غلطن بس اني بكل وقت تعاقبيني
سالت دمعتي وكملت بغصة
- مخليتني كل يوم اجيچ اتوسل بس تگليلي اهلي وينهم
منو الذبتني بذيچ الليلة وماتجاوبين وتضحكين واني ابچي واتوسل
جاوبت بعدم مبالاة
- ملوك : كافي دراما اطلعي بره
- ما أطلع قبل ما تگليلي هم الباعوني ؟ منو الذبتني بذيچ
الليلة ! احچي اترجاچ
صاحت بصوت عالي
- ملوك : لاتلحين اطلعي
من نهت كلامها تقربت دفرتني على ضلعي حسيته انشلـع
ظليت اشهگ اريد القط النفس ماكو وگعت
خليت ايدي بالگاع وسندت راسي عليها ابچي
بس صوت شهگاتي ترن بالغرفة وصدري يصعد وينزل من وره هضمتي
سمعت صوت الباب رفعت راسي شفتها طلعت
گمت ظليت اضرب بالغراض واصرخ
انبح صوتي واتجرحت بلاعيمي
طلعت اسحل بـَروحي صعدت للغرفة تمددت يم الباب
حضنت نفسي مثل الجنين اشهگ
طلع الضوه واني بنفس مكاني وجفني ما مغمض
وتفكيري ! يم ذيچ الليلة هواي حاولت اتذكر بس بالنهاية فشلت
گعـدن البنات ولا كأنُ شافني رفسني وعبرن
بس ماريا اجت متخبلة
- شبيج ليش نايمه هنا
- اهلي عايشين
- ماريا : شـنو ؟
- هيَ گالتلي اهلچ عايشين
- ماريا : المدام !
هزيتلها راسي رفعتني وجاوبت
- ماريا : تصدگين بيها ؟ منو گالچ ماچذبت
حتى تخليچ بقلق
- لا ماري لا أهلي صدگ عايشين احساسي ميخيب
- ماريا : وليش هيچ صاير بحالچ مو من اسنين تردين تعرفين
وهاي هسة عرفتي ليش تبچين
- ماترضا تگلي هم الذبوني لو لا
- ماريا : شگالتلچ من سألتيها
- ماجاوبت
ردت بحديه
- ماريا : لـعد مو اهلچ الذبوچ
عقدت حاجبي مستغربة
- شمدريچ
- ماريا : لو هم ذابينچ تحچي ماتضمها
أصلًا تكيف وتظل تعيرچ بيها مثل ماتعير البقيه
اني مو أنهار كله تذكرني جدتي وجدي باعونها الها !
خلتني اصفن واستوعب !
نهضت ، برهبة ، وقلق ، وفرح ، وخوف ، ورجفه
خليت اديه على اشفايفي ارجف
- اي صدگ اي لو ذابيني تگول واصلًا تفرح
بس من سألتها خافت
ماري اهلي ماذابيني اهلي عايشين
حضنتني وردت
- ماريا : اي وانتِ مو چنتي رايدة بس راس خيط
حتى تظلين بنفسچ ادورين عليهم
اجاچ الخيط والتنتظرينا من اسنين صار
گومي على حيلچ ودوري عليهم
هزيت راسي عفت كلشي وراي لبست
ونزلت اركض أخذت الغراض وطلعت
أمشي وماعرف وين رايحه و ألمن ؟
اتوقفت بنصُف الطريق عصرت راسي اريد اتذكر
بيا مكان انذبيت ماكو بس اتذكر گعدتني على مسطبة وراحت
ألف مسطبه ابغداد وين الگه الگعدت عليها بذيچ الليلة ؟
بكامل قواي العقليا ظليت ادور من مسطبة لمسطبة
اوگف الناس وأسال
" ما جاينيكم ناس يدورون على بتهم "
بيهم اليجاوبون بـ لا وبيهم اليهزون أيدهم ويمشون
عبالهم مخبله ميدرون اني هسة يله وعيت وعقلي استوعب !
صار المغرب تعبت واني لا مشتغلة ولا لاگيتهم
گعدت نزلت اللثام لرقبتي وخليت أيدي على وجهي
ضايعة ، حايرة ، الدنيا نسدت بوجهي وأيست بيوم الگاهم
اتكلمت بيني وبين نفسي
- كل عقلچ تردين هسة تلگينهم ! صالچ اسنين من نشمرتي
زفرت وحاولت ارجع الامل لروحي رجعت جاوبت
- راح تلگينهم راح تشمين ريحتهم
وخرت أيدي من وجهي شفت اقدام واگفه گدامي
رفعت رأسي عقدت حاجبي من شفته
واگف وهالمره مالابس دشداشة
لابس بنطرون وقميص ومخلي أيدي بجيب البنطرون ويباوعلي
- الأدعج : جبتلچ فلوس الچاي ماحب يبقى عليّ دين
- مو گتلك خليها عليه ؟
بدون لا يستأذن اجه گعد بصفي وحچه
- الأدعج : وجبتلچ لفه
باوعتله مستغربة
- يالفه ؟ شعندك شتريد مني
- الأدعج : اليوم عزلنا الموكب واتذكرتچ
من حبيتي الـ لفه ماهان عليّ ما اضملچ
- شتريد مني ؟
- الأدعج : انتِ إلي شتردين
- اني الجايتك لو انتَ
- الأدعج : انتِ وگعتني الأدعج على وجها من أول نظرة .
