7 - الفصل 7: الـقـا؏ الـسـادس

الأدعج "قاع الظلام "

بقلمـَي زهرة الساعدي

لطفًا فراشاتي دوسن على النجمة وعلقن بين الفقرات

حساب الانستا

zahralsadi

قناة التلي

zahralsadi

يگول الأدعج لـ وتينه

" انه الجندي المخفي الراح اظل احميچ "

أول ما غمضتهن اتخلت أيـد على رگبتني وخنگتني .

فتحت عيني ماشفت غير عيون تجدح تباوعلي

رفت اديه لزمت معصم ايده اريد ابعده مني ماگدر

يخنگ بيه بكل ماقوة عنده واني ارافس جوا بلا حول ولا قوة

اعتقدت هاي نهايتي و وصل وقت موتي

بعد ايده من رگبتي ظليت اكح بصوت قوي

ردت اگوم صار فوگاي خله ايده على حلگي وهمس بأذني

- بس تتحركين اذبحچ

هدئت واني استذكر هذا الصوت

هـذا صوت عبد الحارس مالنا ؟

طلع توقعي صـح من بده يسوي حركات مقرفه بجسمي

ويحاول يغتصبني .

بجسمي الهزيل ادافع على أخر امل امتلكه.

وبشهوته الحيوانية يحاول يكسرني ويفقدني عذريتي .

استمرت المصارعه ما بيني وبينه دقائق

گدرت اخلص من جوا ركضت للسطح

سحبني من شعري أله صرخت بصوت قوي استنجد

محـد اجه نقذتي منه رجعني للمخزن سحل

مثل الوحش الينهش بجثه فريسه هيچ هو هسة

مزق ملابسي وبده بـ مصيبته

بعده ما مسويها لمحت حديده وي الغراض ألي بالمخزن

دفرته بمنطقته ابتعد متألم زحفت للحديدة

جراني من رجليه ونومني على بطني

سحبتها وبحركه سريعه ظليت اضرب بي وهو مقاوم

لـحد ماضربته ضربة اخيره فقـد حركته و وگع بالگاع

نمت على وجهي ارجف

اسناني اطقطق من وره الخوف وصدري يصعد وينزل من الرهبه

گمت أشوفه والمصيبة ماگدر المحه !!

ظليت بيدي اتلمس رجفت بخوف من لمسته

صاير جثه بالگاع صرت ازحف على ركبي واتلمس الأرض

شهگت من وصلت لبقعة الـدم

رفعت نفسي مسحت وجهي واتلطخ بدمه

هزيت راسي ورددت

- اني مو مجرمة ما قتلته دافعت على نفسي

طلعت للسطح ادور حوالين نفسي

لطمت على وجهي وگعدت ابچي

باوعت لباب السطح مفتوح نزلت أركض

دخلت المطبخ صارت بوجهي شكرية لطمت واردفت

- شكرية : شنو هذا الدم العلى وجهچ شسويتي ؟

حچيت واني اشهگ

- مـ مات يمكن مات اني مو مجرمة ما قتلته دافعت على نفسي

صفنت بوجهي خايفه صرت اهلوس وما اسيطر على كلامي

- روحي شوفي بالمخزن حبابه گعدي

لا يموت ماريد اصير مجرمة

عافتني وصعدت تركض واني گعدت بمكاني

حشرت نفسي بالزويه رفعت رجليه لصدري

واديه على راسي اشهگ .

نزلت تصرخ وطلعتلها المدام

انگلبت البناية گلاب واني بمكاني

اسمع بس وشوشتهم وعقلي طاير مو يمهم

احتاجيت الأدعج اريده يمي بس هو اليحميني منهم

گمت غسلت على السنگ طلعت اريد اشرد

لكن ألحظ ما حالفني وكان القدر ضدي

صارت بوجهي المدام عيونها تجدح شرارة

سحلتني للمخزن شمرتني بي وقفلت باب السطح عليّ

لان باب المخزن ماكو مكسور

خفت من سكوتها اعرف ضامتلي مصيبة

واني اتلمس بالغراض طلعت الكبوس ولبسته

خفت على شعري .

بقيت بقلقي وخوفي وارتباكي

افتر حوالين نفسي التفت للغراض الصايرات بالزوية

تقدمت طگت رجلي بالحديدة يله عرفت اني گبالهن

ردت أخد وحده منهن واكتل نفسي

رفعتها ردت اسويها أجو على بالي

أهلي ..

