الأدعج "قاع الظلام "
بقلمـَي زهراء الساعدي
لطفًا فراشاتي دوسن على النجمة وعلقن بين الفقرات
حساب الانستا
zahralsadi
قناة التلي
zahralsadi
حزينه عيونچ شتعودلچ بغداد ؟
" وياچ الكابتن ذو الفقار الملقب بالأدعج "
سكتت دقائق بعدها رديت
- أهلًا وسهلًا
- الأدعج : بيـچ
نزلت نظراتي لكف أيدي البعده حاضنه
سحبته مسح على حواجبه واندار لـ أدم
- أدم : ماتاخذنا لوجه الله سويها
- الأدعج : وين ؟
- أدم : فرنا بالطيارة واذا تذبنا على ايطاليا بعد أحسن
- الأدعج : اي مو هيَ طيارة الخلفني
- أدم : سايق چيس حب
- الأدعج : هو انتَ جواز ماعندك
- أدم : مو عشتو انتَ واسطه دسويلي واحد اريد اهج
- الأدعج : هج عن طريق السفينة الطيارة
مابيها هج
- أدم : اذا ما انجح
- الأدعج : شتنجح صالك خمس سنوات بالسادس
نمت نومه اهل الكهف بي
- أدم : فد تكسر واهسي
- الأدعج : الله على الأساس مشرمها ابو الوصخ
ضحكت وگلت بلهفة
- احچيلي عن عالم الطيارة احسه حلو
باوع بعيوني ورد
- الأدعج : يخبل
- شلون تگدر تسوق ؟
- غير درست وتعلمت شنو شلون
- واو على يوم اخذني وياك وصعدني بصفك وخليني اسوق
- اي مو هيَ لعب اطفال راح تخبلوني انتِ وهذا
- أدم : دعوفي انتظريني اطلع من السادس وانه اخذچ
هذا اتكبر علينا هو انتَ من يوم الطلعت من العراق
تغيرت علينا
فتحت حلگي بتعجب ورديت
- انت مو عراقي
- اي صومالي
- لعدد شلون تحچي عراقي
- طفرة فريدة من نوعها
- أدم : يچذب عليچ
التفت أله ورديت
- ها
- أدم : هندي بس عود غامض ومايحچي
تقدم بصق على أصبعه وخلا ابين حواجب الأدعج
- أدم : هندي خط وفسفورة
صاح بصوت منزعج
- الأدعج : طايح الحض شسويت!!!
دفع أيده وتقدم يغسل
- أدم : ها لعبت روحك ابو الوصخ
- الأدعج : ماتكبر انتَ ماتكبر
- أدم : وثول فوگ ما جاي اطمطم چذبتك
- الأدعج : انعل شيطانك
- أدم : هاك هذا ماي سيد دير بالك لاتعصب
اوي حبيبي
- الأدعج : اذا ماربيك من جديد ما اتسمى ذو الفقار
- أدم : اي اسمك الأدعج
- الأدعج : اي هذا لقب يل ملگلگ
- يبو شگد تتعاركون
- أدم : من وراچ اشتعلت صفحتچ طلعتي صدگ كوبرا
رديت باستغراب
- ومنين تعرف لقبي ؟
- أدم : خاب انتِ والله فطيرة
لچ حتى اليوم ألي انولدتي بي عرفنا
نقلت نظراتي لـ ذو الفقار مصدومة
وهو انصدم أكثر مني على چفصه ادم
رجع غسل جبينه للمرة الخامسة من خلص رفع البطل شمره علي
- الأدعج : يا الله صبرني
- أدم : ولحسنين نسيت
- الأدعج : اكل نعل واطلع بره
بدون لايحچي طلع أدم بقينا اني ويا
زغرت عيوني وباوعتله
- شكو
ضيق عيونه وسوه نفس حركتي
- الأدعج : شكو
- اندري شو كلشي ما افتهمت
سجب نفس وابتسم رجع گعد وهز راسه
بـ معنى تعاي اگعدي گبالي
ماگلت لا مثل الحبابه رحت گعدت گباله
- الأدعج : انه عراقي وأصلي جنوبي بس ساكن بغداد
يعني هذا الملاح كله وتشككين بيه مو عراقي ؟
- شمدريني غير أدم يگول بس اني من زراگك عرفتك عراقي
مسح على شواربه وباقي لحيته ورد
- الأدعج : يقصد دارس مو بالعراق
بقيت اربع سنوات خارج البلد
وحاليًا بين فتره وفتره اروح لهناك
- وين ؟
- الأدعج : لـ عمان
- شتسوي ؟ يبو فهمني بعدني مافاهمه شي
- الأدعج : من صغري أحلم اصير طيار
حتى و انه طفل ما اشتري اي لعبه غير الطيارات
لحد ماكبرت وعرفت بالعراق ماكو قسم طيران
