6 - الفصل 6: الـقـا؏ الـخـامـس

الأدعج "قاع الظلام "

بقلمـَي زهرة الساعدي

لطفًا فراشاتي دوسن على النجمة وعلقن بين الفقرات

حساب الانستا

zahralsadi

قناة التلي

zahralsadi

يوصلنه السره ويتأجل الموت

يم ارگابنه وتعمى السچاچين

هزت راسها وگالت كلمتين شلت كل جزء بجسمي

- اختچ حامل .

ضحكت باستهزاء ما مصدگه ظليت اباوعلهم واحد واحد

كملت هيَّ ترزل بينا

- يعني البنيه صغيره وتعبانه شلون تخلونها تحبل ؟

سحبت ورقه اللتحليل منها ورديت

- مو حامل خاف اكو غلط ؟

- لا امي ماكو اي غلط والبنت حامل

التفت لـ ماريا وللولد اوجوهم صفره والدم يابس بعروگهم

ظليت جامدة بمكاني لا اخذ ولا انطي

صارت ترجف بقوة تقدمت لزمت كفوف اديها واردفت

- منين وشلون فهميني راح اتخبل

بعدت كفوف اديها مني ولطمت على وجها

- ماريا : شنو منين صالها أشهر تاخذني سحل لجماعتها

أطلع المبلغ ما اطلعه هيَ تاخذني وغصبًا عني

- واني ماريا اني وين چنت !!!

مسحت ادموعها وردت

- ماريا : ماگدر اگلچ كافي عليچ عذابچ

صاح بصوت قوي خله الناس كلها تباوع

- شمشون : احسن حبلتي ومانعرف منين هلكتي نفسچ دمرتيها

ظلت تبچي بصوت وگفت حضنت راسها على صدري

و بطنج لزم شمشون طلعه بره

ضاعت الأحرف وعجزت الكمات وانشل اللسان بهل لحظة

اريد اواسيها ماگدر خلصتها بس ابچي وابوس راسها

طلع التخطيط صحت على شمشون وبطنج يرحون يجيبونه

گامت هيَ رادت تمشي وراهم داخت رادت تطيح سندتها

- هم يجيبونه تعاي اگعدي

- ماريا : لا اريد اشوف شبيه ليش جاي اختنگ

خفت لا يطلع بيها شي وتسمع منعتها لكن اصرارها أقوى

وگفت يم باب الغرفة واني وراها وشمشون وبطنج يم الدكتور

باوعت لعيونهم حمره دم عبالي من ورا خبر حملها

بس طلع الموضوع اكبر رجفت بخوف من سمعت لدكتور يگول

- لازم عمليه وبسرعه

- شمشون : بس هيَ حامل دكتور

- شلون تخلونها تحبل وهيَ مريضه بالقلب !!