- راح اسألك وجاوبني بصراحه
- الأدعج : خوش
- منين تعرفني وشرايد مني ؟
اذا تريد تسخدمني علمود غير شخص لو جاي تاخذ حقك
خاف اني طارگتك لو المدام مأذيتك اني مالي شغله
من هسة گلي ماعوزي تعب فوك تعبي
- الأدعج : وحگ الگطعو چفوفه غدر ماعندي شي وياچ
ولا جاي استخدمچ انـه أول مرة اشوفچ من بعتيلي الچاي
- لعد شلون تگلي اعرفچ ؟
- الأدعج : اريد اخوفچ
بدون لا أفكر ضربته بخفه ورديت
- تخوف وحدة گلبها ميت
- الأدعج : ليش ميت
- من وره الشفته
- الأدعج : شنو الشفتي ؟
باوعت بوجها ورديت
- ليش جاي تسأل ؟
ابتسم بخفه ورد
- الأدعج : هيـچ فضول
رفعت الفه وجاوبت
- لعد اخليك بفضولك واني استمتع بطعم الفه
غير نظراته مني للشارع طلع جكارته ورثاها
اخذ نفس منها ورد بصوت خافت
- الأدعج : مو مشكلة اذا ميت نرجع نعيشه
قضمت اللفه غمضت عيني واردفت
- اويلي تخبل
- الأدعج : ألف عافيه
- منو مسويها ؟
- الأدعج : الوالدة
- تخبل كون كل يوم تفتحون
- الأدعج : بدون مانفتح اخليها تسويلچ
- صدگ أنتم ليش تفتحون موكب ولابسين أسود ؟
استغرب من سؤالي عقد حاجبه وجاوب
- الأدعج : معقولة ماتعرفين حتى اخوتنه السنه يعرفون
- بس اني كلشي ما أعرف
- الأدعج : ليش ؟
- مخلصتها من الشغل للغرفة وأنام
لا اسأل ولا اعرف ولا اطلع ولا أطـب
- الأدعج : محد معلمچ ؟
- شيعلـم
- الأدعج : انتِ من تشوفين المواكب والناس تمشي
ما يثيرچ الفضول وتسألين
- بلي ومن سألت المدام گالت عقل ماعدهم
وهسة يجي الزعيم يطيح حضهم
- الأدعج : هههه شگد جاي يحاولن مايخلونا نذكر أهل البيت
ويكرهون العالم بيهم
بس وعلي احنا عناد بيهم حتى مواكب نفتح طول عمُرنا
مايخوفون چلبي لا المدام ولا الزعيم
گمت شمرت اللفه وخليت ايدي على شفايفه
صرت قريبه منه لدرجه أسمع انفاسه
اردفت بخوف
- اش لايسمعونك مايخلونك عايش
لزم معصم ايدي بعده ورد
- الأدعج : خلي يسمعون ابن قالع باب خيبر مايخاف
رمشت أكثر من مره ما جاي أفهم إلي يگوله
واستحي اسأل ابتعدت ورجعت لگعدتي
رفعت الفه وكملت أكلي
- الأدعج : متعودين أحنا اذا نعلگ صورة أمام يجي الجيش
يلمنه ويروح
- عود ليش ؟
- الأدعج : الزعيم الحكمنا يكرهم ويريد بسلطته
يخلي العالم كلها مثله ههههههه مايدري بعناد ولد ابو علي
- بس اذا عاندتو راح تتأذون
- الأدعج : فدوه لأهل البيت
ماعرفت شرد بقيت اكل ونظراتي بالأرض
شمر جكارته وگام صار گدامي گال
- دگومين وياي نروح لـ أدم ؟
- هذا الغثيث
- الأدعج : ههههه ماكو أحن من گلبه
ضلعي الاستند بي هذا
- شسوي أروح وياك ؟
رفع طرف شفته ورد
- الأدعج : تصبيله چاي وي اللفه
باوعتله لاف اللفه بچيس الـه
ابتسمت ورديت
- اذا هيچ أروح
- الأدعج : يله گومي علي وياچ
باوعتله نفس النظرة وهيج الطريق كله انظرلة
يلهج السانه بذكر أسم " علي " وهواي يحلف
" وحگ الگطعو چفوفه غدر "
ابتسمتله هواي أول مره اسمع هيچ شي
وبصوته الخشن المبحوح ونبرته سواهن أحلى
أكو ناس مايصدگون من اگلهم ما أعرف وعبالهم ابالغ
لكن بالواقع فعلًا ماعرف
حياتي كلها شغل بشغل والشارع اطلع أله من اشتغل فقط
من السبعة الصبُح للمغرب . ما اختلط بناس تعرف وتعلمني
الاختلط بيهم كلهم من البناية هم مايعرفون مثلي .