وأقرب دولة بيها قسم أحلامي هي عمان
طلعت من خلصت سادس خلصت دراسة ورجعت بشكل مؤقت
وظليت اشتغل هناك على خطوطهم لحد ما قبل أشهر قليلة
انتقلت للخطوط العراقية .وصرت بين فتره وفتره بوقت اجازتي
اروح هناك اتونس واجي
رديت بدهشة
- اها
- الأدعج : اي هاي السالفة وهسة العرمة روت فضولها وفهمت ؟
رفعت حواجبي ما راضيه
- لتگول عرمة
- الأدعج : چا شگول عرمتي احلى مو ؟؟
گلبت عيوني ورديت بضجر
- لا مو حلوة
- الأدعج : ترضين على وتيني مو ؟
ابتسمت وگلت
- اي هذا يخبل
- منو غيري يصيحلچ وتيني ؟
- محد
- أحسن
- هههه ليش ؟
"انتِ وتين الأدعج لغيره ماتصيرين "
ابتسمت بخفه ودنگت بخجل ضليت اللعب بأصابعي
وره دقائق يله حچيت
- تدري انتَ صرت صديقتي المفضل ؟
رد بـ نبرة لهفتي
- والله صدگ ؟
- اي صدگ
- چا هنيالي
- اي هنيالك لان اول مره اثق بشخص
- و انتِ هم هنيالچ
- على شنو ؟
"اول مرة احب وحده غير امي "
رديت بفهاوه
- ها
- الأدعج : اخ هاي الها شتسوي بيه
- شتسوي ؟
- الأدعج : تشيلني وترگعني بالگاع
ابتسمت ورديت
- انتَ شلون صرت صديقي وظليت تحبني وتحچيلي ؟
- الأدعج : صدگيني حتى انه اسأل نفسي وماكو جواب !
- بس اني وياك هواي نختلف
- بيمن بالشكل !
- ههه شدخل الشكل جاي أقصد الاطباع
- عادي نخليهن يشابهن
- اني طبعي مو حلو انتَ احلى وتعرف الله وتصلي وتصوم
وتحلف وسيد
- طبعچ يخبل واذا على السيَد اصيحلچ علويه ميخالف
- مو هذا قصدي مجاي تفهمني !
غمض عيونة وفتحهن رد بنبرة هادئة
- الأدعج : افهمچ انه محد يفهمچ بگدي
- اذا تفهمني انطيتي جواب
- عليمن
- علينا
- شبينا شو چنه ورد نخبل
- يعني هسه احنا اصدقاء ؟
- اي واذا تردين نطور ماعندي مشكلة
- اذا اضوجك لو ماتريدني گول اروح
- انه ماريدچ !
"غير ميت على شوفه عيونچ "
دنگت خجلانة ومن يومها صار الأدعج صديقي المقرب
الاحچيله كلشي بدون تردد
صار جزء من يومي وهواي افكر بي
وبس يمر طاري ابالي ابتسم وانسى كلشي سيء صارلي
بعدني مدنگه واللعب بأصابعي دخل أدم يركض بخوف
- أدم : جيش الدولة اجانه
انتفض الأدعج وگام من مكانة
- شافوك ؟
- أدم : اي شافوني وجاي ياخذون الولد بالمحلات البصفي
راح يوصلون النا
رجف جسمي وهب الرُعب باطرافي
اخاف من الزعيم صدام وأخاف من جيشه
أسمع شلون يعذبون بالناس ويغتصبون النساء
ومسوين مقابر جماعيه يقتلون بدون لايفكرون وعذابهم محد يتحمله
بدون لا يضيع وقت سحبني
چان اكو باب صغير صاير على صفحه اليمنى
يعني اليدخل للمحل مايشوفه اله يفتر
فتح الباب ودخلني اله ظلمه هندس وصوت صراصير عالي
حضنته بخوف وره دقائق رفع ايده وحاوط اكتافي
شغل ضوه من الجداحة
خلاها على وجهي تقرب لأذني وهمس
- الأدعج : اش لا اطلعين صوت
هزيت راسي ورفعت ايدي لزمت معصم ايده
درت ضوه الجداحة لوجها ركزت بملامحه وابتسمت
- الأدعج : هيچ انه اضحك
سويت نفس حركته تقرب لأذنه وهمست
- خفت وبس عيونك تطمني
بعدت راسي من أذنه وخليته گباله
تغيرت ملامحه گال بهيام
" يصيرلچ وطن يحمنچ "
ابتسمت و وي ابتسامتي ركزت لشعره
صرصرة تمشي علي
فتحت عيوني بصدمة وصرخت بصوت قوي
مد ايده يسد حلگي بعدته وانهزمت
سحبني من خصري انطخ ظهري بصدره
قطع صوتي ونفسي بـ كف ايده گز على اسنانه واردف
- الأدعج : شبيچ !!!