شهگت وضربت صدري ضربتين على الراس توجع

وگعت من طولها

گعدت وراها وحضنتها ابتسمت وهيَ تبچي

- ماريا : يعني راح اموت ؟ اروح يم اهلي

بستها من كتفها رديت ببكاء

- وتعوفيني ؟ تعوفين اختچ وحدها بهاي الدنيا التخوف

غطت وجها ظلت تبچي بصوت

واني غطيت وجهي بكتفها وبچيت بحرگه

حسيت الدنيه ظلمت بعيني گمت ماشوف شي

الخبر مثل الخنجر وضرب گلبي

اجو علينا گومونا وطلعنا بره راح بطنج اشتره علاج الكتبه الها

وشمشون واگف يدخن وايده ترجف

واحنا گاعدين على المسطبة وحده حاضنه الثانيه

- ماريا : شنو هسة

صاح عليها

- شمشون : هذا كله من وره سكوتچ وخوفچ

ليش ماحچيتي ليش ماگلتي راح اتسودن

گامت گباله مسحت وجهها واردفت

- ماريا : اعترف اني مو قويه مثل وتين بس قاومت

كل يوم اختنگ من گلبي واتخربط وماطلع المبلغ

وارجع اتوسل بيها ابوس رجليها تدفرني وتسلحني يمهم

يشبعون بيه واحد ورا الثاني انواع الاغتصاب نفس الساعات

بينت عروگه من العصبيه صاح بقوة

- شمشون : كافي

وگفت خايفه اجه بطنج اتوقف بمكانه يشاهد وهيَ كملت

- ماريا : على شنو كافي ؟ خليني اكمل

بعد ما انتهي واتزورگ من اغتصابهم وجلدهم

ارجع للبناية ساعتين وتطلعني للشغل حتى ماطلع المبلغ وتعاقبني

اروح انام على الرصيف روح اسأل الناس عني كلهم شافوني

شلون نايمه بنص الشارع على الرصيف بتعب وهيَ تعرف

وفرحانه على تعبي ليش !! حتى ارجع وتاخذني لجماعتها

عجبتهم او لا عجبهم جسمي وسكوتي

تعرفون ليش ماحچي !! لان مرة حچيت واخذتني

لوحده موتتني تموت واغتصبتني اي بنيه اغتصبتني

وتدرون مرة من خوفي لا اتعاقب بگت ؟ اي بگت من واحد فلوس

وانطيتهن الها لان تعبت من عقاباتها واغتصابهم

وهسة أنتم تجون تگلولي ليش سكتي !!

