8 - الفصل 8: الـقـا؏ الـسـابع

الأدعج "قاع الظلام "

بقلمـَي زهرة الساعدي

لطفًا فراشاتي دوسن على النجمة وعلقن بين الفقرات

حساب الانستا

zahralsadi

قناة التلي

zahralsadi

ياحبيبي وصاحـبي وحـزن القـصيدة

انتَ أول ضيم يچويني وأريده .

صرخت بخوف من انفتح باب المخزن وانشمر على جسمي

جثه بني أدم

ظل جسمي يوجعني وگلبي ينبض بقوة

رفعت نفسي وخرت الجسد من فوگاي وزحفت للزوية

سمعت صوت أنين ، صوت بنية يون بتعب

همست بخوف

- منو انتِ ؟

جاوبتني بصوت متعب

- حسين اريـد حسين يخاف وحده اريدة

رخيت جسمي وظليت صافنه اركز بهلوستها

تردد بأسم واحد وتون بتعب

- حسين خطيه لا تأذونه هو مريض

تقربت منها دغيتها بأيدي واردفت

- شجابچ هنا !

- جيبلي حسين يموت بدوني راح يأذونه

احتاريت شسوي ردت اطلع للسطح لگيت الباب مقفول علينا

ظليت گاعده وهيَّ ثانية وحدة ما سكتت

سديت أذاناتي تعبت واني اسمع مثل الأسم يتكرر والجملة مثلها

جاي تنعاد طول الليل

ظليت اهتز بقوة وارجف واستمر هذا الوضع للصبح

طلع الضوه دخل من جوا الباب

ظل يضوي المنطقة الجوا الباب فقط

ردت اشوفها سحبتها من رجليها وخليت وجهها جوه الباب

گدرت المحها لكن مو قوي اتمعنت بتفاصيلها يله عرفت

بنيه يجي عمُرها بالعشيرانات

ملامحها حاده ولونها خمري

شعرها مجعد بخفه وصاير على وجها

مديت ايدي بعدت گذلتها من وجها . تحركت اشفايفها اليابسه ونطقت

- اريد حسين

رفعت راسها خليته على فخذي

ضربت وجهها اريدها تصحى ماكو فاقدة حچيت بصوت قوي

- اگعدي يله اجيبلچ حسين

فتحت عيونها بثگل شافتني ورجعت غمضت

- گعدت روحي جيبلي حسين اريده

احتاريت شسوي ؟ شحچي وياها ! البنية فاقدة وتهلوس

تقدمت اضرب بالباب ما اجاني جواب

گعدت اباوعلها ركزت بوجها اريد اعرف شصارلها ؟

منو حسين ! شوصلها للبناية ؟

شهگت بخوف من سمعت صوت باب السطح انفتح

گمت وگفت يمها وعيني على الباب منتظرته ينفتح

دخلوا علينه المدام و وياها حراس يخوفون بالشكل

وجهت كلامها إلي

- ملوك : انزلي أخذي الغراض وروحي للشغل

هزيت راسي ومشيت . يم الباب التفت من سمعت صرختها

شفت الحراس يعتدون عليها . غمضت عيوني بحزن ومشيت

على طول الطريق أسمع صوت صرخاتها

ماگدرت اكمل طريقي ماگدرت اعوفها

گلبي فززني عليها بسرعة خطرت على بالي فكرة

رجعت اركض يم باب المخزن وگفت

شفت شاگين ملابسها وجاي يبدون بفعلتهم .