تكملت وي نفسي بنبرة خوف تحاول تهدء روحي

- اي اني عندي أهل مو لازم اموت

اني راح اطلع من هذا القاع وراح انتقم منهم

راح اشم ريحه اهلي ويطلع عندي أخوان ياخذون حقي

الأدعج بره ينتظرني وراح يوفي بوعدة ويلگاهم إلي

بهاي الكلمات گدرت انطي لروحي امل

شمرت الحديدة وانتفض جسمي

كله يرجف من الأحداث الجاي تصير وياي

عقلي رافض يستوعب يريد حياة هادئه

وجسمي بعد وابي يقاوم يريد راحه

كل جزء بخلايا الروح تعب و ماريد هذا الظلم يريد يعيش

گعدت بالزوية رفعت رجليه لصدري

شبكت اديه عليهن وسندت راسي بيهن

ظليت اهتز بقوة واني افكر بالصار

الف سيناريو منتجت براسي لحد ماطلع الضوه

طلعت للسطح افتر منتظره يجيني خبر منهم

مطرت الدنيا دخلت يم باب المخزن وگفت انتچيت على الحايط

چتفت اديه اباوع لحبات المطر شلون تنزل

جريت نفس عميق وزفرته

حسيت بصدري صار خفيف وارتاح

ما استمرت هاي الراحه للمغرب انفتح باب السطح

دخلت وعيونها تجد شر وراها البنات التعاركت وياهن

ومن بينهن هاي الضربت راسها صاحت بصوت قوي

- ملوك : ولـچ انوب تضربين عبد ايدي اليمنى

تردين تخربين شغلي احچي

- حاول يغتصبني ودافعت على نفسي

- ملوك : واذا نام وياچ تقنعيني انتِ شريفه ؟؟

- اشرف منكم كلكم

ضحكت بصوت وتقربت إلي تراجعت للخلف خايفه

انضربت بالحايط صارت قريبه مني

سحبتني شگت الثوب العليه

بينت اجزاء جسمي ظليت اغطيهن بخجل

تقربن مني كلهن صارن مثل الدائرة عليّ

نزعني ملابسي وقيدني بـ حبل وبكل وقاحه

مثلن وي جسمي بحركات مقُرفه ومشمئزة

اتقيئت بـمكاني ضحكن ضحكه جماعيه

وحدة منهن رفعت سطل ماي بارد ثلچ شمرته على جسمي

ظليت ارعش من البرد

سحبتني على الحديدة الصايره بزوية السطح ربطتني عليها

رفعت الصوط وصارت تجلد بيه من بعد ما شفت غليلها

أجت التعاركت وياها جلدتني وهيچ استمر الوضع

مابقى بنفس وحدة تجلدني ، كلهن اتمتعن بتعذيبي

دخت وغوشت عيوني فقدت توازني نزلت راسي وانغمى عليّ .

فقت واني فاقده صحتي وجسمي وروحي

مقيدة على الحديدة بدون ملابس

وجسمي عليّ كدمات التعذيب

مخطط بخطوط حمر من وره الصوط

والأثار تچويني ماگدر الزمها .

حتى الجو صار ضدي

صار هوى بارد ومطرت بغزارة

ظليت احرك بنفسي ماگدرت أخلص

دنگت راسي وضليت اشهگ

اتمنيت اموت واخلص اتمنيت لهنا وتنتهي قصتي

بس كان للقدر رأي ثاني

وكل هاي الأحداث نقطه ابحر من الراح يصيرلي .

يوم ونص اني بمكاني

حاجتي جواي والمطر والبرد يسلب بجسمي

اجت شكرية فتحت الحبل من بعد ما هيَ وافقت

سحبتني وظلت تسبح بيه بالسطح

نشفت جسمي بالمنشفه لبستني بجامة

رادت تلسبني البلوز صاحوا عليها

دخلت اسحل بروحي شفت فراشي ممدود

بدون مخده ولا بطانيه تمددت بدون لا اللبس بلوز

حضنت نفسي مثل الجنين ونمت

انغمى عليّ من وره الجـلد والتعب فقدت

وماحسيت على نفسي بعد فزيـت بس هالمرة مو خوف !

استوطن الأمان جسمي وفز گلبي وارتاحت روحي

يعني هو هنا .

انرفعت من الإرض لـ حضنه ضربت انفاسه وجهي

بهمسات متعبه وهلوسه المرض ضليت اشكيله .