اذا احچي شراح يتغير ؟ راح تسامحني راح تخاف لا

راح تعاقب وتين وياي وانتم تمحيكم

وكل ما احاول اشرد انلزم اني مو بس منها مراقبه

حتى جماعتها يراقبوني ماكو مهرب منهم

انفجرت ماريا وحچت كل البداخلها الضامته علينا

جمدت بمكاني مصكوكه واطعن روحي الف طعنه

ليش ماچنت احس بيها ؟ ليش ما اعرف الي يصير من وراي

عضيت اصبعي بقوة وحچيت

- من ورا النوم اجي چني ميته گبل انام

النوم هواي اخذ من حياتي اول ما ادخل للبناية اكل

وراها اذب روحي چني ميته والليل كله ما افز

اله ثاني يوم من اسمع رنة الجرس

ويلموني من اگلهم كلشي ماعرف بهاي الدنيا

اني عايشه بس ابيع واطلع المبلغ وارجع انام

صرت وراها حضنتها وصرخت وهيَ صامده بدون بچي

تقدم شمشون سحبها مني لصدره

حضن راسها بقوة على گلبه واثنينهم بچو بصوت

درت وجهي عضيت باطن ايدي وبچيت

ما نستاهل الجاي نعيشه وعشنا

مانستاهل ايام مو حلوة

شباب مثلنا بعمُر الورود يحبون الحياة

وجاي ينزاعون حتى يبقون بيها مانستاهل هذا التعب

مو ذنبا الصار مو ذنبنا جاي نتعذب

ذنب الذبونه وما سئلوا علينا

قاطع نوبة بكائنا بطنج

- بطنج : عوزكم بس وحده تنعي

مسحت وجهي ودرته الهم

- بطنج : خاب الخايس عود الدكتور وصاك البنيه ممنوع عليها القهر

ابتعدت ماريا من حضنه مسحت وجها واردفت

- ماريا : احنا اهل التعب الفرح ممنوع عدنا مو القهر

- شمشون : لازم نروح منا

كلنا باوعنا عليّ منتظرينا يشرح

- شمشون : لازم أخذ ماريا واشرد

ردينا بصوت واحد

- شنو ؟؟؟

- شمشون : تعالوا وراي

مشينا ورا صرنا قريب من منطقتنا

وگفنا گباله منتظرينا يحچي جر نفس وكمل

- شمشون : كلمن تدرون وماريا تدري

اني احبها واموت عليها

ابتسمنا اثنينه وماريا دنگت

- شمشون : لهنا وكافي اني چنت منتظر تفرج

بس اضاهر ماكو افراج

لازم احنا نخليها تفرج اني قررت اخذها واهاجر

رجعنا حچينا ثلاثتنا

- وين ؟؟

- شمشون : لأي دوله نحس بيها بلأمان

هناك نسقط الطفل واسويلها عملية

هناك نبني حياة سعيده خاليه من ظلمهم

ونزوج ونشتغل ونحقق كلشي مخططينا

- بس شلون تاخذها ماتدرين بيهم مراقبينه ؟

- شمشون : مايهموني ولا بعد احسب إلهم احساب

- بطنج : ايا سرسريه طلعتوا مخططين

- شوكت ترحون ؟

- شمشون : هسة

فتحت عيوني على وسعهم من الصدمة

وماريا عارضت

- ماريا : هسة شلون اني ماگدر تعبانه رجليه جاي ترجف

و وتين ماعوفها وحدها

- شمشون : عادي ناخذها

رفعت اديه ورديت

- مستحيل اني هنا عندي شغل هواي

- بطنج : ولاتگعد راحه ام الاعمال ولا تستقر

فلك الفلكچ يشكرية

- شدخل طاري شكرية هسة

- بطنج : هاي عاملة بنايتنا تغار من شكرية

كل ماحچت وصاحت فلك الفلكچ يشكرية

- يا

- بطنج : اي شنسوي هاي الدنيا

هسة شنو منو يسافر منو يظل شو طلعت عينكم سرسريه

- شمشون : مو وقت الشقه ولا وقت الضحك

لازم نقرر

سكتنه كلنه بحزن مانريد نفترق بس مجبورين

كلمن يروح بطريق جريت نفس واردفت

- شمشون اخذ ماريا واتوكل

- ماريا : وانتِ ؟

- ابقى هنا عندي شغل

- بطنج : بس لو اعرف شنو الشغل العندچ

هسه يطلع چيس اكنيلس مابايعته

- انچب

- بطنج : مو ارفس بطنچ وامرد طحالچ

- اذا انتَ رجال تعال سويها

- اني رجال ما امد ايدي على مرة

- اعتبرني رجال و واجهني

صاح بينا

- شمشون : مو وكت عركم ابد !!

