ديره السيوف:-
كان متقدم حتى وصل لباب غرفه امه وابوه وهو يحاول يعدل الصينيه بيدينه اللي فيها تمر وفناجيل ودله قهوه وقف بصدمه اعتلت مسامعه من سمع صوت امه تبكي وكل شي كان على مسامعه حتى اختل توازنه وطاحت الدله واللي معاها قريب من رجوله -يكرم القارئ-
ويده اليسار جاها ضرر بسيط من حراره القهوه الا انه ما كان يحسب بشي بسبب اللي سمعه ، سمعو صوت ارتطام قوي فالارض فزو من مكانهم تقدم ابو شجاع وفتح الباب الا انه صعق تماما بمنظر شجاع اللي قدامه كان واقف والدله طايحه بالارض والفناجيل مزون شافت وجهه اللي معتليه الصدمه تماما رفعت يدينها لوجها وبكت بكل قوتها خارت قوها وهي الام القويه بعيون اطفالها كيف ماتبكي وهي فاقده ضناها فاقده روحها الصغيره
سيف -ابو شجاع- : بسم الله عليك يبوك جاك شي ؟
شجاع مصدوم تماما ماجاء منه اي رد
سيف تقدم له ودخله للغرفه وقفل الباب وراه جاء قربه وبهمس بينهم : اسمعني زين يـ شجاع امك اللي فيها مكفيها كان ودها تقول لك شي اسمعها زين وكان انها ماتبي لا تظغط عليها يبوك
طبطب سيف على كتف شجاع تنهد ولف طلع برا الغرفه وتركهم اخذ قطع القزاز المتناثره وبدا يرتب المكان حتى ماحد ينجرح احد ،
تقدم شجاع وجلس عند رجول امه -يكرم القارئ-
رفعت راسها مزون وهي تناظر بعيونه نزلت نظرها لايده اللي على ركبها حيث كانت جالسه مزون على الطراحه اللي مرتفع بمسافه متوسطه عن الارض انصدمت بيد شجاع اللي انقلب لونها للاحمر وبد فيها فقعات صغيره دلاله على ان القهوه كانت باعلى مستويات الغليان
شقهت وهي تمسح دموعها قامت على طول لدرجها الصغير طلعت منه ادويه شعبيه جلست بالارض جنب شجاع ادرفت ببكاء : بسم الله عليك يمك بسم الله عليك وش اللي في يدك يمه !
مسكت يده اليسرى ترفعها له وبدت تحط له المرهم حتى يخفف عنه شوي ، شجاع وعيونه على وجهه امه المايل للاحمرار رفع يده اليمنى ومسح دمعه امه اردف : ما عاش من يبكيك يام شجاع والله مايتهنى لي بال لي تعلميني من سبب هالدموع ؟
رفعت راسها وعيونها مليانه دموع قالت بصوت مبحوح : الضناء يمي الضناء بعده شين شين يـ شجاع شين يمك
ورجعت تبكي سكت شجاع يتنظرها تكمل ناظر بعيونها ناظرت له مزون وهي تعرف ان شجاع عمره ماكان لها ولد وبس كان الابو والصديق والولد وكل شي لها كانت كل صغيره وكبيره تقوله عليها ولا يرضى على امه شي لكن الشي الوحيد اللي ماعمرها قالت لاحد غير سيف واخوه سياف وأختها مزن كونهم حاضرين على اللي صار
اردفت مزون تتكلم عن وجعها والالم اللي فيها من بعد فقد بنتها : تذكر فيه فتره غبت عنكم ثلاث سنوات يمكن !
هز راسه يوافقها الراي بدت تقول له كل شي من الالف للياء وشجاع اعتلت الصدمه عليه اكثر واكثر كل ذا حصل لامه وهو مايدري ؟
نرجع لـ 18 سنه ورا اليوم اللي تطلقو فيه ام شجاع وابو شجاع بعد هوشه كان سببها بنت عم سيف سعدئ
سعدئ : وين حقي يشيخ نياف مرة ولدك تضربني وسط الحريم ؟
الشيخ نياف : وش قومك يبنت ناصر وش الحاصل !
