في ديره المعازف
الساعه 6:29 مساء أعلنت الشمس انتهئ هذا النهار بدأت تتقلص حتى اضلمت الديار اصوات اذان المغرب بكل مكان تملئ ديره المعازف ، كانو يمشون سلطان وعلى يمينه حصانه اللهيبً وعلى يسار سلطان سعود وحصانه كانت الابتسامه مرسومه على وجيهم وسوالفهم الطيبه حتى سمع سلطان كلام احدهم وتغيرت ملامحه للغضب من قوت غضبه تغير لون وجهه للاحمر
...
: يرجال الشيخ نمر مايدري طش بنته على مين الرجال له 20 سنه واكثر يرحل عن الديره شهرين ثلاث شهور ولا بعد احيانا يطول ست شهور ماتشوف وجهه !
اردف الاخر بسخريه : يولد قسم بالله اقول انه مو انس سلامات ماله اثر يختفي على كيفه ويعاود على كيفه
اردف ثالثهم بضحكه ساخره : والله ماندري وش نقول عنك يـ سلطان ولد انس ولا ..ضحك بصوت مسموع .. ولد غيره والعياذ بالله
التفتو عبدالله وظاهر وحصلو سلطان وسعود وراهم والغضب يتصبب من عروق جبين سلطان خافو والتفتو لـ رايد وتقدمو لين صاور وراء ظهره ، سلطان بكامل غضبه ترك لجام اللهّيب ومشى بسرعه لرايد واللي معاه اردف بصراخ : ارجع عيد االيييي قلته ارجع عيده والله والله وانا ولد ابوي مايصبح عليك الصبح !
رايد بسخريه : قصدك ولد سلمى النمر بنت الشيخ نمر
مسكه سلطان مع ياقت ثوبه الابيض وصار وجهه سلطان ورايد مابينهم مسافه وبكل غضبه سلطان رد : اي نعم ولد سلمى النمر تضن اني بتفشل من اسم امي يالرخمه! انا ماني مثلك يولد فارس انا رجال قبل يطلع راسك للدنيا !!
سعود وهو جنب سلطان من يمين يحاول بـ سلطان يتركه : فكه يسلطان هاذا عيل فكه يخوك لا تلتف لهرجه اللي لا يجيب ولا يودي
رايد يحاول يفك عمره من بين يدين سلطان : اتركني يالرخمه ولا والله لا امسح فيك ارض المعازف واخلي سيرتك على كل لسان يولد سلمى اوه معليش ولد محمد اللي نشك انه انسان اصلا !
اشتد غضب سلطان وقرب منه وبحركه سريعه منه ضرب راسه براس رايد طاح بالارض رايد واعتلاه سلطان يضرب فيه حتئ بدأ ينزف خشمه
سعود وظاهر وعبدالله يحاولون يفكون رايد من يدين سلطان اللي واصل اخر مرحله من غضبه وشوي ويموت تحت يدينه
سعود يمسك يدين سلطان : تكفى يخوك خلاص ابعد عن الرجال ذبحته !
عبدالله راح يركض لاقرب مسجد واللي كان فيه ثلث رجال ديرة المعازف ومن بينهم الشيخ نمر وولده سامي
عبدالله بصوت مسموع : الحق يشيخ الحق الحق سلطان ناوي الشر يشيخ ناوي يقتل رايد الحق يشيخ
طلعو يركضون حتى وصلو لـ سلطان اللي يحاول سعود يفك رايد منه ووقف الشيخ نمر ومعه سامي وكذا شخص من رجال الديره الكبار
الشيخ نمر وقف وحط يدينه على كعازته وبصوت عالي جدا : يـ سلطان
سلطان وهو ماسكه يدينه على شكل قبضه كانت متوجهه لوجه رايد اللي ماعاد فيه حياة وقفه صوت جده او بالاصح الابو والاخ والصديق لسلطان منذ الصغر الشيخ نمر واللي صنع هاذي الشخصيه القويه فيه ، وقف سلطان وبعد التراب من على ثوبه تقدم لـ جده نمر وقبّل
راسه اردف بصوت يسمعه كل من كان بالقرب من هذا المكان : يشهد الله يبوي لولاك ماكان فكه مني الا الموت
ترك جده واتجه صوب اللهّيب واخذ لجامه التفتت صوب رايد
وادرف بسخريه : ولد سلمئ هو اللي مسح فيك ارض المعازف يولد فارس اوه معليش مدري انت ولد انس ولا ولد جن
تقدم باللهيّب صوب المربط وهو يحاكي حصانه ويمسح عليه : مافيه شي ينظر عيني خاطرك بعشى الليله ولا تبي نسج يالخوي ؟
-
تقدم فارس وهو يرفع ولده رايد : يرضيك يشيخ سلطان يضر ولدي قدام الجماعه ابي حقي يشيخ !