خرمشت معصم ايده ماوخر همس بأذني
- الأدعج : اذا صرختي يجون ياخذونا اثنينا
گال هيچ وبعد ايده كريت نفس وحچيت برجفه
- صـ صـ رر
دارني اله و وجه الضوه الخافت لوجهي
- الأدعج : شني ؟
- صرصر صرصرة فوگ راسك
- الأدعج : على هاي خفتي ؟
مد ايده لشعره ثواني وقدمها گبالي خله ضوه الجداحة عليها
فتح كف ايده طلعت الصرصرة ميته
ظليت مصكوكه بمكاني شمرها ومسح ايده
- الأدعج : شني هسة ذول يجون لو اطلع الهم ؟
يحچي بصوت خافت وعروگه مبينه وعيونك صارت تخوف
واني جامدة بمكاني من ورا الخوف
سحبني وخلاني ابين غراض وجه كلماته بحذر
- الأدعج : ماگدر اعوف أدم وحده انتبهي زين
من اكح بصوت قوي ثلاث مرات
وره شوي اطلعي خوش
صوتي راح مگدرت ارد خله الجداحة بيدي وطلع
بقيت بمكاني خايفه عدلت الكبوس حتى لاتجي حشره
وتدخل لشعري صعدت اللثام لوجهي
اختنگت من التراب عاد هو يهون عليّ
وره شوي سمعت كحته معناها اطلع
وگفت وانتظرت كم دقيقة بعدها طلعت
جمدت بمكاني من شفت سياراتهم گبال المحل والجيش محتل الدربونة
ما انتبهو عليّ چانو ملتهين وي الأدعج و أدم صايرين ملحمه وياهم
صعدوهم للسيارة واحد منهم ضرب أدم بـ عكس الرشاشه
گام الأدعج لزمه من اكتافه وردمه بگصته
ما انسى هذا الموقف ابد
جندي شكبره وشضخمه خلاه يدوخ ويوگع من السيارة
خليت ايدي على حلگي بصدمة
اجو بقية الجنود ضلو يضربون بي وقسم شالو هذا الوگع
اخذهم وراحو ظليت تايها ماعرف شسوي
غراضي وينهن ؟ الدُب وينه
ظليت ادور عليهن ماكو انتبهت للجامه مال السيارة
الچان يصلح بيها مفتوحه ومشوره غراضي بداخلها
ردت افتح لباب طلع مقفول
نزلت اللثام ورفعت نفسي دخلت من الجامه للسيارة ورا
لميت غراضي واتمددت
ماعندي غير حل اذا اطلع ما اسلم أحسن فكرة
انام هنا لحد مايطلع الضوه واروح لماريا
نمت بوضعيه الجنين حضنت اغراضي بقوة
وظليت افكر بماريا
هسة شتسوي ؟ نايمه لو تفكر ؟ خاف أذوها وبسببي
هاي الضربتها ماتت ! معقولة اني صرت مجرمة
نزلت دمعتي على خدي وتكملت وي نفسي
- اني فگر هسة بسببي اخذو الأدعج وأدم
لو مخليه الولد يبقى هنا چان ما لزموهم
ابچي وافكر والوم بنفسي لحد ما سرقني النوم
وغرقت بأحلامي
لكن هالمرة حلمي أختلف صار سوداوي مو وردي
تحملت بنفسي اغرق وكل ماريد اطلع اكو شي يسحبني للداخل
فزيت مرعوبه ورغم قسوة البرد جبيني ينضح عرق
مسحت وجهي والتفت اباوع على امل الگاهم
بس للاسف ما إلهم آثر رفعت غراضي شمرتهن
وبعدها اني طلعت من الجام
عفت المحل واتوجهت لمكان ماري التشتغل بي
عقلي يفكر بالحلم لكن گلت بالنهاية هو حلم وكابوس شراح يصير مثلًا ؟
بس صار واتحقق
"غرقت بعالم مظلم سوداوي أسود من عالمي هذا "
وصلت للمكان شفت ماريا واگفه و وجها اصفر
صحتلها باوعتلي واهتزت بخوف
نزلت اللثام واتقدمتلها مبتسمه
ظلت تهز راسها سريع وترجف
مافهمت حركتها مافهمت تحذيرها ألي ومشيت برجليه
للظلام المنتظرني
مسافه قليلة بيني وبينها انسحبت من وره قبل لا أوصل إلها
شهگت وظل گلبي ينبض بقوة شفت المدام وي حماياتها
أخذوا ماريا وصعدوها سيارة مضلله
واني انسحبت واتخله چيس على وجهي خلاني ماشوف
شي غير الظلام .