دخلنه لمنطقة شعبية اتوقفنا يم محل صغير
شفنا أدم متمدد جوه سيارة. تقدم دفره برجله واردف
- الأدعج : گوم هـتلي
حچيت واني اباوع لانحاء المحل
- هستوك تحچي وتستغفر
- الأدعج : يم هذا انزع أخلاقي
ضحكت وضميت اشفايفي بيدي
گام أدم اخذ منه اللفه واردف بتنعوص
- سوده عليه حبيبي ماتنساني اجر حنيتك ابوسه اشلع خدها
- الأدعج : لاتتنعوص
- أدم : اوي حبيبي لاتفشلني
- الأدعج : شلون راح اردمه
عوج وجها ودار منه شافني رفع حواجبه
- أدم : هاي شجابها وياك
- الـ هاي عدها أسـم
- أدم : ومنين اعرفه اشم أيدي ؟
- اي شمها ولاتگول هاي
- أدم : ها اشتغل هرمون الكبرياء
- لا بس اكره هاي الكلمة
ضل يردد بعناد
- أدم : هاي هاي هاي
ضجت كلش هزيت أيدي ورديت
- الطول طول النخلة والعقل عقل الصخلة
فتح حلگه بصدمه سحبتي الأدعج
طلعني بره بعدت ايده بنتر
- كسرت ايدي شبيك
- الأدعج : موعيب تگليله هيچ ؟
- مو عيب ماشفته شلون مغثة
- الأدعج : يشاقه وياچ هذا أدم وطبعه بس حيل انصدم
من اجاوزتي عيب ميصير أكبر منچ لازم تحترمي
ملت رأسي والدمعة بطرف عيني
- ما احترم أحد اني
- الأدعج : وهاي زينيه ؟
رفعت الترمز وصحت علي بصوت عالي
- ماعليك خوش
جاي امشي صار گبالي مانعني
- الأدعج : شكو دمعتي واختنگتي غثتچ كلمتي مو ؟
- مادمعت وخر
خله إصبعه السباب على شفتي خزرني ورد بهدوء
- الأدعج : لاتصيحين
خليت عيني بعينه بلع ريگه وذبلت نظراته
عافني دار وجها مسحه وحچه
- الأدعج : اصعدي للسيارة
باوعت وين ما مركز نظراتة شفته يباوع
لـ سيارة حديثه لونها ابيض
- ما أصعد مو بكيفك
- الأدعج : عرامتچ عوفيها على صفحه واصعدي
- شنو هيَ بكيفك !! اعرفك تعرفني شبيك يل ازرگ
تقدم سحبني بقوة من اذراعي وأخذني للسيارة
ضليت ارافس بس هو أقوى مني ضخم وبي كل الحيل
بچيت وحچيت
- راح تخطفني مو ؟ اصخام الصخمني عرفت
- الأدعج : شعرفتي ؟
- تعامنلي بلطف وتنطيني لفات أكيد وراك شي
اني غبيه ما شايفه ام بطن
باوع ترى اني مريضه بس تسويلي شي تتمرض
داس بريك انضربت قوي وگف
اندار عليّ غمز واردف
- الأدعج : انه هم مريض يعني الوضع طبيعي
- انتَ مرضك بعقلك اني بدمي يعني اعديك
- الأدعج : هاي مال مرضك بعقلك راح اغلس عليها
ومنـچ المرض ألف هلا بي
- شبيك اگلك اني مريضه عوفني عفيه
مارد مسحت وجهي وكملت
- أخطف ماري وياي أحبها وخوش بنيه
ماگدر اعوفها وحدها يمها
رفع رأسه وظل يضحك بصوت واكتافه تتحرك
صفنت ما مستوعبه
- الأدعج : مصدگه اخطفچ ؟
- ها
- الأدعج : شني مسودن اخطف وحده عرمة مثلچ ؟
عفت كلشي وركزت على كلمة عرمة المافاهمه معناها
- شنو معنى عرمة
- معناها كل صفاتچ
عبست وجهي ومديت أيدي افتح لباب
لگيته مقفول باوعتله واردفت
- نزلني
- الأدعج : ماتنزلين قبل ماتحچيلي كلشي
- شنو ؟
- الأدعج : منو انتِ وشنو حياتچ ومنو المدام
وليش هيچ عرمة ؟
- ما اگدر اجاوبك
- الأدعج : ليش ؟
سكتت ماعرفت شجاوبه
تذكرت التعلوم العلمته النا
مانثق ، ولانحچي وي شخص ، ولانحب
اي واحد يخالفها ويسوي شي من هذن ينقتل
ملت رأسي وحچيت بتوسل
- خليني أروح
- الأدعج : قفلت اله تحچيلي
صحت بصوت عالي
- ماگدر احچي تفهم لو لا
- انه مو گتلچ لاتصيحين ؟
- ومنو انتَ حتى أسمع كلامك
- الأيام راح تثبتلچ منو انه
سمعت طقه فتحته القفل مال الباب
بدون لا أفكر ولا اباوع لوجها نزلت لبست اللثام ومشيت
خلصت الطريق كله أفكر بالصار لحد ما وصلت
يم البناية رفعت راسي بتعب مابيه حيل عقاب
نزلت نظراتي للغراض
شفت چيس الگلاصات السفري مفتوح
رفعته اريد اسده لمحت طرف فلوس جوه
شگيت الچيس أكثر طلعت أول گلاص
انصدمت من شفت مبلغ كامل
رفعت راسي نظرت لانحاء المكان ماكو بشر