سعدئ : زوجة ولدك سيف تخطي علي وتضربني وسط الحريم يشيخ يرضيك بنت اخوك تنهان وسط الجماعه من وحده ماهي من ديرتنا اصلا وتجي تخطي علي في ديرتي
الشيخ نياف : عيني خير يسعدئ وان شاءالله امرك محلول عاودي للشق عاودي
التفت الشيخ نياف على سيف اللي جنبه وقال : اسمع يـ سيف امسك حرمتك عن بنت عمك ماهي باول مره تاتي البنيه تشتكي منها ؟
سيف : يبه الله يطول بعمرك سعدئ شرانيه ومزون اكيد انها ضربتها من الغضب
عصب الشيخ نياف : سيف اقسم بالله لو ما تعدل مرتك ان يحرم علي سلامك يـ سيف
كل هاذا كان على مسامع نواف ابو مزون عصب بالحيل على وضع بنته اللي كل ماجت تتكلم عنها سعدئ صدقها الشيخ نياف كونها بنت اخوه الوحيده بعد مامات ناصر ربها الشيخ نياف
وقف نواف وهو يكلم سيف وهو ياشر بيده اليمنى : اسمع يـ سيف انا يوم عطيتك بنتي ماعطيتك اياها من الشارع هاذي ضناي وكأنكم ماتعرفون الحق والدين بنتي ترجع لي عزيزه مكرمه انا عايش مابعد مت يـ سيف
وقف سيف وهو يحاول يهدي الوضع لا يكبر : ابشر يعمي ابشرو باذن الله تنحل السالفه لك اللي يرضيك يعمي انت اجلس عين من الله خير يعم ان
قاطعه نياف والغضب يعتليه : وش قصدك يبو عناد ؟
لف صوبه ابو عناد -نواف- : اللي سمعته يشيخ نياف بنتي عزيزه مكرمه وانا ما ارخصتها يوم زوجتها ولدك ع شان كل من ياتي يشتكي تسمع له بدون لا تسمع من كل الاثنين وتحط بنتي بكل مره الغلطانه ؟
عصب بالحيل الشيخ نياف واشتد الكلام بينهم حتى وصل لاخره ثم اردف نياف بصوت عالي جدا : بنتك ترجع لك يبو عناد وبلاش من القرابه هاذي كلها انا رجال وشوري بيدي ماعاش من يغلط علي ببيتي
لف نواف بعصبيه على سيف : انا اللي باخذ بنتي والان اسمعك يسيف ترمي يمين الطلاق عليها الحين بهالساعه !
سيف وهو معصب : زوجتي محد له دخل فيها لا انت ولا ابوي مع كامل احترامي لكم بس طلاق ماني مطلق وانا مستعد اسوي اللي تبونه طلاق ماطلق ام شجاع لو ايش مكان
نياف بغضب عارم : اسمع يـ سيف يشهد على الله لو ماتطلق الحين والله وامان الله لا اني ابوك ولا انت وبولدي والله يـ سيف
طلع نياف اردف نواف بقلة حيلة : لاحول ولاقوة الا بالله توصل بابوك يحلف يمين ويتبرا منك لجل تطلق ؟ قسم بالله انه شي يشيب له الراس لاحول ولاقوة الابالله اسمع يـ سيف انا بنتي عزيزه وعمرها ما هانت على شان اخليها سبب في بعدك عن ابوك وجماعتك طلق طلق يـ سيف والله يعوضكم
مشى نواف والصدمه تعلتي سيف بأكلمه، الجهه الاخرى كانت مزون تسمع كل اللي الكلام اللي صار بكت حتئ حست رجولها ماتسعها من الصدمه وطاحت مسكتها مزن : بسم الله عليك قومي يمزون قومي ياويل حالي عليك ياربي دخيلك
بكت لانها ماتقدر تخلي ابوها ينزل له كلمه وسط مجلس الرجال كيف وهو بمجلس ديره ثانيه ومجلس شيخ ؟ وبنفس الوقت ماتبي لـ سيف القطاعه مع ربعه واهله ادرفت ببكى : يـ مزن من هو الرجال بدون جماعته من هو الرجال بدون ربعه واهله ؟
مزن وهي تبكي على اختها وضامتها لـ صدرها وعارفه وش تفكر فيه مزون تماما : تعوذي من ابليس يمزون ان شاءالله انها تنحل بس انتي اهدي اهدي