ظليت أتصارع ابين اديهم ومثل كل مرة انخذل
من وره جسمي الضعيف المايگدر يقاوم وحوش مثلهم
صعدوني بـ سيارة خلوني ابين رجليهم
گاعده على اركبي وراسي صاير بالأرض مال سيارة
واحد منهم رفع رجليّ خلاهن على ظهري
عضيت شفتي السفليه وظليت ابچي
ظلـم ، اهانه ، قتل ، تعذيب ، حرق
تجارة ، شغل ، ذله ، تعب
كل هذن عشناهن بسببها ، بعد اكو اسوء من هيچ ؟
اتوقفت السيارة نزلني وماعرف وين اني
لحد ما نشمرت وصارت طيحتي على أيدي
شاغت روحي ظليت اصرخ بصوت من ورا الألم
انرفع الچيس مني ماشفت شي گدامي غير الظلام
للحظة اتوقعت اني انعميت
بس طلع توقعي غلط من شفت اكو ضوء خافت بالأرض
جاي من فتحه الباب
واني صافنه للضوه واريد اعرف اني وين !
نضربت راشدي بقوة
لزمت خدي مصدومة منو الضربني ؟
ماجاي المح شخص گدامي
اجاني صوتها الخبيث يتكلم بتحذير
- ملوك : عبالچ الهروب من قاع الظلام سهل ؟
لو ترحين لأخر العالم راح ارجعچ سحل للقاع
گالت هل كلمات وبعدها اختفى صوتها مني
خلتني اتخبل واتسائل واحير وعقلي يتشوش !
تمددت بمكاني وراسي مفتر وحاير بالصار
ظليت افكر بيها اني اعرف عقابها أشد مني
اني انحبس وانضرب واتعذب بس هيَ
تاخذها لجماعتها يمارسون وياها قذارتهم
ماريا ضعيفه الجسم ورقيقة لأبعد الحدود
شلون راح تتحمل قرفهم ؟
قبضت ايدي وظليت اضرب بصدري
- كله من ورأي اني فگر كلهم راح يتأذون بسببي
ماري والأدعج و أدم ما متقصده اسببلهم الأذيه
هواي احبهم بس جاي يتأذون بسببي
بقى عقلي بـ صراعاته وگلبي بهيامه
مرت أيام واني هنا بهاي الغرفة المظلمة
لا اكل ولا شرب وحاجتي جواي والضوه ما شايفته
انفتح الباب صار ضوه خافت غلقت عيوني بألم
حسيت باثار اقدام تتقدم إلي
انرفعت فانيلتي وانسحبت منها مثل البهيمه
من طلعت للممر يله عرفت اني بعدني بالبناية
رفعت راسي شفت اليسحل بيه واحد من حراسها
رفعني ونزلتي من الدرج اخذني لغرفتها شمرتي بالگاع
غمضت عيوني متألمه لكن ماعندي القدرة اتكلم واون واصيح
- ايع شنهاي
فتحت عيني شفت هاي الضاربتها راسها مضمد
عاقده حواجبها لعبانه روحها من منظري
بحركه سريعه هيَ والمدام شالن صوط
واثنينهن تگابلن عليّ يضربن بيه بكل غل ، وحقد ، وكره
انتهيت جواهن لكن صوتي مايطلع دفاعًا لنفسي
ابتعدن مني بعد ما شفن غليلهن بتعذيبي
- ملوك : اشكريها راح تخليچ تطلعين من غرفة الظلام
وراح تعاقبچ بطريقتها
باوعتلها بس لاجاوبت ولا قاومت
طلعن اجتني شكرية تركض
- شكرية : گومي حضرتلچ الحمام
ماگدرت اگوم اني بني ادم وجسمي يتعب
ماعندي قوة خارقه التخليني انضرب منا وارجع اگوم چني صل منا
بقيت مثل الجثه بالگاع أجت شكرية شالتني للحمام
نزعتني ملابسي مثل الطفلة وظلت تسبح بيه
لمحت ماريا واگفه يم الباب بنص تعبي وانتبهت لحالتها
اسوء من حالتي الوجه مصوفر والرگبه كلها اثار
واگفه تباوعلي ودموعها تجري
وين نروح ؟ شنسوي حتى نخلص !