رجعت نظراتي اله وبقيت ربع ساعة هيچ
الگلاصات جديدة وچيسهن ما مفتوح
يعيني أكو شخص شاگ الچيس
ومخلي الفلوس بداخلهن
فرحت وخفت وتسألت عقلي ظل متشوش قاطعت تفكيري ماريا
اجت فرحانه مطلعه المبلغ سحبتني دخلنا سوه
سلمناها الفلوس وصعدنا بالغرفة نرتاح
اجت شكرية صاحتنا على الأكل
نزلنا بالممر البصف المطبخ لگينا السفره مفروشة
والصحون مرتبه عليها
سحبت ماريا وگعدت بنهايتها حتى اظل اباوع للكل
كل سكان هاي البناية هسة مجتمعين
بيهم الصغار وبيهم الكبار وبيهم ولد وبيهن بنات
بس البنات بكثرة عكس الولد
وحده من الساكنة ويانه بالغرفة هاي السحلتها خزرتني
رفعت حاجبي وثنيت شفتي مستهزئة
حركت راسها بـ معنى گومي
رفعت أصبعي وسويت حركه بـ معنى بكيفي شوكت ماريد اگوم اگوم
ظليت أكل برهاوه
الاغلب خلصوا وگامو لغرفهم
والبقيه گاعدين يحچون بالنظرات
يخافون يحچون بصوت منها
عدها قانون ممنوع الاختلاط بأي شخص ان
كان هنا او بالشارع واضاهر حيل ماشين بقانونها
أله اني دايسته وأمشي
التفنا كلنا على صوت صياح قوي جاي من مكتبها
گمت للمطبخ شفت شكرية تغسل امواعين
- اريد چاي
- شكرية : الدنيا ليل تردين تبيعين
- شبيع غير طايح حظي واريد بس أوصل لفراشي
- شكرية : لعد المن
- إلي اشربه راسي راح يطگ
- شكرية : هسة احمي واجيبلچ
- شلون شكرية عندي تخبل
- شكرية : ويني اخبل شو زرگه
ابتسمت ورديت
- وين الزراگ غيرچ الازرگ وانتِ تخبلين
غير سمارچ يطگ بالگاع
- شكرية : ههههه يمچ اصير ككو
ماشاءالله انتِ حليب
- فـد عليچ سوالف مال سرسريه
- شكرية : فلك الفلكچ ولاتگعدين راحه
شمرتلها بوسه بالهوى وطلعت
جاي اصعد الدرج وصادفني مثل الموقف ونفس المرأة
طلعت وياها ومن بين البنات كلهن ضلت مركزه بوجهي
تباوعلي وترجع تباوع للمدام وكأنُ تحاچيها بعيونها عليّ
هاي ثاني مرة اشوفها وهيَ تخوفني بنظراتها
صعدت للغرفة أخذت ملابسي ودخلت أسبح
طلعت امشط بشعري حچيت بانزعاج
- اريد اگصه شل أيدي
- ماريا : انچبي ولچ شعرچ يموت
- شنو الفايده انهار كله لافته كباية ومخليه الكبوس علي
- ماريا : ميخالف ممنوع تگصي
- مادري أحس المدام بس تشوفه بهذا الطول والثخن
تگصه گلت اتلاحگ الوضع واني اگصه قبلها
- ماريا : مو تحبينه يعني ينطيچ گلبچ تگصي انتِ ؟
- حتى لو احبه اگصه قبلها المُهم هيَ ماتگصه
- ماريا : اش وشيلي الفكرى من بالچ
ولاتفتحينه يمها ابدًا
هزيت راسي وضفرته ولفيتها كباية
طلعت المرايه الصغيره والديرم
ظليت ارسم بي بأسناني وشفايفي ركزت على الأثر
انقبض گلبي وانقهرت ودمعت عيوني
بساع غيرت نظراتي وبقيت ارسم لحد ما
انطاني لون قوي يلا عفته
أخذت قلم الكحلة وكحلت عيوني
ختمتها برشه العطر على رقبتي وباقي جسمي
- ماريا : اليشوفچ يگول عايشه بأفخم مكان ومرتاحه
- عسى ما عايشه بحفرة جريذيه ما أهمل نفسي وابهذلها
- ماريا : اويلي هاي وتين الاعرفها
- ههههه دائمًا هيچ اني حتى لو تكسرني
أقصى وقت أبقى يوم تعبانه وبعده ارجع أقوى من القبلة
- ماريا : اريد أصير مثلچ
- أقوى مني انتِ
- ماريا : لا وين
- خليها ابالچ كلمن عايش هنا قوي وگلبه ميت
- ماريا : اخ شگد صحيح
- وأقع مرير خلتنا بدون مشاعر ولا رحمة
- ماريا : تدرين مرات من أبيع يظلون يشاقون وياي
واني أنسى نفسي واجاوبهم ومن اتذكر شموصيتنا
اظل ارجف واعوفهم واروح
- وانتِ ماشيه على الگالته وخايفه منها ؟
يختي طز بيها وبقوانينها الافشل منها
اسمعي منا وطلعي منا وامشي بكلمة نفسچ فقط
- ماريا : ماگدر أخاف منها
- وحده مسربته مثلها تخوفچ ؟
- ماريا : هسة انتِ ماتخافين
- شعر شاربي ماتهزه وداعتچ
- ماريا : اني عكسچ ودائمًا احتمي بيچ