- أذونـي

- وين ما أذوچ تأذو

- جلدتني

- انجلدت ألف مرة

- تعبت

- بحضني استراحي وزيلي تعبـچ .

بلعت ريگي رفعت اديه التعبانه حاوطت رگبته

خليت أنفـي على نحره شميته وهمست

- هسه يله ردتلي الـروح

- هسه يله حسيت نفسي عايش .

- شلون صعدت هنا ؟

- علمود اخليچ بحضني حتى للقمر أصعد .

بچيت ورديت

- ماريدهم اريدك بس انتَ

- وحگ كل دمعة طاحت منچ

وانه ما احلف بغير الله واهل البيت راح ابچيهم دم

- سـيَد

- ياروح السـيَد وراحته وهيبته وسلاية گلبه

- لاتعوفني الدنيا مابيها أمان

- يـمچ انه للموت ماعوفچ وتيني

- حاول يغتصبني

- منين ما حاول أنتهى وبعـد مايگدر يرجع يسويها

- شسويت ؟

- سويت اللازم يصير من زمان

حرامات علمود جزء واحد من جسمه يتسمى رجال

نهيته حتى يصير خنيث رسمي

- صدگ سويتها ؟

- علـمودچ اطلع أرواح مهووس بيچ انه وتيني

اتشتت عقلي وعيوني ثگيله ماگدر افتحهن

بقيت بحضنه واني باسعد لحضاتي

لحد ماغفيت .

گعدت وعبـالي الصار حلم وجيه الأدعج طيف

بس طلع حقيقة اني لابسه ملابس جديدة ودافيه

ويم راسي علاگه اكل وعلاج

رفعت البلوز اشم عطره المحتل ملابسي وجسمي

ظليت استنشق بقوة وما ازفره

فتحت العلاگه لگيت لفات كباب عروگ

ابتسمت واخذتهن من الجوع خلصت لفتين والثالثه عفتها

شفت جايلي علاج ومرقمه

فهمت قصدة ابدي اشرب من الواحد للثلاثة

شربت العلاج واحد وره الثاني

رجعت سديت العلاگه واتمددت .

بقيت بمكاني والافكار تتضارب براسي

انكسرت رگبتي من وره الفراش اريد مخده ماكو

گمت سحلت گونيه چانت محطوطه بالزوية وي الغراض

ابطنها غراض زايده ضربتها حتى تتعدلل

وخليتها مخده إلي نمت عليها تأذيت أكثر خليت وشمرتها

رجعت أفكر بالصار والراح يصير

أفكر بماريا وين وصلت ؟ هسة هيَّ فرحانه

صارت زينه سقطت الطفل !

افكر وافكر لحد ما يرجع عقلي يفكر بي

هو وحدة بس المحتل افكاري

الأدعج .

أجت شكرية قاطعت افكاري وخربت عليّ أحلامي

- المدام تگول من باچر ترجع للشغل

- ها اعتازت فلوس لازم

رفعت اكتافها وثنت شفتها

- شكرية : مادري بس هيَّ گالت روحي گليلها باچر ترجع للشغل

- وايدها اليمنى شصار بي ؟

- شكرية : عبد ؟

- اي عرة الزلم

- شكرية : انتهى وانتهت حياتة

رفعت راسي خايفه مو علي على نفسي لا اصير مجرمة

- شكرية : ضربتچ صـح أذته بس مو مثل

سوايه الملثمين

گعدت عقدت حواجبي ما فاهمه نصت صوتها وكملت

- شكرية : غير اثنين ملثمين داخلين للمستشفى

ضاربين الدكاتره مخدر ولابسين لبسهم وداخلين على عبد

فتحت عيوني ورديت

- شسوله ؟

- شكرية : نهو رجولته كلها ضربو بمنطقته لحد ما إنتهت بعد

فتحت عيوني وحلگي كملت و هيَّ تتلفت

- شكرية : اضاهر عنده عداوات ومغتصب واحد مدري وحدة

هزيت راسي متفهمه وبالي مو يمها ابد

- شكرية : حضري نفسچ باچر وخاف رنة الجرس ما تسمعينها

اني اجي اگعدچ

بلعت ريگي ورديت

- خوش

أول ماسمعت صوت باب السطح انسد

وگفت على حيلي حتى الألم نسيته

ظليت افتر اروح واجي واكل باظافري

ساعة ابتسم ساعة ابچي وعقلي ما بطل من التفكير

استذكرت الصار ومن أجه إلي. بچيت وحچيت

" نهى رجولتة لان حاول يغتصبني "