وضعنا صعب
احنا بدائرة مغلقة نفتر ونحاول نطلع منها بس
مانگدر ونرجع منين مابدينا
سحبتني ولبستني
شالتني للغرفة مددتني على الچربايه غمضت عيوني بتعب
هستوني بديت اغفى فزيت بخوف من صوتها
- كل عقلچن اخليچن هنا بهاي الغرفة ؟
غلست مافتح عيني اجت سحبتني من الچربايه طحت بالگاع
رفستني ابطني لزمتها اتلاوة من الوجع
صار صياح منهن ومن ماريا ادافعلي
اجت شكرية رفعتني واردفت
- المدام تگول خلي ينامن بالمخزن
شهگت خايفه بالگوه طلعت الصوت مني وجاوبت
- أخاف بي حشرات
- شكرية : بس الليلة نامن بي باچر انظفه الچن
التفت الهن باوعت واگفات بانتصار بصوتي الهزيل اردفت
- راح اسكت هالمرة مو خوف بس لأن مالي خلگ
راجعتلچن وخاف ذاك اليوم من فلشت راسچ ماصارلچ شيء
هالمرة اطلع دماغچ اتعشى بي
سكتن ولا وحدة جاوبتني
رفعتني شكرية وسندتني فتحت باب السطح
چان اكو مخزن بالزويه أظلم ويخوف
فتحت بابه وشمرتنا بي اني وماريا
ظلام دامس يحيط بالمكان ماگدر المح ايدي من العتمه
گعدت بمكاني بالگاع زحفت للخلف انتچيت على حديدة
رفعت رجليه لصدري خليت راسي عليهن ونمت
گعدنا الصبح اجت شكرية طلعتنا بره وبلشت تنظف
ظلينه نسمع بس طگه نعالها بالأرض كتلت الحشرات هن والفار
طلعت حالها يقهر سابحه بالتراب من فوگ ليجوه
- شكرية : نظفته الچن منا وهيچ هنا استقرن
هزيت رأسي فرحت بالرغم من هلاك المكان
بس المُهم بعد ماشوفهن
- شكرية وين غراضي ؟
- شكرية : ياغراض
- من لزموني چنت لازمه جنطه بيها غراضي
دنگت وحچت
- شكرية : حرگوهن
صفنت ما مستوعبه رديت بصدمة
- شنو
- شكرية : عناد بيچ حرگت كل غراضچ
ولا يهمچ اني راح اجيبلچ ملابس وهل ايام دبري نفسچ
اللبسي من ماريا
هيَ تحچي على الملابس وعبالها انصدمت عليهن
واني بالي يم الدُب بس هو الباقيلي منهم
املي بي ريحتهم احسها معلگه ويا
نزلت دمعتي گعدت بالگاع اشهگ
اجن يواسني واني مثل الصماء ما أسمعهن يحچن
بالي شارد وعقلي مشوش
حرگت أخر امل وأخر شي يربطني بيهم
حرگت روحي مو بس حرگت الدُب
" أيست وانقطع الآمل راحت كل ذيچ الأحلام "
مرت الأيام واحنا بالمخزن
صـح يخوف والباب مالته ما ينقفل ومن تمطر يظل يخر علينه
بس اهون من انام بوسطهن وما مأمنه على روحي
وره اسبوع طلعت للشغل
كالعاده مثلمه وامشي بالدرابين واتعارك وي خيالي
مريت من عربانة عمو ابو فواطم مالگيته مفتح
عبالي اليوم متأخر لو ماطالع للشغل بدون لا اسأل مشيت
اخذتني رجليه يم باب المحل نزلت اللثام ودخلت
بس شافني گام مبتسم
- أدم : هلا بالكوبرا وين چنتي ؟
- محبوسه
- أدم : شني ؟؟
ملت راسي سحبت نفس عدلت سير انفاسي ورديت
- الأدعج وين ؟
- أدم : عوفچ منه انتِ وين چنتي محبوسه ؟
رديت بحده
- ذو الفقار وين !!
- أدم : مسافر برحلة
- شيسوي ؟ مو وعدني ياخذ حقي منهم
مو خلاني احس يمه بالأمان ليش راح وعافني
صالي ايام محبوسه شبعت كتل و وصلت الموت
وهو ماكو حتى ما سأل عليّ !
- أدم : من اخذتنا الدولة ثاني يوم طلعنا
هو راح برحلة غير شغله و واجب علي يروح !
شهگت واتكلمت بنبرة قوية
- مايهمني شغله مو شغله خوش
التفت صعدت اللثام لوجهي ومشيت
يم لباب بدون لا التفت اله ويشوفني نزلت دموعي حچيت واني اشهگ
"بس يجي الأدعج گله وتينك عذبوها "
- أدم : صار بس گليلي انه هم اخوچ
محتاجه شي
- سلامتك ، ولاتنسى تگله
" وتينك تكرهك "
گلت هيچ وطلعت اركض
تغورگت عيوني بالدموع وظليت ابچي
من نضربت ونحبست مابچيت هيچ
وهسة لان مالگيته وسأل عليّ بچيت !
كملت شغلي ورجعت للبناية انطيتها فلوس
وصعدت للمخزن بدون اكل وبـ ملابسي نمت
وهيچ مشن يومين وباليوم الثالث
گاعده على المسطبه الگبال البناية انتظر المدام تجي
اني ولبنات الچانن طالعات يتشغلن
مايصير ندخل لان هيَ طالعه لازم تجي توگف يم الباب
نسلمها الفلوس يله تسمح النا بالدخول
ماريا گاعده گبالي واثنينا مانحچي من تعبنا
نريد بس نسلمها الفلوس وندخل انام
التفت وانصدمت بالشفته !