- ورا ضهرچ اني وافگس عيونح اليأذيچ
حضنتني واني بادلتها الحضن
- ماريا : ريحتچ تخبل
- شوكت ماتردين رشي منها
- ماريا : حتى لو ارش تبقى عليچ أطيب
- وانتِ من دونها تخبل ريحتچ كلها حنيه
حضنتني بقوة بست راسها وابتسمت
انفتح الباب دخلت الشله التعبانة
- كون تشوفچن المدام
بعدت ماريا گمت واني احچي
- عليمن أتعب روحها وتصعد اني انزل واحضنها گدامها
- عود شوفوني ماخاف
- واني صدگ ماخاف ولا اهتز
- مبين
- اي مبين والفرق واضح بيني وبينچن
- لا تقارنينا بيچ انتِ زباله
ضحكت بصوت قوي رفعت اصبعي وأشرت
- اني الزباله لو أنتن الي من فوگ ليجوه تنقطن قذارة
ماظل باشه لا أبن الباشه لا الحارس لا السايق
ما لعب بيچن دشوفي حالچ چنج ابريعصي مستهتر
- تغارين
- على شنو أغار ليكون انغريتي وشفتي نفسچ
من مارسو قذارتهم وياچ ؟ لا حبيبتي غلطانه
ماغار من وحده ذليله فرغو شهواتهم الحيوانيه بيها
عاطت بصوت قوي وهجمت عليّ
دفعت ماريا على الچرباية أخاف عليها لا تتأذه وتنضرب
صرت بوسطهن اقاوم وادافع واطرگ واعض
لحد ما اجت شكرية فاككتنه
- شكرية : كل وحده بطول البعير شكالچن تسودنتن ؟
حچت لتعاركت وياها
- خلي تعزلنه غرفة وحدنه
- شكرية : البناية قبطت مو زين كل عشرة بغرفة شوفن البنايات
الثانية خمسين وحده سوه لا تتعافن
رديت واني الهث
- شكرية لاتظلين ماتعرفين تحچين خوش
- شكرية : يا انوبه عليَّ ؟
رديت بنفاذ صبر
- انزلي حبابة
- شكرية : تعاي وياي المدام تريدچ
بلعت ريگي اعرفها شتريد مني
وصيت ماريا ونزلت بالي يمها بس ماگدر انزلها وياي
أخاف عليها أكثر ، نزلت شفتها واگفه يم الدرج تنتظرني
- شرايدة ؟
- ملوك : تعرفين كلش زين شرايدة
- واني گتلچ ما انفذ اله تجاوبيني
- ملوك : لعبتي عليَّ اخذتي التردينا وهسة ماتقبلين تنفذين ؟
- ملوكه المفلوكه مالي خلگچ روحه ماروح
واي شي ما انفذ اله تحچيلي وبعد بكيفج
هزت راسها بتوعد
- ملوك : يصير خير
رفعت شفتي مستهزئة وانداريت اصعد
صرت على الباية الاولى حچت هيَ
- ملوك : باچر اذا ما اطلعين اضعاف التطلعينه اعاقبچ
وعقابچ قوي هالمره
عصرت بلوزتي حيل وصعدت اركض
ابداية الممر ألي يوديني للغرفة الصايره أخر وحدة
وبابها بصف باب السطح
سمعت صوت يصرخ بس مكتوم وهذا الصوت جاي من
نهايه الممر يعني من غرفتنا !!!
طگيتها بركضه فتحت لباب لگيته مقفول
ظليت اضرب بي بثنين اديه واصرخ برجفه
- افتحن الباب عوفنها واجهني افتحن
اتخبلت عقل ماظل براسي
ظليت ادفر برجليه ماگدرت اكسره
نزلت لشكريه جابت نسخه واجتني
فتحت لباب وهنا انصعقت من هول المنظر
امشگگات ملابسها وحاصراتها
ويسون بيها حركات مقرفه
وهيَ مقيدة
انعميت وظليت ماشوف شي گدامي سحلت أساس
المصيبه واني متأگده هيَّ الفكرت هيچ تسوي بيها
وذني مساعداتها
لزمتها من شعرها وظليت اضرب بيها بالكنتور
صكيت على سنوني وارگع بيها بكل قوة
وهيَ ترافس خرمشتني وضربتني ماهتميت كملت
لحد ما ظل الدم ينقط بالگاع من راسها وفقدت حركتها
شمرتها امتدت وصارت جثه جواي
اتصمنمت بمكاني واني اباوعلها
رجفت من فوگ ليجوه باوعت لشكرية ضربت صدرها بصدمة
بچيت وحچيت
- مادري اني ما كتلتها اني مو مجرمة
صاحت بصوت عالي
- شكرية : عبد يا مصيبه تعال
حچت وحده من لبنات وهيَ تبچي عليها
- مايسمعچ احنا بالطابق الثالث انزلي صيحي
نزلت شكرية التفت لـ ماريا
چانت مقيدة بـ ملابس فتحهن وسحبتها لصدري
- شسوت اغتصبتچ ؟؟؟
ترجف وتحچي نص كلماتها ماتنفهم
- ماريا : لا ماگدرت عضيتها وضربتهن كلهن
ومن قيدني هستوهن بدن وانتِ اجيتي
- گومي للحمام
رفعت نفسها وطاحت بالگاع
رفعتها لصدري واردفت
- لا لا ماريدچ تطيحين لا
- ماريا : رجليه وتين ماتن !