حسينا بغلطنه اثنينا سكتنا بس نظراتنا تحچي

وهو يعيب عليّ ويسويلي حركات

رفعت ايدي ردت اغمه صارت الغمه بوجه شمشون

- بطنج : ها شفت شلون تعيل همزين الغمه طاحت بيك

- شمشون : أنتم صدگ تحچون ؟

- بطنج : مشاقي وياك قبل ؟

جر نفس وزفره بنفاذ صبر

- شمشون : شبيكم ترى محتاج مساعدتكم

صرنا جدين تقربنا منه حچه بطنج

- بطنج : والباشا اذا عرف بيك رايح

- شمشون : طز بي

- الباشا صديق المدام واثنينهم مراقبينكم

يعني راح يلگونكم لو تحت الأرض

- شمشون : مايگدرون لان يوصل خبر للزعيم

وماظن يخلونه يعرف بـ خياسهم

- ليش ؟

- شمشون : مايقبل عليهم وراح يعاقبهم

ما يتجرأون ويگولون اله ماگدرنا نسيطرعليهم

- ديله هم كلهم نفس الظلم

- بطنج : دسكتي يمعوده جماعته بكل مكان لا يسمعونا

- اي اني عوزي بعد بس سجن

- بطنج : شايفه هذا العذاب الشفتي ؟

ولاشي يم عذاب السجن مال الزعيم

جمعاته ماعدهم گلب مجرمين وخاصةً سجن ابو غريب

قشعر جسمي حركت راسي وغمضت عيوني

- هسة شلون تهاجرون ؟

- ماريا : وانتِ ؟ ترحين وياي

تقدمت حضنت وجهها بكفوف أديه

- اني لازم ابقى هنا وانتِ تعرفين ليش مو ؟

هزت راسها بمعنى اي بستها من خدها وكملت

- روحي انتِ وشمشون وهناك استقروا

واني من أخلص شغلي اجي وراكم أنتم تسحبوني يمكم

شهگت وحچت

- ماريا : اني اشتاقلج

- واني اشتاقلچ بس لازم نفترق بس فتره واجي يمچ وعد

ماريا احنا مو نحب الحياة ؟ مو نريد نحقق احلامنا

اجه الوقت إلي انفذ بي النتمنى وانتِ اول بطلة بينا راح تطلع من هذا القاع

روحي ياروح اختچ وسندها وضوه عيونها

اطلعي منا وعيشي الحياة الچنا نسولف بيها ونتمناها

لاتخلين اي شيء يوگف بطريقچ خلي ايدچ بـ أيد شمشون وسافري

تبچي وتحچي بحرگه

- ماريا : تجين وراي اوعديني ؟

بعد ماگدرت اقاوم بچيت وگلت

- وعـد اجيچ حتى لو متت اني جايتچ بحلمي

حضنتني وظلت تبچي واني اشهگ

صعب عليّ فرگاها بس ماگدر اعوفها تبقى

بس المدام تعرف بيها حامل تاخذها الهم وبعد مانشوفها

وهاي اذا ما ماتت من وره گلبها وعذابهم

اتفقنا من نطلع للشغل يجي شمشمون ياخـذ ماريا ويروح

رجعنا للبناية صعدنا للمخزن ظلينه گاعدين والهدوء يحيط بالمكان

اثنينا نبچي بسكته ومحد تراوي دمعتها للثانيه

حچيت بغصه

- خل نطلع للسطح

- ماريا : شنسوي ؟

- هنا ظلمة اريد اشبع من وجهچ شوف

سمعت حركتها وگفت وطلعنا سوه

گعدنا بالسطح وحده گبال الثانيه على ضوه القمر

بدون كلام فقط وحدة تنظر للثانيه

وچنها عيونة تدري هاي أخر گعده النا سوه

طلع الضوه واحنا بنفس مكانه وعلى حركتنه

جريت نفس و گمت صرت گبالها مديت أيدي الها واردفت

- يله صار وقت طلعتنا

خلت ايدها بـ أيدي وگامت حضنتني

- ماريا : راح ابقى احبچ للموت