المدام مكسره اديها الثنين ومجبرينها
و وجها مزورگ والحراس ساندينها تمشي
وگفنا كلنا نباوعلها . تقربت من يمنا صارت هوسه
طلعن البنات الجوه والبرى ضلن يحچن وياها
بوسط الهوسه انسحبت من قمصلتي
التفت شفتها بنيه صغيرة .
عقد حاجبي ما فاهمه رفعت ايدها ولوحت
بـ معنى انزلي لمستواي
جرني الفضول وسويت التريده
تقربت يم إذني وهمست بكلمات خلتني ارجف وابتسم
" يگول الأدعج تنكسر أيده ألي يمدها على وتيني "
باوعت لوجها بصدمة باست خدي واردفت
وهاي البوسه منه يگول
" اداوي جروحچ ابوسه من عندي عرمتي"
نزلت دمعتي بفرح مسحتها ورديت
- وينه هو ؟
التفت واني وياها شفته وردتلي الروح
واگف بطوله وهيبته لابس دشداشة سوده ولاف الغتره على راسه
وهالمرة مغطي بيها وجها وبس عيونه مبينه
گمت انطيت الفلوس الماريا وحجيت بسرعه
- انطيها الها وگليلها الكوبرا طلعت المبلغ
واذا سألتچ وينها گليلها صعدت نامت تعبانه
ماخليتها تجاوب عفتها وركضت اله
بوسط أكثر منطقه اخاف منها حسيت بالأمان واني بحضنه
بدون وعي ولا تفكير حضنته وبچيت اشتكيله
ماحاوطني ولا احتضني بعدني حسيت بغلطي
مسحت وجهي ودنگت ، اتحمحم وگال
- گالولي كارهتك
- اي
" چا خل اموت شلي بالدنيا والعرمة تكرهني "
- انتَ السويت بيها هيچ ؟
اي انه وهاي البداية
"وحگ الگطعو چفوفه غدر راح افرهم فر واسطرهم سطر "
- خاف يأذونك
- الأدعج : لاتخافين ما اتأذه دام علي وياي
ابتسمت وهزيت راسي
مد كف ايده واردف
- امشينا نروح بعيد عنهم
- وين ؟
- خلي ايدچ بأيدي ولا تسألين
خليت ايدي بأيده واخذني ويا
صعدنا بالسيارة مشه بيها سريع لزمت گلبي خايفه
وخر الغتره من وجها وعافها على راسه وابتسم
- الأدعج : انه يمچ لاتخافين من شي
هزيت راسي بالقبول كمل هو
- الأدعج : وتيني خاف تگولين ليش ما اطلعچ منا ؟
انه جاي اخطط الها وراح اطلعچ بأقرب وقت
بس خلي اتأكد من البالي
قاطعته ورديت
- ماريد تطلعني اريد اعرف اهلي واطلع يمهم
- الأدعج : اخذيها من هل شارب راح الگاهم الچ
ابتسمت وهزيت راسي
صادف واحد يبيع ورد مر من صفحته وقفه واشتره منه
قدملي الورده واردف
- الأدعج : الورد للورد
اخذتها منه وقربتها لأنفي اشم عطرها
باوعلي وعيونة تلمع
- الأدعج : هسة وين الورد بالضبط ؟
بعدتها ورديت بحديه
- هسه اني اشبه هاي الورده هيچ اني حلوة ؟
- الأدعج : واحلى منها
رفعت اصابعي لشفتي ورديت
- بس اني مشوها وهيَ صافيه
- الأدعج : انتِ مميزه لدرجه ماتشبهين اي وردة بالدنيا
- شكلي مايلعب الروح ؟
- الأدعج : تحچين صدگ انتِ !
ضاج من حچايتي خفت منه لان صيح نزلت راسي بدون ما اجاوبه
مد كف ايده لذقني رفع راسي واردف
" انتِ احلى بنية شافتها عيني عملة نادره وتيني "
ابتسمت ورديت
- شكرًا
- الأدعج : هايَ الحقيقة لاتخلين ثقتچ بنفسج ضعيفه
واذا تفكرين بشفتچ هذا مو ذنبچ
تلمستها ورديت
- لا أصلًا بلشت احبها
رفع طرف شفته ورد
- الأدعج : بلشتي ؟
" انه ميت بيها من أول ماطاحت عيوني عليها "
التفت متوتره خافيه ابتسامتي من كلمته
اتحمحم وكمل
- الأدعج : تدرين الصدف عظيمه ؟
- شلون يعني
- الأدعج : مثل صدفة لقاءنا يعني
اني وين چنت وانتِ وين ؟
شفتي بذاك اليوم الصدفة شلون خلتنا ننجمع
وشلون خلتنا اصدقاء واحنا كلمن بصوب
- اي وهواي نختلف عن بعض
- الأدعج : تقالدينا ، حياتنا ، اطباعنا تختلف
لكن ارواحنا تتشابه
- بس انتَ احسن منـ .