الشيخ نمر : سلطان مايغلط يـ فارس وشوف ولدك وشهو قايل هذا السلطان يـ فارس مايجي منه الخطاء وكل اهل ديره المعازف يشهدون على كلامي!
فارس بتردد: بس ..بس يشيخ سلطان اكبر من رايد ضحك بسخريه هاذا لاقالو لك القوي يستقوي على الضعيف
رد الشيخ بضحكه : يفارس ولدك رايد جلس ببطن امه عشر شهور وولدي سلطان جاء على ثمانيه بس انه سبق ولدك بشهر يعني انه صار كبيير ؟
ضحكو الشيبان وسعود ضحك ضحكه سمعاها كل من كان قريب
وبعيد تنحنح سامي : سعود !
انتبه سعود ومسك عمره وتقدم يلحق سلطان
الشيخ : هاذا وهو ولد عشر شهور حتى مو مثل الاودام تسع شهور ضعيف هذا لو جالس ببطن امه اكثر وش تسوي به يـ فارس ؟
تنحنح باحراج فارس وهو يدف رايد قدامه ويقول له : الله يفشلك فشلتني عند العرب يسواد وجهك يـ فارس
ضحكو الشيبان والشباب تقدم واحد منهم: يشيخ اي والله اني انا وكل من يعرف سلطان يشهد له بحسن الأخلاق والاحترام والتقدير وانه مايعصب من ادانات حاجه كود ان ولد فارس متلفظ عليه بشي ماقدر يستحمله سلطان
الكل ايد كلام الرجال وانه على حق وان سلطان مايغلط
الشيخ نمر : بيض الله وجيهكم جميع وحياكم جميع عندي المجلس القهوه والعشاء حياكم الله جميع
تقدم الشيخ وسامي والرجال اللي معهم وكل حديثهم عن سلطان وشجاعته وانه مايغلط ولا يعرف للغلط درب
-
سعود يركض وبيده حصانه ـ لحد ماقرب لسلطان اللي توجه صوب المربط : سلطان يـ سلطان يرجال اركد ورد علي !
لف سلطان بعد ماربط حصانه : عسى ماشر وش فيه صوتك يلعلع ؟
سعود وهو يوقف جنبه ويربط حصانه وقف قدام سلطان ضحك ضحكه طويله تنهد وهو يقول : يرجال اهخ ياربي فاتك فاتك شماتت الشيخ بـ رايد برد كبدي الله يطول عمره
سلطان ابتسم وهو عارف جده ماراح يطوف له الحركه ذي : الله يطول بعمره والله لو مو هو محد يفكه من يدي الا وهو ميت
سعود : يرجل تعوذ من ابليس امش امش ورنا سمره الليله
تقدمو وسعود حط يدينه على رقبه سلطان وتقدمو وهم يضحكون
-
ديرة الوادي :-
بعد اذن العصر وصار الوقت اللي يتقدمون اهل ركـود لـ بيت محمد طلعت الجازي وايان الجازي بصوت مسموع : ي أيـة يبنت اخلصي بسرعه ابوك ينتظرنا بسرعه !
نافع : يلا اعجلو علينا الناس تنتظر
أيه وهي تلف الطرحه على راسها
أيه : ياربي دخيلك وش مطيركم جايه جايه !
راكـد : امشي يبنيه العالم كلها تنتظرك
نافع : قد المغرب بياذن يبوك وش الحركات ذي ؟
أيه : لو رحت يبوي وحنا نلحقك
اياد : لا يشيخه تقولينه صادقه من زين وجيهنا نخلي ابوي يروح لحاله يخطب من الناس
راكـد : امش بس انت وياها ولا يكثر
نافع : اص انت وهو وهي ويلا مشينا تاخرنا على العرب
نافع تقدم ومشت جنبه الجازي وريان وأيـاد ، ركـود وراكـد وأيه وايان سوا وراهم ، أيه تدق كتف ركـود بكتفها : عشتو ورع الحاره بيعرس ولا بعد وحده هو مختارها !!