مزون وهي تمسك يدين مزن اللي على راسها : مقدر مقدر افرق بين سيف وابوه ولا اقدر ارد لابوي كلمه يـ مزن مقدر
مزن بصدمه وحست بحال مرون وعرفت زين ان مزون مستحيل ترضى لـ سيف البعد عن ربعه وجماعته ومستحيل ترضى ابوها تتثنئ كلمته بين الرجال ، طلعت مزون ومزن ورا ابوهم يرجعون لديرة الوداي اللي هم منها وفيها ، وسيف اللي ماشاف مزون ابدا من بعد اللي صار بين ابوه وابوها وعارف مزون صح يعرف وش تفكر فيه مر شهر والمشاكل تكبر بين الطرفين سيف التقى بمزون على اخر حدود ديرة الوادي وكان ناوي على شي يهدي الوضع بينهم
مسك وجهه مزون بيدينه واردف : اسمعيني زين حطيها ببالك اني مستحيل اتخلى عنك لكن تعرفين زين الوضع اللي صاير بين ابوي وابوك ولا ودي تكبر القطيعه اكثر وسياف ومزن مالهم علاقه باللي يصير ع شان يتاخر زواجهم كذا اخاف تكبر وبدال لا تنفرق انا وانتي تترفق القبايل والديار يـ مزون
مزون وهي تبكي ويدها على يدين سيف : سيف تكفى الا مزن حرام ماتهنت بحياتها توها بس اطفالنا يـ سيف عيالنا وش مصيرهم ؟
سيف وهو يضمها على صدره ويده على راسها : معي والله وامان الله مايجيهم شي يمزون وانتي مايصيك من الدنيا شي وانا عايش تعوذي من ابليس وانا بطلق طلقة وحده بس ع شان تهدئ الاوضاع وبعدين ارجع اخذك طيب ؟
لفت صوبه مزون وهي تعرف انه الحل الوحيد اللي يهدي الاوضاع بينهم هزت راسها بالموافقه وتقدم سيف لابوه وبلغه انه بيطلق لكن طلقه وحده بالنهايه ذي ام عياله ، وصل العلم لـ نواف اللي حزن وبالحيل على بنته وحاول كثير ياخذ عيالها عندها لكن سيف رافض تماما حتى تكون لها فرصه ترجع ويرجعونها لو بجحه اطفالها بعدين
بعد مرور سبع شهور واهلك والد مزون المرض تماما وهو يالله يوقف على رجوله- يكرم القارئ- الا بمساعده مزون وعناد اللي كان يبلغ من العمر عشر سنوات اللي بعد ماجابته امه توفت ومزون هي اللي ربته بحكم فرق السن ، بديرة الوادي محمد كان متهاوش مع صيته ومتزوج سلمى بالسر بدون علم احد عرف ان مزون تطلقت ونوئ يتزوجها بحكم علاقه مع سيف كانت سيئه جدا لان وقت السباقات والحروب كان سيف هو البطل عكسه هو اللي مكان احد ابدا معطيه اهتمام تقدم لـ خطبة مزون من ابوها وكان نواف خايف عليها لوحدها وزوجها لمحمد بعد ما كانت تحاول مزون تمنع ابوها وترفضه الا ان ابو مزون قال لها : انا مريض يبنتي واخاف عليك وانتي واخوانك وانتي اكبرهم وماودي احد يغلط عليكم بشي تزوجيه يبوك يمكن انه العوض
وبعد محاولات ابوها فيها ولمده شهر استسلمت مزون ووافقت بعد ما سمعت ان سيف تزوج وهي خايبه الأمال بـ سيف اللي تظن انه تزوج وعاش حياته وتركها كان امالها الوحيد تشوف عيالها اللي ماشافتهم من اخر مره ، تزوج محمد النهار مزون وبعد ثلاث شهور توفى ابو مزون ودخلت بدوامه حزن على والدها الراحل نواف واستمرت علاقتها هي ومحمد وبعدها حملت ب أثـار وكانت صيته حامل لها شهر وشي