عضيت شفتي السفليه بحيره سحبتها
واني اباوع لهاي الصارت جثه ويمكن ماتت !
الدم النازل من لكنتور وصاير بقعة دائريه بصف راسها
والبنات يباوعن إلها ويبچن
غمضت عيوني وماظليت انـظر الها
اخذتها للحمام گعدتها على الكاشيه وفتحت ماي بارد
صرت اشيل بالدونگه واذب على راسها
وهيَ ترجف واسنانها اطقطق
انتهبت ماجايبه ملابس الها
رجعت للغرفة شفت شكرية تمسح بالدم والغرفة فارغه
من البنات جاي عبد ماخذها وهن رايحات وياها
أسمع وشوشة شكرية تلوم بيه بس ماجاي افهمها !
صرت حتى ما اندل دخت و راسي افتر
فتحت كنتوري طلعت مني ملابس وقفلته
رجعت للحمام لبستها ورفعتها
سحبتها للغرفة واني حاضنتها بثنين اديه
خليتها على چربايتها مددتها وغطيتها
بست راسها وخليت اصبعي على شفتها
- لازم اروح ابقي ساكته ولاتحچين حرف
سوي نفسچ نايمة باچر جيبي وياچ ملابسچ وتعاي
بـل مكان التشتغلين بي راح تلگيني انتظرچ حتى نشرد
هزت راسها بخوف وغمضت عيونها
رفعت الحاف لصدرها غطيتها
وبست راسها للمرة الاخيرة وتوجهت للكنتور
فتحته لبست قمصلتي واللثام والكبوس لكن هالمرة
غيرت الوانهن من اللون الرمادي الى اللون الأسود
حتى ما انعرف متعودين عليَّ بس بهذا اللبس
ومحد يدري اني مشتريه جديد .باوعت علىٰ الدُب المحطوط
بأخر الخانة سحبته وضميته على صدري
بس هذا الباقيلي من أهلي أحسن بي ريحتهم وحنيتهم
بذيچ الليلة حاضنته وابچي .
قفلت الكنتور باوعت لماريا نظرة أخيرة وتمتمت بيني
وبين نفسي
- كل الصار والراح يصير لخاطر عيونچ
بس الليلة راح اعوفچ باچر اثنينا محررين منا
مسحت وجهي لبست الكبوس وغطيت شعري
وصعدت اللثام من رقبتي لوجهي
انزل من الدرج واربط بحذائي
وصلت للطابق الأول شفت بالممر ماكو أحد
طگيتها بركضه طلعت من المكان
من دربونه لدربونه وصلت للشارع الرأيسي
خارج منطقة بقعة الحرام وقاع الظلام
دنيا ليل والظلام دامس وبس صوت الكلاب ينبح
والسكارة تفتر وتطوطح
لأول مره أخاف حضنت الدُب ألي مسميته مشمش
خليته على گلبي حتى استشعر بالأمان
شفت من بعيد ثلاثة يطوطحون و واحد منهم حچه بثكل
" خوش فريسة "
شهگت وركضت بخوف
رجليه محتاره وين تروح ليا مكان يحسسها بالأمان
ويوقفها عن الهروب وترتاح من بعد ركض هاي السنين ؟
ردت ارجع للبناية واتحمل عقاب وسجن وضرب واغتصاب
لكن كانت اقدامي الها رأي ثاني تمامًا
بدون لا احس اخذتني للمكان الراح ترتاح بي
اتوقفت گدام المحل خليت أيدي على گلبي
ألي على وشك يطلع مني من فرط التعب
تقربت أكثر صرت مسافه مترين من الباب
مفتوح شويه ويضيئه ضوه برتقالي خافت
طالعه اصواتهم وهم يحچون بهدوء
حسيت بالأمان يمهم ولأول مرة احسه
شلون وليش وشبسرعه حسيته يمهم ؟
لأول مره ماعرف اجاوب نفسي وادوخ من ورا تصرفاتها
رجعت اوهمت نفسي بكلمات ماتشبه موقفي واحساسي ابدًا
"بس يمكن لأن ذاك اليوم دافعولي وضربو الاتحرش بيه "
قربت عيني على فتحه باب المحل
شفت الأدعج مچتف ادي و مستند على ميز
و أدم متمدد جوه سيارة يصلح بيها
تراجعت وسندت ظهري على الحايط البصف باب المحل
رفعت راسي وزفرت بتعب وحيرة وقلق
بقيت مده واگفه بمكاني بدون حركه
بـ مجرد أسمع صوتهم أحس بالأمان ويطمئن گلبي
محد راح يوصلني ويأذيني من السكارة هم يحموني
اما هيَ وعصابتها لا ماريدهم يحموني منهم
بس يدافعولي وتعرف اني جايه احتمي بيهم
يصير ذبحهم حلال واني وياهم
ماريد اسببلهم الاذيه خليني احتمي بيهم من بعيد لبعيد
واني مغمضة عيوني واحاول اهدء روحي
حسيت بوجود شخص گدامي جفلت بخوف
فتحت عيني واني لو تذبحوني قطره دم ماتلگون بجسمي