وتغمز له ركـود وبيده مسبحه : لاحول ولاقوة الا بالله الله يصبرني
راكـد وهو يدخل أيه تحت ذراعه : ايه يالشيخ ولد الشيخ والله انك شايف لك شوفه وانا اخوك
ضحكو البنات على ركـود اللي الكل شك فيه تنهد منهم وهو يهز راسه تقدم لعند امه يفتك من هرجهم ، مشو تقريبا عشر دقايق حيث ان بيوتهم كلها قريبه من بعض بحكم انهم من نفس الديره ،
في بيت محمد النهار بعد ماخلص من الصلاه ورجع بيته
فتح الباب وسكره وراه تقدم للمجلس نادا بصوت عالي
ابو ساير : يام ساير يـ مرّه يام ساير ؟
جت تمشي ودخلت عنده المجلس ردت عليه : هلا يبو ساير وش بغيت !
ابو ساير وهو يتكي على احد المراكي : اليوم العصر الشيخ نافع جاي بأذن الله جهزو قهوتكم ورتبو المجلس يمكن ان الحريم ياتون معه
تخصرت صيته تحت استغرابها : ليه وش عنده غريبه الشيخ يجي ؟
ابو ساير : اقول عن كثرت الهرج شيخ وناوي يتقهوى عندي ارده يعني ، قومي تحركي شوفي لنا العيال وينهم ياتون يساعدوني بذبح للشيخ ان شاءالله ذبيحه وابيك انتي اللي تطبخينها
تقدمت وجلست قباله : البنات يكفون عني ويطبخونها
ابو ساير عصب : انا قلت انتي يعني انتي من وين تفهمين الهرج يـ مرّه !!
ام ساير : خلاص ابشر لك اللي يرضيك
قامت من عنده ترتب امورها نادت أثـار
ام ساير : اسمعيني زين الليله بياتون حريم شفتك طلعتي من غرفتك مو بزين لك سامعه يلا يلا لا اشوفك تطلعين
أثـار بتردد : يمه ..ودي ...
ودي اجلس واشوف البنات اللي بعمري واتعرف عليهم
ام ساير ناظرتها بعصبيه : لا يشيخه وش رايك بعد اعرفك على بنات الديره كلها وتروحين وتاتين على كيفك!
دفتها من ظهرها : امشي امشي قال ايش قال اتعرف واجلس امشي قدامي
مشت أثـار بسكوت تام ولا لها القدره على مناقشه امها
دخلت الغرفه او المخزن تقريبا حيث انه يجمع كل شي من لبس قديم قدور للعزايم ومكانس من الاشجار مصنوعه وسرجّ للاحصنه وكل ماكان للتخزين ، وسكرت الباب وراها تقدمت لفراشها اللي تحت الشباك المساحه اللي كانت تنام فيها ضمت رجولها لصدرها وتنهدت : معقوله امي تكرهني! ياربي انا وش اللي سويته على شان امي تكرهني كذا يشهد الله لو ماكانت امي ماتحملتها كذا وصبرت عليها بس امي ياربي وش اسوي دلني يارب دلني حطت رأسها على رجلوها -يكرم القارئ-
،
هًيا وهي طالعه شافت امها وهي تتكلم مع أثـار وسمعت كل الحديث اللي دار بينهم تقدمت لامها : يمه ليه تدخلينها الغرفه ترتاح خليها ترتب المجلس وتسوي العشاء عنك
ام ساير ابتسمت بخبث حطت يدها على كتف هيّا : اسمعيني زين تدخلين داخل وترتبين عمرك والبسي أشيك لبس عندك وعلمي مها تلبس لها شي سنع
هيًا استغربت : ليه يمه وش فيه! وش له داعي
ام ساير بهمس : بعد العصر بياتون لنا الشيخ واهله والله العالم انهم ناوين القرب من ابوك
ابتمست هيًا : يعني يمه يخطبون منا الشيخ الشيخ يمه!