- لاتجيبين طاري الموت على اللسانچ

- ماريا : انتِ وعدتيني راح نشاوف بعد

ابتسمت ورديت

- وحگ الگطعو چفوفه غـدر راح ارجع اشوفچ

استغربت من حلفتي هزت راسها ما مفتهمه

رفعت راسي زفرت بحيرة واردفت

- اويلي منك يل ازرگ

- ماريا : منو هذا ؟

سحبتها للمخزن وسولفتلها مقتطفات عليّ

- ماريا : يعني هسة انتِ راح تبقين علموده ؟

- لا

- كلش واضح

- مو علمودة علمود اهلي بس اريد اعرفهم

- صحيح

- شبيچ ماري ؟

- وداعتچ مابيه بس اضاهر انتِ واگعه

- ما اوگع اني

هز راسها وجرت نفس

حسيتها اختنگت نزلنا جوه لكينه شكرية تسوي ريوگ

وكتلها وشربتها علاجها رجعنا فوگ

رن الجرس واحنا نمشي بالممر بدن البنات يطلعن

دخلت المخزن فتحت الباب وبديت الم ملابسها

اردفت وهيَ تبدل

- ماريا : ماراح اخذ وياي شي

- ليـش ؟

- ماريا : حتى الملابس اكرهن لان بيها ذكرى منها

هزيت راسي وشمرتهن هن مو هواي ثلاث بجايم وتشيرتات

لبسنا وطلعنه على أساس للشغل على الشارع شفنا بطنج وشمشون

محضرين نفسهم وشمشون شايل جنطه

تقربنا يمهم بس عينه للشارع عبالك مانعرف بعض

تكلم بدون لا يحسس المقابيلنا هو يعرفنا

- شمشون : يله نروح

- ماريا : وين راح نروح

- شمشون : لگيت واحد يهربنا بس لازم الگه سيارة

تعبرنا للشمال ومناك يستلمنه

- ماريا : مالگيت واحد يعبرنه للشمال ؟

- شمشمون : مو تدرين احنا مراقبين ؟ لازم واحد لوتي ويعرفلها

جاوبت بدون لا افكر

- الأدعج

- شمشمون : منو هذا

- هو يگدر يساعدكم

- شمشون : تندلين مكانه ؟

- اي

- شمشمون : امشي ونمشي وراچ

لزمت كف ماريا ومشيت للمحل

وصلنا أله لگينا معزل گعدنا ننتظر

إعلان

- بطنج : طلعتي مو هينه الكوبرا انوب تعرفلها واحد طيار

- خليني أغير شوي من ذاك القاع واتعرف على ناس جدد

- بطنج : ايبا ولا عرفتچ

- دعوفني بحالي

- بطنج : عايفچ عيني وبعد ماتشوفيني أصلًا

ثنيت شفتي بزعل ورديت

- بس أنتم چنتو اصدقائي وهسة راح ترحون

- شمشون : راح نرجع نجتمع

- اكيـد احنا منطين وعد البعض نبقى طول العمُر سوه

- شمشون : گد الوعد احنا

بقينه واحد يباوع للثاني وعيونة تحچي وتودع بعضها

اجـه أدم وگف گبالنا واردف

- أدم : ها الكوبرا جايبه عصابتها وجايه

- بطنج : اشايفنه شايلين سچاچين لو هادين عليك

- أدم : شكولكم مو راحه

- يا ترى ما اسمحلك

- أدم : لا حبابه اسمحيلي

- بطنج : شلون راح اگوم امرد طحاله شگد غثيث

رفعت اديه واردفت

- يعني مو بس اني اسميك الغثيث

- أدم : هسة شرايدين ؟

ردو هم بصوت واحد

- الطيار

ابتسمت وگلت

- رايدين الكابتن ذو الفقار

- أدم : صار بيها كابتن الله اليستر

- محتاجينا بشغلة روح صيحه

- أدم : قنعوني اروح يله

گام بطنج وگف گدامه واردف