كانت سنه كئيبه جدا على مزون الا ان حملها بـ أثـار خفف عليها كثير حتى مع المشاكل اللي كانت بينها وبين محمد من ورا صيته اللي ميته قهر لانه اخذها عليها ومابقت صغيره وكبيره لجل يطلقها وتفتك منها ، كان حمل مزون ب أثآر جميل جدا وزادتها جمال كانت تتوحم على البارد الثلج والحليب وكانت تحب البطيخ جدا وتاكله كثير ف كانت نفسية مزون زينه بعد ما حملت فيها ولجل كذا تعلقت مزون جدا بطفلتها وهي ببطنها مكانت تعرف بنت او ولد وخفت المشاكل شوي بينهم بعد مرور ثمان اشهر على حمل مزون قدرت اخيرا انها تشوف احد من عيالها بعد ما جابتهم لها مزن وجابت شجاع الوحيد اللي قدرت تطلعه معها من القريه بسبب نياف اللي كان يراقب احفاده اللي وصل حده من الغضب لانها تزوجت وهو كان متوقع مشكله بسيطه وترجع لزوجها وعيالها اما سيف ف كان الخذلان عليه كبير كيف مايكون كبير وهو من جهت مزون القلب ؟ لمح طيف ولده شجاع اكبر عياله يمشي خارج لبرا الديره ومعه حرمه مايعرفها ابدا لكن الزول مو غريب عليه مشى خلفه لين وصلو ديره الوادي تلثم وهو يمشي يتبعهم حتى وصلو احدى البيوت طقت الباب مزن فتحت لها مزون
ناظرت الا شجاع بوجهها فرحت وبكت وحضنته لها وهي تقول : يمه شجاع يمه هاذا انت يمه ياقلبي كيف كبرت بسرعه ذي يمه !
مزن : حسبي الله ونعم الوكيل يمزون سيف مو متزوج كذبو عليك يمزون سيف ماتزوج بعدك !
شهقت مزون بصدمه ومازال شجاع بحضنها كيف ماتزوج وهي ماوافقت على محمد الا لمن تاكدت انه فعلا الخبر صحيح ؟ لكن للاسف انه كان كذب واشاعات من سعدئ اللي كانت عارفه بكل شي ونشرت الخبر هذه بجميع ارجاء ديرة الوادي ،
طلعت من عندها مزن ومعها شجاع اللي قدرت تقابله بسبب سياف اللي كان يقابل مزن بدون علم ابوه وقدر يعلمها ان الكلام كله كذب وان اخوه ماتزوج ابدا ، في هاذه الاثناء شافها محمد تدخل وتقفل الباب وهو جاي من عند الشيخ نمر بعد رحله مضت عليها شهرين
لمح طيف رجل لابس ابيض طالع من الديره ومسك اعصابه وتوجه داخل حتى حصل صيته اللي جابت بنت وكانت صغيره حيل وواضح عليها التعب ، بعد مرور ثلاث اسبايع والالم يستمر مع مزون حتى جات لها المعالجه ام خالد وفحصتها وقالت : يمزون انتي باي شهر ؟
مزون بالم فضيع كانت متمدده على طول الفراش والعرق يتصبب من جبينها : بـ.. بالثامن بثامن يام خالد !
المعالجه شهقت : ولاده بسم الله الرحمن الرحيم شدي حيلك ولاده !
ولدت مزون وجابت طفله مثل القمر لكن التعب اغتاش مزون حيل وهد حيلها تماما هي وطفلتها الصغيره جات المعالجه وهي تحاول تعرف ايش مشكله البنيه واردف وهي تهز راسها : لاحول ولا قوه الا بالله بنتك تعبانه حيل يمزون
مرت اسبوعين وهي طريحه فراش قامت على طقات باب البيت وهاذي ثالث مره ينطق الباب ولا احد يفتح على مشارف العصر وقتها طلع محمد وشاف رجال متلثم على باب بيته ولمن لمحه هج للجه الاخرى فتحت الباب مزون ناظرت يمين ويسار وكان على راسها جلال دخلت داخل وعرفها بسرعه انها مزون تقدم والغضب يعتريه تماما دخل البيت وهو ينادي بصوت جمهوري غاضب : مزون يـ مزون !
طلعت مزون من غرفتها وقبل ترد جاها كف لف وجها للجهه الثانيه
اردف بكل غضبه مو اول مره يشوف رجال قدام البيت ولا اول مره يلمح جلال مزون : اسمعي يبنت الناس انتي طالق طالق طالق بثلاث ويلا بيتي يتعذرك يالخسيسه !