صرخت بصوت قوي خلاهم يتوقفون

- هجمو على البناية الملثمين

شهگت بخوف واردفت

- ملوك : عوفها وانزلو ركض

سمعو كلمتها ابتعدوا منها وهيَ وياهم نزلوا يركضون

ركضتلها حضنتها بقوة واني امسد على شعرها واردد

- ماسولچ شي ماگدرو يغتصبونچ

ماجاوبتني رفعت راسها لوجهي غمضت عيونها

صرت اطبطب على وجهها اصحيها رجعت فقـدت

نزلت راسها للأرض واردفت

- قـاومي هسة اجيـچ

عفتها ونزلت اركض لشكرية

لگيتها تحف بوحدة بالمطبـخ ضربت جبيني وگلت

- من الصبح تحفين

مو وكتها شكرية الحگي البنية تخربطت

عافت الخيط وردت

- شكرية : طابوگه نامت فوگاچ يشكرية

بس بالمصايب ينصاح أسمچ

- تعاي وياي فدوة خاف ماتت اني أخاف

- شكرية : ياهيه ؟

- البنية الجديدة

شهگت بخوف وردت

- شكرية : لو أمـوت ما اتقربلها

- ليش ؟

- شكرية : المـدام وصـت تنگص رگبته اليتقرب

لـ شاه

عقدت حواجبي مستغربة

رجعت هيَّ تحف أخذت ماي وصعدت اركض

لگيتها مثل حركتها عبـالي ماتت

تقدمتلها بخوف

شمرت المـاي على وجهها واردفت

- شاه اگعدي

فتحت عيونها التعبانة غلقتهن ورجعت فتحتهن

بصوتها المبحوح گالت

- شاه : شكرًا لأن نقـذتيني

ابتسمت بوجهها ورديت

- عوفي الشكر على صفحه گومي حبابه ليش كل ساع متخربطه

غمضت بـدون لا تجاوب ضربتها راشدي قوي

گمزت متألمه

- شاه : ما اتخربطت ليش هيچ

- ها عبالي انغمى عليچ طرگتچ بطراگي

رفعت نفسها ساعدتها نزلت نظراتها لملابسها

احتاريت لأن اني ماعندي ملابس

ظاله اللبس بـ ملابس ماريا

طلعت من العلاگه بجامه وقميص تقدمت لبستها

جرت نفس واردفت

- شاه : اريـد اطلع منا

- وين ؟

- شاه : اريد اروح لـ حسين

- منو هذا حسين الطگيتي راسي من ورا

- شاه : حسين أخوي

- شبي ؟ وينه !

تتكلم بتبعثر وضيـاع

- شاه : ماعرف هيَّ أخذته وشمرتني هنـا

طلعيني اريد اروحله يموت بدوني

باوعتلها حايرة بهل اثناء رجعت

سحبتني طلعتني وقفلت الباب عليها حچيت بحرگه

- ليـش هيچ تسوين وياها ؟

- ملوك : ماعليـچ انزلي انتِ

- ما انـزل اليوم ما حابه اروح للشغل

بعدني ما مكملة ضربتني راشدي فرتني فـر

لزمـت خدي الاشتعل نار گمت صرت گبالها

بصقت على باطن إيدي وطرگتها

- هذا طراگ يعدل معانيچ الفالته وطبعچ السرسري

يا شريرة ياعار ياعجوز البين

لـزمتني نهتني نهي وگعت بالأرض بصقت دم

جرحت شفتي رفعتني من اذراعي واردفت

- ملوك : گومي اطلعي واليوم اذا ماجبتي المبلغ اذبحچ

عافتني ونزلت ظليت فترة بـمكاني

رفعت نفسي نزلت غسلت وتوجهت للشغل

گعدت على الـرصيف أبيع

للـظهر استغربت الأدعج ليش ما أجاني !

توجهت للمـحل نزلت الغراض يم الباب

ماشافوني مندمجين يحچون سوه وقفني حديثهم

- الأدعج : تدري بيه انـه ماخايف على روحي خايف عليهم

- أدم : لازم نطلعهم من العراق

- الأدعج : والوالد يقبل ؟ شـفت بعينك البارحه شلون رفض

- أدم : نلگه طريقة نقنعه بيها

- الأدعج : ولك مو عايش ويا انتَ وتعرفه من يقفل

قفله الساده بـعد

- أدم : تـريد الصدگ ؟

- الأدعج : اي گوله

- أدم : السيد من درة بعلاقتك وي وتين اتخبل

يگول اول تالـي ذو الفقار هيچ يسوي !

