عند محمد اللي من لمن رجع من قريه المعازف وهو يسرح ويفكر كثير جلست عنده صيته وهي تنزل الفطور قدامه وجلست وهو لسى مانتبه عليها ادرفت بصوت واضح : ابو ساير عسى ماشر وش فيك؟
صحى من افكاره ومسح وجهه وبدا يفطر بدون اي كلمه ولا رد عليها
استغربت صيته ونادت العيال والبنات يفطرون ثم قام بعد ماخلص من الاكل وغسل يدينه وطلع يمشي بارجاء تلك الديره تفحص هذا وهذاك ويسلم على الرايحه والجاي
عند صيته وعيالها ام ساير : اقول نايف يمه
نايف اخذ رشفه من فنجاله ونزله : سمي يمه
ام ساير : ابوك وش فيه علامه بس يفكر من عاود وهو مو طيب !
نايف وقف وحط شماغه على كتفه : مابه خلاف يمه اكيد انه يحسب بضاعته ويفكر وين بيروح هالمره يلا مع السلامه بلحق العيال
وطلع من عندها ، ام ساير وهي تتكي على مراكها ناظرت لـ أثـار اردفت بصوت عالي : اسمعي اليوم ابيك تعزلين المطبخ كامل يلا لا يجي الضحى الا وانتيي مخلصه حتى تبدين بالحوش عجلي
اخذت كاست الشاهي وسندت ظهرها على الجدار
أثـار وبيدها صحون الفطور اردفت بترجي : يمه تكفين خلي البنات يعاونوني على تعزيل المطبخ اتعب عليه مره ومستحيل اخلص منه قبل الظهر !
نزلت كاستها بعصبيه وهي تاخذ الحذوه -يكرم القارئ-
وترميها عليها وبعصبيه : انا بنت ابوي لعنبو حيك يالكسول عجزانه على المطبخ امشي قدامي لا بارك الله فيك يمسوده الوجه وعزلي المطبخ كله وقبل الضحى اخلصي علي بسرعه .. وهاتي نعالي -يكرم القارئ-
نزلت اللي بيدها انحنت للجزمه رفعتها وهي ترجعها عند صيته تقدمت اخذت الصحون ودخلت المطبخ تركت اللي بيدها وتحسست مكان الضربه اللي جت في وجهها تنهدت وكملت شغل وهي تغسل الصحون قالت : والله لو مو امي كان ..اهخ استغفرالله بس
وضحكت على نفسها وكملت وهي ساكته
-
عند مها وهي كانت تشوف كل اللي حصل جت عند امها وجلست وهي مره زعلانه على حاله اختها بس لو تكلمت بتذبحها امها ف سكتت وهي تكلم بنفسها : والله شكل حمل امي فيك يـ أثـار صعب وولدتها والا ليه امي تعاملك كذا الله يعينك بس
اخذت فنجالها وتقهوت وكالعاده الضيقه واصله لاخره على اختها بس مابيدها شي
-
عند محمد النهار اللي دخل للمسجد مع كذا شخص يلبون نداء الصلاه استعدادا لصلاة الظهر دخل المسجد كل رجال ديرة الوادي حيث كان مسجد كبييير ودخلو نافع وعياله راكـد وركـود وريان واياد وفيصل ولد ريان معهم صلو جماعه وبعد ماخلصو طلع كل شخص قاصد بيته وشغله واهله
-
طلع محمد متقدم لبيته ولكن فكره مو معه يفكر بذاك اليوم
محمد ومعه حصانين حصان كان فوقه وحصان وراه يشيل معه باقي الاغراض وبيده ماسكه لجام الحصان الثاني طلع من ديره المعازف من عند سلطان وام سلطان وهو متقدم سمع حديث رجلين من رجال ديره المعازف اردف احدهم قاصد يسمعه محمد : ابدا والله يرجل والله بعض الرجال مادري كيف عايش كل فتره يروح ويرجع
رد الثاني بصوت اعلى : يرجال مايحتاج يعيشون هذول يتخبون ورا ظهر الشيوخ وبناتهم يتزوج بنت شيخ ولا احد يعرف هو من وين ووش ديرته اساسا
رد الثاني بنفس مستوى صوته صاحبه : يرجال هذول مفروض محد ياخذ منهم ولا يزوجهم خصوصا الشيوخ وبنات وعيال الشيوخ مفروض يردعونهم
ضحك خويه : اي والله انك صادق بس البلاء
رفع صوته هنا اعلى من قبل .. البلاء يخوك اذا بنت الشيخ هوت لها واحد والشيخ استضله وزوجهم
ضحك الثاني معه نزل عليهم محمد ومشى اتجاههم والعصيبه والغضب طالع من وجهه قال بحده : تعقب وتخسي انت وياه تتكلمون على الناس من ورا ظهورهم !!