طلعت صيته ومعها بنتها الصغيره بين يديها وعلى وجهها طيف ابتسامه نصر وجنبها ام خالد المعالجه اخذت ام خالد البنيه ودخلت لـ غرفه مزون وهي تحط البنت جنب اختها وطلعت لهم تحاول تهدي الوضع وصيته تسوي نفسها تهدي بينهم
مزون ويدها على مكان الكف : وش فيك جاي علي بشياطينك يمحمد وش انا مسويه ؟
محمد بسخريه : ابدا يبنت ابوك يالخسيسه اطلعي برا داري اطلع من بيتي الباب يتعذرك
ام خالد وقفت بينهم : اعوذ بالله يمحمد تعوذ من ابليس وش فيك يولد
صيته وقفت جنب محمد بتثميل : علامك يمحمد على المره وش فيه ؟
،
في هاذي الاثناء دخل مازن صاحب الـ6 سنوات الي غرفة مزون وهو يلعب مع خواته الصغار وهن جنب بعضهم لكن كانت بنت صيته عليها بطانيه باللون الحليبي واللي كانت لـنايف في صغره وكانت عليها من ولادتها ، وبنت مزون كان عليها بطانيه باللون الابيض
اخذ بطانية بنت مزون وحطها على بنت صيته واخذ بطانيه بنت صيته وحطها على بنت مزون وسحب بنت مزون لحد عتبت الباب لاحظته ام خالد وتقدمت لـعنده اخذتها وهي ترفعها لعندها وهي تكلم مازن : يولد علامك يشين على اختك يوه الله يصلحك
وراحت فيها لـ عند غرفة صيته وهي تنزلها على منام صيته وطلعت تشوف وش الحاصل بين مزون ومحمد اللي ارتفعت اصواتهم
مزون : بطلع يمحمد لكن بنتي معي مابخليها لك ولسواد وجهك
محمد : بقلعتك انتي وياها يلا فارقي فارقي
تقدمت مزون لغرفتها وهي ترتب اغراضها بس بنتها مالها صوت هالمره ، صيته ومحمد توجهو لغرفه صيته ومن دخلو الغرفه حتى سمعو صوت صراخ دوئ البيت كامل حتى ام خالد اللي كانت طالعه من الباب رجعت تركض على الصراخ اللي سمعته دخلت تركض لـ صوب صوت الصراخ وطلع محمد وصيته يركضون لغرفه مزون اللي طلع منها الصوت ، مزون وهي ترتب اغراضها انحنت لبنتها وهي تتحاول تصحييها تضنها نايمه رفعتها حتى انصدمت ان جسمها بادر مره هزتها مره مرتين ثلاث الا مافيه اي رد حطت إصبعها جنب انفها تتحسس اذا فيه نفس او لا وصرخت بصدمه من عرفت ان بنتها ماتتنفس
مزون وهي تبكي : يماااااهه ييــمــه بنتييي بنتييي !!
دخل محمد وصيته وراه واجتعموا الصغار قدام باب الغرفه منصدمين
محمد : علامك يمره وش ذا الصراخ ؟
مزون وهي تبكي : تكفى يمحمد تكفى بنتي بنتيي
دخلت ام خالد تركض حتى وصلت لـ غرفه مزون اخذت منها البنت وحاولت تشوف وش فيها حاولت تصحيها مافيه فايده لفتها يمين يسار ووضح لام خالد ان الطفله فارقت الحياه لفت على مزون اللي وجهها احمر من قوت البكاء نزلت راسها والبنت بحضنها : لاحول ولاقوة الا بالله العظيم عظم الله اجركم لا إله الا الله
مزون طاحت بالارض وبصدمها خلت ملامح وجهها تتقلب صرخت صرخه وهي تنفي اللي سمعته حطت يدينها على اذونها وهي تحرك راسها يمين ويسار : لا لا لا لا مستحيل مستحيل اللي تقولينه مستحيل بنتي بنتي مافيها شي مافيها شي !!
انصدم محمد من اللي سمعه وصيته انصدمت تماما طلعت واخذت عيالها معاها ، انحنت ام خالد لـ عند مزون رمزون اخذت البنت من يدين ام خالد ومسحت على وجهها جلست تقرا عليها ايات من القرآن الكريم قالت بصوت مليان رجفه : لا..لـ..لالا بنتي حبيبتي ماماتت انتم تكذبون علي!