- بطنج : تروح هسة براضاتك لو اسحلك

تغريت نظراته ماعبالك هذا أدم الاعرفه لزم بطنج يريد يضربه

صرت ابيناتهم اني وشمشمون

- يشاقه وياك

كز على اسنانه ورد

- أدم : أعرفه يعرفني حتى يشاقه وياي هيچ ؟؟؟

- شمشمون : امسحها بوجهي خويه

- أدم : هاي الخاطرك انتَ وهاي السلبوح راح اسكت

ابتسمت أله وتكملت بيني وبين نفسي

اني شورطني وخلاني اجمع ذول الثنين بنفس المكان

عافنا أدم وراح يصيح الأدعج

لزمنا بطنج رزلنا وهو ظل بس مدنگ

وره ساعة تقريبًا يله اجو

بس شفته وگفت وابتسمت خوفتني نظراته ضل يخزر بيه

التفت الهم وگال

- الأدعج : السلام عليكم

- شمشون : وعليكم السلام

- بطنج : وعليكم السلام آهلًا وسهلًا ومرحبا وچثير الهلا

تقربت منه وهمست

- گلنالك صير عاقل بس مو هيچ

- بطنج : اسكتي لا افجر طحالچ انتِ وياهم

بالگوه لازم اللساني

عفته ورجعت اباوعلهم لگيت الأدعج مركز وياي

خليت عيني بعينة خزرني وهز راسه متوعد

نزلت نظراتي للأرض وتحمحمت

- ندخل للمحل حتى نسولف ؟

- أدم : اي ندخل ليش لا منـا وهيچ راح افتح محل گعدات

لمصايبكم

فتح باب المحل دخلنا كلنا سوه

اتحمحم شمشون وبده يسولف أله

وهو يهز راسه ويسمعله من خلص كلامه گاله

-عندي عرف هسه يطلعكم وبالليل أنتم واصلين بس لازم بفلوس

- شمشون : عـندي فلوس وقابل بكلشي يطلبه

هز راسه متفهم وطلع بره

بقينا ننتظر شوي ودخل صار يمنا واردف

- الأدعج : بعد ساعتين يجي جاهزين ؟

بس گال هيچ حسيت گلبي انوخذ مني

باوعتلهم واحد واحد اريد اشبع منهم شوف

بقينا گاعدين نودع بعضنا و أدم متمدد جوه سيارة يصلح بيها

بسرعة مشت الساعتين اجت السيارة

طلعنا نشوفها چانت مال لحوم

صار وقت الـوداع وشگد صعب علينا

اتحاضنه اني وماريا ونبچي بصوت قوي

من يوم الاجت للان هاي أول مره راح نفترق

بعد ماشوفها ولا أسمع صوتها ولا احضنها

بعدنا الأدعج ماراضي

- لا تفاولين عليهم مو زين

هزيت راسي ومسحت وجهي

صعدت هيَ أول وحدة

وراها بطنج وگف متردد بدون لا افكر حضنته وبچيت

وهو كذلك ظل يشهگ .

بعدني باس راسي واردف

- بطنج : اسف اذا بيوم غثيتچ اسف اذا بيوم خليتچ تضوجين

اني هواي احبچ انتِ أختي وصديقتي وحبيبتي

ابريني الذمه وتذكريني دوم

هزيت راسي وبچيت

- مايوم غاثني ولا مضوجني مبري الذمه

يا احلى أخ بالدنيا

مسح وجهي وابتسم صعد للسيارة

تقدم شمشون حضني وضل يبچي لكن بصوت خافت

ابتعد مني باسني من راسي وگال

- شمشمون : ديري بالچ على روحچ خلصي شغلتچ

وتعاي النا احنا هناك راح ننتضرچ

هزيت راسي ومسحت وجهي صعد شمشون

وگف اباوعلهم سـد السايق الباب عليهم وسلم على الولد وراح

اباوع للسيارة شلون تمشي ودموعي تجري على خدي

لحد ما اختفت وماصرت المحها .

