مازن يحاول يهدي نايف : خلاص يرجال اهدى اهدى انت وبنشوف وش السوات معهم روق روق يرجل امش امش خلنا نعادو ونشوف وش بخاطرها ونجيبه
نايف ابعد يد مازن اللي كانت فوق كتفه : لا لا ماودي اروح داخل لو دخلت بقلب الدينا فوق تحت وبزعل امي وانا تعرف ماقدر على زعلها
مازن تنهد قال : طيب امش يرجال خلنا نروح مربط الخيول ونسج
نايف مشى ويدينه بجيبه : اي والله ودي اروح للرعد مشينا
مازن بضحكة : مشينا
توجهو ناحيه مربط خيول الديره حيث يتجمعون كل الخيالين هناك وييبدون سباقات ومباريات لان المكان بعيد تقريبا عن الديره شويتين ويقدرون يأخذون راحتهم بالسباق والصراخ بدون ازعاج أهالي ديره الوادي
-
عند آثار
دخلت المطبخ على طول بدون لا تلتف لاحد وتوجهت لصنبور المياه الذي تحت بأخر ارجاء المطبخ لتسهيل عمليه التنظيف اللي سواه لها نايف تسهيل عليها تقدمت وانحنت له وفتحته وعلى طول غسلت وجهها المليان دموع وقفت وهي تمسح وجها بطرف ثوبها وهي تردف وتقول بصوت شبه مسموع : خلاص مستحيل اسمح لأي كان من هاذا البيت خصوصا يشوفني بذي الحاله خلاص
طلعت متقصده تروح لغرفتها او بالأصح المخزن اللي تنام فيه وقفتها ام ساير وهي جالسه تشرب الشاهي أخذت رشفه وقالت بصوت مسموع : على وين ان شاءالله وين رايحه؟
ردت عليها آثـار : بريح شوي صار لي من صباح الله خير اشتغل والحين الظهر بيأذن
نزلت الكاسه وهي تناظرها بطرف عين : لا يشيخه أميره انتي!! باقي الحوش مانظفتيه عاجبك جاء ابوك وهو كذا حوسه؟
ناظرت آثـار الحوش وعلامات الاستفهام على وجهها : يمه الله يهديك من وين تشوفين الحوسه مرتبته البارح وانتو عند عشاء الشيخ؟
وقفت صيته وتقدمت لها وهي تصفقها كف : اياً قليلة الحياء ماباقي إلا انتي عيل صار طولي وعلمني الصح من الغلط !
لفت آثـار لها ونفس كل مره مااستغربت ولا حتى جادلتها هالمره قالت اخفف على نفسي الضرب وارتب احسن لي ع الأقل اطلع بشي مفيد الضرب خف !
تقدمت لقدام واخذت المكنسه وبدت تنظف الحوش النظيف اساسا
طلعت هيًا وهي لابسه حلق ذهب وعقد صغير ولبس جديد : يمه يمه شوفي لبست اللي جاب لي ابوي الله يخليه لي يارب شرايك
وبدت تدور حولين نفسها توري أمها هدايا أبوها لها بينما آثـار ظلت تكنس وترتب الحوش حوالي نص ساعه وقفت وهي يالله تحس بظهرها تقدمت للمطبخ تركب الغداء على بال مايجون اخوانها ويتغدون خلصت الغداء الساعه 1:15 دقيقه
وهي تجلس على طرف باب المطبخ تناظر لـ صيته وهيّا وأبوها متوسطين جلست الحوش ويضحكون ومبسوطين ماهي إلا دقايق وسمعت طق الباب قامت هيًا وفتحت الباب ودخلو نايف ومازن وتقدمو وقبلو راس امهم وأبوهم وتوسط الجلسه وسوالف
محمد : هاه وين كنتو؟
مازن : والله مرينا مربط الخيول شوي يوم أذن الظهر رحنا صلينا جماعه حنا والربع
نايف : إلا ساير وينه،
مها وهي طالعه من غرفتها : نايم الأخ
محمد : صحيه صحيه الصلاه فاتته
راحت مها تصحي ساير ، محمد لف على صيته : هاه يام ساير الغداء زاهب؟ تراني واصل حدي من الجوع
صيته ناظرت آثـار اللي جالسه على باب المطبخ لفت وهي تبتسم : اي يبو ساير زاهب زاهب تبي نتغداء الحين ولا بعدين؟
محمد : لا والله الحين يلا قومو وسنعوه
لف نايف وشاف آثـار جالسه وقفت تدخل المطبخ وهي تسمعهم يتشاورون قام وراح لها دخل المطبخ وهو يبتسم : هاه الزين اليوم الغداء من تحت يدينه!