مسحت على وجهه بنتها وهي تكرر : بسم الله عليك يمي انتي نايمه صح يمه يلا يمه قومي قومي شوفيني فتحي عيونك يلا يمه يلا باقي بسوي لك تمايم وباقي ماعطيتك اسم يحمل هالزين والجمال قومي يمه يلا قومي
ضمتها لـ صدرها وهي تهتز فيها صرخت مره ثانيه بنتي : ماماتت ماماتت بنتي عوضي عن اللي مريت فيه بنتي ماتتركني !!
مسكتها ام خالد وهي تهز راسها : لاحول ولا قوة الا بالله الله المستعان يمزون تعوذي من ابليس يمه تعوذي من ابليس
طلع محمد من عندها وبعد ساعات بسيطه جت تركض مزن لاختها وهي تبكي وضمت اختها لـ صدرها وهي تبكي مزون : راح ابوي وراحت بنتي وراها يمزن حتى ماسمتيها ! حتى ما حضنتها بالقدر الكافي راحت وهي غير عن كل طفل جت على ثمان شهور حتى ببطني ماجلست مثل اخوانها ومثل الاطفال الطبيعييين ثامن شهور ! اسبوعين بس اللي عاشتهم معي كانت هاديه ماتبكي كثير عكس كل طفل صوت بكاهم يجيب الغادي الا بنتي !!
كانت مزون تضرب بيدها على صدرها اردفت وهي تبكي : الا بنتييي الا بنتييي يـ مزن ماتصيح ماتبكي ما كانت مزعجه الا بنتييي الا هي حتى بروحتها كانت هاديه ماصاحت ولا حاولت تبين شي من اللي يوجها
وكملت تبكي وتضرب صدرها مزن كانت تبكي وتضمها لـ صدرها
بعده ايام العزاء طلعت مزون من بيت محمد لبيت ابوها
،
نرجع لواقعنا عند مزون وشجاع
اردفت له وهي تبكي تضرب على صدرها : يمه يشجاع وشلون ماتبيني ابكي عليها وهي حتى ماعاشت معي مثل الاطفال الباقين ؟ جتني بعز حاجتني للفرحه بعز فقدي بعز اشتياقي زرعت فيني الف شعور وراحت راحت يشجاع راحت للي احسن مني
شجاع وعيونه مليانه دموع كل ذا مرت فيه امه بدون لا يدري؟ كل ذا صار على امه بدون لا يحس ؟ امه اللي كانت تبكي على بنتها كل ليله ماحس فيها ؟ ضمن امه لـ صدره وهو يمسح على راسها ويقرا عليها لـ حد ماهدت مزون وقفت وقف معها شجاع اردفت تقول : بروح اغسل وجهي خواتك الحين يرجعون من مزن واخاف يشوفني بالحاله ذي ويرتاعون طلعت من الغرفه وتبعها شجاع حتى وصلت لدوره المياه -اعزكم الله - مسح على وجهه وهو حزين وجدا وجدا على امه واللي صابها
-
عند ديره الوادي تحديد بيت ابو ساير - محمد النهار - الساعه الـ9:30 مساء طلعو من بعد ما حلف عليهم محمد يتعشون عنده
عايله الشيخ نافع كلهم طلعو متوجهين لبيتهم النوم يطلبهم والتعب واصل حده ، عند محمد وصيته بعد مابلغها ان اهل الشيخ ناوي القرب كانت الابتسامه شاقه وجهها حتى اختفت تمام من قال محمد : الشيخ طالب أثـار مني وانا عطيته
عقدت حواجبها صيته وبسرعه : لا لا أثـار صغيره مره ماتنفع للزواج البنت صـ..
قاطعها محمد بحده : انا عطيت الرجال كلمه وحده وماتنرد يمرّه
صيته تحاول فيه يغير رايه : سلامات البنت صغيره يبو ساير مره صغيره ماينفع زوجهم هيًا ولا مها كبار وعلى وجهه زواج ؟
نايف ووجهه احمر من عصبيته : يبه أثـار صغيره حيل البنيه مو وجهه زواج ولا وجهه مسوؤليه
صيته ابتسمت : ايوالله صغيرة يبو ساير
محمد عصب بالحيل وحذف الفنجال من يده وضرب بالباب وتكسر لأجزاء صغيره حيل فزت ام ساير بخوف وهي تناظر بصدمه اردف محمد وهو يوقف بغضب : انا ولد ابوي ولده هاذا الباقي عاد انت وامك تمشوني على كيفكم ؟ انا ابوها وانا ادرى بمصلحتها وغصب عليك انت وامك وعليها هي بعد انا عطيت الرجال وانا ماترجع كلمتي يعيل الامس تبي تنزل راسي بين الرجال انا ولد ابوي صدق !