كلشي صار بسرعه بسرعه

راحوا وبعد ماشوفهم . مسحت وجهي والتفت دخل أدم للمحل

والأدعج عاقد حواجبه هزيت راسي بـ معنى شكو

عقد حاجبه واردف

- انتِ ياهو التشوفينا تحضنينا ؟

- ها

- هم گالت ها انعل شيطانچ على هالفهاوه

- شنو شسويت ؟

- شسويتي ؟ حضنتيهم اثنينهم گدام عيني

وانوب كلمن باسچ من راسچ

زفرت بضجر وجاوبت

- عادي من زمان احنا هيچ علاقتنا

فتح عيونة غيرت نظراتي منه يخوفن صارت

- الأدعج : حلو يعني هذا الحضن والبوس من زمان

- شمشون وبطنج أخوتي

- الأدعج : من أمچ وابوچ

باوعتله واردفت

- تدري بيه ماعرف وين أهلي مو ؟

- الأدعج : معناها هم مو من أمچ وابوچ

- اي بس اعتبرهم اخوتي

- الأدعج : ماكو اعتبرهم بعد هالحاله ماتتكرر

- هسه انتَ مو حضنتك ؟

- الأدعج : انه حاله نادرة

- لا حالك من حالهم

- الأدعج : يعني هم تعتبرني اخوچ ؟

- هسه ؟ ولاشي لان اكرهك

- الأدعج : انـه تكرهيني

- اي لان عيونك صارت تخوفني

تقرب مني وهمس

- عيوني حتى لو تصير تخوف تحبچ

- ماريد روح

- وين اروح ؟

- مادري بكيفك

- لحضنچ ؟

فتحت عيني ورديت

- كافي ترى انطيتك مجال هواي

عصر خشمي ورد

- الأدعج : غصبًا على هذا السيف

- ماكو شي غصبًا على الكوبرا

- الأدعج : يم العالم كوبرا مو يمي

- يمك ويم كل العالم

- الأدعج : شبيچ ؟

دفعته واردفت

- مابيه شي

ردت اروح طلع أدم من المحل واردف

- أدم : تعالوا اشربو چاي وحليب

هزيت راسي ودخلت

قدلمي گلاص بي چاي وحليب ظليت اشرب بي واباوع لـ أدم

بطرف عيني شفته شجاي يسوي

شفته يدخن جكاره ويباوعلي ظلينه فتره مثل الوضعيه

لحد ما أدم فتح المسجل

طلع قصيدة وهاي أول مرة اسمـع هيچ شيء

اندمجت وياها حسيتها تحچي عني

كلماتها توصفني وتشرح حالتي

اختنگت وضلت بس دموعي تجري من وصل هل مقطع

گـبل مـتـروح وتـهـاجر . يـطيـر الـصـاف تـانيني

أخذني وياك لأحـبابي . وعلى الجنـحان خليـني

وادور وين ابوي حسيـَن

صدگ نرحل ياطيـر الصاف وعلى جناحك تخيليني

وصدگ نوصـل لعد أهلي واشوفن والـدي بعيني

لبيابي صبيهن اهديلك لون لأهلي توديني

الك ثلثين من عمُري يامگصر عمُري وسنيني

ريـاحيـن العمُر ذبلـت ولا خفگة برياحيني

واباري منـاحر مصابي ثجيل الهم يباريني

لظى الحسرات هيمني همت والـروح مفجوعة

بسگم بلواي محتارة حرت مابين هاللوعة

حرت مابين . أبوي حسـَين

خلصت القصيدة اجـه الأدعج گعد بصفي

- هاي القصيدة تتكلم عن العليلة ( عليها السلام )

-ليش شبيها ؟

- الأدعج : عافوها كل أهلها واجـو لكربلاء

وهنا حاصروهم قطعوا الماي عليهم

وقتلو ابوها واخوانها وعمامها واولاد عمها

وسبو النساء

رديت بقهر

- خطيـة بس ليش ماراحت وياهم ؟

- الأدعج : مريضه ماتگدر تسافر

لذلك سموها بالعليلة

- شلون گدرت تتحمل كـل هـذا ؟

- الأدعج : رضت بما قسم الله لهما

وهيَ كانت تعلم بواقعة اللطف قبل حدوثها

- لـعد شلون خلتهم يرحون

- الأدعج : حتـى يبقى الاسلام وينتشر الـدين

وحتى الأمام الحسين ( عليه السلام ) كان يدري بالراح يصير

- يعني مات وهو يدري بنفسه راح ينقتل ؟

- الأدعج : اي وانقتل وهو عطشان

- عطشان ؟

- الأدعج : گطعو الماي والاكل عليهم

وحاربوا علمود يجيبون الماي للأطفال وانقتلو

وهسه احنا كل ما نعطش ونشرب ماي نگول

السلام على عطاشى كربلاء

دمعت عيوني رديت بحزن

- طلع من زمان الظلم موجود

- الأدعج : الظلم ماراح يروح يبقى ويانا طول العمُر

مسحت وجهي وگمت

- لازم اروح

- الأدعج : خل انه اوصلچ

- لا اني ارجع وحدي

- اش لا تعارضيني امشي عرمتي

هزيت راسي وصعدت للسيارة

رجع شغل نفس القصيدة عشت شعورها مرة ثانيه

وضليت اتخيل العليلة وشلون تأذت على أهلها

باوعت أله واردفت

- هنا نزلني يمك

- الأدعج : راح اروح برحلة بعد اسبوعين يلة ارجع

رديت بحزن

- كلكم راح تعوفوني بيوم واحد

- الأدعج : بس انه راجعلچ وللموت ماعوفچ

نزلت سديت الباب وباوعتله

- انتظرك

" راجعلچ يا وتين الأدعج وسلاية گلبه "