دخل مازن : وانت الصادق كل يوم من تحت يدينها العسل الله يخليها لنا اميرت الأميرات
التفت لهم آثـار وهي تبتسم : الحين نحطه اطلعو ريحو ويجيكم لعندكم
تقدم نايف اللي حس انه لازم هالمره يسوي شي لاخته
وقبّل رأسها : الله يطول بعمرك كانك شايله البيت كله فوق رأسك من صباح الله
طلعو وهم يجتمعون على السفره سوا وظلت هي آخر وحده كانت بتصرفها صيته بس نايف كان اسرع منها بخطوه وسحبها جنبه وبهمس مايسمعه إلا هي : تغدي تغدي ان عارف والله انك من البارح ماكلتي شي صح
أثار وهي تمد يدها الصغيره للصحن جنب يد نايف وتاكل بهدوء طبعها الهادي كساها بالحيل ، مها وهي ترفع يدها من الصحن قالت بمزح : لا يشيخ وش ذا النوم يساير اعقل اعقل وانتبه لنفسك ولصلاتك مو كل يوم على ذا الحال نصحيك وتاكل
صيته : عمئ يعمي عدوك اي والله شفيك مناشبه وليدي كفي شرك يـ مها
مها : يمه سلامات امزح معه تراني وش فيك قلبتي علي
مازن والأكل بفمه : بلا..بلاك مادريتي انه فلذة كبيدها يعيوني
نايف يضحكه مد يده من فوق راس آثـار وضربه على رأسه بخفيف : اقول اقول ابلع النعمه بعدها اهرج يشين طبعك يبو طبيع
مازن ويده من فوق راس آثـار متجهه لرأس نايف اللي كانت بين نايف ومازن ويحاول يضربه : اقول انت وش تبي الحين هاه وش تبي يرجال فكني بس
اما آثـار فكانت متعوده تجي دايما بينهم واحيانا تأكل لها ضربه واحيانا تصيب واحيانا تخيب ومكمله أكل عادي تحت أنظار هيًا اللي كانت تغار منها لدرجه ماتبيها تجلس مع اخوانها أبدا
خلصو غداء وقامت مها تساعد آثـار بتنظيف بتخفي بدون لا تدري أمها لأنها مستحيل تخليها تشيل الكاس عكس آثار اللي كل شي فوق رأسها
-
عند بطلنا
ركـود : حي الله ابو فيصل يرجال شهر وعليها ولا شفناك!