مسحت وجهي طلعت بالسطح گعدت اباوع للسماء وابتسم

شفت نجمة تلمع أجت على بالي عيونه

صرت اسولف واشكي للنجمة اتخيلها هو

مشى الوقت بالحسرات اول ماطلع الضوه

دخلت بدلت لبست الكبوس واللثام

حسيت براحه راح أطلع واشم هوى

حتى لو اشتغل واتعب المُهم ما انحبس واتعذب

نزلت جوه اعتقدت اني أول وحدة بس نصدمت من شفت !

البناية مگلوبه گلاب كل البنات الـ جلدني والمدام

وجوهن صفر وابينهن هاي الضربتها وضل راسها ينزف

متخربطه بالگاع

تفتر وتتكلم بحيرة

- ملوك : شلون كل هذا جاي يصير شلون !!

- مدام هاي عصابه جاي تلاحگنا

- ملوك : أول مرة ماگدر اعرف منو ذول

راح يخبلوني كل ساع طالعين بشكل جديد

تقربت استمع الهن انتبهت الها مزورگه تزورگ اضاهر مكتوله

كملت وهيَّ ترجف

- ملوك : دخلوا على عبد وفقدو رجولته

اني كل يوم جاياتني نسوان يموتني تموت

وهسه هم نسوان خطفن سيلين واغتصبنها !!

باوعت لسيلين هيَّ هاي ساس البله

هيچ صاير بيها ومتخربطه حيل وياها

- الحراس ليش ماجاي يلزمونهم

- ملوك : ما يعوفون وراهم أثر ولا ينگدرون

مثل العفاريت يختفون .

عفتها حايرة وخايفه دخلت للمطبخ أخذت الغراض وطلعت

وصلت يم مكان عربانة عمو ابو فواطم هم ما لگيته

انخمش گلبي گلت بس ارجع اروح لبيتهم

لان هسة وقت شغل واطلع مبلغ زين

وصلت يم التقاطع ظليت أبيع وامسح جام .

للعصر أجاني صوته من وره ابتسمت تحت اللثام والتفت

- الأدعج : ليش ما اجيتيني ؟

- ردت اطلع المبلغ يله اجيك

- الأدعج : المن جاي تشتغلين على المبلغ

انه انطي الچ

- لا مو لهل درجة ساعدتني قبل

بس هسة كافي دلال لازم أرجع لشغلي

- الأدعج : ليش تزعليني ؟

- انتَ لا تزعلني وخليني اشتغل

تقرب مني رفع كف ايدي قبله واردف

" هاي الأدين انخلقت للراحه مو للشغل "

التفت حول الشارع استحيت وخفت لا يشوفونا

بعد ما اطمئنيت محد انتبه علينا دنگت خجلانه

- الأدعج : امشينا للمحل

- شنسوي ؟

- نتسامر سوه احب اتسامر وياچ

دنگت ردت اشيل الترمز ماخلاني هو أخذه

مد كف ايده بـ معنى الزمي

باوعتله فهمني من نظراتي واردف

- الأدعج : خلي ايدچ بأيدي ولاتفكرين

شبكت كفي بكف أيده ومشينا سوه

وصلنه يم المحل دخلنه لگينا أدم ينتظرنا

- الچلب العضچ كتلنا عيني سلبوح

عقدت حاجبي ما فاهمه

- أدم : والله الچ وحشه اشتاقيتلچ

نزل الغراض ورد عليّ

- الأدعج : تشتاقلك جهنم يل الملگلگ

- أدم : اشتغلت الغيره الوطنيه

- الأدعج : اش ولا حرف صبلنا چاي وحليب واسكت

- أدم : خادم عند الخلفك انه گوم انتَ

بدون مايرد بس باوعله گام وهز راسه

- أدم : طبعًا خادم عند الخلفك ليش اني شعندي غيرك

حبيبي

- الأدعج : عفيه هيج صير حباب لا أذيك

- أدم : اوي عنيف دودي

إعلان

ابتسمنا اله صب حليب وچاي بكوابه

قدمهم النا اخذت رشفه من الكوب واردفت

- انتَ السويت بيهم هيچ ؟

- الأدعج : شسويت

- أدم : غشم نفسه

- شنو السبب الخلاك تسوي كل هذا

- عيونچ .