- الأدعج : فهمته گتله يابه البنت مالها دخل بالجاي تمر بي

حبابه وفقيرة

- أدم : صالك شهر على هاي سالفتك

وين ماتشوف السيد تگعد تمدحله بـ وتين

- الأدعج : شهر وهو قافل يسمع منـا ويطلع منا

والله ليش لأن سأل عليها وعرف هيَّ تبيع وعايشه هناك

- أدم : حقه لأن مايعرفها لو يگعد وياها ويسولف

يغير نظرته

مسح على شواربه ولحيته ورد

- الأدعج : الله يسهلها

- أدم : امين يخوي گلبك بلاك بلوه

- الأدعج : واحلى بلوه

اختنگت ونزلت دموعي حسيت بنقص

وهـذا النقص الدائمًا احسه لو شما أسوي

لو شما اتصرف ابقى اني وحدة تبيع وساكنه بذيچ المنطقة

مسحت ادموعي ورفعت غراضي طلع صوت التفتو عليَّ

گمز من مكانه خايف لا سامعه

- الأدعج : وتيني شجابچ بوية ؟

حـاولت ابين طبيعيه جريت نفس ورديت

- شنو الجديد مو كل يوم اجيكم

- الأدعج : أعرف بس شوكت اجيتي شو ماحسيت عليچ

- هسة اجيت

- الأدعج : تعاي ادخلي

- لا اريد اروح

عقد حواجبه مد ايده نزل اللثام على رقبتي

شاف شفتي المجروحه قبض كف ايده بقوة

برزت عروگه وعيونه الداكنه بالسواد صارت حمرة

- الأدعج : ضربتچ

هزيت راسي بـ معنى اي وبچيت

راد يمسح دموعي يمد ايده وقبل لا يلمس وجهي يبعدها

- الأدعج : الها الله الليلة

- لازم اروح للبناية

- الأدعج : انتِ مكانچ بگلبي مو بالبناية

ظليت اباوعله بعيوني اسولف واللساني ساكت

بلع ريگه ودخل لـ أدم شوي وطلع

فتحت السيارة واردف

- الأدعج : اصعدي

- وين نروح ؟

- الأدعج : تعاي وياي ولا تسألين

صعدت ويا طول الطريق ساكتين

اتوقف يم بيت طلع من عنده ولد

شفته وشهگت هذا الوصلهم لكركوك

ابتسم النا وگال

- السلام عليكم

- الأدعج : وعليكم السلام ورحمة الله وبركاته

- شلونك كابتن شخبارك ؟

- الأدعج : نحمـد الله اي گول وصلوا شلونهم ؟

- وصلوا بخير وسلامه من كركوك وعبرو

وهسة هم بالمانيا وهاي أمانه ندزت للكوبرا

قدملي القمصلة الچانت لابستها ماريا

أخذتها منه خليتها على گلبي وبچيت

رفعتها اشم وابوس بيها ودع الولد شكره ومشه

- الأدعج : هاي أول شي وهسة رايحين للثاني

مسحت وجهي ورديت

- شنو الثاني

ما جاوبني بس هز راسه واني التهيت اشم بالقمصلة

وگف يم مستشفى . نزل فتحلي الباب

لبست قمصلة ماريا ونزلت

دخلنا جوه بس عرف عن نفسه كلها رحبت بي

دخلنه لغرفة . شفت عمو ابو فواطم نايم ويم راسه فواطم

- الأدعج : سوه عملية ونجحت اتحمديله بالسلامة

ضحكت بفرح تقدمت بسته من راسه واردفت

- الحمدلله على سلامتك عمو

فتح عيونه رد بصوت هادء

- ابو فواطم : الله يسلمچ بابه

گعدنا يمه بقينا نسولف شوي وطلعنا