ريـان : والله عاد تعرفوني رحاله وهاذا طبعي من صغري وقلت اوري عيالي الدينا
أيـاد : يشيخ والله ناوي اصير نفسك واطلع هيثم وأمه بس ان شاء الله السنه الجايه بصير رحاله معك
ريـان : أبدا تم نمشي سوا
راكـد : يرجال انت وياها من يوم جلس ريان وانتو على نفس المنوال امشو امشو نروح مربط الخيل نتسابق
ركـود : والله مو بشينه يلا يلا بجيب الجلمود واتحدى احد يسبقني
راكـد : وش له اللي يسبقك ؟
ريان : ابي الكاسر لو سبقتك
ركـود : دور غيرها يبو فيصل دور غيرها مابدل الكاسر والجلمود بكنوز الدينا
ضحكو عليه وهم عارفين عز المعرفه غلات حصانه وطيره عنده منذ الصغر إيـاد : يلا يلا مشينا
قامو جميع متوجهين لمربط الخيول وكالعاده الفايز واحد من عيال الشيخ نافع حيث كانت تجتمع فيهم صفات الرجوله والشهامه والشجاعه من ذا الصغر رباهم أبوهم حتى حب الخيل وحب الوطن وحب الحلال
-
بعد مرور ثلاث اشهر على هذه الحال
في قرية المعازف سلطان وسعود يقنصون ويتبارون بسيوف وسباقات خيل وعلوم طيبه
وفي قريه السيوف شجاع وابوه واخوانه متميزين بكل شي بحل المشاكل ومساعده أهل الديره وسعه صدوره وعند بناته جاء الرفض من هناء للخطاب واعلن ابو شجاع ان مافيه نصيب
وفي قرية الوادي عند إيـاد جته بنوته زي القمر وسماها وريف وسوو لها تمايم عائلي حيث يسبق وريف هيثم الذي يكبرها بـ 7 سنوات
-
بمجلس الشيخ نافع اللي كان متوسط الجلسه هو وعياله فقط وأحفاده فيصل وفرح عيال ريان وهيثم والصغيره وريف وكانت بين يدين جدها يداعبها ويضحك معها قطع الضحك صوت ركـود اللي صدم كل الموجودين ، ركـود بدون تفكير : يبه احم
نافع ووجه صوب البنيه يلعبها : هلا يركـود أسمعك
ركـود بتوتر : أنا.. الصدق يبه أنا
لف صوبه نافع : برجال انطق وش فيك الهرج طار من ثمك !
ركـود من شاف وريف تولع فيها وصمل : أنا نويت...
احم احم الصدق يبو ريان أنا نويت الزواج
الكل ناظر صوب ركـود وعلامات الاستغراب تملاء وجيهم من ناحيه ريان اللي كانت جنبه فرح وراكـد وإياد مبسوطين على هيثم وفيصل
نافع تهلل وجه بالفرح واخيراً اخيرا بعد ماجلس يقنعه سنين جات اللي يسمعه من فمه وبلسان ركـود : يالله ياربي وانا عبدك يركـود يولدي انت صادق! تعال تعال اقرب اشوف عليك حراره مسخن ولا شي
يبوك انت واعي لعمرك!
ضحك ركـود وأردف : والله شفتك تحاول فيني من أربع سنين قلت يلا أفرحك
ضحك نافع وهو يمسح على وجهه : الله يوفقك وانا ابوك والله العظيم اثلجت صدري الحمدلله ماراحت أربع سنين من عمري عبث أقنعتك
سكت شوي .. رجع يُحادثه : هاه تبي اخطب لك على كيفي ولا فيه برأسك موال ؟
سكت شوي وهو يفكر : لا بالله مابراسي لا موال ولا غيره اللي ودك
نافع ابتسم : على بركه الله ابشر بعزك وانا ابوك اللي تبي على خشمي
ركود : تسلم تسلم عليه الشحم يبو ريان
إياد وراكـد : انت صامل؟
ريان : والله اني ماني متطمن وراك بلاء !
ركـود بضحكه : سلامات يطيب انت وياها وش فيكم بدال ما تباركون كذا تتكلمون
قامو جميع يباركون له راكـد يسلم عليه ومسك يدينه : ولو ماصر شي للحين بس يلا الف مبروك الله يوفقك
ركـود وهو شاد على يده : يبارك فيك وعقبالك
راكد : لا يرجال ويني ووين الزواج والخرابيط ذي أنا رجال ماحب الالتزامات ولا احب الـ
قاطعه صوت أبوه : اقول اعقل اعقل انت الثاني واعجل علي صرت شايب ولا معك شي !
راكد : والله شباب شباب يالقائد
نافع : اقول تعوذ من ابلييس وهون ولا والله ازعل عليك
سلامات ييوم عمرك قرب الثلاثين وأنت للحين عزوبي ؟
راكد : ابشر ابشر على خشمي بس عطني وقت اعدل وضعي وبعدين ابي أتزوج وحده يهواها القلب يبو ريان
نافع وهو يرفع عصاته : والله العصاء موجوده كانك تبي الحب والهوى
ضحكو عليه جميع وبدت سوالفهم العذبه الطريه
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━