ابتسمت واني ما فاهمه شغل السيارة قبل لايمشي

اردف بصوت قوي وراح

- الأدعج : بجيب القمصلة تلگين فلوس انطيهن للعار

ظليت اباوع لسيارته لحد ما اختفت مديت ايدي

بجيب القمصلة لگيته مخلي المبلغ التريد اطلعه

مادري شوكت خلاه ولا حسيت بي من مد ايده

صرت الوم بروحي لكن بالنهاية سلمتها المبلغ ودخلت

صعدت فوگ طول الوقت خايفه وتفكيري يمهم

لليل صار صوت صياح قوي عضيت شفتي السفليه بخوف

وره ثواني اندفر باب المخزن وهو منا طايح حضه گبل انكسر

صارو گدامي كلهم صاحت بصوت قوي

- ملوك : ماريا وين ؟

كنت مستعده لهاي اللحضه جريت نفس ورديت

- شمدريني غير بالشغل ؟

- عبد : طلعن سوه اني شفتهن بعيني

- صـح طلعنا سوه لكن كل وحده بمكان

- ملوك : يعني مو سوه ؟

- لا مو سوه مو انتِ المعلمتنا هيچ ؟

- ملوك : اني ادري بيچ ماتمشين بكلامي

- بالضبط دايسة كلامچ بنعالي وماشيه بس الشكر لماري

هيَ التمسعه وماتخلينا سوه

- ملوك : وينها هسة؟

تقربت يمها غيرت نبرتي ورديت

- اذا صارلها شي وما اجت اذبحچ

دفعتني ليوره طحت بالگاع

رجعت وگفت برجها وصحت

- احچي وينها ؟ اخذتيها لجماعتچ لو بعتيها !!

ظلت صافنه بوجهي نزلت دموعي واردفت

- اذا ماري مارجعت الليلة اني اكتلچ فاهمه

من حديه كلامي خليتها تصدگ اني مادري عافتني وراحت

باوعت لباب السطح انسد مسحت وجهي واردفت

- خاب اروحلي فدوة شلون امثل

هسه لو اني ممثله مو احسن من هاي العيشه ؟

تدكرت ماريا من تحچي هيچ ورجعت بچيت صدگ

مرن الأيام واني بالمخزن صدر أمر منها

ما اطلع من السطح وابقى محبوسه

واني كيفت خلصتها نوم وراحه لو اگعد بالسطح اباوع للسماء

وبالليل اظل ابچي هواي اشتاق لماريا وسوالفها

لكن بالنهاية افرح لان خلصت منها من بعد هاي السنين

استهترت هيَ لان مالگت ماريا

وهالشيء طمني معناها گدرت تنهزم منهم وطلعت من قاع الظلام .

وبالليلة النايمه بيها

بين الغافيه وبين الگاعده اسمع طقطقه بس مابيه حيل اگوم

مغمضة عيوني ولو افتحهن كلشي ما المح من الظلمه

حسيت بشخص گاعد يمي گمزت بخوف

فتحت عيوني مالمحت شيء .

رجعت أنام وياريت ما مفكرة اغمض عيوني

أول ما غمضتهن اتخلت أيـد على رگبتني وخنگتني .

للـحكـايـة بـقـية

رأيكم ؟ توقعاتكم ؟

أستودعكم ألي عينه ما تنام 💕

-أستغفر الله.

-سُبحان الله.

-الحمدُ لله.

-لا إله إلا الله.

-الله أكبر.

-سُبحان الله و بحمده.

-سُبحان الله العظيم.

-أستغفر الله و أتوبُ إليهِ.

-لا حول و لا قوة إلا بالله.

-اللهُم صلِ على مُحمد وآل مُحمد.


━━━━━━━━━━━━━━━━━━━━━━━━━━

🌸 هل أعجبتك أحداث القصة؟

💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:

🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام

نتشرف بوجودكم دائماً في عائلة كيمو ستوريز! 🌸

━━━━━━━━━━━━━━━━━━━━━━━━━━

2026/11/15 · 0 مشاهدة · 3513 كلمة
yare.yare
إعلان
نادي الروايات - 2026