- أدم : استغفر الله استغفر الله سيد اتسوفلت كلش

- الأدعج : شگد قطاع ارزاق انتَ

- يعني انتَ سويت بيهم هيچ

- اي انه

حط رجل على رجل وگال

- أدم : وحدك ؟

- الأدعج : انه و أدم يابه شكر خاص الك

جر نفس ورد بغرور

- أدم : بالخدمه حبيبي دودي

- اتخبلت عقل ماضل براسها

ضحكو بصوت واحد

- تگول عليكم عفاريت

- أدم : وصلتها العفاريت

- شنو ؟

: الأدعج : عود ودت حراسها علينا

خبلناهم خبال غيرت نقرة صوتي وگلت

وصلوا هاي كلماتي للمدام مالتكم

" راح تظل ادورلنا العمُر كله وما تلگانه احنا عفاريت بغداد "

رديت اتسائل

- عفاريت بغداد ؟

- أدم : اي هذا أسم شخصياتنا بالليل

عقدت حاجبي مستغربه

- احنا عفاريت بغداد المانسكت عن الحق

احنا الراح نفرهم فر وندوخهم

- خاف يعرفونكم ؟

- أدم : من صغرنا مخبليهم راح يعرفون الدنيا كلها

ومايعرفونا

- أنتم كفو

- أدم : بالخدمه خويه بالخدمه

- بس أكو شي حيرني

التفتو ألي اثنينهم وردو

- شنو هو ؟

- تگول نسوان يضربنها وخطفن سيلين واغتصبنها

- أدم : يعني تردينا احنا النضرب نسوان ؟

مو من اخلاقنا

- الأدعج : هـذن عفروتات بغداد

ضحكنا اني و أدم رديت علي

- يعني وياكم بنات ؟

- الأدعج : اي

عقدت حاجبي وگلت

- اها

- أدم : اشو باوعيلي خل اخذلچ خيره

باوعتله صفگ ادي واردف

- أدم : غارت عليك ولحسنين

- اني اغار على الازرگ ؟؟

- الأدعج : الازرگ الماعجبچ النسوان تركض ورا

- أدم : مو سيد ومن نسل الرسول شلون تچذب هاي الچذبه ؟

ولحسنين افرغ من جيوبي ولا وحده تباوعله

ضحكت بصوت والأدعج گام يضرب بي وهو كذلك

تأخر الوقت گمت واردفت

- لازم اروح تأخر الوقت

- أدم : واذا ماترحين شيصير تموتين ؟

ضحكت وگلت

- اي حقك ماتعرف اليتأخر شيصير بي

- أدم : كلشي نعرف بس هيَّ هسة ملتهيه بضيمها

باوعت للأدعج واردفت

- شسويت ؟

- الأدعج : شوف حضي المشگگ گبل باوعتلي

ترى أدم الحچه مو انه

ابتسمت وشلت غراضي

- ترى افرح من تسون استمرو واني بظهركم يا

عفاريت بغداد

- أدم : بعد روحي وتاج عيني

- الأدج : انطم أدم لا اجي اردمك

- أدم : خل اكملچ الخيره

هذا الازرگ ذايب بيچ ويغار عليچ غيره

الثور على اللون الأحمر

دنگت نظراتي رد علي

- الأدعج : ثول الثولك الثور مايغار على اللون الاحمر يكرها

- أدم : انتَ شعرفك بهل سوالف ؟

هو غير الغيره كاتله بس واحد يلزم اللون الأحمر يروح يردمه

مثلك هسة من تغزلت بسلبوح

- انوب سلبوح

- أدم : شسوي ياخويه غير يشبهچ

رفعت حواجبي واردفت

- مع السلامه

- أدم : هلابيچ ننتظرچ كل يوم هنا بنفس الوقت

ابتسمت ومشيت

اجه وراي واردف

- الأدعج : اصعدي للسيارة

اتوقفت وگلت

- ماريد اتعبك

- انه اتعب اذا مشيتي وحدچ والناس تباوعلچ

بدون لا ارد مشيت للسيارة صعدت وهو مشه بينا

التفت اله واردفت

- اخذني لعمو ابو فواطم

هز راسه و وصلني يم بابهم بدون لا ادلي !