بالممر لاگته ام فواطم نظراتها وحركاتها مو راحه گدام الأدعج

عافها ومشه گبالي ردت امشي وقفتني وكالت

- شنو رأيچ اگول للمدام على الجاي يصير وره ظهرها ؟

ماعرفت شنو ارد خفت من تهديدها

عفتها ومشيت واني ارجف والف فكرة ابالي

صعدت بالسيارة مشه بينا ماعرف وين

واني بالي سارح مو يمه

ظلت تمطر خفيف والهوى بارد

ابتسمت وحچيت

- تدري امنيتي بدون خوف افتح شعري

وارفع اديه وافتر جوه المطر واگمز مثل الاطفال

ما جاوبني اكتفه بهزه راسه واني سندت راسي على الجام

اتوقفنا فوگ الجسر نزلنا سوه

صار گبالي واردف

- الأدعج : يله حققي امنيتچ

ابتسمتله بتعب واتحقق الاتمنى

شـعور الحرية ، تحقيق ابسط الاحلام ، السعادة

كلهن جاي احس بيهن وأعيشهن

نزلت اللثام على رقبتي نزعت الكبوس وشمرته

وهاي أول مرة اسويها وانزعه

فتحت شعري رفعت إديه للهوى

رفعت راسي وغمضت عيوني وتركت روحي للهوى

يتحكم بيها .

افتريت بهدوء والابتسامه مزينه ملامحـي

جـريت نفس عميق خالـي من القلق والتعب والخوف

منظر عادي لكن كبير عنـدي

شعـور عند البعض بسـيط لكن عندي ثمين ، وثمين جدًا

إعلان

فتحت عيوني صار گبالي ساند ظهره على السياج

يدخن جكاره ويباوعلي

صرت قريبه منه وگلت

- انتَ حـققت حلم طفولة وتينك

شمر الجكاره . ابتسم ورد بهيام

" الأدعج انخلق حتى يحقق أماني وتينه "

ابتسمت وبعدت خصلات شعري اللزگت على وجهي

من حبات المطر مـد ايده راد يبعد شعري

قبضها ورجعها وگال

- ما اريـد أذنـب بعلاقتنا بعد أكثر أخاف الله ما يوفقنا

نزع الشماغ من فوك راسه خلاه فوگ راسي غطه شعري

ابتسم وگال

- الأدعج : كافي بعد شعرچ مايطلع

نزلت نظراتي ورديت

- صـح انتَ هواي تحملت حرام من وراي

اتنهدت زفر نفسه بتعب واردف

" انتِ انضف حرام ارتكبته "

" روحي تريد روحچ بوية وتين "

"خـالفت أهلي وعاداتنا وتقالدينا وديني كله علمـودچ "

رديت بنبرة حزن اريد بس حجه حتى يبتعد مني

لكن إصراره أقوى مني

- اذا هيـچ عـوفني

- الأدعج : هو انـه اگدر اعوفچ ؟ من اروح رحلة

بالطيارة وابين الغيوم

"واحس نفسي مختنگ لأن ماشايف عيونچ "

دنگت افكر بكلامه

صراع قوي مابين القلب والعقل

حرب عارمة مابين روحي وجسدي

أفكر بكلامه وكلام أبو وارجع افكر بغزله اليبهج روحي

وانسى كلشي وافقد ويا .

- الأدعج : انه ماعوفچ انه اعلمچ واسويچ أحسن مني

- الناس راح تحچي عليك

ثنه شفته ورد

- الأدعج : شبعت حچي

- يعني حچو عليك لان انتَ صديقي

غمض عيونة وفتحن . ذب حسره ورد

- الأدعج : ماعليّ بالعالم . گلبي هواچ وقفل

صرت ما أسمع للناس ولا افهمهم ولا ابرر

" أريد اخلص عمري الجاي وياچ وتيني "