بعدني ما مكملة خله اصبعه السباب على شفتي ورد
- الأدعج : اش لا انه ولا اي واحد احسن منچ
انتِ قويه ومحاربه وكلش زينه تصرفاتچ
واخلاقچ وانتِ ماعندچ الينصحچ
رفعت ايدي بعدت ايده
رجعت راسي ليوره ورديت
- ذاك اليوم من غلطت على أدم گتلك ماحترم احد
وگتلي هاي زينيه ؟ لليوم ترن بأذني
وحسيت نفسي اني غلط
- الأدعج : مادام فكرتي بيها ورنت بأذنچ انتِ راح تتغيرين
- طبعي ؟ ماحسه يتغير ابد
- الأدعج : ماكو شي مايتغير وافضل تغير
من نغير لصالح نفسنا
من گتلچ مايصير وحاچيتچ هاي لصالحچ
انه ادري محد علمچ شنو الغلط وشنو الصح
بس عدم احترام المقابل غلط
- واذا هو اجاوز ؟
- الأدعج : لازم نفرق بين الشقه والصدگ
اذا شقه نمشيها اله وبعدين نخلي حدود
واذا صدگ نرد علي لكن رد جميل يعكس اخلاقنا
- ماحب شخص يقلل مني ويتجاوز حتى لو بالشقه
- الأدعج : اذا انتِ ماتحبين شلون تغلطين على الناس ؟
صفنت وماجاوبته
- الأدعج : خلي علاقتچ وي الكل رسميه وارسميلها حدود
وگليلهم انه ماحب الشقه لاتشاقون وياي
اكيد راح يحترمون طبعچ وبعد مايكررونها
- ماگدر اسكت اذا نغلط عليّ
- الأدعج : منو الگلچ اسكتِ انه جاي اگلچ
اكو مرات لازم نعامل باخلاقنا
ونبين المقابل شگد هو ما عنده اخلاق ورخيص
ونخلي يخجل من نفسه
لكن اكو حالات نادرة تحتاج غلط وضرب يله تسكت
- اي اني هيچ اقصد
- الأدعج : وانه اگلچ ارسمي حدود
واعرفي المقابل شنو نيته بعدها تصرفي
عوفي التسرع واللسان الطويل على صفحه
ابتسمت ورديت
- خوش
- الأدعج : يعني تسمعين كلامي ؟
گلبت عيوني عرفته يقصد ذاك اليوم
من گتله انتَ منو حتى اسمع كلامك
ضحك وكمل
- الأدعج : اسمعي كلامي اذا يفيدچ خوش
- خوش
- الأدعج : حلو من نغير نفسنا للأحسن مو ؟
- يمكن اي
- الأدعج : يا يابه من العرامة ما تتنازل وتگول اي
- مو بعدني ما مجربه التغير
- الأدعج : ان شاءالله تجربينا
- لازم اروح
ماجاوبني مشه مسافه وطبگ يم عربانة مشويات
نزل فتحلي الباب واردف
- الأدعج : انزلي عيني عرمتي
- يبو
ضحك ومد كف ايده نزلني بقى حاضنه
مشينا للمسبطه تصير بصف العربانة
گالي اگعدي وراح اشتره لفات واجاني
گعد گبالي قدملي لفه وياها لبن
- الأدعج : اذا مو اطيب لفه تاكلينها ما اتسمى الأدعج
- صدگ انتَ ليش يسمونك الأدعج ؟
- الأدعج : لقب من انه صغير بسبب عيوني الدعج
امي ظلت تصيحلي الأدعج ومشه هذا اللقب عليَّ
- يعني العيون الهن أسم ؟
قضم اللفه وهز راسه بـ معنى اي
- واو هسة اني عيوني شسمهن ؟
تقرب مني قلص عيونه ابتسم ورد
- الأدعج : عيون الريم
- شنو هذن
- الأدعج : هذن العيون الكبار ألي يعتن الگلب عت
هن ذن عيونچ
دنگت خجلانة ضليت اكل واشرب لبن
خلصت رفعت راسي شفته ضحك
ما افتهمت عليمن لحد ما طلع اكنيلس من جيبه مسح شفتي
- الأدعج : اللبن لزگ بشواربچ
خليت ايدي عليهن بخجل
- الأدعج : اثخن من شوارب أدم
ماخله ثوم ما مسحه على شواربه وما نبتن مثلچ
عقدت حواجبي خزرته وگمت يم السيارة
راح حاسب الولد واجه فتحلي الباب
صعدت ملت راسي للجام . عود زعلانه والحچي ابيناتنا خجلانة
- الأدعج : هههههه زعلتي ؟
مارديت علي مد كف ايده دغاني وكمل
- الأدعج : وداعه شواربچ الخضر اشاقه