رد واحد منهم : احد جاب طاريك خير وش تبي ؟
رد الثاني يمسك خويه : امش امش يرجال اللي فوق راسه بطحه يتحسسها
مشو وهم يضحكون ويكملون سوالف بينما محمد اعتلاه الغضب بالحييل من كلامهم رجع لحصانه وانطلق بسرعه البرق
كان يفكر بهذا اليوم والاحداث اللي صارت فيها لين قطع صوت افكاره لمن سمع صوت ينادي عليه ،
طلع نافع وعياله من المسجد وشاف محمد يمشي ومعطيه ظهره نادا عليه وهو : يبو ساير !
عقد حواجبه مشى لين ظلت مسافه صغيره بينهم رجع يكرر
: محمد ! يبو ساير ؟
لف عليه محمد ابتسم لمن عرف انه الشيخ مد يده يسلم عليه : معليش يشيخ مانتبهت لك
رد السلام نافع واخذو علوم بعض لين نطق نافع : يبو ساير ان شاءالله انا واهلي بعد صلاه العصر جايينك بموضوع
رد محمد : حياك الله يشيخ البيت بيتك
نافع : تسلم يبو ساير
قاطعم صوت واحد من وراهم : يشيخ يشيخ ودي اياك بموضوع
لف عليه نافع ثم رجع يناظر محمد اردف يقول
: يلا فمان الله يبو ساير على وعدنا بأذن الله بعد صلاه العصر مع السلامه
مشى مع الرجال اللي جايه بعد مارد عليه ابو ساير بالموافقة وتقدم محمد لبيته وراح نافع لمجلسه مع الرجال ،
عند العيال اللي كان كل شي تحت انظارهم وعلى مسامعهم
لف راكـد وهو يضحك : والله صامل ابو ريان
لف عليه اياد بستغراب : ليه وش فيه ابوي ؟
راكـد : يخطب للشيخ اللي جنبك
لفو اياد وريان على ركـود بصدمه ، ريان ابتسم : يرجال طلعت صادق بموضوعك والله اني قلت ركـود مستحيل يترك الطيور والخيل
ضحك مُكمل : مير شكلك طحت ومحد سمى عليك
ضحك اياد : يرجال والله العظيم اني قلت بيجي لابوي الصباح مغير رايه خفت على ظغط ابوي ماهقيت انه صامل !
رد ركـود بانزعاج : اقول لا يكثر انت وياه والطيور والخيل ماخليهم وانا ولد نافع
ومشى وتركهم ريان : يولد هذا علامه عصب علينا ؟
راكـد لف على الباقين وهو يرفع كتافه بمعنى مدري عنه ومشو كلن متجه لبيته وحلاله
-
الساعه 2:45 مساء
في بيت الشيخ نافع بعد ماجمع عياله كلهم وبعد ماكلن اخذ نصيبه من الغداء جالسين فالحوش ام وابو ريان فصدر الجلسه على يمينهم ريان وراكـد وفيصل وعلى يسارهم ركـود واياد وهيثم بحضن ابوه
نافع نزل فنجاله لف صوب ام ريان : ابشرك يام ريان ركـود هداه الله وناوي يعرس
تهلل الفرح بوجه ام ريان ولفت صوب ركـود : صدق يمه ودك بالعرس...
ابتسمت يعسى مبروك يمي انت الله يوفقك يارب العالمين واشوف عيال عيالك يارب
لفت على ابو ريان وهو يكمل كلامه : واليوم العصر ان شاءالله بنروح انا وانتي والعيال نخطب له
الجازي ابتسمت : ابدا تم ان شاءالله العصر العصر بس منهم العرب اللي ودكم تخطبون منهم ؟
سكتت شوي لفت صوب ركـود : ولا فيه براسك احد وانا امك ؟
ضحك ركـود : لا والله مابراسي احد !!
نافع بابتسامه : اي اي واضح
سكت شوي ورجع يتحدثّ : بنروح نخطب من بنات محمد النّهار وعلى طلب الشيخ يبي اصغر وحده فيهم
الجازي عقدت حواجبها بستغراب : بس البينه الصغيره ماعمري شفتها لا بزواجات ولا حتى عشاء عادي تحضره ؟ اخاف ان فيها بلاء ولا شي ولا مكان امها تجيب خواتها لكل محفل وعشاء ولا تجي هي معهم !