- شعرفك هنا بيتهم ؟

- كلشي بحياتچ اعرفه ومفصله تفاصل

- گمت أخاف منك

- خافي من الدنيا كلها ولاتخافين من ادعجچ وتيني

- شگد حلوة من تصيحلي وتيني

- اسمچ مو أسم عادي اسمچ شريان بگلبي لو يروح يوگف نبضه

- و سلاية گلبي شنو معناها ؟

- هاي سلاية تنبت بالنخل وتنبت بي وتكون قوية وما تبعد عنه

هيچ انتِ

" سلاية نخل بالگلب نابته حيل "

ابتسمت وهزيت راسي

نزلت ونزلت الغراض باوعلي من الجامه واردف

- الأدعج : سلميلي على ابو فواطم هواي

هزيت راسي ومشيت للباب

طرقته أكثر من مره يله انفتحلي الباب گمزت وخليت ايد على گلبي

شكلها يفزع خلوني اوصفها الكم

جسمها سمين حيل ولغلوغها بي عشر كيلوات

گاصه شعرها ولادي وصابغته اصفر يلمع

غاطه وجها بالطحين وحاطه حمره برتقاليه

- شني شفتي جني گدمچ

اتكملت بيني وبين نفسي

- علوا على الجني وجهچ يخوف أكثر من طاريه

- شنو احچي بصوت عالي

- شنو هالجمال طالعه تخوفين

اختفت ابتسامتها وردت

- شنو ؟؟؟

- اقصد تخبلين شلونچ شخبارچ

شو ضعفانه

- شتردين

- عمو ابو فواطم

- شتسوين بي

- اللعب ويا توكي يعني شسوي ويا ياعيني غير اريد اشوفه

طگت علچها باوعتلي من فوگ ليجوه دخلت وحچت

- اي موجود بـ فراشه ادخلي

عفت غراضي بالطرمه يم الباب ودخلت

شهگت من شفته بفراشه تقربت يمه

مو ذاك عمو الأعرفه وجها اصفر وجسمه نحلان

وصاير اصفر وضعيف

اتخبلت تقربت بسته من راسه واردفت

- شبيك عمـو ؟

- ابو فواطم : هلا بجميلة الجميلات

- هلا بوية حاچيني گلي شبيك !