ام ساير وهي تتقدم للمطبخ : اي اي الشيخ يمك الشيخ امشي اجهزي بسرعه انتي واختك
راحت ركض هيا للغرفه وبسرعه دخلت غرفتها وفتحت دولابها اللي كان على شكل مستطيل بالارض وطلعت لها فستان ابيض وطلعت بناجرها الذهب ورتبت شكلها
مها وبيدها خيط وابره : هيًا وش فيك انهبلتي يبنت وش عندك ؟
هيًا وهي قامت وبيدينها اللبس : اليوم جايين خطاطيب لنا ويمكن انا او انتي ننخطب مع اني انا اكبر وحده بس امي تقول جهزي عمرك
ابتسمت مها بتتكلم قاطعتها هيًا : لا تكشخين واجد لبسك اللي عليك يكفيك بس رتبي شعرك وساعدي امي بالعشاء الليله هي اللي بتطبخه
مها رفعت حواجبها : سلامات هيا وش ذا الكلام بعدين شدخلك وش البس ووش اسوي ؟ ، بعدين تعالي ليه ما تساعدينا ان شاءالله ولا بيدينك حناء يالاخت !
هيًا بشوفة نفس : بصير حـرم ولد الشيخ اكيد ما بقعد اركب معكم العشاء سلامات
طلعت وهي رافعه خشمها ، مها بسخريه : الحمدلله والشكر معقول ذي اختي يمه منها مريضه الله يعين عليها ، ان شاءالله ما يخطبونك وياخذون أثـار يريحونها منكم
سكت للحظات تنطق : دقيقه وين أثـار ؟
لفت يمين ويسار طلعت تدورها بعد ما ادركت مها انها ماشافت أثـار من بعد صلاه الظهر دخلت عندها لداخل حصلتها نايمه هزتها شوي وهي تقول : أثـار بسم الله عليك ليه نايمه هالوقت! مو عادتك ؟
أثـار وهي ترفع نفسها وتفرك عيونها : اوف والله مدري يـ مها امي قالت لي اجلس ماتحرك ولا اطلع اليوم كله
مها استغربت مدت يدينها أثـار تمسك يدين مها وتجمعت بعيونها الدمعه، أثـار : مها امي ليه احسها ماتحبني انا غلطت بشي ؟
مها وهي تشد على يدين أثـار : لا والله يبعدي انتي كلنا نحبك ونموت فيك انتي عنقودنا شلون ما نحبك
رفعت يدينها لوجهاا وهي تُكمل لها : انتي نعمه من ربي يـ بنت قلبي لا تحاتين ان شاءالله كل شي بيصير حلو طيب ؟
رفعت أثـار يدينها على يدين مها اللي تتوسط وجهها وهي تبتسم لها بدون كلام قامت مها من عندها وطلعت
-
الساعه 4:56 مساء وصلو اهل ركـود تقدم محمد يفتح الباب بعد مابلغ عياله الثلاث ان عنده عشاء للشيخ الليله تقدم نايف بالبخور وبخر الشيخ وعياله بعد السلام بينهم وبعد ساعه كلها راحت سواليف بين الشيخ وابو ساير والعيال مع بعضهم الا ان علاقة نايف وركود كانت غريبه شوي ع انهم ماكانوا يتقابلون الا وقت سباقاتهم بالخيول فقط ، وسط صدر المجلس الشيخ نافع وعلى يمينه محمد
حيث كان مجلس ابو ساير يضم أبناءه وابناء الشيخ فقط وحفيده فيصل ركـود ،راكـد، اياد، ريان ،نايف ،ساير ،مازن
اردف الشيخ بصوت مسموع : الحقيقه يبو ساير اليوم ان جاي وطالب القرب منكم
محمد ابتسم ابتسامه عريضه : حياك الله يشيخ نافع يزودني شرف قربك ومناسبتك يبو ريان
ابتسم نافع تردد لكن كمل : تسلم تسلم .. الحقيقه انا ودي اخطب اصغر بناتك لولدي رـكود اذا مافيها شي يبو ساير
عقد حواجبه ابو ساير ، نايف اللي استغرب الطلب كان بيتكلم لكن قاطعه صوت ابوه : ابشر يشيخ والله تبيه يصير لكن ليه بنتي الصغيره يشيخ ؟
توهق الشيخ وحس نفسه طاح ببير ماله نهايه لكن اردف وهو كله ثقه : يبو ساير والنعم منك ومن بناتك لكن ركـود تو عمره اربع وعشرين ولا ودي ياخذ وحده اكبر منه سكت شوي رجع يردف ..هاه وش رايك يبو ساير ؟
حك حواجبه محمد ابتسم : ابد حياك الله يبو ريان وانا عطيتك الف مبروك
لف صوب ركـود وابتسم له اردف وقال : الف مبروك يركـود الله يوفقكم وانا ابوك وانا عطيتك البنت
عقد حواجبه ركـود وحس عمره طاح بوهقه اكبر منه بلع ريقه وهو يناظر لابوه اردف : تسلم يعم لكن شاور البنيه اول وبعدها يصير خير ان شاءالله
اردف نافع يوافقه الراي : اي بالله يبو ساير موافقتك وخذيناها لكن لزوم تاخذ شور البنيه وتعطينا خبر بعدها
ضحك ابو ساير : الشور لي يبو ريان وانا عطيتك وكلمتي ماتنرد والبنيه اشاورها لكن مايردوني وانا معطي
عصب نايف لـ درجه احمر كامل وجهه مسكه مازن اللي حس بعصبيته وقربه يمه همس له : اعوذ بالله يرجال كانهم مطلعينك من نار اهدى يرجل اهدى
نايف وهو شاد على قبضه يده همس بنفس مستوى همس مازن : انت تسمع ابوي يـ مازن يبي يزوج أثـار وهي صغيره تسمع وش يقول ؟
مازن بهدوء : يرجال اهدئ عين من الله خير امر الله من سعه يشاور اثار ويسمع ردها اهدى انت بس
،
ركـود حس بضيقه ملت صدره التفت صوب راكـد اللي كان يساره همس له : لا يرجال اجل مابيعطوني الموافقه شف ابوها يولد كانه يرميها علي رمي !!