وطلع متوجهه للصاله وبكل صوت جمهوري نادا على أثـار
اللي كانت تسمع كل اللي حصل وعرفت انو خلاص ابوها معصب وخافت على نايف لا يصير له شي من سمعت صوت القزاز يملى المكان طلعت من المطبخ ووقف قدامها ابوها وهي يلهث من شدة عصبيته وقعاله بيده وشماغه على كتفه ، طلع وراه نايف وهو معصب اكثر من ابوه وقف جنب ابوه وأثـار وهو يردف يقول بصوت عالي : يبه وش معنى أثـار ليه هي بالذات سلامات البنت صغيره والله والله لو ماتبيه أثـار ماتاخذه لو على جثتي لو على موتي تـ
قاطعه كف قوي من محمد ترك وجهه يلف للجهه الثانيه بقوه فزت أثـار من قوة الكف اللي جاء بوجهه اخوها نايف انصدمت وخافت عليه كثير ،
مسكه محمد من ياقة ثوبه وعيونه تطاير شرار من كثر الغضب : يعيل الامس ناسي من انا هاه ناسي اني ابوك يـ **** ؟
نايف يحاول يبعد يد ابوه عنه : ابوي على عيني وتاج على راسي لكن يبه أثـار ماتتزوج غصب عليها ماتزوجها يبه
تركه محمد وهي يتقدم لـ صوب أثـار ادرف : اسمعي وانا ابوك الشيخ نافع جاي طالب القرب مني وطلب يدك انتي من بد البنات وانا عطيته وش قولك ؟
أثـار بخوف قالت بينها وبين نفسها : والله مابيه ولا ودي اتزوج بس بس خايفه على نايف يسوي شي ياربي دخيلك !!
فزت على صوت ابوها وهو يعتلي المكان : اخلصي يبنت وش قولك ؟
توترت بالحيل وهي واقفه وسط البيت وعلى يسارها نايف وقدامها ابوها ووراء ابوها صيته ووراها مها وهيًا مازن وساير بالحوش واقفين على بعد مسافه بسيطه منهم قدامهم أثـار وابوهم وهم على يمينها مسكت يدينها ببعض وكانت تفركها وتفكر وش تسوي قطع الصمت والهدوء صوت مها : يبه عطها وقت تفكر وتستخير ؟
محمد بحده : اسكتي انتي محد تكلم معاك
هيًا بسخريه : الحين الناس كلها تتكلم وانتي ساكته يست الحسن والدلال اخلصي علمي ابوي وش ودك فيه ؟
نايف عصب : اسمعي زين يـ أثار والله لو على موتي لو ماتبين الزواج علميني وانا اخوك والله لو على موتي لو يذبحني ابوي بـ ارضي ماخليك تنجبرين على شي ماودك به
لف محمد صوب نايف وصفقه كف مره ثانيه ومسك ياقة نايف جو ساير ومازن وصيته يحاولون يفكون نايف من يدين ابوه لفت أثـار على صوت صيته الصاخب : الله ياخذك ولدي بيروح فيها وافقي حسبي الله عليك من بنت مادري وش لاقين فيك يختارونك من بد خواتك
مها بحده : يمه سلامات وش ذا الكلام ؟
هيا بسخريه : عاجبك الحين وضع نايف وهو بين يدين ابوي شكل بدال العرس والرقص بيصير عزاء
شهقت أثـار وهي تشوف العيال يحاولون يفكون نايف من بين يدين محمد اللي كان مستسلم له كونه ابوه ولا يقدر يسوي شي له
قاطع صوت الصراخ والهوشه صوت أثـار اللي وقع على مسامع الكل وصدمهم جميع : يبه خلاص انا موافقه الراي رايك والشور شورك والبنت ماترد شور ابوها واللي تبيه بس تكفى اترك نايف
تقدمت وهي تبعد يدين محمد عن عنق نايف اللي تغير لونه للبنفسجي مايل للاحمرار بعدته عنهم وهي ترتب لبس نايف اللي كان مصدوم ويحاول يتنفس بصعوبه اردف بنفس مقطوع : لا توافقين وانتي ماودك لا ...
