جاء بسرعه ووقف ورا البيت من جته اليسار ورتب شكله ودخل على طول توجه لـ راكـد اللي كان ماسك البخور يبخر الضيفان مسكه راكـد بهمس : لا يشيخ كان جلست للفجر وش عندك متاخر
ركـود بنفس مستوى الهمس : يرجال وش عرفني إنكم فجاءه قررتو تسوون عشاء
سكت شوي وهو يفكر أردف وهو يزود البخور وقال : إلا وش السالفه ليه ابوي مسوي عشاء ؟
إيـاد من وراه وهو يعدل عقاله : أبدا بس ناقه ابوي مليحه جابت حوار وقرر الوالد القائد انه يسوي عشاء
لف له ركـود وهو يتقدم لمنتصف المجلس البهي وقال بصوت شبه مسموع : اقدح يبوي والله ماهي هينه الناقه ذي ماشاءالله تبارك الرحمن
تقدم لصوب أبوه وهو مبتسم انحنى لمستوا أبوه وهو يقول : تبخر يشيخ تبخر
نافع وهو من دخل ونظراته كانت عليه لين تقدم له وبيده البخور أردف : عشت ولدي كان انتظرت العشاء يستوي وتقلطه !!
ركـود ويده تمسك شماغ أبوه من يمين ويبخره : يبوي والله كنت بوسط الوادي تعرفني ماجلس كثير هنا ولا دريت ويوم دريت جيتك ركض
تنهد ابو ريان : اخلص بخر الضيفان .. سكت شوي .. وريان متى يعاود ماتعرف؟
ركود وهو بيمشي يبخر اللي جنب أبوه من يمين هز كتافه بمعنى لا واستمر يمشي على كل الموجودين بالمجلس لين آخرهم
وكملو اليوم عيال الشيخ نافع يقهوون ويرحبون لين قلطوهم على العشاء
-
عند الحريم :-
ام ريان : يلا يمك يـ إيان بسرعه بخري الحريم وانتي يمنال ومنار صبن قهوه وامشن على طول الحوش كله لا تخلون الصغير ولا الكبير إلا تقهوونهم وين البنات ؟ وين عنقاء وهيفاء وسمر !!
جاها صوت من وراها عنقاء : هلا يخاله هاذاني جايه بشيك على الشاهي والنعناع
هيفاء : وانا ارتب الكاسات يعميمه
سمر : وانا اجل بمسك مبخره ثانيه وأبخر مع إيان يلا مشينا
ام ريان برضى : الله يرضى عليكم يمي انتو ويسعد قلوبكم ولا يخليني منكم اشهد أنكم عزوتي وسندي
ضحكو البنات وبصوت واحد : امين ولنا يارب
إيان تحط البخور على الجمر : يلا قدامي روحي عند الحريم ولا أشوفك ماسكه شي خلاص يمه حنا نكفي
طلعت وهي تدعي لهم
كملو الليله سوالف وضحك وسعه صدر لين جاء العشاء وقلطو الحريم وتعشو وبدو الحريم يمشون وكالعاده عند ام ريان توصي ابو ريان دايما الأكل يتوزع على كل الديره ولا ينكب شي
-
في مكان آخر بعيد تمام البعد عن ديره الوادي وعن ديره السيوف عند ديره المعازف سميت معازف لكثرت الموسيقين اللي يتغنون بهاذه الأرض ، وقفت على الباب كعادتها تودع زوجها محمد النهار اللي ينتسب الي ديره الوادي وهي تعطيه ماء واكل يكفي طريقه اللي بيدوم يوم وشي رجوع الي ديره الوادي
ام سلطان : يلا ودعتك الله يبو سلطان والله ودي ماتروح اجلس بعد كم يوم شرايك!
ابو سلطان : والله ودي بس صار لي ثلاث شهور غايب ولزوم أعاود للديره تعرفين عندي عيال هناك وأم ساير ماودي تشك بشي لكن وعد باذن الله مني أجيك واجلس عندك ست شهور هاه وش رايك!
ابتسمت ام سلطان : الله يستر عليك والله مايهمني لو تدري افضل لي ولك كم صار لك على ذا الحال 20 سنه واكثر وانت تروح وتجي ولا حست فيك تبيها تحس الحين !!
عصب محمد وهو يتنحنح يبعد عن الباب ويغير الموضوع ع شان سلطان اللي كان يمشي متجه ناحيتهم ولا يبيه ينتبه على كلام امه لأنه يعرف قد ايش سلطان وده بأخوان لأنه وحيدهم : سلطان وراك ماتجي تسلم علي ؟ ودي امشي يلا اعجل
انتبهت ام سلطان سلمئ وهي تبعد لجل يطلع سلطان يسلم على أبوه سلطان وهو يبوس راس أبوه : والله ودي ماتروح يبوي ودي تجلس خلاص كم لك على ذا الحال ترحاله!
ابو سلطان بتسليك : ان شالله قريب قريب يلا فمان الله
وطلع متجه لديره الوادي سلطان طلع من عند امه متجه لـ جده نمر شيخ ديره المعازف وهاذي حياته اما يصيد ولا عند جده ولأنه الحفيد الأحب لشيخ نمر وجدا وله مكانه خاص عند رجال الديره كلهم يحبونه ويقدرونه ، دخل المجلس وفيه جده وكم شخص وسلم بصوت جمهوري : السلام عليكم يربع
الكل : وعليكم السلام .. حي الله السلطان .. ارحب
تقدم لجده وهو يجلس جنبه ويبوس رأسه
الجد : حيا الله ولد سلمى حي الله ولدي
سلطان : تبقى يشيخ تبقى
دخل عليهم سامي خال سلطان ومعه ولده سعود :
ابو سعود : سلام عليكم
سعود : شحالكم يالربع
كل من في المجلس : وعليكم السلام.. بخير علومك يسعود.. الله يسلمك شحالك يبو سعود ..
سامي : بخير الله يجعلكم بخير الجميع
جلس على يسار الجد وسعود جلس يمين سلطان وقال: ارحب يالعضيد شحالك
سلطان : ارحب انت بخير يبعدي شحالك انت
سعود : بخير يالعضيد.. هاه وش صار نطلع اليوم ؟
سلطان : أكيد متى تبي بس
سعود : والله ودي بعد صلاه الظهر كذا
سلطان يأشر على خشمه : تبشر والله على ذا الخشم
سعود مبتسم : تسلم لي يالعضيد عليه الشحم
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━