راكـد بنفس مستوى الهمس : عين خيير يولد انت شف اللي قدامك تهقى يعطيك اخته وهو شوي ويقوم يكسر راسي وراسك
ناظر ركـود لـ نايف اللي فعلا شاف وجهه اللي مايبشر بالخير اردف : اعلى مابخيله يركبه يرجل وان شاءالله يقوم ويخربها تجي منه يولد وافتك
ضحك راكـد وقرصه ركود ع شان يسكت لا يفضحهم
،
بالجهه الأخرى من دخول الحريم حتى سلامهم وضحك وسوالفهم ام ساير جنبها هيا قدام ام ريان وام ريان متكيه وجنبها ايان وأيه وجنبها مها ، ام ساير : يهلا والله بحرمة الشيخ نورتي داري يم ريان
ام ريان : تسلمين يام ساير تسلمين .. لزوم تسيرين علي لك يوم
ام ساير بابتسامه : ان شاءالله يبعد عيني ان شاءالله
وكملو سوالفهم ، عند الزوايه أيه ومها بعد ماقامو يمشون بالحوش اللي كان يطل على قسم الحريم أيه : معليش اسئلك شي مهاوي ؟
مها ابتسمت : ايوا تفضلي
أيه تردد : الصدق ودي اشوف اختك أثـار كثير يتكلمون عنها انها فيه مرض ع شان كذا ماتطلعونها
مها رفعت حواجبها: بسم الله عليها من قالك كذا ؟
أيه : والله الناس كلهم بسبب انها ماطلعت ولا احد يشوفها
مها : لا بسم الله عليها مافيها الا العافيه بس امي وابوي يخافون عليها لانها توها صغيره
أيه ابتسمت : طيب وينها عادي اشوفها !
مها ترددت وخافت لكن شجعت قلبها مسكت يد أيه ومشت فيها حتئ صاور قدام المخزن : اسمعي بخليك تدخلين وتسلمين عليها بس بشرط
أيه بحماس : انتي صادقه اقدر اشوفها ؟
مها : اي والله بوريك ايها بس عندي شرط
أيه بتفكير : قولي وش شرطك !