- ابو فواطم : وصلت نهايتي بعد

گمت يمه رفعت ايده بستها ورديت

- ليش تحچي هيچ شيوجعك

- ابو فواطم : كلياتي اثنينهن يرادلهن تبديل

دمعت عيوني رجعت بسته واردفت

- اي مو مشكلة نشتريلك وحدة لو ننطيك من عدنا

انتَ قوي راح ترجع مثل قبل

غمض عيونة وفتحهم

- ابو فواطم : كل قوي الزمن يطيحه

- بس انتَ راح تبقى قوي راح تصير زين

وراح ترجع تبيع لبلبي وترجع عمو الي يلبدني يمه من اتعارك

طاحت دمعتي رفع ايده مسحها وابتسم

- ابو فواطم : الله كريم بويه لاتبچين

مسحت وجهي واردفت

- صدگ الأدعج يسلم عليك

- ابو فواطم : الله يسلمه ويحفظه

- منين تعرفه ؟

- ابو فواطم : اكو واحد ابغداد مايعرف الكابتن

كلها تسولف باخلاقه وتربيته الله يحفظ ابو الطلعه هيچ أسد

- تدري كل يوم افوت من عربانتك ومن ما الگاها ينخمش گلبي

- ابو فواطم : اتعودي بعد ماتشوفينها طول العمُر

ماتحملت بس گال هيچ نزلت دموعي تجري

بهل اثناء دخلت فواطم حضنتني وبچت بحرگه

بقيت اسولف وياهم ضحكتهم يله طلعت

يم الباب حضنتني واردفت

- فواطم : خايفه على بابا تدرين بيه أموت لو صارله شي

لزمتها من اكتافها ورديت

- مايصير علي شي كلنا راح نساعده

ديري بالچ عليّ خوش

هزت راسها ورجعت حضنتني طلعت من بيتهم

والخنگه ترن ابلعومي

شفت سيارة الأدعج بعدها واگفه

تقدمت اله امسح بوجهي نزل خايف

صرت يمن اشهگ واحچي هز راسه طلع بطل مي من السيارة

غسل وجهي وسحبني صعدني

- الأدعج : راح يصير زين

- لازم يشتري كليه وهو ماعنده

- الأدعج : وانه وين رحت ؟

- انتَ تشتريله

- الأدعج : الغرب جاي اساعدهم ابو فواطم ما اساعده شلون

ابتسمت وصفگت اديه ابتسم عليّ وثبت نظراته بعيوني

- كلشي تحبينه وتردينا راح اخلي يعيش

- شكرًا

- اشكري الدنيا كلها ولاتشكريني بوية وتيني

- ليش مادخلت سلمت علي

- مرته الحموضة موجوده تلعب روحي من شكلها

- ماعليك منها هيَّ أصلًا دخلت جوه

- من تشوفني راح تظل گاعده گبالي

عقدت حواجبي غير الموضوع واردف

- الأدعج : عندي خبر حلو الچ

رجعت باوعتله منتظرته ينطق

ضحك وگال

- الأدعج : ماريا وبطنج وشمشون وصلوا بالسلامة

أكثر خبر فرحني طرت مثل طير الحُر بالسماء

ابتسمت وبچيت لكن هالمرة فرح

ثلج ونزل على گلبي خبر وصولهم

وهسة فعلًا خلصوا من هذا القاع

وصلني بعيد عن البناية نزلت ونزل وراي

لف الشماغ على راسه و وجها

رفعت اللثام من رقبتي لوجهي ومشيت بكل ثقه .

صارت عيني بعين واحد شكله يخوف خزرني

دنگت نظراتي همس من وراي

" ارفعي راسچ وراچ الأدعج بوية "