من شفته هو الواگف گبالي ابتسمت وحسيت بالراحه
- الأدعج : مغيرة لون اللثام تردين اتيهچ ؟
- لا
مد أيده نزل اللثام من وجهي لرگبتي
بلعت ريگي خايفه تقرب أكثر وهمس
- لو يحطونچ بين ألف بنية ملثمه راح اعرفچ بدون ماشوفچ
- شلون ؟
"گلبي يفززني ويگلي وتينك وياهن "
عقدت حاجبي مستغربه
سحبني للمحل وسد الباب
- الأدعج : جبتلك ضيف تحبه
طلع راسه من جوه السيارة شافني واردف
- أدم : شجابچ ولچ
- ولچ بعينك
- أدم : بسم الله ونبلش وي السانچ الاگشر
- ماكو غيرك الاگشر ياغثه
مسح وجها وضحك بصوت مسموع
- الادعج : انعل شيطانچ على هالسان عرومة
وهسة اعتذري من أدم لان زعلتي
رفعت حواجبي رافضه الفكرة حچه هو
- ادم : لا ماريد تعتذر مسامحها بس خل تفكني شرها
وتدير بالها على گليب صويحبي
- عليمن ؟
- أدم : على دودي شغلتي گلبه الچان عطلان
- الأدعج : يايابه شلون راح اردمه
- أدم : اي غير ثور ظال تردم بالدوام بگصتك
تقرب منه وبالشقه ظل يضرب بي
ضحكت بصوت انتبهو عليّ
- أدم : شنو اليضحك ؟
- الأدعج : وانتَ شعليك تضحك تبچي ترگص
حچه بتنعوص
- أدم: هاي اخرتها دودي هاي السلبوح
تخوني وياها ؟ زين وفروخنا !
- الأدعج : رجعيهم منين ماطلعو
- أدم : باع باع السرسري
ابتسم ودار عليّ
- الأدعج : شمطلعچ بهذا الليل ماتدرين الوحوش تارسه الشوارع
- ادري بس مجبورة اطلع
- الأدعج : ليش ؟
دنگت راسي محتاره افتح گلبي واحچي ؟
لو الف وادور وما انطيهم جواب !
جانت اكو تناكر مال دهن گلبهن أدم وسواهن
بوضعيه الدائره گعد على وحدة منهن واردف
- أدم : اتفضلوا حبايبي ولو **** راح يضل يلزگ
من الدهن بس شنسوي ماكو غير مكان
ضحكت وكعدت
- اني مايهمني
تقرب الأدعج باوع عقد حواجبه ماعاجبه
ذب جكارته وراح للملابس المعلگه على الحايط
جاب منهن قميص خلاه على التنكر وگعد
- الأدعج : گلبيتي عزيزه عليه
- أدم : تلعب روحه من الدهن المدبگ
- الأدعج : چا مثلك حتى بالخيس اگعد الملگلگ
- أدم: مو گدام البنيه حبيبي
ضحكت على أدم مو طبيعي
يحچي عادي وره ثواني يتنعوص ويحاچي بصيغه بنيه
أول شي اخذت علي نظرة مو حلوة بس هسة اختلف كلشي
اندارو عليَّ اثنينهم واردفو
- يله احچي
خفت عبالي راح يسولي شي من احچي ويستغلون الوضع
بس كان رد فعلهم العكس تمامًا
نزلو نطراتهم للارض ومارفعوها حبيت رجولتهم
وموقفهم هذا فتحت گلبي وحچيت كل البداخلي
وهاي أول مره اسويها ومن ادركت اني سولفت
وفتحت گلبي هنا عرفتهم يختلفون عن كل الناس
- تعبت من العذاب تعبت من الضرب والتچوي
شوهتني اني حيل حلوة بس هيَ خربتني
كل يوم عذاب شكل كل يوم شتم وسب وغلط واهاين
اني عايشه بغابة والوحوش محاوطاني وبأقرب فرصه
يجون ينهشون لحمي
صرت حتى اخاف من روحي ما اثق وكلمن
يحاچيني بطيب احس عنده غايه وياي
حتى انتَ ماجاي اگدر اثق بيك كلشي بيه يريد يثق
بس أكو شي رافض يمكن بسببها لآن هيَ علمتنا هيچ
اني اكابر واگول ما اهتم تعرف ليش ؟
حتى ما اتأثر بيها ولا اطيح بسوالفها بس تعبت
وأحس جاي انجرف لطريقها وأسمع كلامها
تقرب مسح دموعي واردف بحده
- الأدعج : وحگ كل دمعه طاحت منچ راح أخذ حقچ
رفعت راسي باوعتله وعيني متغرغرة بالدموع
حچه بغصه
- الأدعج : راح اخليج تثقين وراح الگه اهلچ
"وراح اثبتلچ حچايات الأدعج گول وفعل "
- أخاف منها عليك هيَ گالت بس تثقن بولد
لو تقربتن اله اكسر راسه
هز راسه مبتسم وهو يگول
"لاتخافين انه براسي علي ماينكسر "
- أدم: الله ياسيد الله
باوعت لـ أدم ورجعت باوعت اله
- انتَ اسمك سيد ؟ وشنو معناها
- الأدعج : ههههه لا بس انه من نسل الرسول