دنگت والخنگه احتلت صدري

وگلبي ينبض بقوة يريد يطلع مني

من بين صراعاتي

أخذت قراري وقررت ابتعد منه

كلشي صار ضدي بيوم واحد رفض ابو

وتهديد ام فواطم قررت ادوس على گلبي وابتعد

علموده ، علمود لا يتأذه

قاطع حبل افكاري المتشابكة واردف

- الأدعج : وين سرحتي ؟

- هيچ

- الأدعج : وتيني

- ها

- الأدعج : ماريد شعرچ يطلع يم غيري

ثنيت شفتي ورديت

- هاي اول مرة واحد يشوفه دائمًا مخليه الكبوس عليّ

اخاف منها لا تگصه

- الأدعج : حتى اگص راسها وحگ الگطعو چفوفه غـدر

مارديت علي كمل هو

- الأدعج : شبيچ ؟

- تعبانه اريد ارجع

حچه بنبره خوف

- الأدعج : مريضه ؟

- لا بس تعبانة ونعسانة

- الأدعج : اصعدي للسيارة

هزيت راسي وصعدت والنار تلسع بگلبي

شميت القمصلة هلبت ارتاح اجه صعد

لفحتني ريحته غمضت عيني واني استنشق عطره

هو هـذا الاريد اشمه ، عطره الماكو منه

شلون راح ابتعد ؟

الگلب شلون يگدر بدون ادعجه ؟

وشلون وشلون ،، خلصت الطريق كله اسأل لحد ماوصلني

نزلني حتى ما انطيت مجال گبل اخذت اغراضي ومشيت

اسمع صوته وراي عصرت عيوني وطاحت دموعي على خدي

ما التفت اله دخلت للبناية شمرت الغراض سلمتها الفلوس وصعدت

اول مادخلت السطح انقفل الباب عليننه

اتمددت بمكاني وسرحت في مرسى أفكاري

بالليل انفتح الباب بدلت وطلعت للسطح

گعدت على البلوكه ورفعت راسي للسماء

شفت نفس النجمة التلمع ظليت احچي وياها

واتخيلها هَّو

- بعد وين اروح وارتاح ؟

عد منو اشكي

وياهو الياخذ حقي !