ابتسمت ورفعته شفت نفس الخزرني مدنگ

وصلت يم البناية وهو وگف قريب منها

باوعتله اودعه . هز راسه واردف

- الأدعج : سلميها لمبلغ واصعدي ركض اقفلي الباب عليچ

- باب المخزن خربان

- سويته الـچ

گال هيچ عدل شماغه وخله ادي بالدشداشة ومشه

دخلت شمرت الغراض وسلمتها المبلغ

باوعتلي بخزرة ما اهتميت عفتها وصعدت اركض

وصلت للسطح شفت باب المخزن جديد ومن حديد

ضحكت بفرح راح يوگف عقلي الأدعج

شلون گدر يسوي وهو چان وياي ؟

شلون دخل للبناية أصلًا بدون لا ينعرف

صدگ طلع عفريت

بدلت ملابسي بس بقيت لابسه الكبوس

من باب السطح صحت على شكرية تأخرت يله صعدت

- خير

- كل الخير تعاي وياي للمخزن

دخلت بقيت حايرة شلون افاتحها بالموضوع

غمضت عيوني واردفت

- شكرية اريد تحفيني

- شكرية : شني ؟

- تحفين شواربي

- شكرية : جاي اتحلم مو

- لا حقيقية

- شكرية : منچ من الشيطان

- من الازرگ

- شكرية : شني ؟

بلعت ريگي وغطيت على چفصتي

- شواربي صايرات خضر وحتى اللبن يلزگ بيهن

- شكرية : اي مو گتلچ خل احفهن شوفي تالية المايسمع كلامي

- يله هسة حفيني لاتضلين تعيرين بيه

هزت راسها ودارت وجهها تريد تنزل

- شكرية الصاكه بوگي منهن مخدة وصعديها إلي

- شكرية : ممنوع نجيبلچ فراش

- ادري ممنوع اني لگيت هنا فراش ومديته إلي

واليوم بوگي مخده وباچر بطانيه العافيه بالتداريج شيشي

- شكرية : ماريد اتورط وي المدام

- تگدرين تسوينها يله حبابه يمة فدوة شنو هذا الجمال

ابتسمت وردت

- شكرية : راح احاول

- اويلي اذا ما ازوجچ لواحد صاك وازفچ بيدي ما اتسمى الكوبرا

خلت شالها على حلگها وردت

- شكرية : فلك الفلكچ

- يمة يمة على اساس خجلت روحي حبابه جيبي خيط

وبوگي مخدة

هزت راسها ونزلت گعدت على البلوكة انتظرها

أجت ضامه المخده ابين رجليها

وصلت يمي وشمرتها ضحكت بصوت ورديت

- شني جبتي مخده

- شكرية : دسكتي وگف گلبي يله وصلتچ

وگفت بستها من خدها ورديت

- شلون شكرية عندي اني تخبل تخبل

ضحكت ودخلت للمخزن خايت المخده ونمت عليها

- شكرية : هذا الفراش حتى البزازين مسويتها علي

- اي شسوي احسن ما انام بالگاع

- شكرية : وماعندچ بطانيه

- لا

- شكرية : والچ بالليل تگص گص شلون بيچ

- عادي تعودت احضن نفسي ادفى وانام

هزت راسها وشدت الخيط برگبتها

- شكرية : تعاي نامي على رجليه

نمت على رجليه بكل برود شغلت ضوه الايت

خلته بوجهي وبلشت تحف من أول خيط گمزت شايطه

- شكرية : اگعدي لا تتحركين

- ماريد وخري

- شكرية : تعاي ولچ صار أثر ابيض

- عادي ماريد فدوة وخري مني

تقدمت لزمتني من اديه خلتهن جوه رجليها صرخت

من ورا الأثر مال جلد

ما اهتمت وضلت تحف بيه .واني جواها دموعي تجري

وهيَ مستمرة تحف وتحچي

- شكرية : ولچ شگد شايله شعر المطي مو هيچ

صحت بصوت قوي

- وخري

- شكرية : خلصت مابقى شي

ظليت ارافس جواها خصلت شواربي ورجعت لحواجبي

وره ماطلعت روحي يله خلصت خلت اضوه قريب مني

تتفحص ابتسمت وردت

- شكرية : وروح امي طلع وجهچ

- ماعندچ مرايه اشوف

هزت راسها وطلعت من صدرها علبه باودر

فتحتها بيها مرايه خلتها گبال وجهي

اخذتها منها اتفحص روحي اتعجبت . صرت حلوة

وحتى عيوني كبرت

- فلك الفلكچ يشكرية

- شكرية : فوكاها انوب

طفرت حضنتها وبستها

- اذا ما تفتحين صالون حفافه افضحچ

- شكرية : هههه افكر بيها

لازم انزل هسه لا المدام تفتقدني خاف تسمعين صوت باب السطح

انفتح گبل ضمي المخدة وره الغراض

- ماتشيلون ذني الغراض

أخاف وراهن جريذية

- شكرية : باچر احاچي المدام واشوف

- صدگ شكرية كل غراضي حرگتهن

هزت راسها بتأسف تقربت منها وهمست

- شكرية بروح امچ جيبيلي ديرم وكحله

- شكرية : يا شتسوين بيهن

- مو تدرين بيه ماعيش بدونهن ؟

- شكرية : باچر اجيبلچ بعد شتريدين

- سلامتچ يحلوة

هزت راسها ومشت وقفتها اسأل

- منو سوه باب المخزن ؟

- شكرية : مادري بس أكيد المدام

هزيت راسي الها راحت وصارت ظلمه حيل

سديت باب المخزن لكن ما قفلته نسيت

تمددت بالفراش اتنهدت واردفت

- اليوم ما راح يتكسر راسي من ورا الفراش

بالرغم من طول اليوم ماحسيت بوجع

لكن هسة هاج عليّ زحفت مابيه حيل اگوم

طلعت العلاگه ضامتها وره الغراض

ظليت اتلمس العلاج ماعرفت ياهي اللازم اشربها اول وحدة

طبكتهن ثلاثتهن وشربتهن بدون مي لان ماعندي .

رجعت لفراشي غفيت براحه

من وره وصيه شكرية والخوف فزيت مرعوبه من انفتح باب السطح

شمرت المخده وره الغراض ورجعت تمددت

غمضت عيوني وعصرتهن حيل حتى ابين نايمة

صرخت بخوف من انفتح باب المخزن وانشمر على جسمي .

للـحكـايـة بـقـية

رأيكم ؟ توقعاتكم ؟

أستودعكم ألي عينه ما تنام 💕

-أستغفر الله.

-سُبحان الله.

-الحمدُ لله.

-لا إله إلا الله.

-الله أكبر.

-سُبحان الله و بحمده.

-سُبحان الله العظيم.

-أستغفر الله و أتوبُ إليهِ.

-لا حول و لا قوة إلا بالله.

-اللهُم صلِ على مُحمد وآل مُحمد.


━━━━━━━━━━━━━━━━━━━━━━━━━━

🌸 هل أعجبتك أحداث القصة؟

💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:

🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام

نتشرف بوجودكم دائماً في عائلة كيمو ستوريز! 🌸

━━━━━━━━━━━━━━━━━━━━━━━━━━

2026/11/15 · 0 مشاهدة · 3890 كلمة
yare.yare
إعلان
نادي الروايات - 2026