كح بنص كلامه تنحنح ثم رجع يُكمل .. انا معاك وانا سندك وانا ظهرك لا تخافيين والله مايلحقك من جور الليالي شي وانا اخوك لا توافقين واعلى ما بخيلهم يركبونه لا الشيخ ولا عياله ولا حتى ابوي الله يطول بعمره
لفت صوبه أثـار وعيونها مليانه دموع تشوف حالته وتعرف فيه انه يقدر يواجهه كل شي لجلها حتى لو يواجه قبيله لجلها يكفي انه ساكت عن ضلم امه لها وصابر على شان انها امه وبس
تنحنح محمد وهو ينزل شماغه من كتفه ويتجه صوب الغرفه : عشتي بنتي اي البنت السنعه ماترد كلمه ابوها وسط الرجال اجل على خير ان شاءالله باكر اعلم الشيخ ونشوف متى يبوي الملكه والعرس يلا انا بنام والكل ينام لا اسمع صوت سامعيني تقدم ودخل الغرفه وسكر الباب وراه اردف يكلم نفسه وهو مستلقي على الفراش
: والله لا اكسر خشمكم يرجال ديره المعازف بس اصبور علي هين هين
-
على مشارف الساعه 12:20 صباحا
الكل نايم الا مازن مها ونايف وأثـار اللي كانو ورا البيت بالحوش الخلفي حاطين قهوه وشاهي بنعناع مسويته أثـار لهم وكان هذا موعدهم كل ليله كذا
تنهدت مها وهي تنزل كاستها : أثـار صدق موافقه انتي ولا؟
ناظرت أثـار لوجهها ثم ناظرت بعيون نايف ومازن : مها سلامات وش ذا السوال قدام العيال شرايك لو مابي ماوافقت وانا اعرف ان مازن ونايف بظهري ؟
مازن وهو يطق صدره : تحزمي يحبيبة قلبي تحزمي والله لك اللي يرضيك والله لو أوقف دونك
ضحكت مها : يعيل اجلس بس قبل شوي بغيت تموت من الخوف
ضحك مازن : يقلبي انتي هاذا الوالد القائد محمد النّهار تبين اوقف بوجهه وهو معصب؟ اخسي الا اخسي
ضحكت أثـار وضحكو على ضحكتها انشرحت صدورهم من مازن اللي دايما يطلعهم من جو الكأبه ونايف اللي كان متكي على جدار الحوش وبيده كاست شاهي مايل للون الاحمر وعلى ضوء القمر تنحنح وهو يقول :
سود الليالي هينه لا تحاتين
اذا على سود الليالي عوافي
يـخوفك درب الشقئ؟ لا تخافين
لاصرت انا ماني بموجود..خافي
علئ هواك وسوي اللي تسوين
انا بوجه الضيم وانتي خلافي
ايه اضحكي والحزن خليه بعدين
خليه لاصار المواصل تجافي ...
صفقو له مها ومازن وهم يضحكون مازن : يرجال والله يجي منك كفو
مها بابتسامه : والله طلعت شاعر ؟
نايف بابتسامه : ماني بشاعر لراعيها
أثـار ناظرت فيه وهي تحس ان عوضها الله بالثلاث اللي قدامها عن كل شي حصل لها حمدت الله عليهم بعد نص ساعه قامو للداخل الكل بينام بعد يوم طويل ومتعب جدا
━━━━━━━━━━━━━━━━━━━━━━━━━━
🌸 هل أعجبتك أحداث القصة؟
💡 لمعرفة تفاصيل هذه الرواية ومتابعة بقية فصولها كاملة وبشكل مسبق وبدون إعلانات:
🔗 تابع القراءة عبر موقعنا الرسمي من هنا: https://kimostories.site/novel/433/يا-ركود-الغيم،-ويا-أثار-المطر-قصرك-سكن-وقلبي-ديره
نتشرف بوجودكم دائماً في عائلة كيمو ستوريز! 🌸
━━━━━━━━━━━━━━━━━━━━━━━━━━