راح ارجع لأيام قبل

راح اشتاق لسوالفك

راح اشتاق لكلمة بوية الاحبها منه

بچيت

وهواي بچيت

عشت لحظات صُراع مابين العقل والگلب

العقل يشجعني على فكرتي ويگلي ابتعدي منه حتى لا يتأذه

والگلب يرفضها ومايريد يبتعد من الأدعج لان لگه الأمان يمه

طلعت من المخزن واردفت

- شاه : شبيچ ليش تبچين ؟

مسحت وجهي ورديت

- مابيه شي

اجت گعدت بصفي چتفت اديها ورفعت راسها للسماء

- شاه : على منو جاي تباوعين و ويامن تحجين

- اباوعله واحچي ويا

- شاه : منو هو ؟

- الجندي المخفي الدائمًا يحميني

- شاه : لعد ليش جاي تبچين

- راح اعوفه

- شاه : اذا هو يحميچ ليش تعوفينا

- مجبوره

- شاه : سوه شي وياچ ؟

- لا

- شاه : لعد ليش ؟

- ابو رافض وجود وحده بحياته مثل وضعي

- شاه : خل يقنعه

- شيقنعه ؟

- شاه : تزوجون غيـر

- لا يازواج هذا

- شاه : لعد شنو ؟

- احنا اصدقاء بس

- شاه : كل هاي الدموع الچنهن شلال

وتگليلي اصدقاء لا حبيبتي ما اقتنع

- ماگدر اتخيله غير شي تذبحني

- شاه : ليش

- تكره نكون علاقات حتى بصداقتي بس ماتدري

- شاه : وهسة انتِ تحبينه بس تخافين منها مو ؟

بلعت ريگي ومارديت ظلت گاعده يمي

تباوع للسماء ودموعها تجري واني كذلك

كلمن عدها قصة بحياتها

وكل وحدة بينا بيها هم محد يحملة

راحت دخلت للمخزن بقيت بمكاني

تركتني وخلت عقلي يتشتت من سؤالها

- معقولة اني احبه ؟ لا لا مستُحيل لا هو صديقي وبس

ماريد احبه ماريد أذي بحُبي

فززني صوت الصياح الجاي من جوه البناية

سديت أذني وغلقت عيوني ماحسيت اله نشاليت ونرگعت

فتحت عيني بصدمة شفتها هيَّ وحراسها

- ملوك : انتِ ماكو غيرچ

صرخت بصوت قوي ورديت

- شنو اني فهميني لا تنچلبين ؟؟

- ملوك : انتِ جاي تطلعين معلوماتنا انتِ الهربتي الملفات

صفنت ما فاهمه شگگت ملابسي وصاحت

- ملوك : ضامتهن طلعيهن

- شوكت نازله جوه اني اشو من الشغل للمخزن

- ملوك : لعد منو ؟ منو الصلف غيرچ يسويها

- روحي للبنات البقيه ليش اجيتي عليَّ أول وحدة

- ملوك : الملفات هسة اختفن يعني بعدهن ماطالعات من البناية

اريد تخلقوهن إلي روحو فتشو وحدة وحدة

نزلوا كلهم يركضون سترت نفسي وگمت للمخزن

طلعت ملابس الشغل ولبستهن لان ما عندي بعد ملابس

سمعت صوت شاه تناشغ بس ما المحها نايمه گاعده وينها

مديت اديه لزمت الحايط سندت ظهري عليّ وگعدت

خليت وجهي ابين رجليه وظليت انحب

مرت الساعات واني بنفس المكان وهيَّ على نفس الونه

صار صوت بالسطح رفعت راسي مسحت وجهي

گمت فتحت الباب شوي خليت عيني شفت اثنين ملثمين

يمشون بهدوء شهگت وخليت ايدي على حلگي

عبالي حراميه

سديت الباب بهدوء .رجعت ادور على شاه

بدون لا اشوفها دست ابطنها صرخت بصوت

نمت فوگاها وخليت أيدي على حلگها

همست بأذنها

- اجونا حراميه اش

سكتت وحتى انفاسها هدت

بعدت أيدي وحچيت بصوت خافت

- هاي هنا اكو حدايد خل ناخذهن واذا اجونا نضربهم

همست بأذني

- شاه : اني اخاف

- انچبي ونفذي الاگًوله لا اشمرچ الهم

قبلت بالگلته زحفت وعلى اللمس أخذت حدايد

انطيتها وحدة وإلي وحدة

زحفنا يم الباب صرنا وحدة منا و وحدة منا

حضرنا نفسنا والحدايد بس يدخلون علينا نضربهم

نسمع صوت وشوشتهم قربت يم بابنا

صوت دگات گلبنا ينسمع وانفاسنا انقطعت من الخوف

انفتح الباب ودخل واحد منهم

گامت شاه وضربته على راسه وگع على وجها وصار بالمخزن

سمعت صوت قوي يحچي وهذا صوته

- الأدعج : لا أدم

شهگت وشمرت الحديدة گمت لـ شاه

وهاي اتخبلت علينا ظلت تضرب بـ أدم على ظهره بقوة

تضرب بي وتحچي

- شاه : حقير كلب حرامي بواگ عساك بالموت

يا مطي يا ثور

سحبتها من خصرها وصرخت

- ولچ هذا أدم عوفي

دخل الأدعج بيده لايت شاف أدم واتخبل

نومه على ضهره وضل يضرب بوجها

- الأدعج : أدم خويه اصحى

ضل يضرب بوجها لحد ما فتح عيونة بثكل