رد نافع : لا ماضنتي .. بس ع شان كذا ودي تمشين معي تشوفين بعينك ونتوكد
ردت عليه الجازي : اجل على بركه الله الله يوفقهم ويكتب لهم الخير يارب
وقف نافع ووقف معه ريان ، وأياد نادا هنادي تاخذ هيثم
نافع : اجل تجهزي وجهزي امورك وبعد صلاه العصر ان شاءالله نتجه لهم بسم الله
وطلع من بيته متوجهه للمجلس لفت الجازي لـ ركـود : هاه يركـود عسى مبروك يامك والله العظيم اني فرحت لك مابغيت تفرحني الحمدلله
قامت وهي تُكمل : بروح اعلم خواتك لجل نجهز نروح للعرب
راحت وهي تصوت عليهم على ان كل شي كانو البنات يسمعونه وكانو في قمت سعادتهم فيه
-
قام راكـد من مكانه وجلس جنب ركـود
ركود بهمس : هم وش فيهم مصرين الا وبراسي موال ؟
ضحك راكـد : اجل ابي من بنات فلان واصغر وحده وماتتوقعهم يشكون !!
ضربه على كتفه ركـود : كله منك لو اني قايل لـ ابوي احسن من الشوشره ذي كلها قم قم بس خلنا نروح للمربط اشتقت للجلمود فديت كبده
قامو وطلعو من البيت متجهين للمربط
-
عند البنات
ايان : بس يمه الصغيره ماندري حتى اذا اسمها صح او غلط وش فيه ركـود يبيها !
منار : اسمها أثـار انا مها صديقتي واعرف كل عيلتهم
ام ريان بتساؤل : وقد شفتيها يمه ؟
منار هزت راسها تنفي : لا والله يمه ماقد شفتها عيني حد علمي فيها وحنا صغار يمكن قبل عشر سنوات
أيـة : غريبه هالبنت ليه ماتجي مع اهلها للزواجات والجمعات !
ردت منال وبيدها خيط وابره تحاول تشبكهم : يمكن ماتحب الجمعات والاشياء ذي
أيـان : يوه وربي جوي انا عاد الزوجات
منار بتساؤل : الا يمه كلنا بنروح ؟
ردت الجازي : لا يمه وخزياه ليه كلنا نطب على العرب بس منال وايان يروحون معي
ردت منال وهي تخطيت فستانها : لا يمه ماودي اروح
نطت أيـة بسرعه : اجل انا اروح ومنها اخلي مها توريني العروس
منـار تستعبط على منال : يوه يشينك يـ منال لك عشر سنين تخيطين فذا الفستان اعتقيه خلاااص
منال : مو بشغلك فارقي بس
الجازي : بس انتي وياها .. اجل أيـة وايان تجهوز ترا بعد صلاه العصر نروح لهم
-
في مكان بعيد عن ديره الوادي عند ديره السيوف الساعه 6:45 مساء
عند صاحب الابتسامه البشوشه شجاع السيف كان صاحب راي ومحبوب جدا عند ربعه وجماعته نزل من ظهر حصانه وتقدم فيه للمربط وتقدم لـ علي راعيهم ، شجاع : مسيت بالخير يـ علي علومك اليوم ؟
علي : هلا هلا يمساء النور والله بخير دامني مسيت على وجهك الطيب
شجاع ضحك : تسلم تسلم .. امسك عش المزيون زين
علي : ابشر ابشر
شجاع : يلا فمان الله تحتاج شي
علي : لا طال عمرك سلامتك
ومشى شجاع متجهه للبيت بعد يوم متعب وطويل مر عليه دخل البيت ماحصل احد استغرب وين راحو البنات دخل للمطبخ كان خاطره بـ قهوه وبد يظبط له ، خلص قهوته وحطها ف صينيه وفنجالين رفعها بيطلع من المطبخ لين سمع صوت توقع ان مافيه احد بالبيت لكن طلع فيه احد وبغرفه امه مشى متجه لغرفه امه ع شان يتقهوى معاها وقبل يطرق الباب سمع الحديث اللي دار بين امه وابوه
سيف : عيني من الله خير يمزون علامك يمره لك سبع طعشر سنه على ذا الحال ؟
مزون وهي تبكي : كيف تبيني اهدى وانسى ضناي اللي ماتت وهي طفله كيف يـ سيف؟
سيف ضاق خاطره عليها وطبطب على ظهرها : يبنت الناس تعوذي من ابليس مو كل سنه وانتي تبكين عليها يمكن لو انها عايشه كان محمد حرمك منها ولا تعذبتي انتي وياها كل وحده فديره !
تنهدت مزون تمسح دموعها : حسبي الله عليه الله لايسامحه الله يغفر لابوي يومه زوجني اياه ع شان خايف علي مـ
شهقو اول ماسمعو صوت طيحه شي قوي بالارض ركض سيف فتح الباب وانصدم بشجاع واقف قدام الباب في حاله صدمه
« نجمة يـ ⭐️»
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━