واتسمى بالـ سيد بس ما البس اعمامه ابوي يلبسها
- يعني هسة انتَ سيد ؟
- اي سيد
- واو زين شسمك وشنو تشتغل ؟
- شلچ بيهن ؟
جاي اجاوب انتبهت لـ أدم گام
وظل يلم بالغراض اليشتغل بيهن
- الأدعج : شني شكو شجاي تسوي
رفع الدرنفيس وحچه
- أدم : جاي تگلك لزمت البت وفتحت راسها بالكنتور
احسن نلحگها خليني الملم الغراض
ضحكت من كل گلبي رديت واني اهفي على وجهي
- لتخاف الاحبهم ما اطرگهم
التفت عليّ وگال بلهفه
- الأدعج : يعني تحبينا ؟
- لو ما احبكم ما اثق واحچي ولا ادخل بوسطكم
- أدم : لاتغرك بسوالفها هم السفاحين هيچ يحچون
حتى يطمنون الضحيه وانوب طب يغدرو
ضحكت بصوت قوي ورديت
- هههههههه يا
- أدم : انه شاك بيها من شكلها وتصرفاتها
وهسه تأكدت روحي خويه عدنا عوائل برگبنا
عليچ ابو الحسنين لاتسولينا شي وعلي احنا فقره
اختنگت ضحك وهو مستمر والأدعج صافن علي
- أدم : عمت عيني تاليتنه نموت على ايد وحده
چنها سلبوح زلم چيس حب احنا ؟
- الأدعج : عمي البت فقيره مبينا من عيونها
- أدم : ولك هم هيچ يسون عيونهم ممثلين
جاي تسوي اغرائات النا عود انه فقيره
لچ انه أدم الملگلگ مايعبر عليّ شي
ضربت جبيني ورديت
- حتى لو سفاحه بطلت اكتلك
- أدم : صدگ ؟
- اي صدگ
شمر الغراض وگعد گبالي
- أدم : مشكوره بعد روحي وعلي ماتقصرين
اجازيچ بنقل الجثث اذا تردين حتى هذا المدبگ اكتله وياچ
بس المُهم عوفيني عايش ولحسنين انه فقير
ضميت شفايفي وهزيت راسي
- لا اثنينكم ما اكتلكم وهاي الخاطرك
- الأدعج : يا يابه
- أدم : شوف المدبگ لو ما انه چا هسه انتَ صاير فعل ماضي
- الأدعج : اكل الثلاث واربعين واسكت
- أدم : اخلاقك زفت كلش متسوفل
- الأدعج : اي رابي وياك شتتوقع مثلًا
- أدم اخوك ؟
تغيرت نظراته وابتسم
- الأدعج : وضلع من اضلوعي
- يا هل اگول تشابهون
- أدم : باعي احنا مو اخوان
هوا ابن خالي واني من صغري اهلي ميتين
ورابي عدهم ..
- الأدعج : الله مارزقي بأخو من امي وابوي
بس رزقني بـ أدم
- أدم : شلون هسه الزمك وارگعك بالگاع
لاتصير لطيف وعلي اعضك
- اثنيكم تشتغلون هنا
- أدم : لا عمي وين انه رجال فيترچي على گد حالي
بس الاخ هنا سايق طيارة
رفعت حواجبي ما فاهمه
- الأدعج : بعرها الملگلگ
- أدم : صارت منا وبينا عليش ضامين
باوعتله ورديت
- ماتثق بيه مو ؟
- الأدعج : لو ما اثق ما احچي وياچ
- لا حقك اني اول وتالي رابيه ابين عصابه
واظاهر شغلك حساس براحتك
- الأدعج : انعل شياطنچ لاتفكرين بهاي الطريقه
بس انه بيه طبع ماحب اي شخص يعرف عني شي
صدگي وثقي بس اهلي وهذا الملگلگ يعرفون أسمي الحقيقي
وشنو اشتغل
- أدم : اوي حبيبي الغامض تعال
اجرك ابوسه اشلع خدك
گمت واردفت
- اني اي بشر مايعرف شنو بداخلي وشنو عايشه
بس انتَ استثنيتك عن البشر وحچيتلك
- أدم : بس انتَ ؟ وانه شني هنا چيس طحين !
هزيت ايدي وردت اطلع
وقفني ومد ايده يصافحني نزلت نظراتي لكفه مستغربه
هز راسه بـ معنى صافحيني
صافحته ابتسم بخفه وسوه حركته المعتاده
مسح على شواربه ولحيته
حچه وعرف عن نفسه ، وأسمه ، وشغله
" وياچ الكابتن ذو الفقار الملقب بالأدعج "
للـحكـايـة بـقـية
وانعرفت مهنه الأدعج الحيرتكم
هالمره بطلنا كابتن طائرة داده 🙈
رأيكم ؟ توقعاتكم ؟
أستودعكم ألي عينه ما تنام 💕
-أستغفر الله.
-سُبحان الله.
-الحمدُ لله.
-لا إله إلا الله.
-الله أكبر.
-سُبحان الله و بحمده.
-سُبحان الله العظيم.
-أستغفر الله و أتوبُ إليهِ.
-لا حول و لا قوة إلا بالله.
-اللهُم صلِ على مُحمد وآل مُحمد.
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━