رفعه وصاح بصوت قوي

- الأدعج : انعل شيطانچ وانعل ابو الرومانسيه الجاي اطبقها وياچ

وخرب روحه اليجي يشوفچ بعد

صايرتلي مقاتل العرمة

حچه هيچ سند أدم ومشه

منين طلع شلون گدر يدخل ماعـرف

لزمت شاه الملخت روحها تملخ

لا خلت وجه ولا قميص زلغت وجهها وشگت ملابسها

- شاه : مات اصخام الصخمني قتلته

فلك الصابني كله من وراچ انتِ الخليتني اضربه

دفرتها ورديت

- يعني شمدريني غير عبالي حراميه

- شاه : مات يمكن مات ثور شكبره وشگده صار جثه من وراي

- لا ما يموت ماعلي شيء

- شاه : شنو هذا البرود العندچ ولچ امشينا ورا

تمددت ورديت

- اي روحي انزلي وشوفي الـراح تشوفينا

لطمت وردت

- شاه : مـاريد أصير مجرمة اني هم ما كتلهم

انوب اكتل ثور واصير مجرمة براسه

دهر الدهرني

- يمعودة تعاي نامي هو ثور باچر تلكينا يركض

ويدردم لسانه شطوله

- شاه : يعني ما يموت

- لا يمعودة باچر الگا بالمحل ههههه اروح اتشمت بي

- شاه : دهر الدهرني

- دتعاي نامي يا خيه تعاي

مسحت وجهها واتمددت بصفي

اتنهدت وگالت

- شاه : عادي افضفض الچ

نمت على صفحتي صرت بصفها ورديت

- كلش عادي

گامت سدت الباب صارت عتمة بالزايد

رجعت يمي

غمـضت عيوني اسمعها وهيَ بلشت تسردلي قصتها

انولدت وطلعت من بطن أم حنونة

علمتني الصدق والحبُ والوفاء والاحسان

علمتني الصلاة والصوم والزكاء

علمتني كلشي بي خير إلي

عكس ابوي ، ابوي بس بالأسم

يشرب ، يزني ، يكتل أمي ، راواها انواع العذاب

اتحملت علمودي ، لـحد ماحبلت وبولادتها توفت

جابت حسين وراحت من هاي الدنيا

كسرتني بروحتها ، ربيت حسين وصرتله أم وأب

هو من ذوالاحتيايجات الخاصة وبي توحد

بس اني يحبني وياكل من أديه

اجتنا مرة ابو وطلعت أخس منه

عشنا طول هاي السنين بالحسرات

اتخيلي أنام بره ماتخلينا ندخل جوه

بدون فراش على صبه الطرمه نتمدد ونغفى

سـوت بيتنه بيت دعاره وهو ماحچه اروحلة

اگله بابا بنتك شابه خاف عليها

جوابه كان ضحك ويضربني وارجع مكسوره

وبليلة ظلمة اجتني وگالت انتهى دورچ بهذا البيت

باعتني لهاي المدام اني وأخوي

انطتها فلـوس وأخذتنا

صرخت لطمت

بست رجليهم بس ابقى يمهم وكلشي اتحمل

ماقبلو سحلوني سحـل خارج البيت وهيَّ أجت اخذتني

فرقتني عن حسين

هسة راح يموت اني أعرفه

مايرهم بـدوني .

نـزلت دموعي واني أسمع إلها

انمرد گلبي وفرفحت روحي

كل وحدة عدها قصة اسوء من الثانية

كل وحدة انباعت للمدام هيَ مظلومة ومكسورة

حضنتها اواسي بيها واصبرها حسيتها ماريا

صرت اسولفلها على ماريا حبتها ودعتلها

ظلينه نسولف لـحد ما تعبنا ونمنا

ثاني يوم گعدت وهيَّ تريد تنزل ماخلتها

طلعت اني وقفلوا الباب عليها زفرت بتعب ومشيت

لبست وطلعت شفت مكان عربانة عمو برطمت اشفايفي بزعل

دمعت عيوني ومشيت مريت من ركن دربونتهم

جاي اعبرها اتوقفت من شفت هوسه الجيران ملتمه ابابهم

مشيت بخوف واني كل ظني طلع من المستشفى واجو يشوفونا

بـس خاب الظن من طلعت ابينهم فواطم تبچي

بكسره . وخيبه . وقهر . وعيون حمره . واشفايف ترجف . نطقت

- فواطم : وتـيـن أبوي مـات

للـحكـايـة بـقـية

رأيكم ؟ توقعاتكم ؟

أستودعكم ألي عينه ما تنام 💕

-أستغفر الله.

-سُبحان الله.

-الحمدُ لله.

-لا إله إلا الله.

-الله أكبر.

-سُبحان الله و بحمده.

-سُبحان الله العظيم.

-أستغفر الله و أتوبُ إليهِ.

-لا حول و لا قوة إلا بالله.

-اللهُم صلِ على مُحمد وآل مُحمد.


━━━━━━━━━━━━━━━━━━━━━━━━━━

🌸 هل أعجبتك أحداث القصة؟

💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:

🔗 تابع القراءة عبر موقعنا الرسمي من هنا: https://kimostories.site/novel/418/الادعج-قاع-الظلام

نتشرف بوجودكم دائماً في عائلة كيمو ستوريز! 🌸

━━━━━━━━━━━━━━━━━━━━━━━━━━

2026/11/15 · 0 مشاهدة · 3123 كلمة
yare.yare
إعلان
نادي الروايات - 2026