مها بخوف : ماحد يدري وش بتشوفين داخل ولا راح تقولين لابن امه عن الشي اللي داخل فهمتي علي
أيه خافت وتوترت : بسم الله شفيك روعتيني مها خلاص مابي اشوف احد
مها ضحكت : يغبيه ماقصد اختي اقصد اللي داخل الغرفه
تنحنحت مها وهي متردده كثير تقول لها لكن عزمت تقول ويصير اللي يصير : الصدق يـ أيه ادري انكم جايين تخطبون هيًا بس الصدق هيًا فيها شوفة نفس و
قاطعتها أيه وهي تضحك : يبعدي من قالك جايين نخطب هيا المريضه ذي ؟ يع فال الله ولا فالك بسم الله على اخواني
سكتت شوي استوعبت رجعت تُكمل : معليش مها لا تزعلين علي بس وربي انك افضل منها اخذك انتي ولا اخذها هي لاخواني بسم الله عليهم
ابتسمت مها : مابزعل يشيخه والله حتى انا ماش مو مره اتقبلها بس انا سمعت انكم تبون هيا ؟
أيه مسكت يدين مها : اسمعي لا تعلمين احد اني قلت لك اخاف يفهمون غلط بس ركـود قال انه يبي أثـار اصغر وحده
مها استغربت وبنفس الوقت ضحكت : يمه انتي صادقه وش عرفه فيها ؟
أيـه : يوه الله يهديك بعدين لاحقين على السوالف ذي الحين وينها عروسه اخوي وريني اياها
مها : ابشري بس تكفين تكفين زي ماقلت لك
أيه : والله تامرين امر بسرعه يلا
تقدمت مها وفتحت باب المخزن دخلت مها ودخلت وراها أيه المكان مليان غبار وضيقه من كثر الاغراض الا مكانها مكان على يمين الغرفه فيه مفرش للنوم تحت الشباك كانت جالسه تقرا قرانها فزت على اصوات برا الغرفه اللي هو اساسا مخزن سمعت كل حرف انقال انصدمت صدمة عمرها وهي تسمع كل شي دار بينهم فجاءه فتحت الباب مها دخلت وراها أيه كانت مها واقفه تناظر ضوء الشباك اللي كان نازل على أثـار
أيه وهي تكح من الغبار فالمكان وتهف بيدها يمين ويسار : مها تستهبلين اقولك وديني لاختك تجيبيني هنا بالهـ
قاطعتها مها وهي تشغل السراج-فانوس- تقدمت وهي تردف بدموع ملي عيونها : أثـار يقلبي صديقتي جت بتشوفك تقومين نطلع برا !
أثـار وهي تلمح الدمع بعيون مها هزت راسها ب ايه
تقدمت مها وهي تمسك يدين أيه بهدوء وطلعت برا
أيه بخوف : بسم الله الرحمن ليه مها ليـ
قاطعها طلوع أثـار انبهرت بجمال أثـار الرباني جميله بمعنئ الكلمه واسعه العينين ، بارزة الخدين ، جميله القوام ، ثغرها ، شعرها الطويل حتى اخر ظهرها ، فتحت عيوهنا أيه مصدومه من الجمال الرباني اللي شافته ولا هي مصدقه قالت بصوت مسموع : يمه بسم الله عليك انتي صدقيه ولا جنيه غمضت عيونها بسرعه وهي ترمش لا لا بسم الله الرحمن عليك مو جنيه ملاك ملاك مصور ماشاءالله تبارك الرحمن
ابتسمت أثـار على مدح أيه لها حمرت وجنتيها ناظرت باختها اللي شوي وتبكي اردفت تحاول تطلع مها من حزنها عليها وهي عارفه تماما ايش سبب الدموع هاذي : افا يـ مها عندك مثل هالصاحبه الحلوه ولا عمرك عرفتني عليها ؟
ضحكت مها وهي تحط يدها وراء ظهر أيـه : هاذي صديقتي أيـه
لفت صوب أيه بتتكلم قاطعتها أيه : المعروف لا يعرف اكيد الحلوه ذي أثـار
انتبهت على صوت هيا اللي جايه صوبهم على طول قالت لـ أثـار تدخل داخل لان تعرف هيًا حبه الهيل بالرز بتعلم عليهم وبياكلونها دخلت أثـار وقبل تقفل الباب لوحت بيدها لـ أيه ومها بمعنى مع السلامه وابتسمت
أيه وهي مو مصدقه : استودعتك ربي يقلبي انتي الله يعين قلب اخوي لاشافك اهخ يقلبيي
وحطت يدينها على قلبها بسرعه تداركت الوضع مها وكانهم جايين من ورا البيت بعد ماتمشو قالت مها : وزي ماشفتي هذيك غرفتي شرايك حلوه !
أيه تمشي معها : ايوالله تجنن خصوصا ترتيبك ياخذ العقل
لفو على صوت هيًا : عشتو وش عندكم هنا ولا تنادوني
أيه قلبت عيونها لها لفت صوب مها : بروح يقلبي داخل الحقيني مشت من عندها وهي ماتطيقها بتاتا ولا تحب تاخذ وتعطي معها
هيا تخصرت : ايوا ست مها وش عندكم هنا ؟
مها مشت : سلامات يعني ماوري صاحبتي غرفتي يعني وبعدين مالك دخل يالحشريه مالت ومشت من عندها
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━