- يا
- الأدعج : مو اگلچ انتِ عملة نادرة حتى شواربچ مو سود خضر
التفت أله ورديت
- صدگ عود ؟
مسح على شواربه ولحيته
ظلت بس اكتافه تهتز من الضحك
واني اتلمس بشواربي واباوعلهن من المرايه
وطلعن صدگ ثخان وخضر
خلص الطريق يداهر بيه واني متت اريد بس اوصل لشكرية تحفهن
نزلت من السيارة بعيد عن البناية
سديت الباب جاي امشي وقفني
- الأدعج : محتاجچ بشي
- گول
- الأدعج : ابوي باچر عنده گعده عشائرية وراح يحتاجچ
عقدت حاجبي مستغربه جديته بالكلام ماخلتني استوعب
مداهرته تقربت رفعت اديه للجامه ورديت
- شيسوي بيه ؟
- الأدعج : يحلف بشواربچ
برجلي ضربت تاير السيارة وعطت
- الازرگ
- الأدعج : انه ازرگ
- اي وعيونك تخوف روح منا لا افضحك
- الأدعج : خاب العرمة لا انزلچ
عيبت عليّ صعدت اللثام لوجهي ومشيت عبالي راح بسيارته
وصلت يم البناية گمزت من شفته يمشي وراي
والشماغ راجع لافه لوجها وگفت قريبه يمه
اباوع للبناية واحچي
- مارحت
- شلون اروح واعوفچ تمشين وحدچ ؟
- شكرًا لأن جاي تحميني
- لاتشكريني بويه هذا واجبي وغصبًا عني هم
" انه الجندي المخفي الراح اظل احميچ "
ابتسمت ودخلت
لأول مرة احس بشعور السعادة
شخص يمي يخاف عليّ يحميني يهتم بيه
هاي كلها چانت بالاحلام كل يوم قبل لا انام احلم بيها
وارسمها بدفرتي شلون صارت حقيقية ؟
شخص غريب وبليلة ويوم
احتل خلايا الروح وصار جزء منها
دورت على شكرية راجعه لبيتها
گلت الصبح قبل لا اطلع للشغل اخليها تحفني
صعدت الدرج والابتسامه شارگه حلگي
اول مرة احب الدنيا واشوفها بغير لون الاسود
اول مرة احب روحي وشكلي وشفتي المشوها
واول مرة اتحمس اشتغل واخلص هاي ايامي حتى
يجي اليوم اليوفيلي بوعده ويلگه اهلي
فتحت الباب دخلت من ضوه السطح
شفت ماريا نايمي وجسمها مثل السعفة يرجف
ركضتلها سحبت البطانيه منها شفتها صايره زرگه
صرخت بصوت ردت عليّ وهيَ منتهيه وعبالك تجر أخر انفاسها
- ماريا : اريد شمشون وبطنج هم خلي ياخذوني
باوعتلها خايفه ردت اخذها لكن هيَ مصره اله هم ياخذونا
رجعت لبست اللثام وسويت الطريق دقيقتين
وصلت الهم فهمتهم تخبلو اجو وياي يركضون
همزين البناية فارغه والحارس مستغل تكسير المدام ونايم
ركضت نزلتها تلگوني هم شالوها
ومدري منين مدبرين تكسي اخذتنا للمستشفى
دخلنا للطوارئ خلولها اوكسجين وظلو يسولفون بيناتهم
- يرادلها تخطيط للقلب وتحاليل عامه
هزينا راسنا واخذنها اول شي للتحاليل
بالگوه لگو وريد وسحبو دم منها
ورجعنا سوينالها تخطيط وگعدنا ننتظر
لحد ما طلع التحليل أول شي اجت الدكتورة
وگفت گدامنا واردفت
- منو البيكم سوت التحليل ؟
گمت الها ورديت
- اختي
عقدت حاجبها وردت
- هاي الگاعده ؟
- اي طلع تحليلها !
هزت راسها وگالت كلمتين شلت كل جزء بجسمي
- اختچ حامل .
للـحكـايـة بـقـية
رأيكم ؟ توقعاتكم ؟
أستودعكم ألي عينه ما تنام 💕
-أستغفر الله.
-سُبحان الله.
-الحمدُ لله.
-لا إله إلا الله.
-الله أكبر.
-سُبحان الله و بحمده.
-سُبحان الله العظيم.
-أستغفر الله و أتوبُ إليهِ.
-لا حول و لا قوة إلا بالله.
-اللهُم صلِ على مُحمد وآل مُحمد.
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━